За слободата на изразувањето Мартиновски морал да лежи еден ден затвор во 1937 година, откако во кафулето „Океан“ негде близу денешно „Беко“ во Скопје нацртал петнаесетина еротски разголени сцени. Не помогнало ни тоа што тој потоа пробал да ги „облече“ ликовите. Властите на кралството СХС го казниле.

– Полицијата не одлучува што е уметност, а што е порнографија – изјавил тогаш Мартиноски.

Тој е прв директор на Средното уметничко училиште во Скопје, иницијатор на Народната галерија и член на МАНУ. Тој има два периоди прв и втор скопски период на сликање, а неговите дела од германски експресионизам во кој твореше и Едвард Мунк, преоѓаат во реализам, па и во соц-реализам. Во Букурешт учел за експресионизмот, во Париз за Модилијани. Имал и рани реалистички слики. Занает научил и од Димитар Андонов Папрадишки, кој бил зограф.

Многу од делата на Мартиноски од почетокот на триесеттите години претставуваат сцени од кафеанскиот живот или пак се поврзани со проституцијата. Користејќи го искуството на други уметници, Мартиноски ги деформира, дури и ги карикира фигурите за да ја нагласи бруталноста на мотивите на кои работи. Сликите „Доилка“ и „Композиција – Мајка со дете“ (1929/30), се дадени со слободни контури на фигурите и пејзажите, со еден вид експресионистичка тензија. Сликата „Кафеана 1“ (1930) е смело „измешана“ и преполнета композиција. Формите на женските и машките фигури се дадени со нервозни, раздробени потези, со забележлива кубистичка и експресионистичка инспирација.

Во последните етапи сликарството се приближува до симболистичкиот експресионизам, како оној на Марк Шагал. Мартиноски постепено ја менувал својата внатрешна тензија. Така, во цртежите од 1956, 1957, 1958 и 1959 година, внел аглести конструкции и деформации, кубистичка изразност и фантазија во композицијата, невообичаените, драматични и смели позиции на фигурите во просторот или грациозните, рафинирани и извиткани облици, се особено забележливи од 1959 до неговата смрт во 1973 година.

Сепак, невозможно е да се даде осврт на неговото творештво во само неколку дефиниции.

The post НЕПОКОРЛИВИОТ СКОПСКИ БУНТОВНИК И СВЕТСКИ СЛИКАР На денешен ден бил роден Никола Мартиноски appeared first on plusinfo.mk.

– За целосно развивање на креативниот потенцијал на учениците потребно е ликовното образование да биде редовен предмет со два блок часови неделно, од прво до деветто одделение. Исто така, многу важно е ликовните педагози да бидат вклучени во наставата од прво одделение со цел да ги препознаваат и насочуваат потенцијалите за сите професии поврзани со визуелната уметност. Предметот ликовно да е дел од програмата на средните стручни училишта со два часа неделно, особено училиштата (текстилно, архитектонско) во кое се јавува особена потреба од визуелна писменост – се вели во соопштението на Иницијативниот одбор на ликовни педагози на РСМ и Детски ликовен центар-Скопје.

Тие сметаат дека со предложените промени најмногу ќе изгубат учениците, но и наставниот процес во целина, бидејќи предметот ликовно образование е посебен предмет со свои специфични наставни содржини и нема врска со изборните предмети.

– Сакаме да укажеме и на фактот дека во одредена мера вашиот концепт има делумно неточни претпоставки. Имено, не е точно дека нашите ученици се премногу оптоварени, туку напротив, македонските ученици спаѓаат во најмалку оптоварените по број на часови и предмети во Европа. Оптовареноста, според нас, е во содржините и несоодветните програми, а особено во застарениот и неадекватен наставен процес и методички пристап, а не во бројот на часови и предмети. Тоа, конкретно се огледа и во предметот Ликовно образование. Имено, во ЕУ овие предмети се застапени во просек од два до четири часа – велат ликовните педагози.

Тие нагласуваат дека единствениот предмет со кој се развива креативноста е ликовното образование, кој со новата концепција за основното образование е поставен на маргините на образованието со тенденција да се укине. Од друга страна, како што велат ликовните педагози, целта на промените во образованието се прават за да се промовира критичко мислење и креативност кај учениците.

– Сакаме директно да укажеме, дека предложената идеја Ликовно и Музичко да се спојат во еден курикулум сè до крајот на основното образование, ќе доведе едноставно до неможност истиот да се реализира. Во неколку европски програми, постои таков пристап, но главно секаде спојувањето е ограничено на првите три одделенија. Ве уверуваме, не постои европска земја каде овие два предмета се во еден, сè до крајот на основното образование – истакнуваат од Иницијативниот одбор на ликовни педагози на РСМ и Детскиот ликовен центар-Скопје.

Оттаму додаваат дека и покрај тоа што на денешниот состанок со министерката во МОН Мила Царовска имаат дијаметрално спротивни гледишта во однос на концептот за предложените реформи во образованието, напоменуваат дека и понатаму се подготвени да учествуваат во креирање на политики и да соработуваат за доброто на учениците и предметот кој го предаваат.

The post Ликовните педагози против идејата да се спојат Ликовно и Музичко appeared first on plusinfo.mk.