Најмалку 50 лица се повредени во судир на два патнички воза на железничката линија јужно од Бедфорд, околу 90 километри северно од Лондон, а британските власти стравуваат дека во несреќата загинал и еден машиновозач. Спасувачките служби и натаму се на терен, додека истражителите започнаа увид за причините за една од најсериозните железнички несреќи во Велика Британија во последните години.

Според досегашните информации, несреќата се случила околу 17:15 часот по локално време, на делницата меѓу Бедфорд и Лутон. Во судирот учествувале два воза на компанијата „Ист Мидлендс Реилвеј“, кои сообраќале кон железничката станица „Сент Панкрас“ во Лондон. Едниот воз патувал од Нотингем, а другиот од Корби.

Првичните информации укажуваат дека едниот воз бил запрен на пругата кога вториот удрил во неговиот заден дел. Причините за тоа сè уште не се познати и се предмет на истрага.

На снимките од местото на несреќата се гледаат сериозно оштетени вагони, а очевидци опишуваат сцени на паника веднаш по ударот. Неколку патници за британските медиуми изјавиле дека биле оттурнати од седиштата и дека во вагоните имало чад, искршен инвентар и повредени луѓе.

На местото на несреќата биле испратени десетици екипи на брза помош, пожарникари, полиција и хеликоптери за итна медицинска помош. Болниците во Бедфорд и Лутон активирале планови за прием на голем број повредени, а дел од одделенијата за итна помош привремено побарале граѓаните да не доаѓаат освен во навистина итни случаи.

Британската транспортна полиција потврди дека реагира на сериозен инцидент во областа на Бедфорд, додека Одделот за истрага на железнички несреќи веќе собира докази на терен. Засега нема официјално соопштение за конечниот број на повредени, ниту потврда за евентуални жртви, иако повеќе британски медиуми јавуваат дека постојат сериозни стравувања оти машиновозачот на еден од возовите го загубил животот.

Поради несреќата целосно е прекинат железничкиот сообраќај меѓу Бедфорд и Лутон, како и дел од линиите што го поврзуваат Лондон со централна Англија. Патниците се повикани да ги одложат патувањата додека трае истрагата и расчистувањето на местото на судирот.

Ова е една од најтешките железнички несреќи во Велика Британија во последниот период и се случува на една од најпрометните железнички рути во земјата, која ги поврзува Лондон, Бедфорд, Лестер, Нотингем и Шефилд.

The post 🎥 „КАКО ДА ЕКСПЛОДИРА БОМБА!“ – СЕ СУДРИЈА ДВА ВОЗА СЕВЕРНО ОД ЛОНДОН Најмалку 50 повредени, се стравува дека загина машиновозач appeared first on plusinfo.mk.

Руското Министерство за надворешни работи денеска соопшти дека палежите на имоти поврзани со британскиот премиер Кир Стармер, извршени во мај минатата година, биле дело на украински државјани и дека нема потреба „раката на Кремљ“ да се бара зад секој инцидент.

Украински државјанин во понеделникот беше прогласен за виновен од британски суд за извршување на палежите по налог на мистериозна личност која ја познавал само под прекарот „Ел Мани“.

Според Би-Би-Си, зад нападите стои Русија.

Портпаролката на руското Министерство за надворешни работи, Марија Захарова, денеска на брифинг во Москва ги отфрли таквите обвинувања.

– Ги уапсивте ли украинските државјани кои ја запалија резиденцијата на Стармер? Наречете ги работите со вистинското име. Кажете дека биле Украинци. Нема потреба раката на Кремљ да се бара во сè – изјави Захарова.

Палежите што ја потресоа британската јавност се случија во периодот меѓу 8 и 12 мај 2025 година во северен Лондон. Првата цел бил автомобил „Тојота РАВ4“ што претходно му припаѓал на британскиот премиер Кир Стармер, а потоа биле запалени влезовите на два имота поврзани со него – една зграда во која порано живеел и куќата во Кентиш Таун што сè уште е во негова сопственост и која во тоа време била издадена под кирија. Во еден од објектите живеела и сестрата на неговата сопруга. Во нападите немало жртви, но британските власти оценија дека постоел сериозен ризик по човечки животи.

За нападите беше обвинет 22-годишниот украински државјанин Роман Лавринович, кој според обвинителството дејствувал заедно со Станислав Карпиук, романски државјанин роден во Украина. Британскиот суд оваа недела ги прогласи двајцата за виновни за заговор за извршување палежи, додека третиот обвинет, Петро Починок, беше ослободен од обвиненијата. Според доказите изнесени на судењето, Лавринович добивал инструкции преку апликацијата Телеграм од лице кое го познавал само под прекарот „Ел Мани“, а за извршувањето на нападите му биле ветени парични надоместоци во криптовалути.

Случајот доби и меѓународна димензија откако британски медиуми, меѓу кои и Би-Би-Си, објавија истражувања според кои мистериозниот „Ел Мани“ можеби бил поврзан со руска мрежа за саботажи и дезинформации. Британските безбедносни служби проверуваат дали нападите биле дел од поширока операција за дестабилизација, а дел од медиумите објавија дека трагите водат кон лица и групи блиски до Русија. Москва ги отфрла ваквите обвинувања како неосновани и тврди дека одговорноста е кај директните извршители, кои се украински државјани.

The post ПОЖАРИТЕ НА ИМОТИТЕ НА КИТ СТАРМЕР ГИ ПОДМЕТНУВАЛЕ УКРАИНЦИ Москва порача – не барајте руска рака во сѐ appeared first on plusinfo.mk.

Украинскиот претседател Володимир Зеленски почнал да го користи молдавскиот воздушен простор за летови кон Европа, избегнувајќи ја Полска поради затегнатите односи со Варшава во последно време, објавуваат украинските портали.

Според наводите, Зеленски претходно најчесто за меѓународни патувања го користел полскиот аеродром Жешов–Јасионка, кој од почетокот на конфликтот во Украина има важна логистичка улога за Киев и западните сојузници. Меѓутоа, вчера тој за Лондон отпатувал преку Кишињев.

Официјално објаснување за промената на рутата не е соопштено, но украинските портали наведуваат дека промената е последица на заострувањето на односите меѓу Украина и Полска.

Несогласувањата на релација Киев – Варшава се интензивираа кон крајот на минатиот месец кога Зеленски на украинска воена единица ѝ додели почесна титула „Херои на Украинската востаничка армија (УПА)“. Одлуката предизвика остри негодувања во Полска, каде Украинската востаничка армија се поврзува со масовни страдања на полското население за време на Втората светска војна.

Полските власти го оценија потегот како сериозна грешка и побараа јавно извинување од Киев. Во Варшава, според медиумските написи, се споменувала и можност за преиспитување на највисокото полско одликување што претходно му беше доделено на Зеленски.

Киев повика на продолжување на дијалогот и фокус на заедничките безбедносни предизвици, но новите информации за промената на рутата говорат дека односите меѓу Украина и Полска одат во надолна линија.

Инаку, во Лондон, Зеленски му порача на британскиот премиер Кир Стармер дека на Украина ѝ е потребно дополнително ракетно вооружување за системите за противвоздушна одбрана.

Тој наведе дека двајцата разговарале и за заштитата на украинската енергетска инфраструктура, како и за подготовките на земјата за претстојната зима.

Стармер вчера во Даунинг стрит беше домаќин на Зеленски, францускиот претседател Емануел Макрон и германскиот канцелар Фридрих Мерц, на разговори посветени на европската поддршка за Украина и на напорите за ставање крај на војната.

The post ЗЕЛЕНСКИ ЈА ЗАОБИКОЛУВА ПОЛСКА ПОРАДИ ЗАТЕГНАТИТЕ ОДНОСИ СО ВАРШАВА Летал за Лондон преку Молдавија appeared first on plusinfo.mk.

Арсенал остана без најпосакуваниот трофеј по драматичното финале против ПСЖ. По натпреварот, Микел Артета не ја криеше разочараноста.

– Што чувствувам сега? Болка. Губење трофеј на пенали… Никој не може да ја одземе таа болка – рече Артета.

Тренерот на „топчиите“ смета дека неговиот тим бил блиску до европската круна и посочи дека лесно можело да биде досуден пенал за Арсенал.

– Освоивме голем трофеј, но го пропуштивме најголемиот. Им кажав на играчите и на персоналот дека дури и милион пати да кажам „благодарам“, нема да биде доволно – изјави Артета.

Иако ПСЖ стигна до нова титула во Лигата на шампионите, Луис Енрике призна дека Арсенал бил исклучително тежок противник.

– Нивниот план беше совршен. Нè ставија во многу тешка позиција, особено по голот што го примивме во првите десет минути – рече Енрике.

Шпанскиот стратег нагласи дека Арсенал е еден од најтешките противници во Европа.

– Почнавме да играме подобро во второто полувреме, но кога се соочувате со Арсенал, со нивниот низок блок, нивната физичка подготвеност и нивната одлична одбрана, она што го направивме е вистинско достигнување. Во врска со пеналите, сакавме да им пристапиме со бистра глава. Беше тежок натпревар. Игравме против најсилниот тим во Европа во прекини, но мислам дека доминиравме.

Францускиот гигант ја одбрани европската титула, откако славеше и во сезоната 2024/25.

Ноќта на славјето на улиците во Париз беа уапсени над 200 лица, односно вкупно 416 лица во повеќе градови.

The post ШТО ЧУВСТВУВАМ? БОЛКА Артета скршен по поразот, Енрике призна, „имаа совршен план, но…“ appeared first on plusinfo.mk.

Иако претходно постојано ги негираа гласините за романса, актерските легенди Мерил Стрип и Мартин Шорт, со нивното ново заедничко излегување повторно го разгореа интересот на обожавателите.

Фотографија од двојката направена за време на опуштена вечера се прошири на социјалните мрежи, а сведоци тврдат дека изгледале многу блиски и расположени. Фотографијата што се појави на социјалните мрежи во текот на викендот ги прикажува Мерил Стрип и Мартин Шорт за време на вечера во лондонски ресторан.

Двајцата седат еден до друг, а според лицето што ги фотографирало, вечерта поминала во многу интимна атмосфера. Тие се забавувале одлично. Имаше многу смеа и нежни гестови – напиша корисничката на социјалната мрежа, додавајќи дека не сакала да го прекине нивниот приватен момент со барање заедничка фотографија.

 

View this post on Instagram

 

A post shared by The Tisch (@tischofficial)

Фоографијата го прикажува актерското дуо како заедно ја гледа содржината на мобилниот телефон на познатата актерка, што дополнително ги поттикна шпекулациите за нивната блискост.

Гласините за можна врска почнаа да циркулираат по нивното заедничко појавување на Златните глобуси во 2024 година, каде што беа видени во блиско друштво. Сепак, претставниците на Мартин Шорт тогаш тврдеа дека станува збор само за пријателство. Самиот актер јавно изјави на почетокот на 2024 година дека тој и Мерил Стрип не се пар и дека ги поврзува блиско пријателство. Сепак, во текот на месеците следеа нови заеднички излегувања, вклучувајќи вечера во Санта Моника и држење за раце на премиерата на четвртата сезона од серијата „Only Murders in the Building“.

Мерил Стрип беше во брак со скулпторот Дон Гамер со години, со кого има четири деца, но во 2023 година беше откриено дека се разделиле неколку години порано. Мартин Шорт беше во брак со Ненси Долман, која почина во 2010 година, три децении, и заедно одгледаа три деца.

The post РОМАНТИЧНА ВЕЧЕРА ИЛИ САМО ПРИЈАТЕЛСКА? Заедничка фотографија од Лондон повторно ги разгоре гласините за врска помеѓу Мерил Стрип и Мартин Шорт appeared first on plusinfo.mk.

The post БИТЛСИ ДОБИЈА МУЗЕЈ ВО ЛОНДОН Музејскиот простор за бендот ќе биде во зградата на чиј покрив беше одржан легендарниот концерт appeared first on plusinfo.mk.

Британскиот премиер Кир Стармер одбил да поднесе оставка и покрај растечкиот бунт во Лабуристичката партија.

Би-Би-Си објави дека на состанок со кабинетот Стармер јасно ставил до знаење дека нема намера да се повлече.

Според политичкиот дописник Хари Фарли, премиерот е „пркосен“ и практично ги предизвикува сопствените пратеници да се обидат да го урнат.

– Ќе продолжам со управувањето. Тоа е она што мора да го направиме како кабинет – им рекол Стармер на министрите.

Од друга страна, „Гардијан“ објави дека неколку високи министри разговарале со премиерот за можноста за „уредна и достоинствена транзиција“.

Меѓу нив биле министерката за внатрешни работи Шабана Махмуд, министерката за надворешни работи Ивет Купер, министерот за одбрана Џон Хили и вицепремиерот Дејвид Лами.

Петтина од Лабуристите сакаат „аут“

Притисокот врз британскиот премиер драматично расте.

Според британските медиуми, дури 81 пратеник од Лабуристичката партија јавно побарале Стармер да поднесе оставка или да постави рок за своето заминување.

Тоа претставува околу 20 % од пратеничката група на лабуристите.

Кризата избувна по катастрофалните резултати на локалните избори, по кои дел од пратениците заклучиле дека Стармер ја изгубил довербата кај јавноста.

„Направете ја вистинската работа“

Дополнителен удар за премиерот беше оставката на министерката за станбени прашања, заедници и локална самоуправа, Миата Фанбуле. Тоа беше првата оставка во Кабинетот.

Таа во писмото до Стармер упати жестоки критики.

„Јавноста не верува дека можете да ја водите оваа промена, ниту јас“, напишала Фанбуле.

Таа побарала премиерот да ја „направи вистинската работа за државата и партијата“ и да одреди временска рамка за мирна транзиција на власта.

Фанбуле оценила дека Лабуристичката партија немала доволно визија, темпо и амбиција.

Кабинетот поделен

И покрај притисокот, дел од министрите и понатаму стојат зад Стармер. Министерот за домување Стив Рид порача:

– Мораме да се обединиме зад премиерот.

Министерот за труд и пензии Пет Мекфаден изјави дека Стармер „ќе продолжи со својата работа како што јавноста очекува“.

„Да бидеш премиер е исцрпувачки“

Главниот секретар на Министерството за финансии Дарен Џонс, кој важи за близок соработник на премиерот, внимателно одговорил на прашањето дали Стармер ќе ја предводи партијата на следните избори.

– Нема да прејудицирам никаква одлука што премиерот може или не може да ја донесе – изјавил Џонс.

Тој предупредил дека премиерската функција е „исцрпувачка“ и дека никој не треба да мисли оти лесно може да ги реши проблемите на државата.

„Во Владата нема несогласување“

И покрај хаосот во партијата, засега нема официјален предизвик за лидерската позиција на Стармер.

Министерката за меѓународен развој Џени Чепмен изјави дека на состанокот на кабинетот „немало ниту еден глас на несогласување“.

Но, британските медиуми оценуваат дека кризата во Даунинг стрит само се продлабочува.

The post СТАРМЕР НЕ ДАВА ОСТАВКА, А ОКОЛУ НЕГО „ПАЃААТ ГЛАВИ“ Дури 81 пратеник бара заминување, министри си одат? appeared first on plusinfo.mk.

Турнејата на Росалија, една од најуспешните и највлијателните шпански пејачки на сите времиња, не престанува да предизвикува реакции. Новинарка од британскиот „Индепендент“ ѝ посвети долга рецензија на концертот во кој заклучува дека Росалија е „доказ дека вештачката интелигенција не може да реплицира некои работи“.

– Сценографијата пред првиот од двата распродадени концерти на Росалија во лондонската О2 арена е сведена на задната страна на огромно платно, на кое се издвојуваат само нејзиниот потпис и печатот на нејзиниот албум „Лукс“ од 2025 година. Моментите на исчекување пред почетокот на спектаклот се поминуваат во погодување што лежи на другата страна – како би можела да изгледа завршената слика – пишува Роисин О’Конор за „Индепендент“.

Каталонската уметница посветува голем дел од својот албум „Лукс“ на ова прашање. Со звучна палета што комбинира оркестар, фламенко и традиционални фадо пејачи, како и изведби на 13 различни јазици, овие песни истражуваат идеи за вера, Бог и светост, љубов и страст, материјализам и жртва. Албумот бара проучување, но тоа не спречи околу 18.000 обожаватели да ги пеат во еден глас стиховите на шпански, француски, арапски и италијански јазик.

Ерата на апатија и одговорот на Росалија

– Подемот на вештачката интелигенција и широката употреба на ChatGPT за сè, од семинарски трудови до избор на оброци во ресторан, со право покренаа загриженост за падот на нашиот капацитет за критичко размислување. Сведоци сме на повеќегенерациски пад на писменоста и разбирање на прочитаното: има повеќе информации од кога било, но недостасува вистински ангажман или анализа – пишува новинарката на Индепендент, воодушевена од концертот на Росалија.

– Милениумците и генерацијата Z, кои пораснаа со оваа технологија, често се мета на критики: ние сме мрзливи, самодоволни, апатични, здодевни, глупави, празни. Социјалните медиуми нè поттикнуваат на бинарно размислување – емоции пред разум – додека нијансираноста стана застарена благодарение на сензационализмот и меѓународното згрозување поради тривијални настани. Затоа, не можам целосно да ви ја пренесам трансцендентната радост да се биде во публиката на настапот на Росалија. Речиси сите телефони беа во џебовите додека таа се појавуваше на сцената, со оркестар во живо предводен од кубанскиот диригент Јуданија Гомез Хередија и опкружена со врвна танцова трупа – пишува таа.

Човечност која вештачката интелигенција не може да ја реплицира

За време на настапот, таа влегува во кадарот на сликата, со позадина што ја имитира онаа на Мона Лиза, и позира за група зачудени туристи – нејзините танчери – кои пеат, од сите песни, „Can’t Take My Eyes Off You“ од Френки Вали. Но, потоа таа излегува од кадарот и се симнува за да им се придружи. Таа не е завршен портрет. Таа е како нив, човек, склона кон грешки. Таа е дело во настанување – заклучува новинарката.

@nikolettaavraam

La Perla LUX tour | Zurich, Switzerland @La Rosalia #rosalia #luxtour #zurich #laperla #rosaliavt

♬ original sound – Nikoletta Avraam

– Како светците што ги споменува во Лукс, Росалија разбира дека вистинското достигнување бара практика, напор и жртва. Слушањето на Лукс, а сега гледањето како настапува во живо, ме потсетува на радоста од учењето. Таа пристапува кон музиката и животот низ истата призма на нејзината вера: и двете бараат посветеност, страст и љубопитност. Таа разбира дека ова е фундаментален дел од човечкото искуство, или барем треба да биде. Таа го слави тоа и го поттикнува кај другите. И тоа е нешто што вештачката интелигенција никогаш нема да може да го реплицира – додава новинарката.

The post 🎥 „ОДА ЗА ЧОВЕЧНОСТА КОЈА ВЕШТАЧКАТА ИНТЕЛИГЕНЦИЈА НЕ МОЖЕ ДА ЈА РЕПЛИЦИРА Каталонската пејачка Росалија „растури“ на концертите во Лондон appeared first on plusinfo.mk.

Двајца мажи се избодени со нож во северен Лондон во напад што британската полиција го третира како можен терористички инцидент.

Нападот се случил во населбата Голдерс Грин околу 11:16 часот по локално време, кога 45-годишен маж нападнал двајца минувачи. Повредени се маж на 76 и маж на 34 години, кои веднаш биле пренесени во болница. Лекарите потврдуваат дека нивната состојба е стабилна.

Според полициски извори и снимки од надзорни камери, напаѓачот прво оттурнал една од жртвите во сообраќаен знак, по што неколку пати го избодел. Вториот маж успеал да се одбрани и да побегне.

WILD TAKEDOWN: British Police arrest a terrorist who stabbed two Jews in the Golders Green neighborhood of London. One victim is in serious condition. pic.twitter.com/ZLi58XUA91

— Breaking911 (@Breaking911) April 29, 2026

Од полицијата велат дека осомничениот има историја на насилно однесување и проблеми со менталното здравје, а антитерористичката единица истражува дали нападот бил насочен кон еврејската заедница во областа.

Напаѓачот бил совладан со електрошокер откако се обидел да им се приближи на полицајците, а пред нивното доаѓање бил задржан од локална волонтерска група.

Инцидентот доаѓа во период на зголемени тензии и серија напади врз еврејски објекти во Лондон, меѓу кои палење возила и вандализирање синагоги.

Британскиот премиер Кир Стармер го осуди нападот, оценувајќи го како „ужасен антисемитски чин“, додека израелските власти повикаа на посилни мерки против антисемитизмот во Велика Британија.

The post 📽️ КРВАВ НАПАД ВО ЛОНДОН Двајца мажи избодени на улица, полицијата претпоставува дека е тероризам appeared first on plusinfo.mk.

Вооружени полицајци кои го чуваат градоначалникот на Лондон, Садик Кан, заборавиле торба со оружје пред неговата куќа, а минувач предупредил за тоа, јавуваат медиумите.

Градежниот работник Џордан Грифитс изјавил за „Сан“ дека неговата девојка ја пронашла торбата на патот во јужен Лондон во вторник вечерта.

Торбата содржела полуавтоматска карабина „Хеклер и Кох МП5“, пиштол „Глок“, тазер и муниција, објави весникот.

– Не можев да им верувам на своите очи – изјавил Грифитс за „Сан“.

Работникот се јавил во полиција и им кажал што пронашол, по што тие дошле во рок од неколку минути за да го земат оружјето, рекол тој.

-Ми беше кажано дека таму ги оставил еден од безбедносните службеници на Садик Кан, што има смисла бидејќи тој живее тука – изјавил тој.

Полицијата ги потврди неговите наводи, како и фактот дека оружјето било нивно.

„Во оваа фаза, се верува дека торбата ја изгубиле полицајците на должност непосредно пред минувачот да ја пронајде“, објави Метрополитенската полиција.

Портпаролот на градоначалникот изјави дека тоа е сериозен проблем

– Ова е многу сериозен инцидент и е пријавен во Дирекцијата за професионални стандарди на Метрополитенската полиција. Сега мора да преземе сите чекори за да се осигури дека таков инцидент никогаш повеќе нема да се случи – рече тој.

The post ДЕВОЈКА ПРОНАЈДЕ ТОРБА СО ОРУЖЈЕ ПРЕД КУЌАТА НА ГРАДОНАЧАЛНИКОТ НА ЛОНДОН Нема да верувате кој ја „заборавил“ торбата таму appeared first on plusinfo.mk.