Општина Центар во рамки на проектот „Образование за сите“ и во учебната 2024/25 година ќе ангажира 25 лични асистенти за поддршка на учениците со посебни образовни потреби и индиректно на нивните семејства.

Општината распиша јавен повик за работно ангажирање на невработени лица кои во период од девет месеци, колку што трае учебната година, ќе бидат по 4 часа со таргетираните ученици и ќе им го олеснат следењето на наставата.

Личните асистенти треба да ги реализираат следниве активности: да им помагаат на учениците при движење низ училишните простории, при користење дидактички материјал во текот на наставата, при извршување на училишните обврски и да им помогнат во олеснување на комуникацијата со наставниците и со соучениците.

За личните асистенти, пак, ангажманот ќе придонесе за подобрување на нивната работна способност и вештини што ќе им овозможат да ја зголемат својата конкурентност на пазарот на трудот.

Општина Центар целосно самостојно го финансира проектот „Образование за сите“ веќе петта година по ред во рамки на Програмата за образование. За учебната 2024/25 предвиден е буџет во износ од 3.500.000 денари, кој ги покрива трошоците за 25 лични асистенти.

Деталите од повикот и условите за пријавување погледнете ги на следниов линк https://www.centar.gov.mk/?p=22424.

The post 25 ЛИЧНИ АСИСТЕНТИ БАРА ОПШТИНА ЦЕНТАР Распишан јавен повик за новата учебна година appeared first on plusinfo.mk.