Димитар Апасиев не знае да ги чита анкетите или намерно манипулира, се вели во реакцијата на МКД.мк и на агенцијата Маркет вижн на вчерашното интервју на претседателот на Левица за ТВ24 (од 3,10 до 3.24 минута) за резултатите од анкетата во септември 2025, пред локалните избори.

Професорот ги коментира резултатите на кој се групно прикажани резултатите од сите испитаници, вклучително и оние кои изјавиле дека нема да гласаат, не знаат дали ќе гласаат, не одлучиле за кого или не сакаат да откријат, се вели во реакцијата.

„Професорот Апасиев прави споредба на резултатите од анкетата од септември лани со резултатите на Левица остварени на изборите за кои вели дека биле ‘безмалку 7%’. Господинот би требало да знае дека на избори не излегуваат оние што рекле нема да гласаат, а кога се проектираат изборни резултати од анкета се отстрануваат и оние кои се изјасниле дека нема да гласаат за ниту една партија. Така според посочената методологија проектираниот резултат на Левица на локалните избори 2025 во анкетата на Маркет вижн е 6,9%.

Според ДИК, на изборите излегле 834.440 граѓани, а од нив на листите за совет, каде јасно може да се види партиската ориентација, за Левица гласале 56.287 што изнесува приближно 6,7%.

Еве како треба да се изврши пресметката.

Значи, резултатот во анкетата на Маркет вижн прилично точно е превиден резултатот на Левица, дури и микроскопски преценет.

Бројките најдобро зборуваат за професионалноста и точноста на агенцијата, а на господинот Апасиев му стоиме на располагање да му помогнеме за толкување и објаснување на резултатите од статистички аспект“, се вели во реакцијата.

The post АПАСИЕВ НЕ ЗНАЕ ДА ЧИТА АНКЕТИ Реакција на МКД.мк и Маркет Вижн за лидерот на Левица appeared first on plusinfo.mk.

Претседателот на ВМРО-ДПМНЕ, Христијан Мицкоски, денеска го претстави новиот состав на Извршниот комитет на партијата, како и новиот генерален секретар, во рамките на процесот на обнова, јакнење и модернизација на партијата.

– Денес заседаваше Централниот комитет на ВМРО-ДПМНЕ, на кој беа донесени важни одлуки за понатамошното јакнење и модернизација на партијата. Нашата цел е создавање силна, ефикасна и обединета структура која ќе даде конкретни и одговорни решенија за потребите на граѓаните – изјави Мицкоски пред присутните медиуми.

Како што најави, партијата ќе продолжи со отворање кон нови идеи и кадри, со фокус на транспарентност, инклузивност и подобрување на организацијата.

– Во периодот што следува, ќе имаме избор на претседатели на општинските комитети, како и нови раководства на Унијата на жени, Унијата на млади сили и Унијата на ветерани, со јасна визија за иднината и со фокус на квалитет, одговорност и резултати – додаде Мицкоски.

Нов генерален секретар е пратеникот Драган Ковачки, додека новиот Извршен комитет се составува од искусни партиски лица и нови членови, вклучувајќи: Александар Николоски, Владо Мисајловски, Гордана Димитриеска Кочоска, Тимчо Муцунски, Никола Мицевски, Луке Галевски, Антонио Милошоски, Дафина Стојановска, Рашела Мизхархи, Влатко Ѓорчев, Кирил Пецаков, Марија Андоновска, Ели Панова, Игор Јанушев, Марија Митева, Благоја Ташаминов, Орце Ѓорѓиевски, Онер Јакуповски, Драгана Бојковска, Синиша Стојановски, Стефан Андоновски, Филип Поповски и Бобан Николоски.

Дополнително, во составот ќе се приклучат новите претседатели на Унијата на жени, Унијата на млади сили и Унијата на ветерани, како и организацискиот секретар Ивица Томовски и шефот на кабинетот Владимир Нелоски.

– Во услови кога опозицијата не нуди решенија и е целосно безидејна, знаеме дека решението е силен граѓански инпут за стабилна и обединета ВМРО-ДПМНЕ. Продолжуваме по патот на обнова, обединување и подготовка за нови изборни победи, со една јасна цел – подобар живот за сите граѓани – заклучи Мицкоски.

The post ДРАГАН КОВАЧКИ Е НОВ ГЕНЕРАЛЕН СЕКРЕТАР Мицкоски го претстави новиот Извршен комитет на ВМРО-ДПМНЕ appeared first on plusinfo.mk.

Претседател на избирачки одбор од општина Пласница се соочува со кривична пријава поради сериозно нарушување на изборниот процес за време на локалните избори.

Според информациите од полицијата, 36-годишниот Ш.Ф. од селото Пласница, кој бил задолжен за спроведување на гласањето кај болни и изнемоштени лица во првиот круг од локалните избори, дозволил во име на болно лице да гласа неговиот син – иако лицето воопшто не било присутно.

Инцидентот се случил на 18 октомври 2025 година, при гласање во домашни услови. Наместо строго да ја почитува законската процедура, претседателот на избирачкиот одбор овозможил гласање и покрај тоа што лицето на чие име бил даден гласот било хоспитализирано и физички отсутно од домот.

„Со ваквата постапка е повредено избирачкото право и е доведена во прашање законитоста на изборниот процес“, информираат од полицијата.

Против осомничениот е поднесена кривична пријава за „повреда на избирачкото право“, а надлежните институции најавуваат дека случајот ќе биде целосно расчистен.

The post СИН ГЛАСАЛ НАМЕСТО ТАТКО КОЈ БИЛ ВО БОЛНИЦА Претседател на избирачки одбор под истрага appeared first on plusinfo.mk.

Полицијата поднесе кривични пријави против двајца жители на Крушево, кои се сомничат дека нуделе пари за купување гласови за време на локалните избори.

Како што информираат од МВР, ОВР Прилеп поднела пријава против Т.Х. (33) и Т.Ш. (36) поради сомнение за кривичните дела „поткуп при избори и гласање“ и „помагање“.

Според полициските информации, на 14 октомври 2025 година, првопријавениот им дал по 1.000 денари на четири лица за да гласаат за него како кандидат за градоначалник на општина Крушево. Второпријавениот, пак, на едно женско лице му дал 5.000 денари со иста цел – обезбедување поддршка на изборите.

Случајот е пријавен и документиран од полицијата, а против осомничените е поведена соодветна постапка. Надлежните институции најавуваат продолжување на истрагата со цел целосно расчистување на случајот.

The post КУПУВАЛ ГЛАСОВИ ЗА ГРАДОНАЧАЛНИК Полицијата откри поткуп од 1.000 и 5.000 денари во Крушево appeared first on plusinfo.mk.

Демократската партија на Турците во Македонија (ДПТМ) соопшти дека денескка официјално ја поднела кандидатурата за нејзиниот кандидат Аријан Ибраим за градоначалник на Општина Центар Жупа на повторените локални избори што ќе се одржат на 11 јануари 2026 година.

„Центар Жупа е општина во која со години заеднички вложуваме труд, доверба и посветеност. Нашиот кандидат Аријан Ибраим, преку својата работа и пристап, ја стекна и ја зацврсти поддршката на граѓаните. Уверени сме дека и на овие избори ќе продолжиме по истиот пат, со истата одлучност и посветеност.

Веруваме дека на 11 јануари, со уште поголема излезност и уште посилна поддршка од нашите сограѓани, Центар Жупа повторно ќе победи. Нека овие избори бидат успешни и благотворни за нашиот народ, за државата и за целото наше членство. На нашиот кандидат и на општинската организација им посакуваме искрен успех“ – се вели во соопштението на ДПТМ.

The post АРИЈАН ИБРАИМ ВО ТРКАТА ЗА ГРАДОНАЧАЛНИК НА ЦЕНТАР ЖУПА Го кандидираше Демократската партија на Турците appeared first on plusinfo.mk.

Ноќеска на полноќ истекува рокот за поднесување листи на кандидати за повторните локални избори за градоначалници во четири општини во кои не се избраа градоначалници на редовните избори поради недоволна излезност на гласачите.

Официјално, рокот за поднесување на листите завршува на 11 декември, до 24:00 часот, односно 30 дена пред денот на одржување на изборите, закажани за 11 јануари 2026 година (недела). Општинските изборни комисии треба да извршат проверка на поднесените листи во рок од 24 часа од приемот на листата.

Изборите за градоначалници ќе се повторат во општините Гостивар, Врапчиште, Центар Жупа и Општина Маврово-Ростуша. Во овие четири општини владата именуваше свои повереници, со в.д. мандат до изборот на градоначалници на повторените избори. Именувани се Аријан Ибраим за Центар Жупа, Буњамин Кадриу за Врапчиште, Фадил Џелили за Гостивар и Онер Јакупоски за Маврово и Ростуше.

Според ДИК, досега не е поднесена ниту една независна кандидатура за градоначалник на Општина Центар Жупа, за кои рокот истече синоќа на полноќ, така што на повторените избори во таа општина нема да има независни кандидати. До вчера попладне во ДИК не беше пристигната ниту една кандидатура од политичките партии за Центар Жупа, но теоретски партиите можат да поднесат кандидатура до 24:00 вечерва.

Засега своите кандидатури за повторните избори за градоначалник на Гостивар ја објавија кандидатите Невзат Бејта и Ваљбон Лимани.

Невзат Бејта на повторените избори ќе го бара третиот мандат за градоначалник на Гостивар. Тој синоќа на неговиот профил на Фејсбук ја објави кандидатурата и соопшти дека ќе има поддршка од коалицијата Вреди.

Ваљбон Лимани, кој ја има поддршката од коалицијата Националната Алијанса за Интеграција, предвoдена од ДУИ, вчера официјално ја поднесе својата кандидатура. Зборувајќи пред новинарите Лимани рече дека е уверен во својата победа и дека неговата кампања ќе се фокусира на директни средби со граѓаните. Лимани на првиот круг од локалните избори во октомври не успеа да победи бидејќи му недостигаа 23 гласа за цензус.

The post БЕЈТА И ЛИМАНИ ЌЕ СЕ ТРКААТ ЗА ГОСТИВАР, ЗА ЦЕНТАР ЖУПА НИКОЈ!? Истекува рокот за кандидирање на повторените избори во четири општини appeared first on plusinfo.mk.

Намибискиот политичар Адолф Хитлер Унона конечно го промени името, изоставувајќи го „Хитлер“ од сите службени документи. Тој изјави дека отсега се вика само Адолф Унона и дека оваа промена е чин на лична совест, јави весникот The Namibian.

– Моето име не е Адолф Хитлер, јас сум Адолф Унона – рече политичарот и додаде дека многумина порано се обидувале да го поврзат со човек што никогаш не го познавал.

Меѓутоа, Унона, кој доаѓа од општината Омпунџа во северната област Ошана, одамна бил под светло на јавноста поради неговото име. Тој се дистанцирал од било каква идеолошка или историска поврзаност со нацизмот, објаснувајќи дека татко му го избрал името без да го разбере неговото значење.

Од друга страна, Намибија била германска колонија кон крајот на XIX и почетокот на XX век, што делумно објаснува зошто многу жители тогаш добивале германски имиња.

Притоа, и покрај контроверзниот детал, Унона изгради успешна политичка кариера. На неодамнешните избори повторно го освои своето место во локалниот совет, како претставник на владејачката партија СВАПО.

Бирачите во регионот, според извештаите, го ценат по делата и достапноста, а не по името. „Важно е што работи за луѓето, не како се вика“, изјавиле жители на Ошана.

The post ПОЗНАТИОТ ПОЛИТИЧАР ГО ИЗБРИША „ХИТЛЕР“ ОД ИМЕТО Татко му го крстил без да го знае кобното значење на зборот? appeared first on plusinfo.mk.

Актуелниот пратеник и поранешен министер за внатрешни работи Оливер Спасовски побарал да биде разрешен од функцијата координатор на пратеничката група на СДСМ затоа што не се согласувал со предлог-резолуцијата на неговата партија за односите со Бугарија, откри самиот Спасовски во инервју за ТВ Сител.

Тој рече дека неговото барање за престанок на оваа функција било поднесено уште кога бил изнесена предлог-реолуцијата и не е поврзано со лошите резултати на СДСМ на лоалните избори. Спасовси рече дека, веднаш кога документот требало да се достави во Собранието, тој изразил несогласување со стратегијата што ја туркал дел од раководството – особено со идејата за таканаречените „црвени линии“ во билатералниот спор. Неговите забелешки биле отфрлени, по што тој побарал да не ја извршува повеќе координаторската функција во Собранието.
Со тоа тој ги негираше шпекулациите дека и тој бил зафатен со кадровските промени што ги спроведува претседателот на партијата Венко Филипче, по неуспехот на локалните избори. Исто така се проширија информации дека многу од поранешните функционери на СДСМ не сакале да преземат нови функции и задолженија, што Спасовски исто така го коментираше.

– Точно е дека со председателот Филипче имав средба во четири очи, како и со други колеги, како Славјанка Петровска и други од пратеничката група на СДСМ, но не е вистина дека Филипче ни нудел позиции, а ние сме одбиле. Филипче си има средби, како што јас имам во пратеничка група, и заеднички и поединечни, каде се договараат стратегии за седници, што е редовна работа. Власта прави измислици и шпекулира за да ремети со дезинформации – рече Спасовски.

Тој додаде дека со години предупредувал дека во партијата се замолчува реалната слика за состојбите, што, според него, на крај довело до дебакл на последните локални избори.
Поранешниот министер за внатрешни работи смета дека СДСМ може да се подобри само ако повторно ги активира луѓето кои се повлекле од партиските активности, а задача на новиот претседател Венко Филипче е да ги охрабри тие кадри да се вратат. Притоа нагласи дека не мисли на оние што преминале во ВМРО-ДПМНЕ, туку на поранешни членови што се пасивизирале и од партијата и од политиката.

The post СПАСОВСКИ НЕ СЕ СОГЛАСУВАЛ СО ПРЕДЛОГ-РЕЗОЛУЦИЈАТА НА СДСМ ЗА ОДНОСИТЕ СО БУГАРИЈА Поради тоа се откажал од позицијата координатор на пратеничката група appeared first on plusinfo.mk.

„Одговорноста е моја“, изјави данската премиерка Мете Фредериксен откако стана јасно дека нејзината социјалдемократска партија претрпе пораз во речиси цела Данска на локалните избори што се одржаа деновиве. Посебно тежок е поразот во Копенхаген, бидејќи за првпат од 1903 година, социјалдемократите ја изгубија власта во данската метропола.

Исходот на данските избори доаѓа како уште една потврда дека социјалдемократијата продолжува да ја губи почвата во Европа. Дури и во Скандинавија, најсилното упориште на социјалдемократијата во светот, партиите што доминираа долго време ги губат своите позиции.

Во Данска социјалдемократите и понатаму ја предводат владејачката коалиција на државно ниво. По парламентарните избори во септември годинава во Норвешка, социјалдемократскиот премиер Јонас Гар Сторе успеа да освои втор мандат. Но сепак, најголем пораст на норвешките избори забележаа десничарските популисти.

Шведските социјалдемократи се во опозиција, но и понатаму имаат најголеми симпатии меѓу избирачите, околу 35 проценти, според сондажите кои се прават во пресрет на парламентарните избори кои во Шведска треба да се одржат во септември 2026 година. Но, по поразот на данските социјалдемократи на локалните избори, критичарите повторно укажуваат на ризиците во стратегијата за која се определи нивната сестринска партија во Шведска, преземајќи делови од данските социјалдемократски заложби, кои деновиве беа казнети од страна на данските избирачи.

Лидерката на шведските социјалдемократи, Магдалена Андерсон, црпи голема инспирација од нејзината данска сестринска партија, особено за прашања поврзани со криминалот и сегрегацијата во општеството. Предлогот за уривање на становите во градски подрачја населени со бегалци и мигранти е пример што беше испробан во Данска. Во изборната кампања во 2022 година беше критикувана изјавата на Андерсон дека Шведска не треба да има никакви „Сомалиски квартови“, а што исто така има јасни сличности со реториката на данските социјалдемократи.

Со строги казни и строга миграциска политика, данската премиерка Фредериксен во голема мера успеа да ја избрише десничарската популистичка Данска народна партија од политичката мапа. По 2022 година таа формираше центристичка влада заедно со две либерално-конзервативни партии. Пресвртот и овозможи на Фредериксен да ја зајакне својата позиција како еден од ретките социјалдемократски премиери во Европа. Но, тоа ја чинеше партијата скапо.

Повеќето аналитичари се согласуваат дека губењето на избирачките гласови се должи на идеолошкото свртување на данските социјалдемократи кон десно. Токму затоа многумина предупредуваат дека Магдалена Андерсон, која како лидер на една од најголемите социјалдемократски партии во Европа се подготвува за изборната кампања во Шведска следната година, таа треба да учи од грешките на Мете Фредериксен. Данските социјалдемократи се уште ја имаат премиерската функција. Но, како што беше забележано во еден коментар, „тие ја изгубија својата душа“.

Нема никакво сомнение дека социјалдемократските партии одиграа клучна улога во реконструкцијата на демократијата во Западна Европа по Втората светка војна во 1945 година, а нивните заложби во голема мера се сè уште централни за демократијата во Европа денес. Во повоениот период, овие партии имаа клучни политички функции и исполнуваа важна идеолошка ниша.

Но, според актуелните назнаки во политичките прегрупирања во Европа, социјалдемократските партии моментно не нудат големи надежи за подобрување на ранливите и сиромашните групи во општеството, како што некогаш правеа од 1920-тите години па наваму. Новата генерација социјалдемократски политичари идеолошки се оддалечи од традиционалниот колосек и го изгуби контактот со корените на работничкото движење. Оние кои денес се невработени или примаат социјална помош не се членови на социјалдемократските партии. Социјалдемократските политичари, всушност, немаат контакт со споменатите групи. Социјалдемократските партии во Европа до одреден степен ги задржуваат позициите меѓу своите гласачи во средната класа и во моментов се грижат за интересите на оваа општествена група.

Како што стојат сегашните трендови, социјалдемократските партии ќе продолжат со својот тренд на опаѓање, а во уште повеќе европски земји тие може да бидат маргинализирани во иднина. Многумина критичари укажуваат дека социјалдемократите немаат ништо посебно да им понудат на гласачите од работничката класа, туку ќе се вртат кон средна класа која сега е донекаде и радикална.

Времињата на големите реформи во Европа во добар дел се поминати. Речисти сите граѓани во ЕУ имаат здравствено осигурување, пензии и бесплатно основно образование. Многумина имаат законски утврдени минимални плати и колективни договори. Токму затоа, проблемот на социјалдемократите е да изнајдат нови прашања кои можат да ангажираат широки избирачки групи во едно време кога чувството на класна припадност е на пат да биде избришано.

Подобрувањето на условите на пазарот на трудот и отворање на нови работни места бара и една посилна идеолошко-политичка спрега и соработка меѓу социјалдемократите и синдикатите – во интерес на работниците и обичните граѓани. Токму како што во Шведска, кога се зборува за историската поврзаност на социјалдемократската партија со синдикалните движења, тој односн традиционално се означуваше како „две гранки на исто дрво“.

Праведноста и правичноста можат да имаат смисла како обединувачко ткиво на општеството само доколку се базираат врз нови, успешно спроведени и „опипливи“ реформи. Најважното во таа смисла не е голото повикување на клучни вредности, туку оние кои ја водат политиката да знаат, пред сè, во која насока плови бродот, за да можат и на другите да им покажат на морската мапа дека ги гледаат островите во далечината.

Што се однесува до СДСМ, македонските социјалдемократи, и по големите изборните порази, секако и понатаму сакаат да се вбројуваат и да се сметаат за една од прогресивните социјалдемократски европски партии, нудејќи ја својата визија за изградба на праведно општество кое ќе ги штити слабите и ранливите. Но таа слика се чини може да заврши и како одблесок од сопствениот лик од огледалото, зад кое всушност се шири вистинската слика на општеството во која на идеолошкиот компас на македонските социјалдемократи избирачите се помасовно му го вртат грбот.

The post Социјалдемократијата во слободен пад во Европа appeared first on plusinfo.mk.

Партијата Алијанса на Албанците, крилото под раководство на Зијадин Села, ја напушта коалицијата Национална алијанса за интеграција, чиј предводник е ДУИ. Партијата ќе делува самостојно, а нејзините пратеници во Собранието ќе бидат независна група.

Претседателството на Алијансата за Албанците одржа состанок на кој се дискутираше за актуелната политичка состојба, процесот и епилогот од локалните избори, како и следните чекори, соопшти вечерва партијата.

„На последните локални избори, коалицијата со која учествувавме излезе како победник на национално ниво, со бројот на освоени гласови на листите за советници и бројот на освоени советници, но сме незадоволни од епилогот во градоначалничката трка, каде што се соочивме со моќен државен инженеринг и интеракции на албанските субјекти на власт со македонските партии од сите табори, со единствена цел да се реализира платформата на ВМРО-ДПМНЕ за дефакторизација на Албанците во земјата. Од овие сценарија, самите Албанци изгубија повеќе од нас како субјекти, бидејќи по централната власт, Албанците сега беа деградирани и на ниво на локалната власт“, се вели во партиското соопштение, потпишано од Зијадин Села.

Но, и покрај оваа ситуација, се додава, Алијансата за Албанците останува решена да ја брани националната кауза на Албанците во Македонија.

„По суштински и многу важни дискусии, членовите на Претседателството едногласно донесоа одлука за автономно дејствување на Алијансата за Албанците, додека во наредните денови пратениците на АА ќе ја обработуваат во Собранието одлуката за дејствување како независна група. Алијансата за Албанците останува силен опозициски глас на Албанците, одржувајќи комуникација со субјектите на албанската опозиција, за што навреме ги известивме и нашите досегашни коалициски партнери“, соопшти партијата.

Националната кауза, рамноправноста на Албанците во државата и Уставот, како и санирањето на штетите предизвикани од актуелната Влада остануваат наша примарна определба за политичко дејствување, се додава во соопштението.

The post СЕЛА ЈА НАПУШТИ КОАЛИЦИЈАТА СО АХМЕТИ Алијанса на Албанците ќе делува самостојно, нејзините пратеници ќе бидат независна група appeared first on plusinfo.mk.