Манчестер Сити сè уште не знае каква казна ќе добие за утврдените прекршувања на финансиските правила на Премиер лигата, но најтешкиот удар за клубот можеби нема да дојде од независната Комисија. Пресудата може да отвори правна врата низ која дел од најголемите ѕвезди би се обиделе да заминат без клубот да добие ниту едно евро обесштетување.

Проблемот можеби не е ограничен само на играчите на Сити. На ист начин, играчите од ривалските клубови кои не успеале да освојат трофеј или да се квалификуваат за Лигата на шампионите во периодот опфатен со случајот, исто така би можеле да поведат судска постапка против Манчестер Сити.

Играчите  на Сити се очекува да побараат одговори кога следната недела ќе се вратат на тренинзите, откако клубот беше прогласен за виновен за вештачко зголемување на приходите за повеќе од една милијарда евра преку фиктивни деловни договори.

Проблем за клубот е што неговите ѕвезди наводно немаат посебни клаузули што автоматски би им овозможиле да заминат доколку Сити биде исфрлен од Премиер лигата. Но, тоа не значи дека се без друга правна опција.

Адвокатот Пол Гилрој КЦ објасни дека играч би можел да тврди дека клубот, како негов работодавач, толку сериозно го нарушил меѓусебниот однос на доверба што со тоа создал основа за раскинување на договорот.

– Играчот би можел да каже: „Вие сте мој работодавач, ја прекршивте таа обврска и тоа ми дава право да кажам дека го раскинувам договорот и си одам“. Тоа е можност. Видов коментари дека е малку веројатно, но зависи од многу работи – рече Гилрој во подкастот „Stick to Football“.

Од казна до бесплатно заминување

Таквиот исход воопшто не е извесен и би зависел од правното толкување, но последиците за Сити би можеле да бидат огромни. Ако аргументот успее, некои фудбалери би можеле да се обидат еднострано да ги раскинат договорите и да заминат без трансферно обесштетување.

Гилрој посочува дека многу ќе зависи и од начинот на кој раководството на Сити ќе комуницира со фудбалерите и ќе се справи со последиците од пресудата.

Но, тука се отвора и вториот, потенцијално уште поширок проблем. Правните последици теоретски не мора да завршат во соблекувалната на Манчестер Сити.

Фудбалери од ривалските клубови кои во периодот опфатен со случајот останале без трофеј или пласман во Лигата на шампионите, според правната можност што ја наведуваат англиските медиуми, исто така би можеле да се обидат да поведат постапка против Сити.

Казната допрва доаѓа

Колкава ќе биде непосредната спортска казна за Манчестер Сити сè уште не е познато. За неа ќе се одлучува на посебно сослушување пред независна Комисија, затворено за јавноста.

Според правилата на Премиер лигата, Комисијата располага со широк спектар санкции – од парична казна и одземање бодови до други спортски мерки.

Англиските медиуми очекуваат дека сериозноста и времетраењето на утврдените прекршувања би можеле да донесат многу потешка санкција од казните изрекувани во претходните случаи за поединечни прекршувања на финансиските правила.

Меѓу најекстремните можности што се споменуваат е и исклучување од Премиер лигата. Додека Сити ја чека одлуката за казната, клубот истовремено ќе мора да го спречи отворањето на два други фронта – во сопствената соблекувална и надвор од неа.

The post СИТИ МОЖЕ ДА ГИ ЗАГУБИ ЅВЕЗДИТЕ, НО ТОА НЕ Е НАЈЛОШОТО Играчите на ривалите би можеле да отворат втор фронт appeared first on plusinfo.mk.

Реал Мадрид се соочува со казни од УЕФА поради расистичкото однесување на навивачите за време на дуелот со Барселона во Лигата на шампионите.

Дисциплинската комисија на европската фудбалска асоцијација одлучи дека клубот ќе мора да плати парична казна од 15.000 евра. Дополнително, долниот дел од јужната трибина на стадионот „Сантијаго Бернабеу“, кој има околу 500 седишта, ќе биде затворен – но само доколку се повтори слично однесување на некој натпревар организиран од УЕФА.

За претстојниот дуел од осминафиналето против Манчестер Сити, затворањето на трибината нема да се применува, што значи дека навивачите ќе можат да ги следат своите миленици без ограничувања.

Ова е уште еден потсетник дека расизмот нема место на фудбалските терени, а клубовите мора да преземат мерки за да го спречат и санкционираат ваквото однесување.

The post РЕАЛ МАДРИД СЕ СОЧУВА СО КАЗНИ Расистичкото однесување на навивачите не помина без санкции appeared first on plusinfo.mk.

Во седиштето на УЕФА денеска беа извлечени двојките за 1/16 финалето од Лигата на шампионите, носејќи неочекувани дуели и големи дерби средби.

Европскиот првак ПСЖ ќе се соочи со францускиот ривал Монако, додека Реал Мадрид ќе има шанса за „одмазда“ со Бенфика. Останатите интересни пресметки вклучуваат дуели како Јувентус против Галатасарај, Интер против Бодо/Глимт и Атлетико Мадрид против Бриж.

Двојките за 1/16 финалето се:

Монако – ПСЖ

Бенфика – Реал Мадрид

Карабах – Њукасл

Бодо/Глимт – Интер

Галатасарај – Јувентус

Борусија Дортмунд – Аталанта

Бриж – Атлетико Мадрид

Олимпијакос – Баер Леверкузен

Првите натпревари ќе се играат на 17 и 18 февруари, а реваншите на 24 и 25 февруари.

Тимовите кои директно обезбедија пласман во осминафиналето се: Арсенал, Баерн Минхен, Ливерпул, Тотенхем, Барселона, Челзи, Спортинг и Манчестер Сити, кои групната фаза ја завршија на првите осум позиции.

Се очекува возбудлива фаза со многу неизвесни натпревари и потенцијални сензации, а фановите веќе ги пресметуваат шансите за големите фаворити и изненадувањата што можат да се случат во Европа.

The post РЕАЛ БАРА „ОДМАЗДА“ ПРОТИВ БЕНФИКА, ПСЖ ПРОТИВ МОНАКО Европската сцена се подготвува за епски пресметки appeared first on plusinfo.mk.

Португалскиот напаѓач на Ал-Наср, Кристијано Роналдо, повторно ги воодушеви фановите со својата амбиција, истакнувајќи дека само повредите можат да го спречат да постигне 1.000 гола во својата кариера.

Четириесетгодишниот фудбалер моментално има 956 гола, а за „RMC Sport“ изјави дека секогаш се стреми кон нови предизвици, без разлика дали игра на Блискиот Исток или во Европа.

– Каде и да играм, секогаш сакам да освојувам трофеи и да ја достигнам таа бројка што сите ја знаете. Уверен сум дека ќе го постигнам тоа ако останам без повреди – рече Роналдо.

Роналдо неодамна беше прогласен за играч на годината на Блискиот Исток по трет пат по ред од страна на „Globe Soccer Awards“. Легендата е петкратен победник на Златната топка, петкратен освојувач на Лигата на шампионите и европски шампион.

Напаѓачот игра за Ал-Наср од 2023 година, а во својата импресивна кариера настапувал и за Спортинг, Манчестер Јунајтед, Реал Мадрид и Јувентус, оставајќи неизбришлив белег во светскиот фудбал.

The post ЌЕ ПОСТИГНАМ 1.000 ГОЛОВИ АКО ОСТАНАМ ЗДРАВ Роналдо и на 40 години не се откажува од целта appeared first on plusinfo.mk.

„Остануваме обединети. Понекогаш во животот треба да поминете низ тоа и да научите од тоа, бидејќи не можете секогаш да победувате. Заедно повторно ќе се издигнеме“, напиша Халанд на социјалните мрежи.

Норвежанецот го пропушти вчерашниот реванш против Реал Мадрид (1:3) откако сè уште не е целосно заздравен по повредата со која се здоби против Њукасл пред неколку денови. Останува под знак прашалник и неговиот настап на неделното дерби со Ливерпул во Премиер лигата.

The post ЗАЕДНО ПОВТОРНО ЌЕ СЕ ИЗДИГНЕМЕ Халанд ги повика соиграчите од Сити да не очајуваат appeared first on plusinfo.mk.

Фудбалерите на Барселона во Париз го шокираа ПСЖ и победија со 2-3 во првиот натпревар од четвртфиналето во Лигата на шампионите. Подеднакво возбудливо беше и во Мадрид каде Атлетико  на домашен терен беше поуспешен од Борусија Дортмунд со 2-1.

Резултатот во Париз беше отворен во 37 минута со голот на Рафиња за почетно водство на гостите. Фудбалерите на ПСЖ по одморот тргнаа силно и од 48 до 51 минута направија комплетен пресврт преку Дембеле и Витиња.

Потоа Баркола погоди статива за 3-1 за да во 62 минута по одличната асистенција на Педри, бразилскиот ас Рафиња да израмни на 2-2.

Конечниот 3-2 за Барселона ги постави Кристенсен во 77 минута.

Реваншот се игра во Барселона на 16 април.

Во вториот четвртфинален дуел, Атлетико Мадрид славеше против Борусија Дортмунд со 2-1. Домаќините водеа со 2-0 по 32 минута игра со головите на Де Пол и Лино. Гостите се вратија во 81 минута со погодокот на  Але. Фудбалерите на Борусија во финишот имаа две големи шанси и два пати ја погодија пречката на противничкиот гол, пропуштајќи шанса да дојдат до изедначување.

Во реваншот на 16 април, Борусија е домаќин во Дортмунд.

The post 📽 БАРСЕЛОНА ГО ОСВОИ ПАРИЗ, АТЛЕТИКО СИГУРЕН ВО МАДРИД Фудбал за сладокусци во првите четвртфинални натпревари во Лигата на шампионите appeared first on plusinfo.mk.

Првите четвртфинални натпревари во фудбалската Лига на шампиони, завршија нерешено, откако Арсенал и Баерн одиграа 2-2 во Лондон, а Реал Мадрид и Манчестер Сити ремизираа 3-3 во Мадрид.

Стрелци за Арсенал беа Букајо Сака во 12 и Леандро Тросар во 76 минута.

Головите за Баерн ги постигнаа Серж Гнабри во 18. минута и Хари Кејн од пенал во 32. минута.

Резултатски пресврти донесе и дуелот на „Сантијаго Бернабеу“ во Мадрид.

Стрелци за Реал беа Рубен Диас во 12. Минута (автогол), Родриго во 14. минута и Федерико Валверде во 79. минута.

Головите за Манчестер сити ги постигнаа Бернардо Силва во втората, Фил Фоден во 66. минута и Јошко Гвардиол во 71. минута.

Реваншите се закажани за седум дена во Минхен и во Манчестер.

The post НЕРЕШЕНО И ВО ЛОНДОН И ВО МАДРИД Без победник во првите четвртфинални натпревари од Лигата на шампионите  appeared first on plusinfo.mk.

Властите во Шпанија се информирани за вознемирувачката порака која се шири на социјалните мрежи и ја објавува споменатата фондација „Ал Азим“, а како што пишува шпанска „Марка“, засега нема причина за преголема паника. Веќе се е пријавено во полиција и информирани се разузнавачки служби, а сите четвртфинални натпревари во ЛШ се оценети како натпревари од „висок ризик“.

За разлика од Лондон и Париз, за ​​ова многу повеќе се зборува во Шпанија, каде „Марка“ пренесува дека утрово ќе има состанок на безбедносните служби на кој ќе се одлучи дали треба да се преземат дополнителни мерки за да се обезбеди безбедноста на сите учесници во натпреварот. Затоа сите погледи се вперени во Мадрид, кој за 24 часа ќе организира два натпревари, Реал Мадрид и Сити, па Атлетико и Дортмунд, а се очекува наплив на голем број навивачи.

Инаку, фондацијата „Ал Азим“ служи за објавување на пораките на Исламската држава, но многу фанови сметаат дека тоа е само закана за создавање паника, бидејќи сметаат дека не би ги откриле однапред своите намери.

ÚLTIMA HORA I El Estado Islámico amenaza con un atentado terrorista en los Cuartos de Final de la Champions

La fundación Al Azaim, medio que se encarga de difundir mensajes del Estado Islámico, ha hecho pública una imagen en la que se amenaza al Parque de los Príncipes, al… pic.twitter.com/b1LQ5hoakD

— El Partidazo de COPE (@partidazocope) April 8, 2024

УЕФА се огласи во врска со заканите на Исламската држава дека ќе има терористички напади на натпреварите од Лигата на шампионите. Во кусото соопштение УЕФА потврди дека навистина има информации за потенцијален напад на четирите стадиони на кои се играат четвртфиналните натпревари, но дека нема опасност за гледачите.

„УЕФА е свесна за наводните терористички закани кои се упатени пред натпреварите од Лигата на шампионите оваа недела и тесно соработува со властите на земјите каде што се играат овие натпревари. Планирано е сите натпревари да се одржат според веќе воспоставена програма со соодветни безбедносни мерки“ – стои во објавата од УЕФА испратена неколку часа пред натпреварите кои почнуваат вечерва од 21 часот, меѓу Арсенал и Баерн во Лондон и Реал Мадрид и Манчестер Сити во Мадрид.

The post 📷 ТРЕВОГА ПРЕД НАТПРЕВАРИТЕ ОД ЛИГАТА НА ШАМПИОНИТЕ Исламската држава испрати грозоморни закани  appeared first on plusinfo.mk.