Пензионерите кои се во добра здравствена состојба и сакаат да работат треба да добијат можност за повторен ангажман во приватниот сектор, порача директорот на Фондот на ПИОМ, Никола Мемов.

Тој учествуваше на тркалезна маса на тема „Недостигот на работна сила: Од предизвик до можност преку активно стареење и искористување на позитивни искуства“, организирана од Комората на Македонија за приватно обезбедување.

Како што беше истакнато на настанот, целта е да се најдат решенија за недостигот на работна сила, особено во секторот на приватното обезбедување.

Во своето излагање, Мемов нагласи дека Фондот на ПИОМ не креира политики, но може да даде препораки врз основа на искуствата.

– Сметам дека пензионерите кои сакаат и се во добра здравствена состојба, треба да имаат можност за работа. Пазарот на трудот покажува дека има потреба од нив, особено во приватното обезбедување, каде нивното искуство може да биде значаен ресурс – изјави Мемов.

Тој додаде дека ваквата можност треба да се однесува исклучивона приватниот сектор и дека би донела корист и за работодавачите, државата и самите пензионери.

– Работодавачите ќе добијат искусна работна сила, државата ќе има дополнителни приходи од придонеси, а пензионерите ќе имаат и пензија и плата-  истакна Мемов.

На дебатата се обрати и професорот д-р Лазар Јовевски, кој посочи дека стареењето на населението е сериозен предизвик.

Тој нагласи дека постојат две можни решенија – увоз на работна сила или внатрешна реорганизација на пазарот на труд.

– Ако се избере втората опција, ќе мора да се менува правната и економската рамка за да се овозможат нови модели на вработување – изјави Јовевски.

Претседателката на Комората, м-р Верица Милеска Стефановска, истакна дека во повеќе земји пензионерите веќе имаат можност да работат без да ја губат пензијата и дека и кај нас е потребно усогласување на законската регулатива.

Учесниците заклучија дека се неопходни законски измени со кои ќе се олесни пристапот на пензионерите до пазарот на труд, со цел да се надмине недостигот на работна сила.

The post ПЕНЗИОНЕРИТЕ СЕ ВРАЌААТ НА РАБОТА Мемов предлага законски промени на пазарот на труд appeared first on plusinfo.mk.

Претседателот на Владата Христијан Мицкоски денеска на собраниската седница за пратенички прашања порача дека реформската агенда се движи во добра насока и дека државата има шанса да се позиционира меѓу „фронтранерите“ во процесот.

Тој нагласи дека до 30 јуни е предвиден „грејс период“ за завршување на дел од обврските и изрази очекување дека резултатите ќе бидат видливи во претстојниот извештај.

– Имаме амбициозна агенда. Нашата цел е да испорачаме реформи дома, да ја завршиме реформската агенда и акцискиот план, и да покажеме дека имаме капацитет да бидеме меѓу водечките земји – рече Мицкоски.

Тој додаде дека Владата сака да се фокусира на внатрешните реформи и да ги стави во втор план, како што рече, барањата поврзани со уставните измени.

Во делот на енергетиката, премиерот најави дека се работи на модел кој би можел да донесе поевтина електрична енергија за граѓаните.

Според него, новите решенија, договорени во консултација со Европската комисија, би можеле да овозможат намалување на цената на струјата од 5 до 10 проценти.

– Иако пазарот е либерализиран, правиме допрецизирања во Законот за енергетика. ЕСМ нема да испорачува повеќе од 70% од потребите на снабдувачот од 1 јануари 2027 година. Целта е да добиеме поевтина и стабилна цена – истакна Мицкоски.

Тој појасни дека потрошувачката на електрична енергија е поделена во периоди од денот и годината, со различни цени во зимска и летна сезона, како и преку ден и ноќе, зависно од производството од обновливи извори.

– Сакаме да направиме модел што ќе биде вин-вин ситуација – и за системот и за граѓаните. Во одредени периоди струјата од соларните капацитети е речиси со нулта или дури негативна цена – рече премиерот.

Мицкоски додаде дека повеќето мерки од реформската агенда се во завршна фаза, а како отворено прашање останува Изборниот законик, кој зависи од политички договор со опозицијата.

The post НЕМА ДА ИМА ПОСКАПУВАЊЕ, ТУКУ ПОЕВТИНУВАЊЕ НА СТРУЈАТА Мицкоски најави пресврт со цената, се подготвува нов модел appeared first on plusinfo.mk.

Претседателот на Владата, Христијан Мицкоски одговарајќи на новинарско прашање, дали има најава за нови инвестиции во државата, информираше дека веќе има потврда за две нови странски инвестиции во вкупна вредност од околу 80 милиони евра.

– Па да, ние генерално, преговараме со многу компании коишто доаѓаат надвор од земјава, коишто ќе инвестираат во Македонија. Можам да потврдам дека веќе имаме потврда од две такви. Една турска, една германска, коишто вкупно ќе инвестираат околу 80-тина милиони евра. Извозот којшто двете заедно ќе го прават од Македонија ќе биде над 200 милиони евра и вкупно двете компании би требало да вработат некаде околу 1.000 вработени. Двете не се во автомобилската индустрија, туку во индустрија со висока технологија, што посебно нè прави горди – изјави Мицкоски.

Премиерот Мицкоски очекува бројот на странски инвестиции во државата значајно се зголемат до крајот на годината.

– До крајот на годината очекувам уште најмалку три потврди, со што ќе го заокружиме овој циклус, а во следната година ќе продолжиме и на овој план да работиме, да ги поддржуваме домашните компании е наш приоритет, но, се разбира, и компании коишто доаѓаат од надвор, а коишто пројавуваат интерес да инвестираат тука, се добредојдени. Фокусот ни е малку да направиме диверзификација на тоа портфолио, да не биде само автомобилската индустрија, туку и ваков тип на инвестиции во висока технологија – објасни премиерот.

The post ТУРСКА И ГЕРМАНСКА ФИРМА ЌЕ ИНВЕСТИРААТ 80 МИЛИОНИ ЕВРА ВО МАКЕДОНИЈА Мицкоски очекува уште најмалку 3 потврди за инвестиции до крајот на годината appeared first on plusinfo.mk.