Од наплата на патарини во државава во првите шест месеци од годинава се остварени речиси 1,92 милијарди денари, односно повеќе од 31 милион евра, што е за 21.891.532 денари повеќе во споредба со истиот период минатата година, информираат од Јавното претпријатие за државни патишта (ЈПДП).

Најфреквентна наплатна станица е Тетово, по која следуваат Петровец, Романовце, Глумово, Миладиновци, Желино, Гостивар, Стоби, Кадрифаково, Преод, Сопот, Демир Капија, Отовица и Гевгелија.

Сепак, кога станува збор за остварените приходи, односно собраните средства во зависност од цената на патарините, прва е Романовце. По неа следуваат Миладиновци, Петровец, Глумово, Желино, Тетово, Стоби, Преод, Гостивар, Сопот, Гевгелија, Кадрифаково, Отовица и Демир Капија.

Од ЈПДП посочуваат дека во периодите кога има зголемен обем на сообраќај, особено во текот на летната сезона, Одделението за наплата на патарина подготвува посебен акциски план.

Тоа значи дека на наплатните станици на двата коридора се активираат сите расположливи ленти за да се овозможи побрз проток на возилата.

Истовремено, приоритет се дава и на електронската наплата преку М-ТАГ и М-КАРД.

– На секоја наплатна станица на двата коридора се пуштаат во функција сите расположливи ленти, а подеднакво се дава приоритет и на електронската наплата на патарина – М-ТАГ, каде најмалку една лента е секогаш во функција. Тоа се возила кои поминуваат без да застанат. Исто така, тука е и електронската наплата преку М-КАРД, каде возилата немаат контакт со вработените, односно бесконтактно поминуваат – информираат од ЈПДП.

Електронската наплата во моментов учествува со 36 проценти во вкупниот промет на наплатата на 11 наплатни станици каде што е воведена.

Од ЈПДП велат дека податоците за продажбата на електронските уреди и нивното надополнување покажуваат дополнителен раст на електронската наплата. Особено значајно е што М-ТАГ уредите од неодамна се достапни и во продажните салони на мобилните оператори.

Од мај годинава М-ТАГ уредите можат да се купат и во продажната мрежа на „Македонски телеком“ и „А1 Македонија“. Претходно, уредите беа достапни само преку ЈПДП или на наплатната станица Петровец.

Проширувањето на продажната мрежа е дел од напорите за зголемување на користењето на електронската наплата, со што се очекува да се намалат и гужвите на патарините, особено во летните месеци кога низ државата минува голем број домашни и странски возила.

Раководството на ЈПДП при промоцијата на можноста за купување М-ТАГ уреди кај мобилните оператори информираше и дека се размислува за промена на начинот на наплата на патарините.

Како пример беше посочен системот што се применува во Србија, односно затворен систем во кој наплатата би се вршела според изминатите километри.

За таа цел веќе се работи на студија за можноста ваков модел да биде воведен на Коридорот 8.

Тоа би значело промена од сегашниот систем, во кој возачите плаќаат на конкретни наплатни станици, кон систем во кој би се пресметувала патната такса во зависност од делницата што ја поминало возилото.

Наплатата на патарини бележи континуиран раст во последните години. Во 2025 година, заклучно со 23 декември, ЈПДП остварило промет од 4.158.914.362 денари, односно 67.624.624 евра.

Според податоците, во 2024 година биле остварени 66.463.963 евра, во 2023 година 62.077.966 евра, во 2022 година 53.242.070 евра, во 2021 година 46.401.122 евра, а во 2020 година 34.029.562 евра.

Трендот покажува дека приходите од патарини постепено растат, паралелно со зголемувањето на сообраќајот и проширувањето на можностите за електронска наплата.

The post РЕКОРДНА НАПЛАТА НА ПАТАРИНИТЕ, 31 МИЛИОН ЕВРА ЗА 6 МЕСЕЦИ Романовце има најголеми приходи, Тетово е најфреквентно appeared first on plusinfo.mk.

Опозициските партии и граѓаните реагираа на бројот на картичките и начинот на кој тие ќе бидат подготвени. Тие предлагаат само да се кренат рампите за српските туристи, а не да се користат картички. Владата се правда дека парите ќе бидат префрлени на сметката на ЈП државни патишта за покривање на загубата поради нејзината одлука.

Од Јавното претпријатие велат дека веќе ги изготвуваат картичките кои ги имаат обезбедено во претходен тендер.

– Картичките веќе се изработуваат бидејќи М-Смарт картичките се во сопственост на Јавното претпријатие за државни патишта, согласно Договорот со турски Аселсан за имплементација на електронската наплата на патарина на наплатните станици на Коридор 10, и со отпочнувањето на електронската наплата во јули 2019 година, електронските уреди М-Смарт кард се предадени како готов производ на ЈП за државни патишта – велат од ЈП за државни патишта.

Според најавеното, картичките ќе бидат надополнети со 760 денари колку што е износот на патарината во двата правца од Табановце до Богородица. Владата, меѓутоа, ќе треба да издвои и дополнителни 100 денари колку што чини издавањето на смарт картичката или вкупно 860 денари по картичка.

За реализирање на оваа одлука Владата најави дека издвоила 2,8 милиони евра кои треба да му префрли на ЈП за државни патишта за изготвување на 200.000 смарт картички наменети за српските туристи кои ќе патуваат по коридорот 10. Српските туристи кои ќе летуваат во земјава не се опфатени со оваа владина одлука, бидејќи нема електронска наплата на патарините на дел од автопатите.

Износот кој државава го планира за плаќање на патарините на српските туристи кои ќе летуваат во Грција, како и бројот на пресметаните картички, предизвика реакција кај граѓаните и партиите.

Опозициската ВМРО-ДПМНЕ се посомнева дека власта ќе спроведе незаконска набавка на картички за српските туристи кои бесплатно ќе патуваат низ земјава во следните месеци. Пратеникот Кирил Пецаков обвини дека Владата расипнички и нерационално планира да потроши 3 милиони евра, наместо мерката да се спроведе, како што рече, со едноставно кревање рампа и видeo надзор на возилата со српски регистарски таблички.

– Владата и Зоран Заев мора да одговорат како е дојдено до таа сума од 3 милиони евра за набавка на картички за патарина? Владата и Зоран Заев мора да одговорат зошто оваа мерка не се воспостави со едноставно кревање рампа и видеонадзор на автомобилите со српски регистарски таблички? Исто така, како пратеник што доаѓа од Охрид, јас и охриѓани сакаме да добиеме одговор од Зоран Заев и од Владата, зошто оваа мерка не се воспостави и не важи и за Охрид како летна туристичка дестинација за илјадници српски државјани, туку важи само за Грција? – пеаша Пецаков.

И лидерот на опозициската Левица Димитар Апасиев се посомнева во мотивите на владата со ослободувањето на српските туристи од патарините преку употреба на смарт картичките. Тој смета дека постои многу поедноставно решение за тоа.

– Ама вас ви е битно тендерчето за „картичките“ да си го наместите – прокоментира Апасиев.

Владата појасни дека пресметките за бројот на картички се направени врз основа на анализите на поминати возила за 2019 година, кога имало рекорден приход од наплата на патарина и транзитирале рекорден број возила. Оттаму е извлечена бројката од 200.000 картички.

Вицепремиерот за економски прашања Фатмир Битиќи дообјасни дека сумата која ќе му се префрли на Јавното претпријатие за државни патишта кое стопанисува со патарините не е за картичките туку за намалениот приход на претпријатието поради оваа активност на владата.

– Во суштина, тоа не се пари за картички. Тоа е надомест на тоа што ќе се изгуби како приход во ЈП за државни патишта. Тие средства одат на одржување на јавните патишта во државата, на нови инвестиции – рече  Битиќи.

Премиерот Зоран Заев, пак, изјави дека земјава од Србија доби 48.240 вакцини кои чинат 700.000 евра, а ослободувањето на српските туристи од плаќање патарини е благодарност за српскиот гест.

The post Нема тендер за картичките за српските туристи, ама 2,8 милиони евра ќе легнат на сметка на ЈП државни патишта appeared first on plusinfo.mk.