Горан Баре, еден од најзначајните и најавтентични рок-музичари од регионот и фронтмен на култната хрватска група „Мајке“, почина на 61-годишна возраст. Неговата смрт доаѓа само неколку недели по вознемирувачките сцени на концертот во Макарска, кога не успеа да ја отпее ниту првата песна и со помош на членовите на екипата мораше да ја напушти сцената.

Според хрватските медиуми, членовите на бендот Марио Рашиќ и Ален Тибљаш го пронашле Баре без знаци на живот во неговиот стан. Тие изјавиле дека во последните пет години се обидувале да го убедат да побара лекување за здравствените проблеми, но без успех. Засега не е објавена официјална причина за смртта.

Последниот концертен инцидент се случи на 20 септември, на фестивалот „Модро и зелено“ во Макарска. Баре излезе на сцената со „Мајке“, но настапот беше прекинат речиси веднаш. Публиката го испрати со аплауз, а бендот подоцна соопшти дека не се чувствувал добро и дека следува двомесечна пауза за одмор и закрепнување. Тогаш најавија враќање на сцената во декември.

„Не ми е жал за ништо. Сè е тоа живот“

Кон крајот на август, непосредно пред концертот во загрепската Шалата, Баре даде едно од последните интервјуа за „Индекс“. Во него зборуваше за музиката, за новите песни и за луѓето што му биле најголема поддршка.

– Всушност, не ми е жал за ништо. Не би сакал никој да ги доживее работите што ги доживеав јас, но и тоа е живот. Тој е и тага и плачење, и смеење и глад, и ситост и дебелеење. Сè е тоа живот и од ништо не треба да се срамиш – рече Баре во интервјуто.

Тој тогаш објасни и дека настапувањето му дава смисла на животот. „Во овие денови смисла ми дава да излезам на сцена и на публиката да ѝ кажам: Добро вечер. Тоа е единствената смисла на моето постоење. Единствено создавањето песни, нивното споделување и изведување ми носи задоволство – изјави музичарот.

За „Мајке“ зборувал со посебна нежност, признавајќи дека без нив не би можел да го замисли животот.

– Да ги нема нив, немаше да ме има ни мене. Не гледам никаква радост без нив. Тие ми се најдобри пријатели и луѓето што единствени ме разбираат – рекол тој. Во истото интервју признал дека во минатото бил тежок човек и дека членовите на бендот со години го трпеле додека се борел со сопствените проблеми.

Живот обележан со загуби и самоуништувачки периоди

Зад неговиот препознатлив глас, жестоките настапи и песните исполнети со болка стоеше животна приказна обележана со тешки загуби. Во 1995 година, неговата сопруга Мирјана починала од предозирање. Нивниот син Миран тогаш имал само една година. Баре подоцна раскажувал дека ја пронашол сопругата мртва покрај себе, искуство што длабоко го потресло. По нејзината смрт се соочувал со сериозни психички тешкотии и зависност.

Односот со синот со години бил нарушен, а Миран дел од детството го поминал кај баба му и дедо му. Баре во 2022 година зборувал за нивната оддалеченост и за болката што ја чувствувал поради тоа, но подоцна открил дека повторно воспоставиле контакт. И покрај сè, секогаш истакнувал колку е горд на синот, кој завршил два факултета.

За Мајке и кариерата

Баре ја основаше групата „Мајке“ во средината на осумдесеттите години, а бендот со текот на времето стана едно од највлијателните имиња на хрватската рок-сцена. Неговиот глас и авторскиот израз оставија белег во песни како „Тешки бои“, „Мене не ме интересира“, „Време е да се тргне“ и „Биди горд“.

Првиот албум на „Мајке“, „Разум и безумље“, излезе во 1990 година. Кариерата на бендот беше прекинувана и повторно обновувана, но Баре продолжи да создава и да настапува, претворајќи ги личните падови и болки во музика што допре до генерации слушатели.

Во последното интервју зборуваше и за две нови песни, „Ноќта е мојот ден“ и „Праисконски пламен“, со кои бендот настапил во Шалата, и за материјалот што го подготвувале за нов албум. Неговата желба да создава не згаснала до крајот.

Горан Баре останува запаметен како музичар кој никогаш не се обидуваше да ја разубави сопствената приказна.

The post ПОЧИНА ГОРАН БАРЕ, ЛЕГЕНДАРНИОТ ФРОНТМЕН НА „МАЈКЕ“ Во последното интервју пејачот зборуваше дека не жали за ништо appeared first on plusinfo.mk.