Израелската армија (ИДФ) уби бремена Палестинка во осми месец за време на напад на бегалскиот камп Нур Шамс во близина на Тулкарем, на окупираниот Западен Брег, соопшти денеска палестинското Министерство за здравство, објави Франс 24.

Во соопштението се додава дека сопругот на убиената е тешко ранет во израелскиот напад кој започна рано утринава.

23-годишната идна мајка била мртва кога пристигнала во локалната болница, соопшти Министерството.

„Медицинските тимови не можеа да го спасат животот на бебето поради окупацијата (од израелската војска) спречувајќи ги повредените да бидат префрлени во болница“, се вели во соопштението на Министерството.

Израелската војска изјави дека го разгледува тврдењето дека трудницата била убиена од израелски оган.

Инцидентот се случил околу зори, според изјавата на членот на народниот комитет во кампот, Мурад Алијан.

– Двајцата се обидуваа да го напуштат кампот пред да стигнат окупаторските сили во него. Тие беа застрелани додека беа внатре во нивниот автомобил, а сопругата со нејзиното бебе беше мачена, додека, пак, сопругот беше повреден – рече Алијан.

Израелските сили ја продолжуваат повеќенеделната воена операција на северниот окупиран Западен Брег, гаѓајќи ги бегалските кампови Џенин, Тулкарем и Фара.

Во нападите загинаа десетици Палестинци и неколку илјади раселени, додека делови од кампот и клучната инфраструктура беа уништени со булдожери, јави Ал Џезира, пренесе Танјуг.

The post ИЗРАЕЛСКАТА ВОЈСКА УБИЛА БРЕМЕНА ПАЛЕСТИНКА Младата идна мајка била мртва кога пристигнала во болница appeared first on plusinfo.mk.