Вицепремиерот и министер за транспорт Александар Николоски ги повика македонските превозници да не наседнуваат на, како што рече, лажни информации поврзани со ограничувањето на престојот на професионалните возачи во Шенген-зоната.

Николоски во гостувањето во емисијата „Вести плус“ на ТВ Канал 5 рече дека неодамнешните информации за наводен состанок во Брисел на кој се разговарало за превозниците од Западен Балкан не се точни.

– Пред два дена во Брисел немаше никаков состанок, туку вообичаена редовна прес-конференција на која новинарите можат да постават какво било прашање, па и за превозниците од Западен Балкан. Би ги замолил превозниците да не потпаѓаат под влијание од една соседна држава во која сега ќе има избори. Токму од таму дојде информацијата дека на 1 септември во Брисел имало некаков состанок. Тоа е лажна вест – рече Николоски.

Тој посочи дека значаен чекор во решавањето на проблемот со престојот на македонските професионални возачи во Шенген-зоната бил направен во февруари годинава.

Според него, Европската комисија тогаш ги препознала возачите на камиони, автобуси и други превозни средства како професионалци, со што им се отворила можноста да аплицираат за долгорочни визи.

– Се работи за доста сериозен проблем што го имаат македонските превозници и ние целосно го разбираме и им даваме сериозна поддршка. Мислам дека најголемиот напредок се случи во февруари, кога Европската комисија реши да ја промени својата визна стратегија и да ги препознае возачите на камиони, автобуси и други превозни средства како професионалци – рече Николоски.

Тој објасни дека токму тоа овозможува возачите да добијат долгорочни визи и да не бидат ограничени со правилото за престој од најмногу 90 дена во период од 180 дена, кое важи за граѓаните на земји што не се дел од Шенген-зоната.

Николоски посочи дека македонските возачи веќе можат да аплицираат за вакви визи во Хрватска и Швајцарија.

– Многу е значајно што тие визи важат за целата Шенген-зона, односно не се однесуваат само на државата што ги издала, туку на целата Шенген-зона. Ова е решение што можеме да го користиме. Секако, би било подобро и полесно доколку ЕУ ги промени правилата. Ние цело време го бараме тоа, но тоа не зависи од нас, туку од ЕУ – нагласи Николоски.

Тој додаде дека целта е со долгорочни визи да бидат опфатени и други држави во кои најчесто работат македонските превозници.

Сепак, според него, и визите што во моментов ги издаваат Хрватска и Швајцарија се доволни за возачите да можат непречено да се движат низ Шенген-зоната.

– Кога ќе се влезе во Шенген-зоната, нема ограничување во движењето. Доколку некој има долгорочна виза, треба само да ја покаже и нема да има проблем со престојот – појасни Николоски.

The post ПРЕВОЗНИЦИТЕ ДА НЕ НАСЕДНУВААТ НА ЛАЖНИТЕ ВЕСТИ Николоски откри како можат да го избегнат правилото 90/180 appeared first on plusinfo.mk.

Владата и Министерството за транспорт продолжуваат да бараат решенија за проблемите со кои се соочуваат македонските превозници по воведувањето на системот „ЕЕС“ (Entry/Exit System) во Европската Унија, изјави денеска вицепремиерот и министер за транспорт Александар Николоски.

Одговарајќи на новинарско прашање за најавите на дел од превозниците дека би можеле да организираат протести доколку до 1 септември не се најде решение, Николоски рече дека Владата има редовна комуникација со превозничките здруженија и дека се бараат конкретни решенија преку билатерална соработка со земјите од Шенген-зоната.

– Имаме редовни средби, ако не еднаш неделно, тогаш на две недели. Имаме одлична соработка. Ова прашање е едно од стотиците прашања што ги решаваме. Во однос на проблемот што настана со воведувањето на „Ентри/Егзит“ системот на Европската Унија, ние го правиме нашиот максимум и превозниците имаат целосна поддршка – истакна Николоски.

Тој посочи дека прашањето е во надлежност на Европската Унија и Шенген-зоната, но додаде дека државата презема чекори за надминување на последиците преку склучување билатерални договори со одделни земји.

Николоски информираше дека Македонија веќе има такви договори со Хрватска, Швајцарија и Романија, додека интензивно се работи на договори со Австрија, Унгарија и Германија.

– Очекувам во текот на октомври да започнеме разговори и со Словенија и на тој начин да бидат покриени земјите каде што нашите превозници најчесто работат или транзитираат – рече Николоски.

Во однос на најавените протести, министерот нагласи дека не ги смета за најдобро решение.

– Мислам дека е поконструктивно да наоѓаме решенија и не мислам дека протестите се решение. Секако, тие се крајна форма, но ние во изминатиот период наоѓаме решенија и ќе продолжиме да ги наоѓаме – нагласи Николоски.

Тој додаде дека има впечаток оти зад дел од притисоците поврзани со ова прашање стојат и политички мотиви од соседството.

– Она што го добив како чувство е дека една соседна држава врши притисок за ова прашање, пред сè, од политички причини. Нека си ги решаваат своите проблеми. Ние имаме индивидуален пристап и ќе ги решаваме проблемите онака како што мислиме дека е најдобро – рече министерот.

Николоски истакна дека не се согласува со пристапот проблемите на државите од регионот да се третираат колективно, под етикетата „Западен Балкан“, нагласувајќи дека Македонија треба самостојно да ги застапува своите интереси.

– Не смееме да паѓаме во замката на колективизација на проблемите. Долго време има обид целиот регион да биде претставен како едно. Ние славиме 35 години независност за некоја недела и враќањето назад би било најлошото нешто што може да ѝ се случи на државата – нагласи Николоски.

The post ПРОБЛЕМОТ НА ПРЕВОЗНИЦИТЕ ЌЕ СЕ РЕШАВА СО БИЛАТЕРАЛНИ ДОГОВОРИ Владата бара решение за ЕЕС и поддршка за камионџиите appeared first on plusinfo.mk.

Македонските превозници вечерва во 20 часот ќе се повлечат од блокадите на товарниот дел од граничните премини, одлучи попладнево на состанок Асоцијацијата Макам-транс, откако Европската комисија донесе одлука за носење нова стратегија за визи која ќе значи решавање на проблемот со кој се соочија професионалните возачи, за престојот од 90 во 180 дена во шенген-зоната.

Со тоа, по речиси четиридневен застој ќе се нормализира товарниот сообраќај на премините „Деве Баир“, „Делчево“, „Ново Село“, „Дојран“, „Богородица“, „Меџитлија“, „Ќафасан“, „Блаце“, „Блато“ и „Стење“ за влез и излез од државата.

„Макам-транс“ во објава на Фејсбук наведе дека се повлекуваат од блокадите, бидејќи со одлуката на ЕУ е добиена потврдата која ја очекувале за промени и се заблагодари на сите кои неуморно во изминатите денови ја дадоа својата поддршка и солидарност со блокадата на граничните премини.

– Вашето заедништво и истрајност дадоа резултати. Согласно официјалното известување од министерот за транспорт Александар Николоски, Европска комисија донесе одлука да донесе нова стратегија за визи која ќе значи решавање на проблемот со кои се соочија професионалните возачи, за престојот 90 во 180 дена. Бидејќи е добиена потврдата која ја очекувавме за промени, ве информираме дека протестот кој беше организиран од страна на Асоцијација Макам-транс на граничните премини ќе биде прекинат од вечерва, 29.1.2026 година од 20 часот за влез и излез од државата. Особено сме благодарни до сите медиумски куќи, портали кои нашата борба ја направија видлива за цела Европа. Заедно сме посилни“ велат од „Макам-транс“.

Транспортерите од Македонија, Србија, Црна Гора и од Босна и Херцеговина ја почнаа блокадата на почетокот на неделава со барање да бидат изземени од новиот систем за контрола на влез и излез во ЕУ, поради кој се соочуваат со економски штети и со депортации.

Претходно, вицепремиерот и министер за транспорт Александар Николоски објави дека Брисел ќе донесе нова стратегија за визи, која ќе значи решавање на проблемот на превозниците што веќе 4 дена ги блокираат граничните премини кон шенген-зоната.

„Само што добив одлични вести од Брисел во врска со огромниот проблем на превозниците од Македонија! Нашите ставови се прифатени. Возачите се прифатени како професионалци. Тоа е она што го баравме. По протестите и силната офанзива изминатиот период, Брисел ќе донесе нова стратегија за визи, која ќе значи решавање на проблемот со кој се соочија професионалните возачи“ објави Николоски на Фејсбук.

Извршната потпретседателка на Европската комисија за технолошки суверенитет, безбедност и демократија, Хена Виркунен, при презентацијата на стратегијата за визи на ЕУ и на европската стратегија за управување со азил и миграција, усвоени на денешната седница на Колеџот на комесарите, рече дека со стратегијата предлагаат да разгледаат поголема флексибилност за превозниците, како што рече, секако без да се загрози безбедноста, а во исто време и да не се променат правилата, дури кога станува збор и за безвизно патување.

Таа потенцира дека кога станува збор за прекугранични работници, кои секојдневно ја минуваат границата на ист премин, има исклучоци и флексибилност, но тоа не важи за некои други професии, каде што исто така, се идентификувани предизвици, како што се возачите на камиони, спортистите и уметниците.

– Но, ние го разгледуваме тоа и во оваа стратегија за визи сега се осврнуваме на овој проблем – додаде Виркунен, без да наведе конкретни мерки.

Таа нагласи дека со новиот систем за влез и излез (ЕЕС) не се воведени никакви нови правила кога станува збор за должината за краток престој во шенген-зоната без визи, и натаму останува можноста за престој до најмногу 90 денови во период од 180 денови.

Транспортерите од Србија и од Босна и Херцеговина соопштија дека не се повлекуваат од блокадите.

The post ЗАВРШУВА БЛОКАДАТА НА ГРАНИЧНИТЕ ПРЕМИНИ Македонските превозници се повлекуваат откако ЕК најави нова стратегија за визи appeared first on plusinfo.mk.

Министерот за надворешни работи и надворешна трговија Тимчо Муцунски вели дека со Европската унија активно се комуницира за решение за мерките што се најавени за нашите превозници како и за тарифите за извоз за челичната индустрија. Притоа, како што вели, се укажува, дека во случај на нивна примена ќе платиме цена која ќе биде четири до шест пати повисока од средствата што би ги добиле од Планот за раст.

Муцунски во гостување на ТВ Сител вечерва рече дека се надева на некаков исход бидејќи од ЕУ било укажано дека се свесна оти има проблем и дека се работи на изнаоѓање решение.

Според Муцунски, ако се искрени намерите за интеграција на регионот ЕУ нема да дозволи да се применат мерки кои толку негативно ќе влијаат економски.

– Не е само проблемот со превозниците, имаме уште еден предизвик – потенцијалната примена на тарифи од ЕУ кон земјите од регионот за извоз на челик. Ова не се применува само кон нас туку кон сите земји кандидати и земји од регионот на Западен Балкан. Од септември активно комуницираме и по однос на овие две клучни прашања со Европската унија. Меѓу другото ѝ кажуваме на ЕУ, дека, со максимална почит кон Планот за раст, што го сметам за многу позитивен и многу значаен, доколку се примени оваа мерка кон нашите превозниици и доколку се примени мерката за тарифите врз челичната индустрија ние ќе платиме цена која ќе биде четири до шест пати повисока од средствата што би ги добиле од Планот за раст. Истатата ЕУ којашто се жали на непринципиелни тарифи, одлучи да не стави не само нас туку цел регион, Србија, Црна Гора, Албанија, БиХ и Косово во група на тарифи со Русија, Белорусија, Северна Кореја, Кипар, и ние со месеци кажуваме на високите претставници дека мора да се најде решение – рече Муцунски.

Тој вели дека тоа прашање е отворано неколку пати на највисоко ниво, како што било случај уште при посетата на претседтелката на ЕК Урсула фон дер Лајен од страна на премиерот Христијан Мицкоски.

– Како земји сме информирани дека ЕУ е свесна дека има проблем и оти работи на изнаоѓање решение. Тоа што не сме задоволни е брзината со која се работи за изнаоѓање на тоа решение но наше е да дискутираме, да апелираме и да нудиме конкретни решенија и по однос на двете прашања и да бидеме унифицирани во ставот како регион. Се надеваме на некој осход. Доколку Европската унија е искрена во намерите за интеграција на регионот секако на краток, среден и долг рок нема да дозволи да примени мерки кои толку негативно ќе влијаат економски врз целиот регион – рече Муцунски.

The post AKO E ЕУ ИСКРЕНА, НЕМА ДА ПРИМЕНИ НЕГАТИВНИ МЕРКИ КОН БАЛКАНОТ Освен превозниците, проблем се и тарифите за челик appeared first on plusinfo.mk.