Почитувани членови на Европскиот парламент,

Повод за моето обраќање е тековната расправа за Извештајот околу напредокот на македонската евроинтеграција и поднесениот амандман на известителот Томас Вајц, со кој се бара мислење од правната служба на Советот на Европската Унија за поврзаноста на вториот протокол од Договорот за пријателство помеѓу Бугарија и Македонија со преговарачката рамка, со оглед на неговата контроверзност и отстапување од критериумите од Копенхаген, преку внесување идентитетски барања за редефинирање на македонскиот народ, јазик и историја како бугарски.

Ви се обраќам како подносителка на уставната иницијатива за поништување на вториот протокол со Бугарија (јули 2025), со намера да Ви обезбедам подиректен увид во содржината и значењето на протоколот, како и причините за неговата неприфатливост, погледнато низ очите на Македонците и македонските граѓани. Ние сме во европската чекална и ова е единствен начин за мене, граѓанка на земја кандидат, да се обратам до Вас, кои решавате за нашата сегашност и иднина.

Уставната иницијатива ја поднесов за да ѝ помогнам на својата земја да го започне и успешно да го заврши процесот на евроинтеграција, по три децении неправедни блокади, вета и условувања од разни страни. Македонските граѓани заслужуваат конечно фер третман и исполнување на дадените ветувања од ЕУ, зашто и по сите разочарувања, неправди и трауми, ги споделуваат европските вредности и се изјаснуваат за ЕУ дури 71% (март 2026). Ова е и моја лична борба, како поранешна политичарка: пратеничка, потпретседателка на македонскиот Парламент, заменик министерка, основачка и претседателка на првата парламентарна зелена партија, подоцна членка на Европските зелени. Речиси две децении бев член на собраниските комисии за надворешни работи, за европски прашања и на Мешовитиот парламентарен комитет за евроинтеграција. Сега се борам како граѓанска активистка за истите вредности во кои верувам.

Протоколот претставува акт од Вториот состанок на Заедничката меѓувладина комисија со Бугарија од 17 јули 2022 година во Софија, потпишан од министрите за надворешни работи на Македонија и на Бугарија, врз основа на членот 12 од Договорот за пријателство, добрососедство и соработка со Бугарија.

Протоколот го сметаме за блокатор на нашата евроинтеграција, зашто на него се реферира во повеќе документи од македонскиот евроинтегративен пакет. Тој содржи такви непринципиелни и небулозни барања, кои е невозможно да ги исполниме, зашто тоа би значело себеукинување како народ и држава со свој идентитет, континуитет и историја.

Протоколот прекршува 14 членови од нашиот Закон за склучување, ратификација и извршување на меѓународни  договори, 2 члена од нашиот Закон за надворешни работи и 3 члена од нашиот Устав. Меѓу прекршените членови од Уставот е и членот 8 за темелните вредности на уставниот поредок, во делот за основните слободи и права на човекот и граѓанинот, слободното изразување на националната припадност и почитувањето на општо прифатените норми на меѓународното право.

Протоколот содржи седум (7) вида правни прекршувања, од кои првите пет (5) се од чисто правничка природа, а две (2) и од политичка природа:

• Прво, не е почитувана процедурата за негово договарање, усвојување од страна на Владата и потпишување – Протоколот е договорен нетранспарентно, во целосна тајност, без информирање и увид на стручната и на пошироката јавност, иако ги засега сите граѓани и државата во целост. Не е испочитувана законската процедура од Законот за склучување, ратификација и извршување на меѓународни  договори (1998). Со вака донесениот протокол, органите на управата самите си презеле нови обврски за државата, спротивно на Уставот и законите.

• Второ, не е ратификуван во македонското Собрание – За да биде важечки еден протокол за спроведување на меѓународен договор, тој треба да помине ратификација во Собранието, преку носење Закон за ратификација на протоколот од соодветниот договор, со разгледување на собраниската Комисија за надворешни работи и на пленарна седница на Собранието.

Споредбено, бугарската собраниска Комисија за надворешни работи го добила текстот на Протоколот и дискутирала за него уште на 23 јуни 2022, а по прекинот на седницата, бугарското собрание на пленарна седница на 24 јуни 2022 го усвоило целиот пакет од Францускиот предлог за почеток на преговорите со Македонија, сосе имплицитно вградениот Протокол. Парадоксално, тој акт е донесен на состанокот на меѓувладината комисија и потпишан од министрите за надворешни работи на двете земји, речиси еден месец подоцна, на 17 јули 2022!

• Трето, не е објавен во „Службен весник“ – Протоколот како официјален документ не е објавен ниту од страна на Владата, ниту од страна на Министерството за надворешни работи, иако е тоа уставна обврска, што го прави неважечки.

• Четврто, нема соодветна форма и содржина – Протоколот е компилација од протокол на меѓународен договор за пријателство и соработка со преамбула; записник од работен состанок на избрани и именувани функционери со извештај за спроведената соработка на теми од повеќе ресорни министерства; и акциски план за идни активности на македонската држава. Содржината, пак, на Протоколот е сосем несоодветна, со наметнување обврски кои водат кон идентитетски инженеринг и денационализација, спротивно на меѓународните и домашните стандарди за меѓудржавно општење.

• Петто, излегува надвор од рамките на правен акт кој обработува еден (1) член од Договор помеѓу две земји – Со својата содржина Протоколот излегува не само надвор од опфатот на подзаконски акт, од опфатот на потпишаниот договор меѓу двете земји, туку и од конвенциите на Обединетите нации за регулирање на меѓународните односи. Подзаконски акт нема правна сила да наметнува измена на преамбулата на Уставот, на целото важечко законодавство, како и на идентитетските обележја на еден народ и држава! Ова е во целосна спротивност со меѓународните принципи за државна сувереност во таквите одлуки.

Протоколот од вториот состанок на Заедничката меѓувладина комисија ги има сите карактеристики на нов договор, а не записник од состанок на таа комисија согласно член 12 од Договорот. Со Протоколот, всушност, се создаваат нови обврски за Македонија, надвор од Договорот за пријателство, добрососедство и соработка.

• Шесто, произведува масивни штетни дејствија врз идентитетски прашања за македонскиот народ, јазик и држава – Протоколот ѝ наметнува на Македонија обврски, чие евентуално исполнување би предизвикало меѓународно правно поништување на македонскиот народ и македонскиот јазик, како и комплетно бришење на нивниот историски континуитет, тргнувајќи од бугарското негирање на сите овие идентитетски одредници за македонскиот народ, јазик и држава. Имено, наметнува еден вид „средновековно духовно владение“ над Македонија, со долг список детални „ингениозни“ мерки за превоспитување и замислена бугаризација на Македонците.

На пример, бара целосна промена на историските наративи, изнудено изнаоѓање „заеднички“ личности и настани за славење, внесување на „новата историја“ во „наставните програми, учебници и релевантни наставни материјали, натписи на споменици, плакети, информативни материјали во музеи и други локации од образовно и културно значење, како и релевантни информации во електронски информативни медиуми во јавна сопственост“.

Се бара строга цензура на сите содржини во медиумите, јавните настапи, дури и приватните изјави на социјални медиуми, како и на „државното финансирање за нови книги, документарни и списанија, филмови и други уметнички дела, културни споменици и прослави“. Обврзува на бугарско одобрување историски и други учебници и лекции во нив, како и на сите објавени материјали, содржини, натписи и др., поврзано со образование, култура и уметност.

Покрај ова, во Протоколот се поставува и „услов првата меѓувладина конференција да се одржи веднаш откако Република Северна Македонија во нејзиниот Устав ќе ги вклучи сите граѓани кои живеат на територијата на земјата кои се дел од бугарскиот народ и ќе го усогласи своето важечко законодавство со измените направени во Уставот“. Вистински преседан е, еден подзаконски акт, па уште и незаконски донесен и правно невалиден, да наметнува измена на преамбулата на Уставот и на целото важечко законодавство. (hic!) Со сево ова, протоколот задира во темелните вредности на нашиот уставен поредок.

• Седмо, претставува непремостлива пречка за нормално функционирање и стратешко меѓународно позиционирање на македонската држава, зашто е вграден во евроинтеграцискиот пакет – Имено, имплицитно вграден во преговарачката рамка за евроинтеграција и експлицитно во два други документа од евроинтеграцискиот пакет. Во Преговарачката рамка за пристапните преговори на Македонија со ЕУ, предложена од страна на Претседателството на Франција со Советот на ЕУ на 30 јуни 2022, на Протоколот се реферира со „годишни прегледи и мерки за ефективна имплементација според Членот 12“. Додека, пак, во пакетот документи на ЕУ поврзани со македонската интеграција, Протоколот се спомнува директно во два (2) документа: во Заклучоците на Советот на ЕУ (18 јули 2022), во делот посветен на регионалната соработка и добрососедските односи, во точката 14, каде се поздравува „договорот за Протоколот од вториот состанок на заедничката меѓувладина комисија(…) Овој важен чекор ќе придонесе кон добрососедските односи и регионалната соработка, кои остануваат главни елементи на процесот на проширување како и на процесот за стабилизација и асоцијација“; и во Изјавата за одржувањето на првата Меѓувладина конференција (19 јули 2022), со истата формулација како и во цитираните Заклучоци.

Следејќи ја хронологијата на настаните поврзани со Протоколот, сметаме дека целата процедура со упатувањето на него во евроинтегративниот пакет за Македонија е хронолошки нелогична, правно неодржлива и крајно деградирачка за нашата земја. Имено, Бугарија и Европската Унија гледале, дискутирале и усвојувале непостоечки документ, додека Македонија била оставена како пасивен набљудувач да го чека нивното одобрување, па дури потоа да го потпише, иако се работи директно за неа и за нејзино идентитетско деградирање.

Сево ова правно ги дисквалификува и Протоколот и упатувањето на него во преговарачката рамка. Од сето погоре изнесено, јасно е дека Протоколот е непремостлива пречка за евроинтеграцијата, со оглед на апсурдноста на обврските и невозможноста тие да бидат исполнети од страна на Македонија како самостојна и суверена држава.

Процедурално гледано, мојата уставна иницијатива за поништување на Протоколот е прифатена за разгледување од Уставниот суд и се очекува јавна расправа и конечна одлука оваа пролет. Но, сега е прилика и Европскиот парламент да одигра клучна улога во одблокирањето на нашата евроинтеграција, заради кредибилноста на самата Европска Унија, стабилноста на регионот и просперитетот на Македонија и нејзините граѓани.

Се поставува правно прашање дали невалидниот Протокол може да се поништи во склад со меѓународното право и каква правна разврска тоа би произвело. Следејќи ја Виенската конвенција за договорното право (1969), членот 53 го овозможува поништувањето во случај кога е во спротивност со императивната норма на општото меѓународно право (jus cogens), како во овој случај (прекршувања 6 и 7). Понатаму, може да се повика на „невозможноста за исполнување на договор“ од членот 61, поради тоа што претставува непремостлива пречка за нормалното функционирање и стратешкото меѓународно позиционирање на македонската држава (прекршување 7). Постапката, пак, за прогласување на договор за ништовен и раскинување на договор, е објаснета во членот 67, додека постапката за корегирање на договор поради грешки во текстот, е објаснета во членот 79.

Важно е да се утврди официјално ништовноста на документот и неговата неодржливост како елемент во преговарачката рамка и во придружните документи. И правно и политички, постојат повеќе начини за разрешница на овој Гордиев јазол, базирани на меѓународното право и европските принципи, кои подразбираат заемно почитување, недискриминација и слобода за самоидентификување.

Останувам отворена за дополнителни разјаснувања, со надеж на логична и правична разврска, што ќе ја деблокира македонската евроинтеграција.

Со почит,

Лилјана Поповска

 Доставено до:

• Комисија за надворешна политика во Европскиот Парламент
• Делегација на Мешовитиот парламентарен комитет ЕУ – Македонија
• Претседателка и Потпретседатели на Европскиот Парламент
• Претседатели на политичките групи
• Правна служба на Советот на Европската Унија
• Специјалниот известувач за евроинтеграцијата на Македонија, Томас Вајц

The post Отворено писмо до Европскиот парламент за македонската евроинтеграција appeared first on plusinfo.mk.

Македонскиот идентитет нема простор повеќе да биде распродаван, а овие мекотелни политичари, кои се дел од мекото ткиво на македонскиот идентитет, јас сум убеден дека по следните парламентарни избори, ќе заминат во историјата и никогаш повеќе нема да ни се повторат – изјави денеска премиерот и претседател на ВМРО-ДПМНЕ, Христијан Мицкоски, коментирајќи ги обвинувањата на опозицискиот СДСМ поврзани со евроинтегративниот процес.

– Начинот на кој СДСМ ги гледа евроинтегративните процеси, а тоа е исклучиво распродавање на македонскиот национален идентитет, удар врз ткивото, тоа се, би рекол, мекотелни политики. Тие се мекотелни политичари, тие се мекото ткиво на македонскиот идентитет и на тој начин ја загрозуваат целата онаа стратегија што ние како Влада ја градиме – рече Мицкоски, кој денеска беше во Гази Баба.

За жал, како што рече, следбенците на живковизмот во Бугарија денеска слават што имаат вакви политичари во Македонија, кои сè уште се активни, како луѓето од опозицискиот СДСМ, кои мислат дека на овој начин ќе привлечат некакво внимание.

– Тие се само обичното меко ткиво на македонскиот идентитет. Сите во светот треба да знаат, и македонските граѓани, дека таа работа без ВМРО-ДПМНЕ не оди и дека таа работа без ВМРО-ДПМНЕ не ја бидува. А ВМРО-ДПМНЕ нема да влезе во каква било авантура сè додека нема јасен крај, прво, и, второ, сè додека не бидат гарантирани човековите права на македонската заедница кај нашиот источен сосед. Нема да се поместиме нити милиметар. Ќе чекаме, ако не ние, ќе го пренесеме тоа на оние што нас ќе нè следат. Ако и тие не успеат, и оние што нив ќе ги следат – рече Мицкоски.

The post ЗАВРШИ ВРЕМЕТО НА МЕКОТЕЛНИТЕ ПОЛИТИЧАРИ ВО МАКЕДОНИЈА Мицкоски вели дека македонскиот идентитет нема повеќе да биде распродаван appeared first on plusinfo.mk.

Намалување на бројот на пратеници во Собранието од 120 на 90, јасна заштита на македонскиот идентитет и продолжување на европскиот пат без отстапки по клучните национални прашања, се дел од ставовите што ги изнесе претседателот на Движењето ЗНАМ за Наша Македонија, Максим Димитриевски, осврнувајќи се на изборните реформи, односите со Бугарија и евроинтегративниот процес на државата.

Говорејќи за изборните реформи, Димитриевски посочи дека ЗНАМ предлага намалување на бројот на пратеници во парламентот, оценувајќи дека ваквата промена ќе придонесе за поефикасно функционирање на законодавниот дом, поголема одговорност на избраните претставници и рационализација на трошоците.

– Не постои рационална причина Македонија да има парламент со 120 пратеници кога и држави со слична големина имаат помал број. Намалувањето ќе значи појасна одговорност и поголема отчетност кон граѓаните – изјави Димитриевски.

Тој нагласи дека со ваквата реформа позицијата на пратеникот треба повторно да добие поголема тежина во политичкиот систем, а парламентот да ја врати својата улога како централна институција на демократијата.

Осврнувајќи се на односите со Бугарија, Димитриевски оцени дека одредени политики од Софија испраќаат загрижувачки сигнали и, како што рече, се во спротивност со европските вредности и принципи.

Според него, прашањата поврзани со идентитетот и правата на Македонците не треба да останат само билатерален проблем, туку треба да бидат разгледани и на европско ниво.

– Недозволиво е во 21 век да се оспоруваат идентитетски прашања и да се создаваат пречки за демократско организирање на луѓето кои се идентификуваат како Македонци – истакна Димитриевски.

Врзано за европската перспектива на државата, тој нагласи дека Македонија останува посветена на европскиот пат, но без компромиси кога станува збор за националниот идентитет и достоинството на државата.

– Македонскиот јазик, идентитет, писмо и култура се автентични и имаат свој историски континуитет. Ние сакаме да бидеме дел од Европа, но без да се откажеме од самите себе.

Тој додаде дека паралелно со евроинтеграциите, државата мора да продолжи со зајакнување на институциите и економскиот развој, посочувајќи дека европските вредности треба да се градат дома преку силни институции, економски напредок и почитување на националниот идентитет.

The post ПАРЛАМЕНТ СО 90 ПРАТЕНИЦИ И ЗАШТИТА НА МАКЕДОНСКИОТ ИДЕНТИТЕТ „Да“ за Европа, но без отстапки, вели Димитриевски appeared first on plusinfo.mk.

Ставот на Владата за уставните измени останува непроменет, истакна вечерва премиерот Христијан Мицкоски во гостување во Дневникот на Македонската радио-телевизија (МРТ). Тој нагласи дека тие нема да се реализираат без јасни гаранции дека процесот на евроинтеграција нема да биде сопрен од нови блокади или билатерални условувања.

– Земјава е подготвена да ги почитува преземените меѓународни обврски, но истото го очекуваме и од соседите и од Европската Унија – рече Мицкоски, посочувајќи дека Бугарија треба да ги почитува конвенциите што ги ратификувала, вклучително и овозможување регистрација на македонската заедница и претставник во Советот за малцински права.

Премиерот објасни дека државата е свесна за обврските преземени од претходната влада и дека тие продолжуваат да се почитуваат.

– Доколку се однесувате вон институциите, ќе бидете изолирани, а прашањето е каква иднина ѝ следува на државата. Колку и да е горчливо, тоа е реалност – додаде Мицкоски.

Тој се осврна и на разговорите со меѓународната заедница, истакнувајќи дека добива уверувања оти ЕУ го признава македонскиот идентитет, но дека овие гаранции мора да се формализираат преку заклучок на Советот на ЕУ.

– Ако навистина го мислите тоа, ве молам, донесете заклучок за да можеме јасно да ги информираме граѓаните, сакаме ли во Европска Унија, а дали имаме гаранции за нашиот јазик и идентитет – рече Мицкоски.

Во однос на можен „нонпејпер“ од еврокомесарката за проширување Марта Кос или нови документи за олеснување на членството, премиерот посочи дека таков документ сè уште не е пристигнат:

– Може Комисијата да даде предлог, но за тоа да функционира, мора да се согласат земјите членки. Процесот зависи од политичката волја на земјите-членки да прифатат нови методологии, како постепена интеграција со заштитни механизми – појасни Мицкоски.

Тој предупреди на внимателност во изјавите, додавајќи дека новите методологии би можеле да вклучуваат ограничувања во користењето на структурните фондови и дека се разгледуваат различни сценарија за обезбедување на интеграцијата.

The post НЕМА УСТАВНИ ИЗМЕНИ БЕЗ ГАРАНЦИИ ЗА ЕВРОИНТЕГРАЦИЈА Премиерот со јасна порака кон Бугарија и кон ЕУ appeared first on plusinfo.mk.

Четвртокот вечер уживав во „Вечерното шоу со Богдан Илиевски“ и во излагањето на секогаш одличниот гостин, професор и академик Стојко Стојков. Иако историјата не е мој фах, уживав, затоа што Стојков е еден од ретките историчари кои гледаат интердисциплинарно: историскиот извор е извор, но секој извор е запишан од човек. Затоа треба да се разгледа контекстот, веројатноста, околностите во кои бил создаден – сè за да се доближи човек до историската вистина.

Силен впечаток ми остави делот за „баба Ката од Сандански“ и разговорот што го водела со извесен Христо Тасев, кој ја прашал:

– Вие бевте Грци или Бугари?

Таа одговорила:

– Ние бевме Бугари, оти сме од село. Но, мојата ќерка некаде од 1920 отиде во Џумаја – и стана Гркиња.

Тасев продолжил:

– Не може да станала Гркиња, бабо, таа си останала Бугарка.

А баба Ката остро возвратила:

– Абе како останала Бугарка? Ти реков – отиде во град! Гркиња стана!

– Ама бабо, тоа не се менува со одење во град…

– Абе ти улав ли си? Како ќе биде Бугарка кога живее во градот? Гркиња е!

Оваа вистинска историска случка, запишана во спомените на Тасев, прво ме насмеа, а потоа ме замисли. И тоа не поради Баба Ката, туку поради една баналност што упорно се слуша во меѓумакедонските препукувања околу идентитети, историја и „чистоти“. Покрај поделбите на леви и десни, радикали и дипломати, христијани, муслимани и атеисти, ние Македонците измисливме уште една: едни се „чисти Словени“, други „чисти Антички Македонци“.

Што мислам јас за ова прашање одамна е кажано во мојата колумна „Сага за народот во бестрага“. А што мисли математиката?

Потекнуваме од милиони прародители. Па ако меѓу сите нив некој навистина верува дека е „чист“ Словен, Грк, Бугарин, Албанец, Влав, Србин…  тогаш тоа е само уште едно „дрн–дрн јарина“.

Конкретно, оваа хеленско–словенска поделба ме замисли подлабоко. Да не речам, ме натера да се навратам на значењето на зборот „Хелен“ во антиката, и тоа токму во корелација со случајот на баба Ката. Имено, голем дел од современиот грчки аргумент против постоењето на Македонците како посебен македонски народ почива на тезата дека „Александар бил Хелен“. Доколку сте историски упатени, сигурно сте читале аргументи за и против оваа теорија.

Јас овде не навлегувам во нив. Наместо тоа, при читањето, налетав на извор кој ретко се цитира, веројатно затоа што не ги спомнува Македонците директно. Околу 380 година п.н.е., во време на растечката моќ на Македонската држава, атинскиот ретор Исократ запишал:

„Името Хелени повеќе не означува етнос, туку воспитување и култура; Хелени се оние кои учествуваат во нашата паидеја, а не само оние кои го делат нашето потекло“.

Клучната фраза е „повеќе не означува“. Тоа значи дека некогаш можеби означувало род, но во неговото време веќе доминирала новата дефиниција – Хелен како културна категорија. Така и се создава историската конфузија: некои извори го користат „Хелен“ како етноним, други како социјално–културна титула, спротивна на „варварин“, кој означувал некултурен, прост, неучен човек. И токму тоа објаснува зошто толку автори на антиката не го врзуваат „хеленскиот“ статус со крв, јазик или генетика. Го објаснува и моментот дека Македонци често и за себе велеле дека се Елини.

Во таа смисла, Александар, кој зборувал јазик недоволно разбирлив за Хелените „по род“, можел да биде сметан за Хелен „по култура“.

И кога ќе ги додадеме аргументите во погоре споменатата колумна „Сага за народот во Бестрага“, нашата денешна поделба на „чисти Словени“ и „антички Македонци“ станува беспредметна. Ние сме континуитет на сите. Врз современата македонска култура и идентитет влијаеле сите. Од кралевите на Македонија во антиката, до луѓето кои ја формирале современата држава. Кој и колку може да ви одреди генетиката, но во денешниот современ свет, повторно е важна културата и самоопределбата. Ако утре сакам да сум Кинез, ќе сум, па макар немал коси очи, и бил генетски од Балканот.

Историјата е сложена, разновидна и човечка. Ние сме резултат на милиони корени, а не на два. А кога човек ќе сфати дека „чисти народи“ постојат само во фантазијата, станува јасно дека најголемиот циркус на Балканот не е хеленско–словенскиот, туку нашата упорност да веруваме во него.

The post Словенско-бугарско-хеленски циркус appeared first on plusinfo.mk.

Местото на оваа мала земја е во Европската Унија, но не по секоја цена, порача денеска премиерот Христијан Мицкоски. Тој го повика Европскиот совет уште на следната седница да испрати заклучок дека никој од нив нема проблем со посебниот македонски идентитет, јазик и култура, а источниот сосед да покаже европска зрелост и да ги почитува пресудите од Меѓународниот суд за човекови права.

– Мораме да испратиме јасна политичка порака – ДА за Европската Унија, НЕ за билатерални услови и ДА за гаранции од страна на Европскиот совет, којшто ако навистина сака да ја види оваа мала земја како дел од Европа, мора да испрати заклучок уште на следниот Европски совет во којшто јасно ќе кажат дека никој од нив нема проблем со посебниот македонски идентитет, со македонскиот јазик кодофициран пред 80 години и со повеќевековната култура и традиција. И да кажат нема повеќе вето и препреки поради билатералните прашања. А, нашиот источен сосед мора да покаже европска зрелост и вистински европски вредности и да го почитува меѓународното право кое вели дека пресудите од Судот за човекови права треба да се спроведат и конечно македонскиот народ во Западна Бугарија да го добие тоа што одамна и припаѓа, а тоа е да успеат да се здружат во заедница, а потоа да номинираат свој претставник во министерскиот совет за малцински права во бугарската Влада. Тоа се црвените линии – истакна Мицкоски.

Осврнувајќи се на патот кон Европската Унија во изминатите години, Мицкоски рече дека отстапките се секогаш на грбот на македонскиот народ и дека патот до полноправно членство во Унијата е полн со нечесни удари и откажувања, но дека немаме друга опција.

Пречката што мора да се премости, како што посочи, е Францускиот предлог прифатен од СДСМ, за која, рече, дека сега прави политички маневр со нејзините црвени линии.

– Нашата огромна пречка на патот кон ЕУ е прашањето со нашиот источен сосед и т.н. Францускиот предлог што претходната влада сама го прифати. Сега тоа е пречката што мора да се премости. Но, да не заборавиме и на едно огромно лицемерие што се гледа во тоа што истите што нè убедуваа дека нема подобар од Францускиот предлог и дека идентитетот се штити, сега се обидуваат преку политички маневар да цртаат црвени линии што треба да нè заштитат од предлогот што самите го прифатија на маса – нагласи Мицкоски.

Според него, граѓаните со право се загрижени околу клучното прашање дали ова е последната отстапка што треба да се направи.

– И денес, кога работите се неправедни и тешки, има такви од опозицијата што заговараат да се откажеме од преговори. Ајде да го прифатиме и тоа, но истите мора да кажат која е алтернативата на тоа откажување за државата и сите нејзини поколенија, и дали имаме право да го прекинеме сонот во кој веруваме. Има и такви што ќе речат дека не е фер патот до ЕУ. Кога се формираше целта за членство во Европската Унија, никој нам не ни ветуваше фер игра, напротив, судбината на малите народи и држави во голема мера зависеше од игрите на поголемите народи и држави. Нашата умешност мора да биде да ги реализираме нашите цели низ еден таков контекст на работите. И секогаш мора да има план А и план Б, но целта мора да останува иста – порача Мицкоски.

Додаде дека секогаш има план Б и дека нема сила што ќе го натера да донесе погрешна одлука за државата.

– Затоа им пречам на нашите противници, затоа сум предмет на кампања полна со лаги и клевети, затоа што тие живеат на грбот на народот и државата, а ние за татковината и народот. И морам да ви кажам – најважно од сè ми е да бидам чесен и искрен кон народот и да останам со неизвалкан образ, и нема цена што може тоа да го смени или сила што ќе ме натера да донесам погрешна одлука кога во прашање е Македонија. И секогаш има план Б, кој ќе значи заштита на сè она во што веруваме, и знам дека никогаш нема да ве разочарам. Во оваа битка сме заедно и ќе продолжиме да бидеме заедно до остварување на нашата заедничка цел – за Македонија што има иднина и надеж – рече Мицкоски на централната прослава во Прилеп организирана по повод Денот на народното востание – 11 Октомври.

The post МАКЕДОНИЈА ВО ЕУ, НО НЕ ПО СЕКОЈА ЦЕНА Мицкоски бара од Брисел да се почитува македонскиот јазик и идентитет appeared first on plusinfo.mk.

Владата на ВМРО-ДПМНЕ и коалицијата прави жесток обид да поврати барем малку од она што претходно беше распродадено од претходниците, одговори денеска премиерот Христијан Мицкоски на обвинувањата од опозицијата дека власта се откажала од идентитетот и од јазикот.

– Можеби тоа е само во нивната микроорбита на измеќари на туѓи интереси и предавници од највисок ков и тоа се покажа и докажа во минатото. Владата на СДСМ и ДУИ единственото нешто што го правеше, покрај тоа што го знае најдобро – да краде, тоа беа националните предавства и потпишувањето на сите документи што им беа ставани на маса. Станува збор за национално исплакнати луѓе на кои освен кариера и да го крадат народот, а потоа да уживаат од тоа што го краделе, ништо друго не им преостанува. Тоа што го прави оваа Влада на ВМРО-ДПМНЕ и коалицијата, е токму жесток обид да се поврати барем малку од она што тие го распродадоа и го вадиме на виделина сето она за кое што ако досега некој имал каква било дилема верувам дека отсега ќе нема. Ние продолжуваме жестоко да се бориме за нашиот идентитет, за тоа што сме, а не тоа што сакаат да бидеме – некои модерни Македонци кои што говорат модерен македонски јазик – рече Мицкоски во Гевгелија.

Премиерот порача дека нема посвето нешто од тоа да се бориш за својот народ, за своите граѓани, за својата татковина.

– И да го повратиш тоа што оние претходни квинслинзли, за жал, го продадоа за да можат да уживаат во дебелите црвени килими и кожните фотелји и да се богатат на грбот на граѓаните. Но, тие нека продолжат со таа политика, а ние ќе продолжиме со политиката на одбрана на македонскиот идентитет и одбрана на интересите на граѓаните и Македонија како држава – рече Мицкоски.

The post „ТИЕ ВРШЕА ПРЕДАВСТВА, НИЕ ЖЕСТОКО СЕ БОРИМЕ ДА ВРАТИМЕ БАРЕМ МАЛКУ ОД РАСПРОДАДЕНОТО“ Мицкоски продолжува со одбрана на македонскиот идентитет appeared first on plusinfo.mk.

Пратеникот и член на Извршниот комитет на ВМРО-ДПМНЕ, Миле Лефков, на денешната прес-конференција обвини дека постои поврзаност меѓу структури од СДСМ и бугарска антимакедонска пропаганда, насочена кон дискредитација на ВМРО-ДПМНЕ и на премиерот Христијан Мицкоски.

Лефков тврди дека до ВМРО-ДПМНЕ пристигнале информации кои укажуваат на, како што рече, „јасна поврзаност и координација меѓу бугарски пропагандни мрежи и структури поврзани со СДСМ“. Тој тврди дека тие заеднички делуваат кон негирање на македонскиот идентитет и јазик, и дека крајна цел им е напад врз партијата и нејзиниот лидер, кој го нарече „единствената брана за македонските интереси“.

– Некои кругови во СДСМ и блиски до нив, се целосно финансирани од бугарски фондови, со цел да шират лажни информации и конструкции за политичари од ВМРО-ДПМНЕ и за државниот врв – изјави Лефков, додавајќи дека тоа се гледа и преку брзото пренесување содржини од бугарските медиуми во македонскиот медиумски простор од страна на, како што рече, „структури блиски до СДСМ“.

Тој како пример го посочи лидерот на СДСМ, Венко Филипче, за кого рече дека „во тајност прифаќа внесување на Бугарите во Уставот без никакви барања“, што, според Лефков, е уште еден доказ за антимакедонската ориентација.

– Сето ова е обид да се нанесе штета на ВМРО-ДПМНЕ, при што во игра се и пари – посочи Лефков, тврдејќи дека СДСМ се обидува да се наметне како политички фактор чијашто поддршка би била клучна за надворешната политика на државата.

Лефков го обвини СДСМ дека, наместо да понуди конкретна програма за претстојните избори, се обидува преку, како што рече, „распродажба на македонските национални интереси“, да ја задржи својата релевантност, делувајќи, тврди тој, во интерес на Бугарија.

„СДСМ ПОВТОРНО Ѝ НАНЕСУВА ШТЕТА НА МАКЕДОНИЈА“ Лефков обелодени неуспешен обид на бугарските служби и СДСМ за деструкција на ВМРО-ДПМНЕ и на премиерот Мицкоски

The post СТРУКТУРИ НА СДСМ ЛАПААТ ПАРИ ОД БУГАРСКИ ПРОПАГАНДНИ МРЕЖИ?! Филипче е спремен да ги внесе Бугарите во Уставот без никакви барања, тврди Лефков appeared first on plusinfo.mk.

Претседателот на Владата, Христијан Мицкоски, вечерва во емисијата „Само интервју” на Телевизија Канал 5, говореше за односот на Бугарија кон македонските евроинтеграции, укажувајќи дека барањето за внесување на Бугарите во Уставот не е единствено – туку само почеток.

– Ајде да направиме, велам, еден обид, а тој обид е Европскиот парламент со мнозинство гласови да донесе одлука или резолуција, или ќе биде дел од извештај со којашто јасно ќе се признае македонскиот идентитет и јазик како посебен – рече Мицкоски.

Тој објасни дека тоа веќе се случило во рамки на извештајот на известувачот Вајц.

– Пред да помине на АФЕТ имаше една друга страна. Тогаш беше потребно не да се избрише од извештајот, туку да се избрише „сегашен“. Потоа дојде „модерен“ од одредена група на европратеници – вели Мицкоски.

Премиерот додаде дека уставните измени не се последната пречка на патот на Македонија кон ЕУ, како што тврди опозицијата.

– Она што можеше да го види Европа и светот е дека не е само промената на Уставот единственото нешто коешто треба да го направиме за да продолжиме. Впрочем, многу влијателни политички фигури во Бугарија тоа го кажуваат – истакна Мицкоски.

Според него, тврдењата на бугарскиот претседател Румен Радев дека единствениот услов е промената на Уставот – не се точни.

– Пред некој ден слушнав изјава од претседателот Радев во која што вели единствениот услов којшто треба да го направи Македонија е да го смени Уставот. Ние во Договорот за добрососедството немавме никаков услов. Потпишан е договор во којшто Бугарија треба да не поддржува во рамките на процесот на преговори и членство. Па добивме вето, затоа што ние не сме го исполнувале договорот и не сме ги испорачале малцинските права на бугарската заедница во Македонија – рече премиерот Мицкоски.

Премиерот потенцираше дека Македонија нема да стане членка на ЕУ по секоја цена, затоа што овој народ и Македонија дале премногу изминативе повеќе од 30 години.

– Сите сме за ЕУ, и сите сакаме да бидеме во ЕУ, но не по секоја цена. Затоа што да беше ова прво нешто, нема никаков проблем ќе седневме ќе разговараме. Овој народ, и овие граѓани и оваа држава дала премногу како никој друг што не дал, и преку глава им е на граѓаните од таков тип политика, сега или никогаш, прозорецот е отворен, сега е моментумот, од Солана го слушаме – рече Мицкоски.

Претседателот на Владата, Мицкоски кажа дека, не се ова први измени што се бараат, тој потенцира дека се менуваше нашиот идентитет, од знамето до името, се тоа е дел од основните темелни вредности на еден идентитет, атрибути коишто го дефинираат идентитетот, истакнувајќи дека во минатото еден по еден овие атрибути се менувале, а за разлика од тогаш, сега тоа нема да биде случај.

– Тоа што сега го правиме ќе има влијае во иднината, и тогаш тие генерации ќе судат кој што правел и како прави – дециден е Мицкоски.

The post „НЕ ПОПУШТАМ ПРЕД РАДЕВ, НЕ ПРИФАЌАМЕ УЦЕНИ“ Европската иднина не смее да зависи од соседот, вели Мицкоски appeared first on plusinfo.mk.

Оваа власт нè води во длабока криза, рече денеска претседателот на СДСМ, Венко Филипче, кој смета дека Извештајот на Европскиот Парламент од кој беа избришани македонскиот јазик и идентитет, не го загрозува посоењето на Македонскиот јазик и идентитет. Тој го оцени вчерашното обраќање на премиерот Христијан Мицкоски како празна прес-конференција и го обвини ВМРО-ДПМНЕ за антинационални политики.

– По маратонските губитнички прес-конференции на премиерот Христијан Мицкоски време е јасно и недвомислно да проговориме за вистинската состојба во која власта ја донесе државата на меѓнароден, а со тоа и на внатрешен план. Одлуката на Европскиот Парламент и усвјувањето на извештајот се резултат на застранување од јасно утврдените стратешки позиции на државата и злоупотребата на јазикот и на идентитските прашања од страна на Владата, за сопствена политичка кампања. Тоа е директен резултат на дипломатските импровизации и целосна негрижа на Владата за зачувување на меѓународните позиции на државата. Секој нов пораз во надворешната политика, Владата го оправдува со сè подраматични и празни прес-конференции, обвинувајќи ги другите за сопствениот неуспех. Антинационалните политики на ВМРО-ДПМНЕ, со кои се обидуваат да го загрозат нашиот јазик и идентитет за сопствени политики се срамни, се понижувачки и се спротивни на здравиот разум на секој што ја сака оваа земја – рече Филипче.

Она што е прво и најважно да се каже е дека извештајот на ЕП не е извештај за постоењето на македонската нација, македонскиот јазик или македонскиот идентитет, рече Филипче.

– Македонскиот јазик и идентитет се јасно дефинирани и заштитени. Никој не може да ги допре или да им наштети. На македонски се преведува во ЕУ, на македонски се потпишуваат договорите меѓу ЕУ и Македонија, на македонски се говори во Унијата. Ова го гарантира преговарачката рамка – рече Филипче.

Со ова, додаде, европските институции веќе ја признаваат македонската реалност и ваквите прашања не се предмет на преговарање, туку се веќе решени и обезбедени.

– Во својот мандат, СДСМ успешно ги отфрлаше обидите македонскиот јазик да биде исклучен од извештајот затоа што имавме пријатели и стратешки партнери кои гледаа дека искрено се бориме за ЕУ-интеграција. Нашите стратешки партнери ја препознааискрената борба, чесните намери и волја за ЕУ-интеграција, но и јасните црвени линии. Ние знаеме кои сме, на кој јазик говориме и токму тоа го загарантиравме со договорите – истакна Филипче.

Вадењето на јазикот од извештајот е пораз на владината дипломатија, која не успеа да подобри ништо од позициите кои ги наследи, туку како со булдожер ги сруши, рече тој.

– Тие ги срушија нашите европски перспективи и го изложија нашиот народ на потсмев, правејќи го целосен губитник.  Македонскиот народ има јасна визија и силна волја да се интегрира во ЕУ, но без отстапки од своето национално достоинство и идентитет, додаде тој. Нашата борба и визија беа јасни: да го заштитиме јазикот и идентитетот и што поскоро да влеземе во ЕУ како Македонци кои говорат македонски јазик. Ова во ниеден момент не беше, ниту пак е, загрозено сега. Македонскиот јазик е безбеден, идентитетот е безбеден. Но македонската интеграција во Унијата е сè подалечна поради политиките и изборите на власта – рече Филипче.

„НИКОЈ ВЕЌЕ ДА НЕ СПОМНАЛ ДЕКА ПРОБЛЕМОТ Е БУГАРИ ВО УСТАВОТ“ Мицкоски вели дека Бугарија има јасен план да го уништи македонскиот идентитет

The post „ОВАА ВЛАСТ НЀ ВОДИ ВО ДЛАБОКА КРИЗА“ Според Филипче, СДСМ ги сочувал македонскиот јазик и идентитет, а ВМРО-ДПМНЕ ги загрозува appeared first on plusinfo.mk.