Откако започна војната во Заливот Русија му ги пренесува на Иран локациите на американските воени средства, вклучувајќи воени бродови и авиони – тврдат тројца американски разузнавачки службеници за „Вашингтон пост“, кои зборуваат под услов да останат анонимни поради чувствителноста на темата.

Според соговорниците на весникот, не е сосема јасно колкав е обемот на руските разузнавачки инволвирања во помагање на Иран.

– Се чини дека станува збор за прилично сеопфатен напор – вели еден од разузнавачите.

Способноста на иранската војска сама да ги лоцира американските сили е намалена за помалку од една недела по почетокот на борбите, велат разузнавачите.

Според аналитичарите, можното споделување разузнавачки информации од Москва се вклопува во шемата на иранските напади врз американските сили, кои се насочени кон командна и контролна инфраструктура, радари и импровизирани објекти, како оној во Кувајт каде што беа убиени шест војници. Во последните денови, беше погодена и филијалата на ЦИА во американската амбасада во Ријад, главниот град на Саудиска Арабија.

– Иран спроведува многу прецизни напади врз радари за рано предупредување или радари над хоризонтот. Тие го прават тоа со многу јасна цел – ги таргетираат командните и контролните центри – вели Дара Масикот, руски воен експерт во Карнеги фондацијата за меѓународен мир.

Иран има само неколку воени сателити и нема сопствена сателитска констелација, објаснува Масикот. Поради тоа сликите обезбедени од многу понапредните вселенски капацитети на Русија се исклучително вредни, особено затоа што Кремљ ја усоврши својата технологија во изминативе години на војна во Украина.

Никол Грајевски, која ја проучува соработката на Иран со Русија во Центарот Белфер на Харвардската школа „Кенеди“, смета дека одмазничките напади на Иран покажуваат високо ниво на „софистицираност“, како во насочувањето, така и во способноста, во некои случаи, да ја надвладеат американската и сојузничката одбрана.

– Тие минуваат низ американската и израелската против-воздушна одбрана – рече таа, забележувајќи дека квалитетот на нападите на Иран се подобрил дури и во споредба со оној демонстриран во 12-дневна војна со Израел минатото лето.

Од друга страна, Пентагон брзо ги осиромашува своите залихи од прецизно оружје и пресретнувачки ракети за против-воздушна одбрана, велат за „Вашингтон пост“ извори запознаени со ова прашање.

Ваква загриженост изрази и генералот Ден Кејн, претседател на Здружениот штаб, додека претседателот Доналд Трамп уште размислуваше дали да ја одобри операцијата. Подоцна, администрацијата на Трамп се обиде да ги минимизира процените на Кејн.

Руската помош ја преобликува динамиката на прокси војната воспоставена по руската инвазија на Украина во 2022 година.

– Русите се добро запознаени со помошта што им ја даваме на Украинците. Мислам дека се многу среќни што добија шанса да добијат некаков вид одмазда – рече еден од функционерите запознаен со поддршката на Москва за Техеран. Тој додава дека квалитетот на руското собирање разузнавачки информации не е на американско ниво, но сепак се рангира меѓу најдобрите во светот.

„Вашингтон пост“ претходно објави дека Кремљ гледа можни придобивки во долготрајна војна меѓу САД и Иран, вклучително и повисоки приходи од нафта и криза што ги одвлекува вниманието на Америка и Европа од војната во Украина.

Руската амбасада во Вашингтон не одговорила на барањето на „Вашингтон пост“ за коментар. Исто така и ЦИА и Пентагон одбија да коментираат за обвинувањата.

Двајца функционери запознаени со странската поддршка за Иран велат дека Кина не изгледа дека му помага на Иран во одбраната, и покрај блиските врски на двете земји.

Исто така и кинеската амбасада во Вашингтон не одговорила на барањето за коментар. Пекинг, исто така, официјално повика на прекин на конфликтот.

На прашањето оваа недела каква порака има САД за Русија и Кина, кои се меѓу најмоќните сојузници на Иран, министерот за одбрана Пит Хегсет рече дека нема порака и дека „тие всушност не се фактор тука“.

The post РУСКОТО РАЗУЗНАВАЊЕ МУ ПОМАГА НА ИРАН „Вашингтон пост“ открива на кој начин appeared first on plusinfo.mk.

Владата ги прецизира локациите за изградба на гасни централи со турслата компанија „Казанџи груп”, изјави премиерот Христијан Мицкоски.

Тој рече дека по потпишување на Меморандумот со компанијата процесот на преговори продолжува.

-Во игра се неколку локации – во Скопје се неколку локации во оптек, исто така и Куманово е во потег, Тетово, Гостивар, поголемите градски средини. Нормално, тука се исто така и останатите, имајќи предвид дека Битола, веќе ќе се затвори проблемот со затоплување, бидејќи се завршува проектот за топлификација од РЕК Битола- рече Мицкоски.

За инвестирање во ваков тип на проекти премиерот најави дека Владата е веќе во преговори со уште неколку странски инвеститори.

-Ни остануваат Прилеп, Велес, Штип, Струмица, Кавадарци итн. Да, да не ми замерат останатите коишто нема да ги споменам. Но, покрај „Казанџи”, веќе сме во преговори со уште неколку други потенцијални инвеститори за инвестирање во ваков тип на проекти – рече Мицкоски.

The post „КАЗАНЏИ ГРУП“ РАЗГЛЕДУВА ЛОКАЦИИ ВО СКОПЈЕ, ТЕТОВО И ВО КУМАНОВО ЗА ГАСНИ ЦЕНТРАЛИ За централите во другите градови се бараат нови инвеститори appeared first on plusinfo.mk.

Од 5 мај (понеделник), Општина Аеродром започнува голема пролетна акција за бесплатно собирање кабаст отпад на целата територија, која ќе трае до крајот на јуни. Оваа иницијатива се реализира во соработка со Јавното претпријатие за комунални дејности на Општина Аеродром, а претставува продолжение на есенската акција спроведена минатата година.

Како дел од акцијата, на повеќе локации ќе бидат поставени специјални садови каде граѓаните ќе можат да го остават својот стар и дотраен мебел, со цел правилно отстранување и зачувување на животната средина.

„Преку оваа акција сакаме да излеземе во пресрет на сите жители на Аеродром, со што им овозможуваме на еден едноставен и организиран начин да се ослободат од кабастиот отпад од домовите. Истовремено, придонесуваме за почиста околина и спречување на создавање диви депонии“, велат од Општина Аеродром.

Акцијата ќе започне во населбата Мичурин, каде на 5 и 6 мај садовите ќе бидат поставени на улицата Анастас Митрев зад паркот до трансформаторот и на улицата Венјамин Мачуковски до трансформаторот кај Железничката станица.

Потоа, на 7 и 8 мај жителите на Острово ќе можат да го остават отпадот на улица Владимир Комаров бр. 9 до контејнерите, како и на број 16 зад ТЦ „Скопјанка“.

Општината ги повикува сите граѓани редовно да ја следат интернет страницата aerodrom.gov.mk, каде е објавен целосниот распоред со точни датуми и локации за собирање на отпадот.

Во минатогодишната акција, реализирана во август и септември, од 41 локација беа собрани дури 70 тони отпад, што е показател за високата потреба и интерес на граѓаните за вакви организирани акции.

The post ГОЛЕМА ПРОЛЕТНА АКЦИЈА ВО АЕРОДРОМ Граѓаните ќе можат бесплатно да се ослободат од стариот мебел appeared first on plusinfo.mk.

Министерството за внатрешни работи ги информира граѓаните и сите корисници на воздухоплови без екипаж (дронови) дека од страна на Агенцијата за цивилно воздухопловство е поставена забрана за вршење на било какви операции со воздухоплови без екипаж (дронови) на територијата на град Скопје и тоа на плоштад Македонија, улица Димитрие Чуповски, булевар 11 Октомври пред Собрание на РСМ, улица Филип Втори, булевар Гоце Делчев до булевар Илинден и пред Влада на РСМ.

„Неовластеното, некоординирано оперирање на овие воздухоплови не само што го загрозува воздушниот сообраќај, туку може да предизвика сериозни последици по животот и имотот на трети лица на земја. Оперирање со воздухоплови без екипаж во забранети зони е основ за поведување постапка за санкционирање согласно Законот за воздухопловство“, информираат од МВР.

Од МВР, исто така, апелираат до граѓаните во овие денови на неизмерна тага и болка во рамки на загарантираното со Устав право на собирање и одржување на протест, истите да се одржат во мирна атмосфера, да се почитуваат веќе донесените одлуки од страна на државните институции и да се почитуваат наредбите и насоките од страна на полициските службеници, во насока на обезбедување на мирот, безбедноста и сигурноста на сите граѓани во државата.

The post ЗАБРАНА ЗА ЛЕТАЊЕ ДРОНОВИ НА ПОВЕЌЕ ЛОКАЦИИ ВО СКОПЈЕ Агенцијата за воздухопловство и МВР со апел до граѓаните appeared first on plusinfo.mk.

Општините Центар и Аеродром спроведуваат засилени инспекциски контроли со цел подобрување на безбедноста на граѓаните, како во угостителските и станбените објекти, така и во училиштата и детските градинки.

Локалните власти иницираа состаноци со релевантните институции и инспекциски служби, кои работат на идентификување и отстранување на потенцијалните ризици, како и на подобрување на почитувањето на законските регулативи.

Општина Центар: Инспекциски мерки за сигурност во објектите

По иницијатива на градоначалникот Горан Герасимовски, во Општина Центар се одржа итен состанок на Штабот за заштита и спасување, на кој присуствуваа инспекциските служби, како и командирот на ПС Беко, Игор Стаменковски. Главна тема беше безбедноста во општината и предлагањето мерки за заштита на граѓаните.
На состанокот беа дискутирани неколку клучни области: безбедноста на станбените објекти, усогласеноста на угостителските објекти со безбедносните прописи, функционалноста на хидрантната мрежа, како и мерките за заштита во училиштата и градинките.

– Првиот состанок го одржавме со директорите на општинските училишта, бидејќи безбедноста на децата е наш приоритет. Сите училишта и градинки имаат изработено План за заштита и спасување, а нивните проценки се одобрени од Дирекцијата за заштита и спасување – изјави Герасимовски.

Инспекциските служби наредната недела ќе одржат состаноци со управителите на станбените згради и регистрираните заедници на сопственици, фокусирајќи се на усогласеноста со нормите за домување, противпожарната опрема и нејзиното одржување. Дополнително, ќе се закаже состанок со Подрачното одделение за заштита и спасување – Центар за координирани акции.

Општината ги потсетува угостителските објекти на нивната обврска за спроведување безбедносни мерки, а инспекциската служба ќе продолжи со контролите. Управителите се должни да подготват потребна документација која ќе биде предмет на увид. Во случај на неправилности, ќе бидат издадени решенија за отстранување на недостатоците во рок од 8 дена.

Општина Аеродром: Контроли во угостителските и станбените објекти

Во текот на минатата недела, инспекциските служби на Општина Аеродром извршија контроли во над 100 угостителски објекти. Во моментов се анализираат собраните податоци за усогласеноста со законските прописи и безбедносните стандарди. Истовремено, општината подготви план за контрола на хидрантските мрежи и пристапите во станбените згради, а од понеделник ќе започнат инспекциските проверки во соработка со куќните совети и управителите.

Вршителот на должноста градоначалник на Општина Аеродром, Дејан Митески, испрати барање до сите основни училишта и детски градинки да достават податоци за состојбата со хидрантската мрежа, противпожарната опрема и плановите за евакуација.

„Општина Аеродром прави сѐ што е во нејзина надлежност за заштита на граѓаните и обезбедување безбедни услови за живот и работа. Инспекциските служби ќе продолжат со контролите со цел да се зголеми нивото на безбедност во сите објекти на територијата на општината“, се вели во соопштението од Општина Аеродром.

И двете општини повикуваат на соработка од страна на граѓаните, сопствениците на објекти и институциите, со цел унапредување на безбедносните стандарди и создавање на побезбедна средина за сите.

The post ЌЕ СЕ ЧЕШЛААТ РЕСТОРАНИ, ГРАДИНКИ, ЗГРАДИ… Општините Центар и Аеродром контролираат сѐ и нема да запрат appeared first on plusinfo.mk.

Општина Центар објави јавен повик за доделување локации за поставување подвижни објекти, подвижни апарати и други подвижни направи на 14 локации во централната градска зона.

Право на учество имаат сите правни и физички лица со регистрирана дејност и сите лица што вршат занаетчиска дејност, а подвижните објекти може да се користат за угостителски услуги (продажба на јадења, напитоци, сладолед, и слично).

– Јавниот повик е одлична можност за сите заинтересирани лица да основаат или да го прошират својот бизнис во срцето на градот. Со обезбедување локации во Центар не само што го поддржуваме развојот на малите бизниси, туку и создаваме простор за иновации и креативност во угостителскиот сектор. Преку нашиот повик се залагаме за подобрување на урбаната средина, создавајќи современи и еколошки прифатливи решенија што ќе ја збогатат понудата за граѓаните и туристите. Ги повикувам оние коишто сакаат да аплицираат да не контактираат – вели градоначалникот на Центар Горан Герасимовски.

Барателите за локација треба да достават соодветна документација, вклучително и барање за издавање одобрение, доказ за регистрирана дејност, потврда за исполнување на минимално технички услови, скица со димензии и фотографија од подвижниот објект, како и уплатница од 1.000 денари.

Локациите ќе се даваат за користење на период од 12 месеци, а подвижните објекти треба да исполнуваат минимални еколошки стандарди и да не го нарушуваат амбиентот. Повикот ќе трае цела година, се додека има слободни локации.

Сите заинтересирани може да аплицираат според принципот „Прв дојден – прв услужен“. За повеќе информации на линкот во прилог https://www.centar.gov.mk/?p=24205

The post ПРИЈАВЕТЕ СЕ ЗА ЛОКАЦИЈА ЗА ВАШИОТ МАЛ БИЗНИС Општина Центар објави повик за подвижни угостителски услуги appeared first on plusinfo.mk.

Од Општина Аеродром појаснуваат дека акцијата ќе започне од населба Мичурин каде што денеска садовите ќе бидат поставени на улица „Анастас Митрев“ зад паркот до трансформаторот и на улица „Венјамин Мачуковски“ до трансформаторот кај Железничка станица.

Потоа, утре, жителите на Острово својот кабаст отпад ќе можат да го оставаат на улица „Владимир Комаров“ бр. 9 до контејнерите, како и на „Владимир Комаров“ број 16 зад ТЦ „Скопјанка“.

Кабастиот отпад е планирано да се собира речиси до крајот на септември, а жителите за сите локации и датуми можат да се информираат на страницата на Општината.

„Ваквата акција се спроведува со цел да им се излезе во пресрет на аеродромци бесплатно да го отстранат стариот мебел од своите домови. Со тоа истовремено ја заштитуваме животната средина од несовесно фрлање отпад, при што се создаваат диви депонии што ја загадуваат околината, но и даваат лоша слика за Аеродром“, се вели во соопштението од Општината.

Истовремено, од Општина Аеродром најавуваат дека во наредниот период во голема мера ќе ги зајакнат инспекциските контроли на терен. Доколку се забележи дека граѓани фрлаат кабаст и друг вид отпад на локации што не се наменети за тоа ќе се применуваат најстроги казни за таквото несовесно однесување.

The post АЕРОДРОМЦИ ДОСТА ФРЛАТЕ КАЈ ЌЕ СТИГНЕТЕ! Општината од денеска започна со собирање на кабаст отпад, погледнете кога ќе бидат во вашето маало appeared first on plusinfo.mk.

Како што информираа од МВР ма 09.01.2024 од страна на полициски службеници на Одделот за криминалистичка полиција-Сектор за општ и насилен криминал Скопје,  полициски службеници од ОСОСК и СВР Штип, во содејство со САЕ Тигар, по претходно издадени судски наредби, извршени се претреси на пет локации во Пробиштип и една локација во Штип, при што од слобода е лишен Љ.Н. (43) од Пробиштип.

„Љ.Н. на 21.12.2023 околу 13.00 часот со секира влегол во училишниот двор на Средното општинско училиште „Наум Наумовски Борче” во Пробиштип и им се заканувал на вработените, со спреј пишувал пораки со заканувачка содржина по надворешните ѕидови од училиштето, по што уништувал предмети и инсталации во ходниците на училиштето и се обидел да ја скрши вратата од канцеларијата на директорката на училиштето. Потоа Љ.Н. влегол во зградата на Центарот за социјални работи во Пробиштип каде упатувал закани по животот на вработените.  Против Љ.Н. е поднесена кривична пријава до надлежното обвинителство, а се преземаат и дополнителни мерки во врска со овој случај“, соопштија од МВР.

The post СО СЕКИРА ГО ДЕМОЛИРАЛ УЧИЛИШТЕТО И ИМ СЕ ЗАКАНУВАЛ НА ВРАБОТЕНИТЕ „Тигрите“ приведоа 49-годишен насилник од Пробиштип appeared first on plusinfo.mk.

„Првата фаза ги опфаќа формирање и обележување на паркинг зони на булеварот Јане Сандански, како и улиците 23 Октомври, Ангел Димовски и Коста Новаковиќ, а втората фаза ќе ги опфати Реонски центар и Ново Лисиче, по завршување на анкетата која ќе се спроведе во следниот период. Аеродром станува урбана и зелена општина, со доволен број паркинг места и организиран систем за паркинг. Со проширувањето на опфатот општината го реализира ветување за обезбедување доволен број слободни паркинг места за жителите на Аеродром и отстранување на хаварисаните возила“, се вели во известувањето од Општина Аеродром.

The post НОВИ ЛОКАЦИИ ЗА „ЗОНСКО ПАРКИРАЊЕ“ ВО АЕРОДРОМ Општина најави проширување и во Реонски центар и во Ново Лисиче appeared first on plusinfo.mk.

Инвеститорот на комплексот „Diamond of Skopje“ вели дека основата на сообраќајницата е готова, бидејќи таа морала да биде завршена за да може врз неа да се градат останатите објекти кои се составен дел од инвестицијата вредна 350 милиони евра.

– Дел од проектот е и подземната сообраќајница што се протега под комплексот „Diamond of Skopje“ и е долга 746 метри и широка 37 метри. Подземната сообраќајница има по две сообраќајни ленти и помошна лента во двата правци и две трамвајски линии во средината. Во моментов, бетонските работи на подземниот тунел се комплетно завршени, односно вкупната должина од 746 метри е целосно ископана, со поставени потпорни ѕидови и фундамент. За нејзината изградба е извршен 14 метри длабок ископ, по што се изградени потпорни ѕидови, кои се веројатно меѓу највисоките во земјава, и на нив е поставен фундамент. Се работи за важен инфраструктурен проект чие ставање во функција ќе овозможи брзо движење низ центарот на градот, што е клучен предизвик во централните градски подрачја. Изградбата на подземната сообраќајница, како и изградбата на останатите две станбени згради, e планирано да се заврши во текот на следната година. Вкупната инвестиција во целиот проект достигна 350 милиони евра – изјавија инвеститорите за Плусинфо.

Градот засега нема никакви активности, ниту во делот на кружниот тек кај Водњанска, ниту пак кај Јужниот булевар, особено откако во октомври се случи отворањето на трговски центар „Diamond Mall“, при што се зголеми бројот на возила кои се движат во овој дел од градот.

– Подземната сообраќајница е еден од највиталните делови на комплексот „Diamond of Skopje“. Таа ќе биде прва и засега единствена од ваков вид во земјава. Оттука, од големо значење е нејзино сообраќајно поврзување, поради што нејзината реализација се прави на партнерска основа со Град Скопје, под чии ингеренции се кружните текови на западната и на источната страна. Ние сме во постојана комуникација, фокусирани сме на својот дел од работата и истовремено конструктивни за континуитетот на отпочнувањето на фазите на изградба, кои се во тек од страна на Град Скопје, кој е наш значаен партнер – велат инвеститорите.

Градоначалничката на Скопје Данела Арсовска пред шест месеци изјави дека експропријацијата на објектите на просторот наменет за кружен тек би била неспорна зашто голем дел од засегнатите куќи се дивоградби. Најголемиот проблем, според неа, би бил да се реши ситуацијата со објектот на „Македонски железници – инфраструктура“, кој се наоѓа непосредно до Паркот на новинари, а во кој е сместена значајна ИТ опрема на претпријатието.

Од „Железници инфраструктура“ минатиот месец за Плусинфо рекоа дека спорниот објект во моментов нема некоја значајна опрема која би го забавила процесот на изградба на кружниот тек, но до нив нема официјално барање дека објектот треба да се руши.

– Нашиот диспечерски центар е префрлен од оваа зграда. Останува само дел од опремата, кој може да се дислоцира во секое време и без да предизвика некакви проблеми во работењето. Ние го поддржуваме овој проект на Градот, но очекуваме за возврат на овој имот да добиеме локација во близина на кружниот тек, за да можеме да изградиме реномиран објект. Писмено за ова ги известивме Град Скопје и општина Центар, но немаме информација дали тоа ќе се прифати и каде е обезбедена новата локација. Инаку, немаме добиено барање објектот да го дислоцираме и дека ќе се руши – велат од претпријатието.

Еден месец пред локалните избори во 2021 година, тунелите со кои се спојува булеварот Македонија (Јужен булевар) со булеварот Кочо Рацин увид изврши тогашниот градоначалник Петре Шилегов.

– Ова сообраќајно решение е дел од планот кој го поставив пред четири години кога станав градоначалник – а тоа е Скопје да биде град без сообраќаен метеж, со најголема пешачка зона во Европа во центарот на градот. Со реализацијата на овој план скопјани добиваат брзо и непречено патување низ градот со возила, јавен превоз или други средства за транспорт – изјави тогаш Шилегов и најави дека градежните работи целосно ќе бидат готови до 2024 година.

Мултифункционалниот комплекс „Diamond of Skopje“ се протега на површина од 325.000 метри квадратни, има четири станбени кули со вкупно 772 станбени единици, деловен простор, трговски центар „Diamond Mall“, кој се отвори на 20 октомври годинава, хотел со пет ѕвездички „Limak Skopje Luxury Hotel“.

The post ТУНЕЛОТ ПОД ЛИМАК Е РЕЧИСИ ГОТОВ, АБЕР НЕМА ОД КРУЖНИТЕ ТЕКОВИ Колку долго ќе чекаат 6 ленти и 2 трамвајски линии Градот да ги поврзе во сообраќај? appeared first on plusinfo.mk.