Лајонел Ричи е хоспитализиран во болница во Сент Луис и е сместен на одделот за интензивна нега, откако му се слошило по неговиот концерт во саботата, на 29 август. Според американските медиуми, 77-годишниот пејач по настапот самиот побарал медицинска помош и бил примен за дополнителни испитувања, а извор близок до неговиот тим рекол дека тоа било направено од претпазливост. Лекарите, меѓу другото, проверуваат дали можна дехидратација предизвикала проблеми. Засега нема официјално соопштение за конкретна дијагноза.

Неговото последно појавување на сцената дополнително ги загрижи обожавателите. Ричи настапувал во The Muny во Сент Луис, а кон крајот на концертот, додека ја пеел „All Night Long“, побарал од тимот да му донесат столче за да може да ја заврши песната седејќи. Сведоци изјавиле дека кон крајот на настапот изгледал како да има потешкотии, иако локален новинар кој бил на концертот рекол дека целокупниот настап не изгледал како настан по кој би следела хоспитализација.

Ова е втор сериозен здравствен инцидент за Ричи во само нешто повеќе од два месеци. На 24 јуни, за време на концертот во Сент Пол, Минесота, кој беше првиот настап од неговата летна турнеја со Earth, Wind & Fire, пејачот почувствувал вртоглавица и морал да седне на сцената додека ја пеел „Dancing on the Ceiling“. По уште една песна, концертот бил прекинат, а Ричи бил однесен во болница. Поради совет од лекарите да се одмори и целосно да закрепне, биле одложени и следните два концерти во Чикаго и Колумбус.

По првиот инцидент Ричи сепак брзо се вратил на сцената. На почетокот на јули им се заблагодари на фановите за пораките и поддршката и порача дека се чувствува добро. Во меѓувреме продолжи со турнејата „Sing a Song All Night Long“ заедно со Earth, Wind & Fire, која започна во 2023 година и продолжи со нова серија концерти во 2026 година.

Засега нема потврдена информација дека Ричи има сериозно заболување, ниту дека неговата состојба е животозагрозувачка. Американските медиуми, повикувајќи се на извори блиски до пејачот, известуваат дека тој е во болница за испитувања и дека се очекува да биде пуштен. Претставниците на Ричи досега не објавиле официјален медицински билтен со детали за неговата состојба.

Ричи, кој во јуни наполни 77 години, засега има следен закажан концерт на 26 септември во Сан Франциско, заедно со Earth, Wind & Fire. Настапот претходно бил одложен поради здравствениот проблем на тапанарот на Earth, Wind & Fire, Џон Парис. Во моментов не е објавено дали најновата хоспитализација на Ричи ќе влијае врз неговите идни настапи.

The post ЛАЈОНЕЛ РИЧИ ЗАВРШИ НА ИНТЕНЗИВНА НЕГА ПО ПОСЛЕДНИОТ КОНЦЕРТ На пејачот му се слошило додека ја пеел „All Night Long“ appeared first on plusinfo.mk.