Не е тешко да се заклучи што сака да постигне Венко Филипче со неговата гласност за внесување на Бугари во Уставот, со оглед на тоа што СДСМ секогаш се движи по истата траекторија на национални отстапки, соопшти ВМРО-ДПМНЕ.

„Последните уставни измени кои се случија беа за промена на името на државата, за што заслужен беше менторот на Филипче, Зоран Заев. СДСМ дојде на власт со изгубени избори, со лажни ветувања за европска иднина, а сега Филипче повторно се обидува да ја продаде истата приказна. СДСМ ја доведе Македонија да биде блокирана на патот кон ЕУ, затоа што на никој од СДСМ, ниту од претходниот состав на Заев, ниту од овој не толку нов состав на Филипче, не му се приоритет националните интереси, ниту македонскиот идентитет“, соопшти ВМРО-ДПМНЕ.

Филипче сега се обидува да го наметне истото сценарио со Бугарија, се додава во соопштението.

„Со месеци се додворуваше на Бугарија, на Румен Радев, па даваше изјави во јавноста усогласени со бугарското МНР, се нудеше за некако да се продаде кај нив, затоа што од македонските граѓани доби јасни пораки на неколку последователни избори и знае дека народот нема да го гласа“, сеоопшти ВМРО-ДПМНЕ.

Ставовите на официјална Софија се дека македонскиот јазик е дијалект на бугарскиот, дека Македонците и Бугарите се ист народ во две држави и дека македонските револуционери се Бугари, потенцира партијата.

„Филипче на чело на СДСМ е подготвен да ја редефинира македонската историја, затоа што сонува за премиерска фотелја. По примерот на Заев, Филипче исто така кажува дека е подготвен на нова национална отстапка што ќе му ја овозможи оваа фотелја. Вели дека ако било до него веднаш би ги вметнал Бугарите во Уставот, без понатамошни гаранции. Оттука, може да се заклучи дека Филипче ги следи комплетно истите чекори на Заев. Вели дека македонскиот идентитет не бил загрозен што комплетно се коси со ултиматумите кои Бугарија и ги наметнува на Македонија при евроинтегративниот процес. Филипче би избрал да служи на туѓи држави, да исполнува туѓи агенди, а очигледно и највисокото раководство на СДСМ се усогласува со ова, со оглед на тоа што лица од ИО на СДСМ постојано се во комуникација со контроверзни лица и лица кои за цел имаат да шират бугарска пропаганда во Македонија“, предупредува ВМРО-ДПМНЕ.

Но, ова нема да помине, категорична е партијата.

„Филипче и СДСМ ги потценуваат граѓаните. Граѓаните нема да дозволат уште еден Заев да ѝ се случи на Македонија, нема да дозволат уште една национална отстапка, нема да дозволат понатамошно обезличување на Македонија, пазарење со националните интереси и редефинирање на македонската историја. Народот сака предвидлив евроинтегративен пат, со јасни црвени линии, а не лик кој се однесува како специјален бугарски пратеник на Бугарија во Македонија и кој застапува антидржавни политики само за да дојде на власт и по претходен пример да ја испразни државната каса“, соопшти ВМРО-ДПМНЕ.

The post ФИЛИПЧЕ БИ ГО ПРОДАЛ МАКЕДОНСКИОТ ИДЕНТИТЕТ ЗА ДА СТАНЕ ПРЕМИЕР, ИСТО КАКО ЗАЕВ Избира да служи на туѓи држави и да исполнува туѓи агенди appeared first on plusinfo.mk.

Нашиот став е јасен и непроменет и нема цена која што може мене како претседател на Владата да ме натера да влезам во таква авантура, а во која што нема да има извесен крај, изјави денеска претседателот на Владата Христијан Мицкоски во врска со вчерашната посета на претседателот на Европскиот совет, Антонио Кошта и ставот дека мора да се донесат уставни измени за да почнат преговорите за влез во ЕУ.

Мицкоски беше дециден дека за овие 26 години многу пати ни биле давани ветувања за отстапки, но и дека ставовите кај нашиот сосед во однос на ова прашање се радикализираат. Тој ги повика граѓаните да се обединат околу ставот на Владата по ова прашање.

– Ние со господинот Кошта имаме изградено, навистина би рекол, искрен однос. Тоа не значи дека секогаш се сложуваме. Една од темите за која што не се сложуваме е токму оваа за која што вие денеска зборувате. Нашиот став е јасен и непроменет. Со други зборови еве да го повторам: нема цена која што ќе нѐ натера да влеземе во авантура без притоа да знаеме дека таа авантура ќе има извесен крај. Не постои цена која што може мене како претседател на Владата да ме натера да влезам во таква авантура, а во која што нема да има извесен крај – истакна Мицкоски.

Многу пати во минатото, додаде тој, на граѓаните, но и на политичарите од македонската Влада им беа давани ветувања.

– Беа тапкани по рамо дека уште ова треба да се направи, верувајте ми на зборот, но, за жал, ние се наоѓаме на истото место каде што се наоѓаме пред 26 години. Од информациите коишто јас ги имам и тоа што ми беше соопштено од билатералната средба меѓу министрите за надворешни работи, нашиот и на нашиот источен сосед, мислам дека таму драматично се радикализира состојбата, и не само што ова не е единствениот услов за да влеземе во процесот и тој процес да го изодиме до крај, туку напротив таму работите драматично се радикализираат, а причината за тоа е, нормално, опозицијата кај нас, која што, за жал, не бира средства за да ги урива позициите на Владата кога станува збор за одбрана на македонските национални интереси и претставува меко ткиво на македонскиот национален идентитет – нагласи премиерот Мицкоски.

Тој ја повика македонската јавност да застане и да се обедини околу политиките на Владата кога станува збор за ова прашање бидејќи, како што рече, „колку повеќе сме заедно, обединети, толку повеќе сме силни и дома и надвор“. „А овие коишто се мекото ткиво, додаде, „ќе бидат наскоро поразени и минато на политичката сцена во државата“.

– Но и тоа ќе го издржиме, имаме доволно сила. Ние сме подготвени за сето ова, имаме факти, имаме аргументи, ќе работиме… Ова не е спринт, ова е маратон. Потребна е стратегија, план, визија… Ова се победува со ум. Не се победува со брзање и под притисок – нагласи премиерот Мицкоски на прес-конференција во Владата.

The post НЕМА ЦЕНА ЗА АВАНТУРА БЕЗ ИЗВЕСЕН КРАЈ Мицкоски по средбата со Кошта повика македонската јавност да се обедини околу политиките на Владата appeared first on plusinfo.mk.

Венко Филипче денес се радува што Бугарија потврдила дека уставните измени биле „европско, а не билатерално прашање“, објави пратеникот на ВМРО-ДПМНЕ, Бране Петрушевски.

„Па нормално дека ќе го потврдат тоа! Токму СДСМ дозволи бугарските уцени да станат дел од нашиот преговарачки процес, поради неговата сервилност, неспособност и криминално владеење. Филипче нема ниту морално право, ниту политички кредибилитет да зборува за Европа“, објави Петрушевски на Фејсбук.

Официјална Софија и СДСМ зборуваат со ист речник и со исти тези, додаде тој, а разликата е што Бугарија ги брани своите, а Филипче упорно им штети на македонските национални позиции.

„Со ВМРО-ДПМНЕ Македонија ќе оди кон Европа само исправена, достоинствена и со зачуван идентитет, а не понижена и на колена како што ја остави СДСМ“, порача Петрушевски.

The post БУГАРИЈА ГИ БРАНИ СВОИТЕ, А ФИЛИПЧЕ ИМ ШТЕТИ НА МАКЕДОНСКИТЕ ИНТЕРЕСИ Софија и СДСM зборуваат со ист речник appeared first on plusinfo.mk.

Претседателот на Владата и претседател на ВМРО-ДПМНЕ Христијан Мицкоски вечерва изјави дека по завршувањето на локалните избори во Собранието ќе предложат македонска резолуција која што ќе има за цел да ги штити македонските национални интереси. Мицкоски изнесе повеќе забелешки за предложената резолуција на СДСМ, наведувајќи дека она што му паднало во очи во преамбулата е дека содржи неточни факти и лаги, и дека на ваков начин не се штитат македонските национални интереси.

– И ние како ВМРО-ДПМНЕ, како одговорна државотворна партија ќе направиме една вистинска резолуција. Еве како подлога ќе ја искористиме оваа резолуција и преку собраниските комисии после завршувањето на локалните избори ќе формираме т.н. македонска резолуција која што ќе има за цел да ги штити македонските национални интереси. Нешто што, за жал, за СДСМ видовме дека во минатото не постои, а мене ми е жал што и овој претседател на СДСМ како и неговите двајца претходници продолжува по таа патека – рече Мицкоски.

Премиерот кажа дека имал кратко време да го прочита документот што СДСМ го достави во Собранието и немал време да навлезе во детали, бидејќи за него ќе се дискутира после изборите. Од она што успеал да го види рече дека има доста работи што тие сметаат дека би допринеле во квалитетот на самата резолуција, но она што му паднало во очи а, како што потенцира, „е типично за СДСМ да фалсификува и лаже“ се оние неколку точки кои се во самата преамбула на резолуцијата.

– Да речеме се обидува да се негира еден историски факт и да се каже дека македонскиот јазик бил официјален јазик во Обединетите Нации од 2019 година. Тоа е една монструозна лага, посебно во годината кога славиме 80 години од кодификацијата на македонскиот јазик и неговото примање во ОН како официјален јазик на тогашната југословенска федерација заедно со српскохрватскиот и словенечкиот јазик. Бидејќи денеска целта ни е културата, јас би сакал овој монтруозен фалсификат кој што е дел од оваа резолуција категорички македонската јавност да го отфрли и да го осуди – рече Мицкоски.

Според него, истовремено има неколку други фалсификати, а тоа е дека во 2005 година Северна Македонија не доби датум за почнување на преговори туку Република Македонија, односно тогашната држава која во меѓународниот поредок беше Поранешна Југословенска Република Македонија.

– Исто така и во 2009 година прв позитивен извештај за отпочнување на преговори доби Република Македонија согласно Уставот. Самата конструкција е лажна, но тоа е типично за СДСМ и последно што сега би го искоментирал, а за деталите ќе се вратиме после изборите е конфузијата која што е во самата резолуција. Зборуваме за копенхагеншки критериуми а потоа ги цитираме двата билатерални договори со Грција и со Бугарија. Едно со друго не се комплементарни, така што има многу што да се даде како инпут – рече Мицкоски.

The post РЕЗОЛУЦИЈАТА НА СДСМ СОДРЖИ НЕКОЛКУ НЕТОЧНИ ФАКТИ, ВЕЛИ МИЦКОСКИ По изборите, ВМРО-ДПМНЕ ќе предложи свој текст appeared first on plusinfo.mk.