Со новите законски решенија за урбанистичко планирање и градење, надмината е досегашната правна празнина и создадена е рамка за изградба на дата центри во државата. Иако сè уште нема конкретни иницијативи од приватниот сектор, државата сериозно размислува за изградба на државен дата центар со цел заштита на институциите и зголемување на сајбер безбедноста, посочи министерот за транспорт и вицепремиер Александар Николоски денеска по увидот во реконструираната улица Лазар Димитров во општина Кисела Вода.

Одговарајќи на новинарски прашања за локациите на овие центри и усогласувањето на подзаконските акти, тој нагласи дека примарната цел е да се фати чекор со светските трендови во оваа област, која досега воопшто не била регулирана.

– Сакавме да фатиме чекор со времето, имајќи предвид дека ова е она што го прави светот, бидејќи кај нас законската регулатива воопшто го немаше предвидено. Бевме во една сива зона, ниту беше забрането, ниту беше дозволено и сметавме дека е добро да ја уредиме оваа материја. Досега од приватен инвеститор не дошла иницијатива за ваква инвестиција. Се надевам дека ќе дојде во следниот период. Инвестицијата може да е државна и може да е приватна. Мислам дека е паметно за Македонија во идниот период да размислува за една државна инвестиција за да ги заштитиме државните институции. Се сеќавате што се случуваше на пример со Фондот за здравство пред некоја година. Така што од безбедносни причини мислам дека е паметно за нас како држава да се заштитиме и да имаме систем којшто целосно го контролира – посочи Николоски.

Во однос на обезбедувањето на просторот и начинот на реализација, Николоски појасни дека пристапот ќе зависи исклучиво од тоа дали станува збор за државен или за приватен проект.

– Доколку правиме таков државен дата центар, тогаш секако локацијата ќе ја обезбеди државата. А доколку се работи за приватна инвестиција, тогаш целокупната инвестиција и во купување на земјиште и во урбанизација ќе биде на приватниот инвеститор. А како што кажав досега немаме таков инвеститор, што значи дека и ние кога го носевме законот, иако знам дека остави кај некој впечаток дека наменски го носиме, не го носевме наменски, туку сакавме да создадеме правна рамка за потенцијални и инвеститори и инвестиции. Дали тие ќе дојдат за една година, за пет или за десет… Ние сега рамката ја имаме – вели Николоски.

Прашан дали идејата е ваквата инфраструктура да биде наменета за државната администрација и за образовните институции за поевтино користење, тој истакна дека процесот би требало да биде во надлежност на Министерството за дигитализација, потенцирајќи ја неопходноста од организиран безбедносен систем наместо досегашната практика на изнајмување ресурси.

– Мое мислење е, секако на ниво на Влада треба да донесеме одлука дека процесот би го водело Министерството за дигитализација, но мислам дека е паметно да размислуваме во оваа насока, затоа што сега ние сите изнајмуваме, а изнајмуваме најчесто од Мајкрософт или Телеком. Начелно тоа е во ред, но никогаш не се знае, повторувам, знаете што се случи со Фондот за здравствено осигурување, а имаше и одредени други такви ситуации. Дел институции сами прават заштита и нема еден организиран систем. Така што е паметно како држава, безбедноста не е само во војска и во полиција, туку е и тука да ние се заштитиме. Со ова веќе имаме правна рамка да се заштитиме како држава – рече Николоски.

The post ИДЕЈАТА Е ДРЖАВЕН ДАТА ЦЕНТАР ДА ГИ ШТИТИ ИНСТИТУЦИИТЕ Правна рамка за градење има, инвестицијата може да биде и приватна appeared first on plusinfo.mk.

Познатиот милијардер Бил Гејтс изјави дека сексуалниот престапник Џефри Епстин се обидел да го уценува со чувствителни информации од неговиот приватен живот.

– Никогаш не сум бил сведок ниту имал индикации дека Епстин бил вклучен во тековни криминални активности. Никогаш не сум бил на неговиот остров, ранч или дом во Флорида. Никогаш не сум жртвувал никого – изјавил Гејтс сведочејќи пред Комитетот за надзор на Претставничкиот дом на САД.

Според неговиот исказ, Епстин подоцна дознал информации за неверството на Гејтс во бракот со Мелинда Френч Гејтс.

„Се обиде да ме принуди“

Гејтс тврди дека Епстин се обидел да ги искористи тие информации за повторно да воспостави соработка.

– Како што јавноста сега може да види од објавените документи, Епстин се обиде да ги искористи информациите за моето неверство, заедно со многуте лаги што ги изгради врз нив, за да ме принуди повторно да соработувам – навел Гејтс во својата изјава.

Тој додал дека обидот не успеал, но покажал како Епстин ги користел контактите со влијателни луѓе за свои цели.

Средбите почнале во 2011 година

Гејтс изјавил дека првите средби со Епстин ги имал во 2011 година.

Според него, мотивот бил обид преку неговите контакти да обезбеди поддршка за глобални здравствени проекти и филантропски иницијативи.

– Фокусот секогаш беше на фактот дека тој познавал многу богати луѓе и тврдеше дека може да ги натера да донираат пари за глобалното здравство. Гледано од денешна перспектива, тоа беше ќорсокак – изјавил Гејтс.

Случај што продолжува да отвора прашања

Односот меѓу Гејтс и Епстин повторно дојде во фокусот по објавувањето на документи поврзани со случајот.

Комисијата се обидува да утврди дали Епстин користел компромитирачки информации за влијателни личности и дали преку такви методи градел мрежа на влијание.

The post ЕПСТИН СЕ ОБИДЕ ДА МЕ УЦЕНУВА, ВЕЛИ БИЛ ГЕЈТС Престапникот знаел кој е најголемиот „грев“ на милијардерот appeared first on plusinfo.mk.

Иранската револуционерна гарда во вторник соопшти дека ќе ги нападне американските компании во регионот почнувајќи од 1 април како одмазда за нападите врз Иран, објавија државните медиуми.

Меѓу 18-те компании наведени во заканата на ИРГК се „Microsoft“, „Google“, „Apple“, „Intel“, „IBM“, „Tesla“ и „Boeing“.

„Овие компании треба да очекуваат уништување на нивните единици во замена за каков било терористички чин во Иран, почнувајќи од 20 часот по техеранско време во среда, 1 април“, се вели во соопштението на ИРГК.

ИРГК изјави дека американските компании за информатичка технологија и вештачка интелигенција ќе бидат нејзина цел бидејќи тие се „главен елемент во дизајнирањето и следењето на целите“ во Иран.

„Им советуваме на вработените во овие институции веднаш да ги напуштат своите работни места за да ги заштитат своите животи. Жителите околу овие терористички компании во сите земји во регионот, исто така, треба да ги напуштат своите простории во радиус од еден километар и да одат на безбедно место“, се вели во соопштението.

The post „ЗАПОЧНУВАМЕ НА 1 АПРИЛ ВО 20:00 ЧАСОТ!“ Иран најавува напади врз 18 американски гиганти, мета се „Microsoft“, „Google“, „Apple“….. appeared first on plusinfo.mk.

Американскиот милијардер и коосновач на „Мајкрософт“, Бил Гејтс, во својата нова книга открил детали од својата младост за кои досега молчел. Со невообичаена искреност, Гејтс опишува како неговиот долгогодишен пријател со кого ја основале компанијата, Пол Ален, го вовел во светот на експериментирање со дрога, алкохол и рок музика.

„Човеков беше проблем“

Гејтс раскажал дека токму Ален бил човекот кој првпат му понудил алкохол, му дал да запали џоинт и го натерал да слуша Џими Хендрикс.

– Ме напи, ми даде џоинт. Овој човек беше проблем… Џими Хендрикс! Мислам, тој ме тераше да ја слушам таа музика – вели Гејтс во книгата, алудирајќи на слободоумната младост што ја делеле.

Иако неговите родители се залагале за дисциплина и образование, Пол Ален, како што пишува Гејтс, го охрабрувал да го тестира животот, понекогаш и преку опасни искуства.

Експерименти со ЛСД и младешки ризици

Авторот признава дека пробал ЛСД неколку пати, почнувајќи уште во тинејџерските години. Тој искрено додава дека овие искуства биле дел од неговата рецесија на авторитетот и потрага по идентитет, но дека на дваесетгодишна возраст целосно се откажал.

– Сфатив дека менталната јасност ми е поважна од привидните визии – наведува Гејтс, истакнувајќи дека денес со резерви гледа на тоа време.

Во разговор за списанието „Пипл“ во јануари 2025 година, Гејтс додал дека ова експериментирање не произлегло од порок, туку од љубопитност и желба за ризик, истата која подоцна му помогнала да гради технолошка империја.

Стив Џобс му предложил да земе халуциногени

Интересно е што Гејтс открил дека и неговиот некогашен ривал, коосновачот на „Епл“, Стив Џобс, еднаш му рекол дека требало да проба халуциногени дроги, убеден дека тие „ги прошируваат креативните хоризонти“.

Гејтс, сепак, тврди дека токму одбивањето на тој пат му ја зајакнало трезвеноста и аналитичноста, две особини кои го дефинирале како бизнисмен и филантроп.

Иако во јавноста често се појавува како рационален технократ кој има 118 милијарди долари на сметката, новата книга покажува сосема поинаков лик – човек кој отворено зборува за грешките и заблудите од младоста.

The post БИЛ ГЕЈТС ПРИЗНА, ПРОБАЛ ЛСД СО КООСНОВАЧОТ НА „МАЈКРОСОФТ“ И Стив Џобс му рекол да проба халуциногени дроги appeared first on plusinfo.mk.

Технолошките компании „Мета“, „Алфабет“ и „Мајкрософт“ инвестираат огромни суми пари во развојот на вештачката интелигенција, во трката за доминација на пазарот кој доживува вистински бум и ја зголемува вредноста на нивните акции на рекордни нивоа.

Финансиските извештаи објавени вчера покажуваат дека овие компании издвојуваат високи суми за сè, од центри за податоци до најновите чипови.

„Мета“ објави дека нејзините капитални расходи за 2025 година ќе бидат помеѓу 70 и 72 милијарди долари, повисоки од претходните проценки. Нејзините расходите во 2026 година ќе бидат „значително повисоки“ од оваа година, бидејќи „Мета“ се обидува да ги стигне лидерите како „ОпенАИ“.

Шефот на „Мета“, Марк Закерберг, ги бранеше инвестициите на компанијата, истакнувајќи ги огромните можности што ги носи вештачката интелигенција – и во развојот на нови производи и во подобрувањето на рекламниот бизнис.

-Правилното нешто што треба да се направи е да се забрза ова. Моментално, нашиот бизнис за апликации и рекламирање работи во услови на постојан недостаток на компјутерска моќ – изајви тој.

„Алфабет“ исто така ја зголеми својата прогноза за трошоци за оваа година – на помеѓу 91 милијарда и 93 милијарди долари. Тоа е речиси двојно повеќе од капиталните расходи што ги имаше компанијата во 2024 година.

Ни „Мајкрософт“ не заостанува многу. Нивните капитални расходи во третиот квартал достигнаа 34,9 милијарди долари. Тоа е значително повеќе од очекувањата на аналитичарите и скок од 24 милијарди долари во претходниот квартал.

– Продолжуваме да ги зголемуваме инвестициите во вештачка интелигенција – во капитал и во талент – за да ја искористиме огромната можност што претстои – рече извршниот директор на Мајкрософт, Сатја Надела.

Тој додаде дека Азур, одделот за cloud computing на Мајкрософт и другите производи за вештачка интелигенција веќе имаат „вистинско влијание“.

Еуфоријата на инвеститорите околу масовните расходи за вештачка интелигенција им помогна на акциите на сите три компании да го надминат поширокиот индекс S&P 500. Но, Волстрит сега е фокусиран на клучно прашање: кога тие инвестиции ќе почнат да носат вистински резултати.

The post КОЈ ЌЕ ДОМИНИРА НА ПАЗАРОТ СО ВЕШТАЧКА ИНТЕЛИГЕНЦИЈА? „Мета“, „Алфабет“ и „Мајкрософт“ инвестираат десетици милијарди долари во нејзиниот развој appeared first on plusinfo.mk.

По вторпат во Македонија, здружението АРНО и Центарот за поправки „Ништо ново“ ќе го одбележат Светскиот ден на поправки, кој оваа година се одржува на 18 октомври на тема „застарување (обсолесценција) на софтвер“.

Темата за оваа година е особено значајна, бидејќи само неколку дена пред Светскиот ден на поправки, Microsoft ја прекина поддршката за Windows 10, оставајќи повеќе од 400 милиони компјутери ширум светот без ажурирања и безбедносна поддршка. Ова, според европската иницијатива Right to Repair Europe, претставува класичен пример на „софтверска обсолесценција“ — моментот кога функционални уреди се
отпишуваат поради прекин на софтверска поддршка, што води до драматичен раст на електронски отпад (700 милиони кг дополнителен е-отпад) и непотребни трошоци за граѓаните и институциите.

Во овој контекст, АРНО и Центарот „Ништо ново“ повикуваат граѓани, наставници, млади и сите заинтересирани да се пријават на онлајн работилницата „Како да го одржуваш твојот компјутер – практични совети и трикови“, која ќе се одржи на 20 октомври (понеделник) во 18:00 часот, онлајн, на платформата ZOOM.

Работилницата ќе ја води Проф. Д-р Бобан Јоксимоски од Факултетот за информатички науки и компјутерско инженерство (ФИНКИ). Учесниците ќе добијат конкретни насоки и алатки за одржување на софтверот, оптимизација на системите и безбедно користење на постари уреди. Учеството е бесплатно, преку регистрирање на овој линк.

Покрај онлајн програмата, во Центарот за поправки „Ништо ново“ ќе се одржи и креативна работилница за шиење со модната дизајнерка Ирина Тошева, каде учесниците ќе создаваат футроли за лаптопи и таблети од стар текстил.

Оваа активност симболично ги спојува темите на дигитален и текстилен отпад и покажува дека поправките можат да биде и корисни, и креативни.

Во исто време, меѓународна коалиција на експерти за циркуларна економија и дигитални права ги повикува Microsoft и европските институции да ја продолжат бесплатната и автоматска поддршка за Windows 10.

Организации од целиот свет можат да го потпишат отвореното писмо за поддршка на овој линк.

– Минатата година првпат го одбележавме Денот на поправки со донации и поправка на играчки. Годинава фокусот е на софтвер и дигитален отпад, па организираме онлајн предавање. Се приклучуваме и кон апелите до Европската комисија за обврзни правила за еко-дизајн и продолжена поддршка на производите најмалку 15 години – изјави Антонио Даниловски, координатор на ЕИЦЕЕ проектот и менаџер на Центарот за поправки „Ништо ново“

Светскиот ден на поправки е глобална иницијатива што ги охрабрува заедниците да преземат конкретни чекори против културата на фрлање и непотребното купување нови уреди. Според податоците на Open Repair Alliance, само во 2024 година се одржале над 2.000 настани во 40 земји, на кои биле поправени околу 190.000 уреди. Со организирањето на овие активности, АРНО продолжува да ја развива културата на поправки во Македонија и да создава можности за учење, споделување знаење и активно учество на граѓаните во циркуларната економија.

Активностите се спроведуваат во рамки на кампањата Breath Cleаn која е дел од проект финансиран од Германската Сојузна Влада преку Поддршката за климатски дијалог во рамките на Регионалното климатско партнерство со Западен Балкан, наложена од Сојузното министерство за економска соработка и развој (Bundesministerium für wirtschaftliche Zusammenarbeit und Entwicklung (BMZ)) и спроведена од Deutsche Gesellschaft für Internationale Zusammenarbeit (GIZ North Macedonia) GmbH.

The post ТЕМАТА НА ГОДИНЕШНИОТ СВЕТСКИ ДЕН НА ПОПРАВКИ Е ЗАСТАРУВАЊЕТО НА СОФТВЕР Од прекин на софтверска поддршка до отпишување на функционални уреди и непотребен раст на електронски отпад appeared first on plusinfo.mk.

Мајкрософт изгради медицинска алатка со вештачка интелигенција за која тврди дека е четири пати поуспешна од човечките лекари во дијагностицирањето на сложени заболувања, бидејќи технолошкиот гигант открива истражување за кое верува дека би можело да го забрза третманот.

„Дијагностичкиот оркестар на вештачка интелигенција на Мајкрософт“ е првата иницијатива што произлегува од здравствената единица за вештачка интелигенција формирана минатата година од Мустафа Сулејман, со персонал од ДипМајнд, истражувачката лабораторија што тој ја ко-основаше и која сега е во сопственост на конкурентот Гугл.

Во интервју за Фајненшл тајмс, извршниот директор на Мајкрософт вештачка интелигенција рече дека испитувањето е чекор на патот кон „медицинска суперинтелигенција“ што би можела да помогне во решавањето на кризите со вработување и долгото време на чекање за преоптоварените здравствени системи.

Новиот систем на Мајкрософт е поткрепен од таканаречен „оркестратор“ кој создава виртуелни панели од пет агенти на вештачка интелигенција кои дејствуваат како „доктори“ – секој со посебна улога, како што е измислување хипотези или избор на дијагностички тестови – кои комуницираат и „дебатираат“ заедно за да изберат тек на дејствување.

Доминик Кинг, поранешниот раководител на здравствената единица на ДипМајнд, кој се приклучи на Мајкрософт кон крајот на минатата година, рече дека програмата „се покажала подобро од сè што сме виделе досега“ и дека „денес постои можност да се дејствува речиси како нова влезна врата кон здравствената заштита“.

The post ВЕШТАЧКИОТ „СУПЕРДОКТОР“ НА МАЈКРОСОФТ ВРЕДИ КОЛКУ ПЕТ ВИСТИНСКИ Голем пробив на вештачката интелигенција во медицината appeared first on plusinfo.mk.

„Мајкрософт“ (Microsoft) најави дека ќе отпушти уште неколку илјади вработени, откако во мај подели откази на 3% од вработените на сите нивоа и географски подрачја. Компанијата најави и намалување на одредени хиерархиски нивоа.

„Тоа ќе биде помалку од 4% од работната сила односно отказ ќе добијат околу 9.000 вработени. Продолжуваме да ги спроведуваме организациските промени потребни за поволно позиционирање на компанијата и нејзините тимови во променливата пазарна средина“, се наведува во соопштението на „Мајкрософт“.

Намалувањето на бројот на вработени најверојатно е предизвикано од примената на вештачката интелигенција (ВИ).

„Мајкрософт“ е компанијата која е една од најнапредните во примена на ВИ. Компанијата во април соопшти дека од 20 до 30% од внатрешното програмирање е направено со употреба на ВИ.

Во компанијата работат  228.000 луѓе.

The post ВЕШТАЧКАТА ИНТЕЛИГЕНЦИЈА ИМ ГИ ОДЗЕДЕ РАБОТНИТЕ МЕСТА Околу 9.000 работници ќе мора да заминат од „Мајкрософт“ appeared first on plusinfo.mk.

Веќе легендарната платформа за интернет-разговор на „Мајкрософт“ – Скајп (Skype) замина во историјата. Постоечките корисници на Скајп ќе можат бесплатно да се префрлат на Мајкрософт тимс (Microsoft Teams), користејќи ги нивните имиња и лозинки за најавување. Така, и нивните контакти и историјата на разговори ќе се префрлат на другата платформа.

Исто така, треба да се напомене дека корисниците имаат рок до јануари 2026 година да ги префлат своите податоци, по што тие ќе бидат избришани.

„Ја поедноставуваме нашата понуда за бесплатна комуникација за подобро да се прилагодиме на потребите на нашите корисници“, се вели во соопштението на „Мајкрософт“.

The post СКАЈП ЗАМИНА ВО ИСТОРИЈАТА Каде ќе можат да се префрлат корисниците на познатата платформа? appeared first on plusinfo.mk.

Компанијата „Викресофт“, која беше основана од „Мајкрософт“ во соработка со кинески партнери, денеска престанува да работи, објави кинескиот медиум „Кајинг“, повикувајќи се на информирани извори.

Ова е во согласност со одлуката на Мајкрософт да ги суспендира услугите за поддршка на клиентите во Кина, кои ќе ги вклучуваат корисниците на оперативниот систем Windows и програмите за обработка на текст Office.

Затворањето на компанијата ќе остави без работа 2.000 работници.

The post МАЈКРОСОФТ ЈА ЗАТВОРА СВОЈАТА ФИРМА ВО КИНА Откази добиваат 2.000 работници appeared first on plusinfo.mk.