Нерешени 29:29 на дуелот на македонските ракометари против Португалија во дуелот од второто коло. Ова е првиот бод за нашите ракометари во групата.

Македонските ракометари имаа два гола негатива по првиот дел од вториот натпревар на Европското првенство против Португалија – 13:15. Натпреварот во првиот дел беше дури 11 пати со нерешен резултат, а кон средината на полувремето македонските ракометари поради 3 исклучувања имаа 6 минути играч помалку. Никола Маркоски доби и црвен картон во 15. минута. Во неколку наврати Португалија во напад играше и „7 на 6“.

Почетокот на вториот дел беше во знакот на Португалија која поведе и со 18:13, а по тајм аутот на Лазаров македонските ракометари намалија на два негатива (20:22). Водството на противникот повторно се зголеми, но македонските ракометари не се предаваа и постојано вршеа притисок на противникот и ја намалуваа предноста на Португалија. Со голот на Серафимов во 55. минута прв пат изедначивме во вториот дел.

До крајот се играше гол за гол, а последниот напад на Португалија траеше премногу долго. Во тие моменти голманот Мартин Томовски имаше две одбрани за конечни 29:29.

Кузмановски со 15 голови беше најефикасен на натпреварот. Во вторник противник за македонските ракометари е селекцијата на Романија.

По ремито со Португалија за пласман во следната фаза ќе ни биде потребна математика за да стигнеме на второто место во групата.

Македонските ракометари во првиот дуел загубија од Данска со 24:36 и имаме негатива од 12 гола, додека Португалија по првиот дуел има плус 6 .

Во последното коло противник ни е Романија и за пласман на второто место ќе треба да имаме висока победа, а притоа Данска да стигне до убедлив триумф против Португалија.

Победа против Романија во третото коло од групата на македонските ракометари може да ни го донесе и второто место во групата, но секако ќе го чекаме исходот од дуелот на Данска и Португалија, кој се игра по нашиот натпревар.

Освојување и на третото место во групата, како една од варјантите (потребна ќе биде победа над Романија) ќе значи подобар вкупен пласман и евентуално избегнување на играње на два баража за Светското првенство следната година.

The post МАКЕДОНИЈА РЕШИТЕЛНО ДО НЕРЕШЕНО СО ПОРТУГАЛИЈА Македонските ракометари одиграа неверојатен натпревар appeared first on plusinfo.mk.

Македонија вечерва излегува на големата европска сцена без страв и без калкулации. Со срце, со верба и со јасна порака дека ниту еден противник, без разлика колку е моќен, не е недостижен. Во Хернинг, од 20:30 часот, „црвено-жолтите“ го почнуваат Европското првенство против кодомаќинот и еден од главните фаворити – Данска.

Реалноста вели дека Данска е ракометна сила, селекција навикната на злато, притисок и полни трибини. Но ракометот отсекогаш бил спорт во кој Македонија знаела да изненади, да се издигне над очекувањата и да покаже карактер кога е најтешко. А токму тоа го носат избраниците на селекторот Кирил Лазаров – генерација што не бега од предизвици.

Македонската репрезентација веќе неколку денови е во Данска, каде сериозно се подготвува за стартот на шампионатот. Во вторникот, како последна проверка, беше одигран и контролен натпревар против Митјиланд, кој нашите ракометари го добија – сигнал дека формата расте и дека тимот е подготвен за големата битка.

Ова не е првпат Македонија да стартува европски шампионат токму во Хернинг против Данска. Истата сцена ја видовме и во 2014 година. Но секој турнир е нова приказна, секој натпревар нова можност да се испише историја.

Дуелот е дел од групата Б, во која се уште Португалија и Романија. Во првиот денешен натпревар од 18 часот ќе се сретнат токму овие две селекции, додека Македонија во следните денови ја продолжува борбата – во недела од 18 часот против Португалија, а во вторник во истиот термин против Романија.

Пласман во следната фаза ќе обезбедат двете првопласирани селекции од групата, а Македонија во овој шампионат не влегува со наведната глава, туку со исправен став и желба да се бори до последна секунда.

The post ДАНСКА Е ФАВОРИТ, НО МАКЕДОНИЈА НЕ СЕ ПРЕДАВА „Црвено-жолтите“ вечерва ја почнуваат европската битка appeared first on plusinfo.mk.

Македонската ракометна репрезентација го освои второто место на „Жолтиот куп“ во Винтертур, откако вечерва одигра нерешено 28:28 против домашната селекција на Швајцарија во последното коло од турнирот.

Иако Македонија имаше ист учинок како и домаќинот – две победи и едно реми, подобрата гол-разлика од претходните натпревари ѝ донесе прво место на Швајцарија. Пред вечерашниот дуел, Швајцарците имаа +14, а Македонија +9 по победите над Украина и Бахреин.

Избраниците на селекторот Кирил Лазаров, бодрени од голем број македонски навивачи на трибините, одиграа значително подобро второ полувреме и успеаја да ја анулираат негативата од пет гола разлика, но недостасуваше чекор за целосен резултатски пресврт и победа.

Турнирот во Швајцарија беше важна проверка во пресрет на големиот предизвик што следува, бидејќи македонската репрезентација веќе по завршувањето на настапот во Винтертур заминува за Данска, каде за шест дена ќе ги започне настапите на Европското првенство 2026.

The post МАКЕДОНИЈА ВТОРА НА „ЖОЛТИОТ КУП“ Реми со Швајцарија за силна најава пред ЕП 2026 appeared first on plusinfo.mk.

Селекторот на македонската ракометна репрезентација, Кирил Лазаров, изрази задоволство од текот на подготовките во пресрет на Европското првенство 2026.

– Со оглед на здравствената состојба на одредени ракометари, нема да брзаме со конечниот список за Европското првенство. Ќе почекаме да поминат последните тренинзи, а потоа ќе одлучиме кои ракометари ќе патуваат на ЕП. Заедно со федерацијата донесовме одлука за Данска да патуваат 19 ракометари. Задоволен сум од досегашниот тек на подготовките, имаме позитивна атмосфера. Ни претстојат три тест-натпревари кои ќе ни послужат за подигнување на формата, особено затоа што имаме играчи кои имаат помала минутажа во своите клубови – изјави Лазаров.

Предводникот на „црвено-жолтите“ смета дека македонската репрезентација мора да се потпре на силен колектив, бидејќи нема многу поединци што можат самостојно да го понесат товарот на едно големо натпреварување.

– Ние сме Македонија, мала земја, и затоа изборот на играчи можеби е најограничен во споредба со другите селекции учеснички на Европското првенство. Мора да создадеме цврст колектив и систем што ќе функционира. Слабостите што ги имаме треба да ги покриеме, а добрите страни максимално да ги искористиме. Се обидуваме да создадеме добра хемија, да функционираме како тим и да играме пожртвувано – потенцира Лазаров.

Македонската репрезентација првиот натпревар на Европското првенство 2026 ќе го одигра против Данска, на 16 јануари.

The post НЕ БРЗАМЕ СО СПИСОКОТ, КЛУЧНА ЌЕ БИДЕ ХЕМИЈАТА Лазаров задоволен од подготовките, но внимателен со изборот appeared first on plusinfo.mk.

Македонската машка ракометна репрезентација го започнува патот кон Европското првенство во Данска, Шведска и Норвешка со 21 избраник на селекторот Кирил Лазаров. На списокот е и еден дебитант – Самоил Ристевски од Еурофарм Пелистер, кој ќе го облече националниот дрес за првпат.

Меѓу повиканите се најдобрите домашни играчи, а единствен интернационалец е голманот Мартин Томовски, кој настапува за германскиот Битигхајм. Подготовките ќе започнат во Скопје, од понеделник, каде тимот ќе го одигра првиот контролен меч пред заминување за Скандинавија.

Македонија во група со Данска, Португалија и Романија

На Европското првенство, кое ќе стартува во јануари, „црвено-жолтите“ ќе играат во групата Б во данскиот град Хернинг. За место во следната фаза ќе се борат со моќната Данска, амбициозната Португалија и обновената селекција на Романија. Првите две репрезентации ќе продолжат понатаму.

Повикани ракометари

Голмани: Мартин Томовски, Никола Митревски, Иван Галевски
Леви крила: Петар Атанасијевиќ, Иван Џонов
Десни крила: Ненад Костески, Никола Костески
Средни бекови: Марко Митев, Игор Ѓоргиев, Мартин Ивановски
Леви бекови: Филип Кузмановски, Павле Атанасијевиќ, Дамјан Митев
Десни бекови: Томислав Јагуриновски, Мартин Серафимов, Мартин Велковски
Пивоти: Жарко Пешевски, Марко Стојковиќ, Валентин Карасманакис, Самоил Ристевски, Михаил Аларов

Лазаров ќе има две недели да ја воигрува селекцијата пред настапот на најголемиот континентален собир.

The post ЛАЗАРОВ ГО ОБЈАВИ СПИСОКОТ, 21 ИЗБРАНИК ЗА ЕВРОПСКИОТ СОН Самоил Ристевски дебитира во националниот дрес appeared first on plusinfo.mk.

Ракометната репрезентација на Македонија одигра нерешено 29-29 против селекцијата на Грција, во првиот од двата пријателски натпревари што се играат во Солун, како дел од подготовките пред настапот на ЕП 2024 го Германија, во јануари.

Подготвителниот пријателски натпревар доби драматична завршница во која македонската репрезентација се спаси од пораз со голот на десното крило Ненад Костески во последните секунди .

Во првиот дел од натпреварот, Македонија имаше сигурна предност, во еден период и со пет голови разлика (11-6), а на полувремето водство од 15-13.

Македонските ракометари добро го почнаа и вториот дел и ја вратија предноста од пет разлика (17-12). Но, потоа следуваа грешки кои Грците ги искористија, изедначија на 21-21, а потоа и го прездедоа водството поведувајќи со 29-27 . Филип Кузмановски намали на гол разлика, а Ненад Костески го постави конечниот резултат.

Вториот контролен натпревар утре во Солун со почеток во 17.30 часот.

The post МАКЕДОНИЈА ОДИГРА РЕМИ СО ГРЦИЈА Ракометарите во последните секунди се спасија од пораз appeared first on plusinfo.mk.

Доколку избраниците на селекторот Кирил Лазаров бидат поуспешни во двомечот против Романија, противник во последната фаза за место на ракометниот мундијал, што од 11 до 29 јануари идната година ќе се одржи во Полска и во Шведска, ќе им биде репрезентацијата на Чешка.

Македонските ракометари ќе ги почнат мундијалските квалификации на домашен терен на 16 или 17 март, а реваншот е една недела подоцна во Романија.

Доколку „црвено-жолтите“ ја минат првата пречка, воведниот натпревар против Чешка ќе го играат на гостински терен на 13 или 14 април, додека реваншот на домашен терен на 16 или 17 април.

Преостанатите осум двојки од првиот бараж се: Украина – Финска, Италија – Словенија, Португалија – Швајцарија, Австрија – Естонија, Грција – Босна и Херцеговина, Израел – Литванија, Словачка – Белгија и Фарски Острови – Белорусија.

The post ЌЕ ИГРАМЕ ПРОТИВ РОМАНИЈА И ПРОТИВ ЧЕШКА Неповолна ждрепка за македонските ракометари appeared first on plusinfo.mk.