Најдобриот македонски тенисер Калин Ивановски полека, но сигурно се враќа на вистинскиот пат по долгата пауза предизвикана од повреда и операција, а неговите настапи во Дејвис купот покажаа дека повторно е подготвен да биде лидер на македонскиот тенис.

Ивановски беше еден од најзаслужните за пласманот на Македонија во Втората Светска група, откако забележа четири победи во исто толку натпревари во поединечна конкуренција. Македонскиот ас ги совлада противниците од Молдавија, Косово, Грузија и Црна Гора, потврдувајќи дека постепено ја враќа препознатливата форма.

Овие мечеви беа негови први официјални настапи по минатиот август, кога одлучи да ја прекине сезоната и целосно да се посвети на решавање на здравствените проблеми и рехабилитацијата по операцијата.

Колку сериозно пристапува кон своето враќање покажува и фактот што во изминатиот период тренираше со еден од најголемите тенисери во историјата – Новак Ѓоковиќ. За Ивановски ова не е прво заедничко искуство со српската легенда, која во минатото јавно истакна дека би прифатила да одигра егзибициски натпревар со македонскиот тенисер, и тоа во Охрид.

Добрата игра во националниот дрес, заедно со работата со Ѓоковиќ, се јасен сигнал дека Калин Ивановски е подготвен за ново поглавје во својата кариера и враќање на турнирската сцена.

The post ЃОКОВИЌ МУ ПОМОГНА НА КАЛИН ДА СЕ ВРАТИ Македонската тениска надеж повторно блеска по долгата пауза appeared first on plusinfo.mk.

Најдобрата македонска тенисерка Лина Ѓорческа ќе настапи во квалификациите на уште еден Грен слем турнир оваа сезона, откако обезбеди место во претквалификацискиот дел на Ролан Гарос.

Таа ќе се обиде преку квалификациите да избори пласман во главниот турнир на престижниот настан на земјена подлога, кој важи за еден од најголемите во светот на тенисот.

Се очекува во наредните денови да биде извршена ждрепката за првото квалификациско коло, по што ќе биде познато и името на нејзината противничка на стартот од настапот во Париз.

Ова ќе биде уште една можност за Ѓорческа да се докаже на највисоко ниво и да се избори за место меѓу најдобрите тенисерки во светот.

The post ЃОРЧЕСКА НА ЧЕКОР ДО ГЛАВЕН ТУРНИР Македонската тенисерка ќе игра квалификации на Ролан Гарос appeared first on plusinfo.mk.