Успешните средби на заменик претседателот на Владата и министер за транспорт Александар Николоски со турскиот министер за трговија Омер Болат и министерот за транспорт Абдулкадир Уралоглу, резултураа со договори за воспоставување на директна авиолинија Анкара -Скопје и карго железничко поврзување меѓу двете земји, објави на својот фејсбук профил, заменик претседателот на Владата, Николоски.

Министерот за трговија на Турција на социјалната мрежа Икс ја објави информацијата за новата авиолинија и карго железничкото поврзување и напиша дека двете земји продолжуваат да работат кон остварување на целта за билатерална трговска размена од 2 милијарди долари.

„По повод Турско–Македонскиот бизнис форум, заедно со нашиот министер за транспорт и инфраструктура, г. Абдулкадир Уралоглу, остваривме средба со заменик-претседателот на Владата и министер за транспорт на Република Северна Македонија, г. Александар Николоски.

На средбата се согласивме дополнително да ја зајакнеме нашата соработка во областите на транспортот, логистиката, цивилното воздухопловство и железничкиот сообраќај. Веруваме дека директните летови на “AJet” на релација Анкара–Скопје, како и железничката соработка меѓу TЦДД и МЖ Инфраструктура ќе дадат значаен придонес за трговијата, инвестициите и поврзаноста меѓу нашите земји.

Во согласност со визијата на претседателот на Република Турција, г. Реџеп Таип Ердоган, за силна регионална соработка и економска интеграција, со решителност продолжуваме да работиме кон остварување на целта за билатерална трговска размена од 2 милијарди долари.

Во наредниот период ќе продолжиме да ги зајакнуваме транспортните коридори и да ги поддржуваме активностите на турските компании во Северна Македонија, придонесувајќи за поврзаноста, просперитетот и заедничкиот развој на Балканот.

Длабоките пријателски и братски врски меѓу нашите земји ќе стануваат уште посилни преку новите проекти што ќе се реализираат во областа на трговијата и инвестициите” , објави министерот за трговија, Омер Болат.

Средбата на министрите се реализира во рамки на турско -македонскиот бизнис форум што денеска се одржа во Истанбул.

The post АВИОЛИНИЈА СКОПЈЕ-АНКАРА И КАРГО ЖЕЛЕЗНИЧКО ПОВРЗУВАЊЕ Николоски со министри во Истанбул договори нов импулс за трговијата appeared first on plusinfo.mk.

Премиерот Христијан Мицкоски, кој денеска престојува во работна посета на Турција и учествува на Бизнис-форумот Македонија – Турција во Истанбул, упати повик до турските компании да инвестираат во земјава и да станат дел од, како што рече, „развојната приказна на Македонија“.

Обраќајќи се пред претставници на турската бизнис-заедница, Мицкоски истакна дека Северна Македонија и Турција имаат традиционално добри и пријателски односи, кои претставуваат цврста основа за натамошно продлабочување на економската соработка.

– Македонија и Турција негуваат традиционално пријателски односи изградени врз доверба, почит и силни врски меѓу народите, а токму тие односи претставуваат цврста основа за продлабочување на економската соработка и нови инвестиции – истакна Мицкоски во своето обраќање на форумот.

Тој нагласи дека државата денес се позиционира како стабилна и конкурентна бизнис-дестинација, нудејќи поволни услови за инвестирање.

– Македонија денес се позиционира како стабилна и конкурентна бизнис-дестинација, со стратешка географска положба, поволна инвестициска клима, модерни индустриски зони и пристап до регионалните и европските пазари – посочи премиерот.

Според него, турските компании преку инвестиции во земјава ќе добијат можност да го прошират своето присуство и да се вклучат во европските синџири на снабдување.

– Турските компании преку инвестирање во Македонија добиваат можност да станат дел од европските синџири на снабдување и да го прошират своето присуство на пошироки пазари. Нагласив дека нашата цел е да градиме долгорочни партнерства, кои ќе создаваат нови работни места, поголем економски раст и заеднички успех. Ги поканив турските инвеститори да бидат дел од развојната приказна на Македонија, држава што има јасна визија за иднината, отворена врата за нови инвестиции и силна определба за економски развој – рече премиерот.

Бизнис-форумот во Истанбул има цел да ги поврзе институциите и компаниите од двете земји, да отвори нови можности за соработка и да ги промовира инвестициските потенцијали на Македонија пред турската деловна заедница.

Во изјава по настапот Мицкоски рече дека е во Истанбул заедно со владина, но и со бизнис делегација.

– Ја продолжуваме традицијата на организирање B2B настани и B2B средби, односно тоа што го отпочнавме во Унгарија и тоа што го продолживме во Австрија, потоа со хрватската бизнис заедница на билатералната средба во Охрид, го продолжуваме сега овде во Истанбул. Нашата цел е нашата македонска економија и нашите бизниси да се поврзат со бизнисите овдека во Истанбул, Турција.

Постои навистина голем интерес кај турските бизнисмени за инвестиции во Македонија, а она коешто ние ќе го правиме овие два дена овде во Истанбул е да ги презентираме можностите на македонската економија и сите оние можности и поддршка што ние како Влада ја даваме за привлекување на странски директни инвестиции.

Така што еве веќе првиот дел од овој настан заврши, очекувам многу успешни состаноци, очекувам силни пораки да бидат испратени и продолжуваме да информираме од нашата билатерална посета во Истанбул, Турција – рече Мицкоски.

The post 📷 ТУРСКИТЕ КОМПАНИИ ДОБИЈА ПОКАНА ОД ПРЕМИЕРОТ Македонија нуди партнерство и нови можности, вели Мицкоски appeared first on plusinfo.mk.

Во петок (11 јуни 2026) во Истанбул ќе се одржи бизнис форум посветен на јакнење на економските врски и промоција на инвестициските потенцијали на Република Северна Македонија пред турската деловна заедница.

Форумот има за цел да ги поврзе институциите и бизнис секторот од двете земји преку директни контакти и разговори насочени кон отворање нови можности за соработка и заеднички инвестиции.

На настанот е најавено учество на претседателот на Владата на Република Северна Македонија, Христијан Мицкоски, кој ќе предводи владина делегација составена од ресорни министри од економската, енергетската и инфраструктурната област.

Од турска страна, домаќин на форумот е министерот за трговија на Република Турција, Омер Болат, а организацијата ја спроведуваат Министерството за трговија на Турција и DEİK – Советот за надворешни економски односи.

Во рамки на програмата ќе бидат претставени инвестициските потенцијали на нашата земја, а настанот ќе вклучи и официјални обраќања, тематски панели посветени на трговијата, енергетиката и инфраструктурата, како и Б2Б средби меѓу компании од двете земји, со фокус на размена на искуства и унапредување на соработката во клучните економски сектори.

Форумот е наменет за компании кои имаат интерес за проширување на своето присуство на меѓународните пазари и воспоставување нови деловни партнерства во рамки на регионалната економска соработка.

Форумот се организира во рамки на проектот „Промоција на Мапа за инвестирање“, како дел од Програмата за поддршка на спроведувањето на Националната развојна стратегија, предводена од Владата на Република Северна Македонија и Генералниот секретаријат, а имплементирана во соработка со УНДП.

Во континуитет на ваквите активности, како дел од пошироката серија промотивни настани за позиционирање на Северна Македонија како атрактивна инвестициска дестинација, сличен бизнис форум неодамна се одржа и во Будимпешта. Овие настани претставуваат дел од пошироките напори за промоција на економските потенцијали на земјата и привлекување нови странски инвестиции преку директна комуникација со меѓународната бизнис-заедница.

The post ИНВЕСТИЦИСКИТЕ ПОТЕНЦИЈАЛИ НА МАКЕДОНИЈА ПРЕД ТУРСКАТА БИЗНИС ЗАЕДНИЦА Форум за унапредување на економската соработка меѓу Македонија и Турција appeared first on plusinfo.mk.

По лесната победа над Луксембург, денеска македонските ракометари играа во далечниот Ван против Турција. Момците на Кире Лазаров доминираа и на денешниот натпревар, забележаа убедлива победа од девет голови разлика и веќе е јасно дека без големи проблеми ќе обезбедат едно од првите две места на табелата и ќе се пласираат на Европското првенство.

Денешниот меч Македонија го стартуваше фуриозно, со предност од 9-0 на стартот. Турците првиот гол го постигнаа дури во 14. минута од натпреварот. На полувремето нашата репрезентација имаше предност од 17-8.

Во вториот дел Македонија се опушти, Турција во еден момент намали и на шест разлика, но тоа беше максимумот што го постигнаа. На крајот македонската репрезентација ги одржа тие девет голови од првото полувреме и славеше со резултат 36-27.

Најдобар во нашиот состав беше Филип Талески со седум голови, Дејан Манасков постигна пет, а Јагуриновски четири голови.

По првите две кола Македонија и Португалија имаат по четири бода, Турција и Луксембург се без бодови.

The post МАКЕДОНИЈА ЛЕСНО ЈА СОВЛАДА ТУРЦИЈА Квалификации за Европското првенство во ракомет appeared first on plusinfo.mk.