Министерот за здравство Азир Алиу поддржува дополнителна дејност кај лекарите, но нагласува дека таа мора да биде строго регулирана и да не влијае негативно врз јавниот здравствен систем.

– И уште еднаш напоменувам, бидејќи имаше шпекулација дека министерот е против дополнителната дејност, што не е точно. Јас сум за секој процес кој ќе придонесе кон здравствениот систем во државата, да може тоа да го поддржиме и законски и институционално, но никако да се вложи здравствениот систем – истакна Алиу.

Според него, дополнителната дејност не смее да ги влоши процесите во јавниот здравствен систем.

Тој нагласи дека не смее да се зголемат листите на чекање на товар на граѓаните.

– Дополнителна вредност е ако некој доктор кој ќе работи во јавна здравствена установа да може да биде интересен и за приватниот сектор, бидејќи во приватниот сектор никогаш нема да ве вработат или да ви нудат можност за соработка, ако не сте стручен во областа. Мораме да бидеме претпазливи и да не ги спречиме процесите кои што придонесуваат позитивно кон здраствениот систем, но уште еднаш да не дозволиме тие процеси да се злопотребуваат – рече Алиу.

Министерот посочи дека и приватните здравствени институции се дел од здравствениот систем и дека пациентите таму се исто така граѓани на државата.

The post ДОПОЛНИТЕЛНА ДЕЈНОСТ КАЈ ЛЕКАРИТЕ, НО СО СТРОГИ ПРАВИЛА Не смее да има зголемување на листите на чекањe appeared first on plusinfo.mk.