Фондацијата МК2025 го отвора повикот за стипендии „Таленти денес – лидери утре“ за учебната 2026/2027 година и ги повикува сите амбициозни средношколци од Македонија да аплицираат и да станат дел од новата генерација млади таленти.

Повикот е наменет за средношколци кои покажуваат одличен успех, учествуваат на натпревари, имаат љубопитност, идеи, амбиција и желба да се развиваат. Ова е можност за младите кои сакаат да го направат следниот чекор во своето образование, личен развој и идни професионални цели.

„Преку Фондот за поддршка на талентирани средношколци „Таленти денес – лидери утре“, и оваа година ќе бидат избрани 10 стипендисти. Поддршката за секој/а стипендист/ка изнесува 60.000 МКД, исплатени во 10 еднакви месечни износи во текот на учебната година, односно во месеците во кои се одвива настава – од септември 2026 до јуни 2027 година. Но, оваа програма е многу повеќе од финансиска стипендија. Таа е можност за менторство, обуки, практични искуства, поврзување со успешни професионалци и учество во активности на Фондацијата МК2025 и Македонија2025. Целта е да им се помогне на младите таленти да продолжат да учат, да се развиваат и посигурно да чекорат кон своите цели“, фелат од Фондот.

Кој може да аплицира?

Право на аплицирање имаат:

● средношколци од прва до трета година на редовна настава во државни средни училишта;

● ученици со просечен успех над 4.70;

● добитници на награди или учесници на државни и/или меѓународни натпревари во областа на природните и општествените науки, компјутерското програмирање и други области;

● кандидати-ученици кои доаѓаат од социјално ранливи семејства со вкупен годишен бруто приход во семејството до 925.000 МКД.

Корисниците на стипендија за 2025/2026 година потребно е повторно да аплицираат на отворениот повик, доколку ги исполнуваат критериумите.

„Со оваа програма не поддржуваме само одлични ученици – поддржуваме млади луѓе со визија, труд и потенцијал. Веруваме дека вистинската поддршка, дадена во вистински момент, може да биде пресвртница во нивниот образовен и личен развој. ‘Таленти денес – лидери утре’ е повеќе од стипендија – тоа е вложување во иднината на Македонија“, посочија од Македонија2025.

Досегашните стипендисти се најдобар доказ дека ваквата поддршка може да направи значајна разлика. Нивните приказни зборуваат за труд, истрајност, нови можности и верба во сопствениот потенцијал.

Повеќе информации за програмата, начинот на аплицирање и потребната документација се достапни на следниот линк: https://macedonia2025.com/en/news/fondacija-mk2025-otvoren-povik-za-stipendiranje-na-deset-10-srednoshkolci-talenti-denes-lideri-utre

Апликациите се поднесуваат електронски преку E-scholarships платформата на Македонија2025. За валидни ќе се сметаат само апликациите поднесени преку платформата.

Крајниот рок за доставување на апликациите е 15 август 2026 година, до 23:59 часот.

Досега, преку програмата „Таленти денес – лидери утре“ се доделени 50 стипендии. Сега е редот на новата генерација.

Не пропуштајте ја оваа можност – аплицирајте, развивајте се и станете дел од заедницата на млади таленти и идни лидери!

The post ТВОЈОТ ТАЛЕНТ ЗАСЛУЖУВА МОЖНОСТ Македонија2025 го отвора повикот за стипендии за средношколци appeared first on plusinfo.mk.

The post СЕМЕЈСТВОТО БИТОВ ВО ФОКУС НА „МАКЕДОНИЈА 2025“ Николоски оствари значајни средби appeared first on plusinfo.mk.

За Македонија е важно внимателно да ги следиме очекувањата и движењата и да не преземаме брзи мерки. Инфраструктурни проекти и економски реформи се она што треба да го направи Владата за заштита на стандардот на македонските граѓани, смета извршната директорка на „Македонија 2025“ Никица Мојсоска-Блажевски.

По отварањето на Самитот 2026 во организација на „Македонија 2025“ одговарајќи на новинарски прашања таа посочи дека на економски план добро е што инвестициите, особено инфраструктурните, се одвиваат добро и тоа доведува до економски раст.

– Треба да размислиме повеќе за пообемни би рекла структурни реформи коишто е тешко да се спроведат во услови кога имате неизвесност и ограничен фискален простор. Меѓутоа би рекла инфраструктурни проекти и економски реформи. Секако дека обврска имаат и компаниите и тие да се унапредат, да бидат поконкурентни, да се дигитализираат, сè она што спомнавме или програми преку коишто им помагаме на компаниите – рече Мојсоска-Блажевски.

Глобалната неизвесност, случувањата на Блискиот Исток и растот или, како што оцени, недоволниот раст во Европската Унија влијаат врз македонската економија.

– Очигледно има одредено забрзување на стапката на инфлација, меѓутоа главно тоа се трошоците поврзани со транспорт. Сè уште Народната банка смета дека монетарната политика е добро поставена и дека во моментот нема простор за загриженост или за промена на монетарната поставеност. Во однос на бруто домашниот производ проекциите на Народна банка се одредено намалување на првичната проекција, односно раст оваа година од околу 3,5 проценти, секако имајќи ги предвид глобалните економски геополитички случувања – истакна Мојсоска-Блажевски.

За Македонија смета дека е важно најпрво, внимателно да ги следи очекувањата и движењата и да не презема брзи мерки.

– Во случај на преземање мерки, тие би требале да бидат таргетирани, секогаш се залагаме за таргетирани мерки наместо универзална поддршка – таргетирани зборувам за заштита на животниот стандард на посиромашните граѓани – додаде извршната директорка на „Македонија 2025“.

Во однос на тоа како средствата од дијаспората да се употребат за инвестиции, посочи дека направиле анкета за дијаспора со над 1.500 одговори, во кои испитаниците велат дека им недостасуваат информации.

– Значи информации како да се инвестира, како да се отвори компанија, сметка во банка и така натаму и заради тоа спомнав, не сакам воопшто да ја гледаме, како мал придонес на Македонија 2025, меѓутоа веб-страницата за дијаспора навистина мислам дека има огромен потенцијал и за индивидуалци коишто сакаат да се вратат во Македонија – како да се вратам, како да пријавам место на живеење, децата да ги запишам во градинка и така натаму, меѓутоа и за компании. Или оние коишто сакаат да отворат бизнис и оние коишто сакаат да инвестираат во наши бизниси – истакна Мојсоска-Блажевски.

​Во Македонија има посебни поволности за инвестиции од дијаспората, како субвенции од страна на Владата за коишто многу малку се знае.

– Сакам и тоа како прашање, односно како можност да го промовираме, меѓутоа и многу поголема поддршка на нашата дијаспора. Четириесет и пет отсто од испитаниците велат дека би сакале да се вратат, 16 проценти дека сакаат да инвестираат. Што им недостасува? Информации, предвидливост, она што нели сите сакаме да постои, и посилни институции. Мислам дека сега е моментумот глобално заради целата геополитичка ситуација и да се вратат повеќе од дијаспората и да инвестираат повеќе од дијаспората – нагласи Мојсоска-Блажевски.

Според неа, емоцијата преовладува кога има еднакви услови за инвестирање некаде.

– Но, не можеме да бидеме многу полоши од било кое друго место за инвестиции за да донесат одлука да инвестираат. И ние треба да си ја завршиме нашата домашна задача – подвлече Мојсоска-Блажевски.

The post БИ СЕ ВРАТИЛЕ 45% ОД АНКЕТИРАНИТЕ ИСЕЛЕНИЦИ, 16% БИ ИНВЕСТИРАЛЕ ВО МАКЕДОНИЈА Недостасува предвидливост и посилни институции appeared first on plusinfo.mk.

И тој потежок пат има своја цена. Затоа што најчесто бирократите ќе ви кажуваат што треба да направите. Бидејќи за нив тоа е „business as usual“, а за вас е сè. За вас е сè. Достоинството нема цена – рече Мицкоски на форумот на иницијативата „Македонија 2025“.

Како Влада цениме дека покус пат до Европската Унија нема, односно има, но тој е полн со предизвици, кои најчесто се понижувачки и поради тоа го избираме потешкиот пат, со кој местото во Унијата ќе го заслужиме со квалитет и испорака, порача денеска премиерот Христијан Мицкоски во обраќањето на Самитот 2026 во организација на „Македонија 2025“, кој годинава се одржува со мотото „По 2025: Забрзување на растот. Поттикнување лидерство“.

Тој одговараше на прашање поврзано со процесот на евроинтеграциите, во кој за нас како да преовладуваат политичките наместо Копенхашките критеруми, за заморот на граѓаните и за Реформската агенда, како придобивка во моментот за државата, општеството и целокупното население.

– Во зависност од тоа каква политичка идеологија имате, претпоставувам секоја влада има своја матрица на приближување и остварување на таа цел, на таа стратешка цел. Владата што јас ја предводам има различен пристап споредено со претходната влада. Ние цениме дека пократок пат нема. Односно, има, но тој пократок пат има свои предизвици. Најчесто тие предизвици се понижувачки. И затоа велиме: ако треба да одиме по потешкиот пат, ќе одиме по потешкиот пат, но тоа место ќе го заслужиме со квалитет и со испорака, а не со тоа што ќе потпишуваме бели листови хартија. Бидејќи тие, на крајот, за идните генерации создаваат проблеми – рече Мицкоски.

Премиерот истакна дека кај граѓаните оваа недокажана приказна или недосонуван сон повеќе создава фрустрација, а не очајување или чувство да се откажеме. Додаде дека во јавните мерења се согледа дека поддршката за ЕУ интеграција горе-долу е константна и рече дека таа треба да остане константна, бидејќи тоа е стратешка цел.

– И затоа ние одлучивме да одиме по овој потежок пат. И тој потежок пат има своја цена. Затоа што најчесто бирократите ќе ви кажуваат што треба да направите. Бидејќи за нив тоа е „business as usual“, а за вас е сè. За вас е сè. Достоинството нема цена. И затоа велам нема пократок пат. Ќе трпите и навреди, и критики, и често пати невистини. Најчесто и измислици, но тоа е цената што морате да ја платите и да ја издржите. Бидејќи треба да верувате во тоа што го правите. Јас лично верувам дека овој потежок пат е поисправниот пат. Можеби е поспор, изобилува, како што реков, со предизвици, но нема друг пат. И затоа мора да докажеме дека сме најдобри, истакна Мицкоски.

Како Влада цениме дека покус пат до Европската Унија нема, односно има но тој е полн со предизвици, кои најчесто се понижувачки и поради тоа го избираме потешкиот пат.

Во однос на испораката за Реформската агенда, премиерот нагласи дека од 21 индикатор, 16 се успешно завршени и за тој период на мерење сме најдобри во групата на шесте земји од Западен Балкан. Додаде дека во јуни има ново мерење, на кое, како што рече работат интензивно за да го испорачаат. За утре најави подолг состанок преку видеоврска со директорот на Генералниот директорат за соседска политика и проширување на Европската комисија, Герт Јан Копман, кој како што рече, во принцип ги движи тие активности и истакна дека очекува дека ќе се приближиме до таканаречениот „front-runner“.

– Во случајов, има една изрека, една реченица што дел од бирократите дипломатски ја употребуваат, Црна Гора ја нарекуваат „front-runner“. Јас се сеќавам, ние бевме „front-runner“ таму некаде пред седум-осум години и беше прашање само да смениме име, презиме и сè останато, па само што не сме влегле внатре. Но еве, после 25 години, пак сме на истото место, на мака на која бевме пред 25 години. Затоа треба да веруваме во себе. Тешко е тоа. Малубројни сме. Тешко е дека некој ќе ве забележи ако немате исклучително вреден квалитет и успеси. Тешко е, не е лесно, но мора да издржите во името на генерациите од минатото и во името на генерациите што следуваат. И јас немам друг избор во моментот освен да издржам, но не да бидеме тврдоглави. Тоа не е добро. Да не бидеме тврдоглави. Да работиме, да испорачуваме. Акциски план за малцинства – испорачан, Реформска агенда – први во испорака. Мора квалитет да покажете. Тогаш и најголемите ќе признаат и ќе симнат капа и ќе речат: „Овие го заслужуваат местото, дај да не се глупираме со имиња, презимиња, устави и слични работи“ – нагласи премиерот.

За работата и улогата на „Македонија 2025“, Мицкоски рече дека како организација, идеја и визија е исклучително голема додадена вредност за својата татковина.

– Ценам дека бројките даваат одговор на сите дилеми, дека навистина контрибуцијата е одлична. Мислам дека можеби сега тоа што ни треба е поголема гласност во светските центри, поголема гласност во клучните светски центри во Европа, во САД, на другите континенти. Ние мораме да се бориме за нашата вистина. Ако ние не се бориме за нашата вистина, повторно ќе кажам, тоа не значи дека треба да сме тврдоглави, но ако не се бориме за нашата вистина и ако тоа храбро не го кажеме и аргументирано, за да звучи логично, тогаш ќе ја изгубиме битката. Многу поголеми народи и нации денеска немаат своја држава. Ние имаме своја држава и доаѓа времето кога тоа обединување на сите слоеви, на сите структури, на сите нас е потребно, за да бидеме погласни и да ја кажеме нашата вистина и да се бориме за нашата вистина. И мислам дека тука Македонија 2025, со својата мрежа, со својата веќе институционална меморија од 18 години, може да биде исклучително голем амбасадор за својата татковина и за граѓаните во Македонија. А ние, како Влада, се разбира, јас како претседател на Владата, стојам на располагање, нормално, доколку е потребно тоа, да помогнам во целиот тој процес, порача премиерот Христијан Мицкоски.

The post ПОКУС ПАТ ЗА ЕУ ИМА, НО ТОЈ Е ПОНИЖУВАЧКИ Оваа Влада го избира подолгиот и потешкиот appeared first on plusinfo.mk.

Иако физички се далеку од тука, нашинците во дијаспората и натаму се врзани за татковината, рече претседателката Гордана Сиљановска Давкова на приемот во пресрет на дводневниот традиционален самит на Македонија 2025 и ги врачи признанијата за придонес на припадниците на дијаспората.

Признанието во соработка со Македонија 2025 се доделува на истакнати личности од дијаспората за нивниот придонес во зачувување и афирмирање на македонските историски, културни и духовни традиции и вредности, како и за јакнење на националните и државни интереси и капацитети.

Претседателката им честиташе на годинешните добитници на признанието, д-р Ичак Калдерон Адижес, Елизабет Наумовски и Антонијо Трпевски, потенцирајќи дека со нивната работа во науката, бизнисот, културата, филантропијата и со поддршката на младите оставаат траен белег овде, но и ширум светот, а истовремено се и мотивација за идните генерации.

– Признавам, средбите со луѓето од македонската дијаспора во мене будат ем гордост ем тага. Од една страна, се радувам кога гледам успешни професори, лекари, инженери, научници, претприемачи и интелектуалци кои, со дисциплина и истрајност, изградиле респектабилни кариери. Но, од друга страна, ја замислувам македонската држава во растечка економска или друга соработка со нив или нивно физичко присуство тука – рече таа.

Според неа, имаме насушна потреба од соработка со дијаспората, не само во бизнисот, туку и во образованието, науката, културата и во спортот.

– Дијаспората денес не е хомогена структура, туку сложен простор составен од различни генерации, но со иста љубов кон татковината. Ме охрабрува фактот што сè повеќе млади луѓе, иако родени далеку одовде, изразуваат интерес за македонскиот јазик, култура и за традиција – рече претседателката.

Таа ја истакна важноста од досегашната соработка со Македонија 2025 преку проекти како „Охрид, кампот за високотехнолошка извонредност“, којшто им овозможува на младите да стекнуваат знаење, да развиваат критичко мислење, со што ќе бидат во чекор со новите технолошки предизвици.

– Вечерашниов настан е увертира во традиционалниот Самит на Македонија 2025, иницијатива што со години ги поврзува знаењето, лидерството, претприемништвото и меѓународното искуство. Во време на технолошки и геополитички промени, сè појасно станува дека напредокот на државите ќе зависи од нивниот институционален капацитет, од способноста да создаваат конкурентна економија, да користат вештачка интелигенција и дигитализација, од начинот на којшто ќе го развиваат, задржат и користат сопствениот човечки потенцијал – рече Сиљановска Давкова.

Додаде дека односот кон дијаспората не смее да остане само прашање на добра волја и повремени иницијативи, туку мора да прерасне во сериозна и долгорочна национална политика.

„Владата веќе ја усвои Националната стратегија за соработка со дијаспората, а во рамки на мојот Кабинет во завршна фаза е и формирањето на Советот за дијаспора, како тело што треба да овозможи активно вклучување и влијание на дијаспората во матичната земја“, најави претседателката.

The post ОДНОСОТ СО ДИЈАСПОРАТА МОРА ДА ПРЕРАСНЕ ВО НАЦИОНАЛНА ПОЛИТИКА Имаме насушна потреба од соработка со иселениците appeared first on plusinfo.mk.

„Македонија и покрај одреден напредок сè уште значително заостанува зад земјите членки на Европската Унија, поради што се неопходни длабоки реформи, побрз економски раст и поефикасни институции, изјави главната извршна директорка на „Македонија 2025“.

Ова беше дел од говор на Никица Мојсоска Блажевски, на денешниот брифинг со новинарите за претсојниот Самит 2026.

Таа информираше дека годинава Самитот „Македонија 2025“ има цел да понуди конкретни решенија и јасни пораки за економскиот и за  општествениот развој на земјата во однос на макроекономијата и економскиот раст, како и фокус на инвестициите, инфраструктурата и на лидерството.

Мојсоска Блажевски посочи дека иако податоците за странските инвестиции не се поволни, меѓународните анализи сепак препознаваат одреден исчекор на земјата кон инвестиции со поголема додадена вредност, што, според неа, треба да биде насоката и во иднина.

Во рамки на Самитот ќе се разговара и за инфраструктурниот развој, со учество на претставници на Владата и Министерството за транспорт и врски, а програмата ќе биде прилагодена на современите формати – со пократки и поинтерактивни сесии, интервјуа и директни разговори.

Блажевски најави дека програмата ќе опфати теми поврзани со лидерството, дигитализацијата и вештачката интелигенција, како и панели со говорници од корпоративниот, граѓанскиот и дипломатскиот сектор. Самитот ќе биде затворен со пораки од високи владини претставници.

Говорејќи за идните планови на организацијата, Мојсоска Блажевски нагласи дека „Македонија 2025“ влегува во нова стратешка фаза со стратегија до 2030 година, заснована на три клучни столба – економски развој, образование и лидерство, и дијаспората.

– Без економски раст не можеме да зборуваме за ништо друго. Но, исто толку важно е вложувањето во луѓето и поврзувањето со дијаспората, која претставува голем неискористен потенцијал за земјата – рече таа.

Организацијата, како што посочи, продолжува со соработката со Владата во неколку области, меѓу кои дигитализацијата, воспоставувањето национален научно-технолошки парк и развојот на услуги за дијаспората. Воедно, најави и промоција на нова дигитална платформа наменета за поврзување на дијаспората со Македонија.

Мојсоска Блажевски потенцираше дека „Македонија 2025“ е независна и непартиска организација, која критички, но конструктивно придонесува во јавниот дискурс, а сите вклучени работат на волонтерска основа.

Оваа година на самитот се очекуваат околу 700 учесници и над 300 компании вклучени во различни активности.

Самитот „Македонија2025“ е водечка регионална платформа која ги здружува глобалните бизнис лидери, креаторите на политики, инвеститорите, иноваторите и членовите на дијаспората за да ја обликуваат иднината на економскиот раст и лидерството во Југоисточна Европа.

The post БЕЗ ЕКОНОМСКИ РАСТ НЕ МОЖЕМЕ НИКАДЕ „Македонија 2025“ најави стратегија за развој, образование и за дијаспората appeared first on plusinfo.mk.

Фондацијата „Атанас Близнакоф“ објави отворен повик за доделување стипендии за студентска извонредност за редовни студенти запишани на прв циклус студии на Универзитетот „Св. Кирил и Методиј“ во Скопје, во академската 2025/2026 година.

Стипендиите се наменети за студенти кои покажале исклучителни резултати во средното образование, имаат потенцијал за личен и професионален развој, но истовремено се соочуваат со финансиски пречки за продолжување на образованието.

Износот на стипендијата изнесува 2.500 (две илјади и петстотини)  американски долари во денарска противвредност и се исплаќа еднаш годишно, на почетокот на академската година.

Право на пријавување имаат сите ученици кои:

• ќе се запишат како редовни студенти во прва година на студии при Универзитетот „Св. Кирил и Методиј“ – Скопје;
• имаат завршено средно образование со просечен успех од најмалку 4.0;
• не користат друга стипендија повисока од 6.000 денари;
• се државјани на Република Северна Македонија;
• чии вкупни семејни бруто приходи не надминуваат 800.500 денари за 2024 година.

Апликацијата се пополнува електронски на платформата за стипендии на Македонија2025: https://e-scholarship.macedonia2025.com, каде кандидатите ќе можат да ги прикачат потребните документи и да ги следат сите инструкции.

Процесот на селекција се заснова на јасни критериуми и вклучува автоматско бодување преку платформата, како и проценка на есеј и интервју од страна на комисија составена од претставници на Фондацијата „Атанас Близнакоф“ и Македонија2025. Кандидатите кои ќе ги исполнат условите и ќе бидат најдобро рангирани, ќе бидат информирани до крајот на октомври 2025 година.

Преку оваа програма се овозможува пристап до висококвалитетно образование за најталентираните млади во земјата. Програмата не претставува само финансиска поддршка, туку е вистинска инвестиција во целосниот потенцијал на идните лидери на Македонија.

Стипендистите добиваат можност да се вклучат во дополнителни активности како индивидуално менторство со истакнати професионалци, тренинзи за развој на меки вештини, обуки за кариера и лидерство, како и практикантства во реномирани компании и организации. Програмата овозможува полесен и посигурен премин од академските студии кон професионалната кариера.

Фондацијата МК2025 изразува длабока благодарност до Фондацијата „Атанас Близнакоф“ за континуираната поддршка на студентската извонредност

Краен рок за аплицирање: 30 август 2025 година (до 23:59 часот).

За повеќе информации, инструкции и листа на потребна документација:
 https://e-scholarship.macedonia2025.com

The post ГОДИШНА СТИПЕНДИЈА ОД 2.500 ДОЛАРИ ЗА СТУДЕНТИ Фондацијата „Атанас Близнакоф“ објави повик за стипендии за учебната 2025/2026 година appeared first on plusinfo.mk.

Над 250 основци од училиштето „Љубен Лапе“, но и од неколку училишта од општина Аеродром, присуствуваа на Регионалниот Саем за наука организиран од Македонија2025 и поддржан од Џонсон Мети. Во заедничкото соопштение на двете компаниии се вели дека „денеска, поливалентниот простор на основното училиште „Љубен Лапе“ во Скопски Аеродром беше преполн со енергија, љубопитност и научна креативност“.

Саемот беше организиран во рамки на проектот „Науката и Јас“ и собра над 50 ученици-презентери од седум основни училишта (Скопје, н.Драчево, с. Отља – Липково и Кичево).

„Тие со голема посветеност ги споделија своите научни проекти и експерименти пред публиката. Преку интерактивни презентации и практични експерименти, учениците ги претставија резултатите од својата работа во областа на природните науки – географија, биологија, хемија и физика – инспирирајќи ги своите врсници и поттикнувајќи љубопитност и интерес за науката“, се вели во написот.

Настанот беше дополнително збогатен со демонстрација на научни експерименти од страна на претставници на Џонсон Мети, кои, како што се вели во соопштението, „го приближија светот на науката до учениците на интерактивен и инспиративен начин“.

Со воведни обраќања се обратија претставници на Џонсон Мети, Македонија2025, градоначалникот на општина Аеродром и директорката на училиштето „Љубен Лапе“ од Аеродром.

Саемот за наука е дел од поширокиот проект „Науката и Јас“, кој во изминатите две години опфати над 100 помлади наставници по природни науки од различни училишта и досега вклучи околу 3500 ученици од цела Македонија. Проектот е поддржан од Џонсон Мети програмата за поддршка на заедницата и се реализира во партнерство со Министерството за образование и наука и Бирото за развој на образованието.

„Менторството меѓу наставниците беше клучен сегмент на овогодишната програма – создадени се менторски парови, каде поискусни наставници ги поддржуваа своите помлади колеги во подготовката и реализацијата на наставата, како и во подготовката на учениците за научните саеми. Оваа соработка ја поттикна размената на искуства, знаења и иновативни пристапи во наставата и ја зајакна заедницата на наставници по природни науки“, велат од Македонија2025 и од Џонсон Мети.

Според организаторите, „настанот уште еднаш ја истакна важноста на заедничката работа помеѓу јавниот, приватниот и граѓанскиот сектор за подобрување на образованието во Македонија. Заедничките вложувања во научната писменост на младите се клуч за иднината на нашето општество“.

Проектот „Науката и Јас“ продолжува со нови активности и научни авантури. Организаторите ја канат јавноста на следниот Регионален Саем за наука, кој ќе се одржи на 3 јуни 2025 година, со почеток во 12 часот, во поливалентниот простор на ОУ „Гоце Делчев” во Прилеп.

The post 📷 МАКЕДОНИЈА 2025 СОБРА НАД 250 УЧЕНИЦИ НА РЕГИОНАЛНИОТ САЕМ ЗА НАУКА Училиштето „Љубен Лапе“ беше преполно со креативна енергија appeared first on plusinfo.mk.

Во процес е формирање на Совет за дијаспората како институционален облик на соработка и постојана комуникација со дијаспората, којашто ќе овозможи нејзина интеграција во македонските работи, рече денеска претседателката Гордана Сиљановска-Давкова на традиционалниот самит „Македонија 2025“.

Таа ги врачи признанијата, кои им се доделуваат на истакнати личности од дијаспората за нивниот придонес во економскиот развој, здравството, социјалната сфера, образованието, науката, културата и во други области. За исклучителна научна работа признание доби д-р Светлана Мојсов, светски позната професорка на Универзитетот Рокфелер во Њујорк, која остави длабок и траен белег врз модерната медицина. Признание за извонредната поддршка и медицинска помош доби Хуманитарното здружение „ЛецКер а.с,б.л.“ (LetzCare a.s.b.l.) од Луксембург, а наградата ја прими неговиот претседател Сафет Алили. Претседателката рече дека очекува ова признание да инспирира и многу други нашинци на правење хумани дела, особено важни за најранливите сограѓани.

Сиљановска-Давкова истакна дека давањето признание на личности и организации од дијаспората е етички и морален чин на вреднување на добрите дела и докажување на нераскинливото заедништво со нив.

– Со „Македонија 2025“ споделуваме иста визија: да станеме компетитивен регионален економски играч, да имаме енергетска сигурност, да бидеме држава со успешен образовен и научен систем, поврзан со вештачката интелигенција и дигитализацијата, да градиме еколошка и правна држава, со силно граѓанско општество и демократска јавност – рече претседателката.

Укажувајќи на светскиот и европскиот амбиент на неизвесност од секаков тип, од мировен до еколошки, таа ја нагласи потребата од соработка, единство и зацврстување на односите со дијаспората во сите сфери, интегрирајќи ја во македонското општество.

– Зачекоривме во 2025 и оваа година е вистинскиот момент за евалуација на резултатите и на дострелите на „Македонија 2025“, во предвечерието на Сизифовската работа којашто нè очекува во остварувањето на Реформската агенда и Планот за раст. За реформи е потребен домашен политички договор, но и договор со ЕУ и со нашите стратешки партнери, како и со дијаспората заради нејзината докажана креативност и капацитет во острата конкуренција во меѓународниот економски поредок, но и во културниот натпревар на државите, нациите и на поединците. Се разбира, наша најголема национална обврска е да си го чуваме, браниме и негуваме националниот идентитет и неговиот интегритет и дигнитет. Да не се откажуваме од етичките вредности и принципи, да ги почитуваме, ако сакаме да се повикуваме на нив, кога другите ги кршат кон нас. Да не го забораваме општото добро – рес публица и да не го жртвуваме за личните и за колективните интереси – рече Сиљановска Давкова.

Ние сме во нераскинлива врска со дијаспората, без разлика дали е од првата, втората или третата генерација, додаде таа.

– Како мала држава, со повеќе луѓе надвор, одошто дома, енергетски зависна и економски упатена кон регионалниот, европскиот и светскиот пазар, имаме насушна потреба од динамични и блиски врски со нашинците во странство. Веќе реков, без разлика за која генерација станува збор, врските мора да се негуваат, да се шират и да се продлабочуваат. На генерациите родени и школувани далеку од земјата на нивните предци, не е доволно да им се доближи татковината како историја, како мит или како легенда, туку како вистинска, жива, реална приказна со светла и сигурна иднина. Се разбира, не треба да западнеме во илузионизам и да забораваме дека нашинците имаат две татковини, ниту да негуваме стереотипи: позитивни или негативни – рече таа.

Реалноста покажува дека заемната соработка дава плодови тогаш кога придобивки од неа имаат сите инволвирани и засегнати страни и субјекти, додаде претседателката.

– На крајот, би сакала да ви предочам дека Кабинетот е во процес на формирање Совет за дијаспора како институционален облик на соработка со неа, како мост и канал за постојана комуникација со дијаспората. Јас, лично, но и мојот Кабинет ви стоиме на располагање за промоција, поврзување, посредување, презентирање, консултирање, информирање, поддржување и за интегрирање со домашните субјекти од различен тип и во различни области. Сакам да ја споменам нашата работа на Дигиталниот регистар на најуспешните во дијаспората, како неопходна алатка за поврзување, вмрежување и стратешко вклучување на дијаспората во развојните процеси во татковината. Со неа целиме кон мапирање на научниците и експертите, политичките и бизнис-лидерите, културните и спортските дејци како вреден потенцијал и извор на ум, знаење, вештини и искуство, неопходни за креирањето програми и политики. Се разбира, соработката со „Македонија 2025“ ќе продолжи во започнатите проекти, како што е традиционалниот „Охрид камп за високотехнолошка извонредност“, којшто е доказ дека соработката е можна, корисна и посакувана од најраната возраст, оти младите се нашата иднина во која треба да инвестираме – рече претседателката Гордана Сиљановска Давкова.

The post НЕРАСКИНЛИВАТА ВРСКА СО НАШИНЦИТЕ НИЗ СВЕТОТ МОРА ДА ЈАКНЕ Претседателката Сиљановска Давкова најави формирање Совет за дијаспората appeared first on plusinfo.mk.

„Со финални презентации на иновативни бизнис-идеи и нетворкинг настан со алумни-заедницата, успешно заврши седумнаесеттото издание на „Лидер Проектот“ – врвна бизнис обука организирана од Македонија2025, наменета за млади професионалци, идни менаџери и претприемачи од целата земја“.

Вака соопштија од Македонија 2025 за настанот кој се реализираше во соработка со реномираната бизнис-школа „Ричард Ајви“ од Канада и, како што се велат од Македонија 2025, „се темели на најдобрите глобални практики во деловното управување, адаптирани на локалниот контекст и предизвици“.

Во текот на две недели, учесниците интензивно работеа на теми од стратегија, финансиско управување, маркетинг, развој на производ, човечки ресурси и лидерство, преку анализа на реални деловни студии на случај, симулации и практични задачи. Обуката вклучи и индивидуална менторска поддршка од искусни канадски предавачи.

Круна на програмата беше натпреварот за најдобра бизнис-идеја, на кој учесниците ги претставија своите концепти пред жири составено од етаблирани македонски бизнис-лидери.

„Жирито ги оценуваше идеите според иновативност, одржливост и пазарен потенцијал, а самите презентации претставуваа одлична можност за примена на стекнатите знаења во реален контекст. По завршувањето на официјалниот дел, се одржа и нетворкинг настан со членови на алумни-заедницата на ‘Лидер Проектот’ што овозможи поврзување, размена на искуства и иницирање на нови соработки меѓу младите професионалци“, велат од Македонија 2025.

Од компанијата порачуваат дека „преку оваа врвна бизнис обука, Македонија 2025 останува посветена на градењето на нови генерации млади лидери и претприемачи, подготвени да придонесат за економскиот развој и иновативноста на Македонија“.

The post ЗАВРШИ 17. ИЗДАНИЕ НА „ЛИДЕР“ ПРОЕКТОТ НА МАКЕДОНИЈА 2025 Беа обучени млади претприемачи appeared first on plusinfo.mk.