Џастин Бибер и неговата сопруга Хејли наводно ненадејно го прекинале гостопримството кон поранешниот пастор Карл Ленц и неговото семејство, барајќи од нив да го напуштат нивниот стан во Њујорк во рок од само 24 часа. Ова го откриваат Карл и неговата сопруга Лора во новата заедничка книга „Overcoming Infidelity: 10 Conversations to Help You Heal the Hurt“, во која зборуваат за неверството што во 2020 година му ја уништи кариерата на пасторот, но и за последиците што ги почувствувало целото семејство.

Лора Ленц раскажува дека со месеци планирале да се преселат во Бруклин, а Џастин и Хејли им понудиле привремено да престојуваат во нивниот стан во Њујорк додека бараат нов дом. Според нејзините зборови, славниот пар им рекол да не брзаат и да останат колку што им е потребно.

Но, ситуацијата целосно се променила кога во јавноста излегла аферата на Карл. Лора тврди дека добиле телефонски повик од човек од тимот на Џастин, со порака дека мораат да се иселат во следните 24 часа.

– Набрзина ги спакувавме работите и ги натоваривме во изнајмен камион за селидби – напишала таа во книгата.

Карл, кој тогаш веќе бил отпуштен од црквата „Хилсонг“ поради, како што било наведено, „морални пропусти“, признал дека го разбирал разочарувањето на Бибер и неговата сопруга. Сепак, го погодило тоа што последиците ги почувствувале и Лора и нивните три деца.

– Заслужив да бидам исфрлен на улица, но чувствував дека Лора и децата се невини набљудувачи кои повторно страдаа поради моите гревови – напишал тој.

Пасторот додал дека неговите постапки го ставиле Џастин во многу непријатна ситуација и дека нивното блиско пријателство практично било уништено. Смета дека медиумскиот скандал го вовлекол пејачот и Хејли во негативно внимание што никогаш не го побарале.

Пријателството меѓу Џастин и Карл траело од 2008 година. Ленц беше еден од највлијателните духовни советници на пејачот, го крсти и му помагаше во периодот кога Бибер се соочуваше со лични проблеми и се обидуваше да го промени својот живот. Во 2014 година Џастин дури извесно време живеел со семејството Ленц во Њу Џерси, а Карл бил поканет и на неговата свадба со Хејли во 2019 година.

Сè се променило во ноември 2020 година, кога Ленц беше отпуштен од „Хилсонг“, а црквата соопшти дека причините се поврзани со проблеми во раководењето, нарушување на довербата и откриени морални пропусти. Подоцна Карл призна дека имал афера со жена која работела како дадилка во нивното семејство, како и дека се борел со зависност од лекот Адерал.

По заминувањето од станот на Бибер, семејството добило помош од актерот Тајлер Пери, кој им понудил сместување во својата луксузна куќа во Менхетен Бич, Калифорнија. Ленцови велат дека во периодот кога многу нивни пријатели се дистанцирале од нив, Пери бил меѓу ретките што им подал рака за помош.

Карл и Лора денес се сè уште во брак, а во новата книга зборуваат за обидите да ја обноват врската по неговото неверство. Пејачот и Хејли досега не ги коментирале јавно тврдењата на поранешниот пастор и неговата сопруга. И двајцата престанале да го следат семејството Ленц на социјалните мрежи уште во 2020 година.

The post ЏАСТИН И ХЕЈЛИ БИБЕР ГО ИСФРЛИЛЕ ПОРАНЕШНИОТ ПАСТОР СО СЕМЕЈСТВОТО ОД НИВНИОТ СТАН Славниот пар му дал на Карл Ленц 24 часа да се исели по скандалот со неверството appeared first on plusinfo.mk.