Регулаторната комисија за домување (РКД) информира дека одзедела лиценци на четири правни субјекти – управители на станбена згради, при вонредна периодична проверка за исполнувањето на условите врз основа на кои им е издадена лиценцата со барање на податоци.

Целта на вонредната периодична проверка, информираа денеска од РКД, беше добивање на податоци за постапување согласно член 42 од Законот за изменување и дополнување на Законот за домување (“Службен весник на Република Македонија” бр.160/2025), според кој управителите на станбени згради беа должни најдоцна во рок од шест месеци од денот на влегувањето во сила на овој закон да го усогласат своето работење согласно со неговите одредби.

Со извршената проверка биле опфатени правни лица – управители на станбени згради со седиште во повеќе градови во државата, меѓу кои Скопје, Охрид, Прилеп, Тетово, Гостивар, Струмица, Штип, Битола, Кичево, Велес, Куманово, Кочани и Кавадарци.

При проверката констатирано е дека 62 правни субјекти го имаат усогласено своето работење.

– Кај 4 управители, од кои 3 се со седиште во Скопје и една во Струмица, констатирани се неправилности, недоставени податоци или неисполнување на обврските утврдени со закон. Еден од управителите со одземени лиценци не извршувал дејности над кои ние како комисија имаме надлежност повеќе од 6 месеци наназад и со тоа свесно се откажале од управувањето. Две од правните лица-управители после одземањето на лиценците си ги завршиле комплетно своите обврски согласно Законот за домување, во поглед на враќање на средствата од резервен фонд и изготвување на завршни финансиски извештаи, изјави Никола Затуроски, претседател на Регулаторната комисија за домување.

Според последните податоци на РКД, во државава вкупно 8.053 станбени згради се управувани од страна на управител или на заедница на сопственици. Со лиценцирани управители се 5.600 објекти, со договори за вршење управувачки услуги со вкупно 135.338 посебни делови, односно станови и деловни простории. Податоците од Централниот регистар, пак, покажуваат дека до средината на декември минатата година има 2.453 активни регистрирани Заедници на сопственици.

The post 4 ФИРМИ, УПРАВИТЕЛИ НА ЗГРАДИ, ОСТАНАА БЕЗ ЛИЦЕНЦИ Вонредна контрола откри неправилности appeared first on plusinfo.mk.

Акцијата за преиспитување на концесиите за канабис се спроведува подолг период и правдата ќе си дојде на свое место, а опозицијата ја мачи тоа што доаѓа време за одговорност за сите вклучени лица – рече претседателот на Владата Христијан Мицкоски на денешната собраниска седница за пратенички прашања.

– Оваа влада веќе шест лиценци има одземено. Од информациите со кои располагам, уште неколку ќе бидат одземени во периодот кој следи. Контролите продолжуваат, очекувам голем број лиценци да бидат одземени. Но, исто така за мене е поважно, што е правено изминатите години откако главната економска политика на претходната влада се темелеше на давање на лиценци и одгледување на цвет од канабис. Тоа беше главната економска политика на претходната влада и, нормално, ширење на хистерија кога сега од опозиција ја прават без да понудат било какво решение – рече Мицкоски, одговарајќи на прашање од пратеникот Љупчо Пренџов.

Премиерот Мицкоски рече дека фирмата во којашто се запленија повеќе од 30 тона цвет од канабис има роднинска поврзаност со висок функционер на опозицијата од минатото, односно претседател на локална организација во СДСМ во Ново Село.

– Не еден килограм, не еден тон, туку 30 тони. Факт е дека овие испораки завршуваат до луѓе блиски од претходната влада, но тоа не можам јавно да го зборувам бидејќи е дел од истрагата. Тишината нив ги оптеретува, тие се навикнати на парада, камери, лисици, понижувања, омаловажувања, тие не се навикнати на соопштенија за јавност или кратка изјава и тоа ги мачи затоа што конечно доаѓа времето на наплата на она кое што во назад во времето било погрешено. Ги мачи што гледаат дека нема назад, кога гледаат како камионите се полнат со запленет канабис, се одземаат лиценци. Работи меморијата, секој се преиспитува што направил што потпишал, кој документ, што згрешил, тоа е цело време потсвест која ќе продолжи да ги јаде. Сега тие се молат да заврши истрагата побргу за да видат кои се тие, дали се тие или не, дали ќе се покрене постапка овде за одземање имунитет можеби, тоа ги мачи – изјави премиерот Мицкоски.

Премиерот Мицкоски рече дека има чувство оти голем дел од нив ќе се изненадат, дека правдата ќе биде исполнета, и голем дел од нив ќе одговараат.

– Замислете држава во која главната економска политика се темели на канабис? Отидоа чекор понапред, сакаа да формираат слободни канабис туристички зони каде ќе биде дозволено користење марихуана. Не им беше доволно што тони канабис ќе порасне и генерации ќе бидат потенцијални зависници. Беа свесни за тоа и решија да направат слободни зони за консумирање канабис, па спомнуваа Дојран, Охрид и не случајно во тие региони има најмногу плантажи за да нема трошоци за транспорт. На тоа дојде крај и сега следи одговорноста и гарантирам дека одговорност ќе има – рече премиерот Мицкоски.

The post ИМ РАБОТИ МЕМОРИЈАТА, СЕ ПРАШУВААТ ШТО ПОТПИШУВАЛЕ Мицкоски им порача на опозиционерите дека „доаѓа времето за наплата“ appeared first on plusinfo.mk.

Министерството за финансии на САД  објави дека ќе им дозволи на компаниите што бараат дозволи да ја препродаваат венецуелската нафта на Куба, но услов е нафтата да не е наменета за институциите и војската на земјата.

Одлуката би можела да помогне во ублажување на акутниот недостиг на гориво на островот. Откако Вашингтон ја презеде контролата врз извозот на нафта од Венецуела на почетокот на јануари, по апсењето на претседателот Николас Мадуро, испораките за Куба престанаа, што ја влоши нејзината енергетска криза.

Упатствата на Министерството за финансии, исто така, јасно ставаат до знаење дека потенцијалните трансакции мора да бидат „поддржани од кубанскиот народ, вклучително и приватниот сектор“, што вклучува извоз за комерцијална и хуманитарна употреба во Куба, додека трансакциите што вклучуваат или им користат на кубанската војска или други владини институции нема да бидат опфатени.

Дури и со новата политика, не е јасно дали Куба може да си дозволи да купува нафта без поволни услови.

Министерството за финансии изјави дека кандидатите кои ќе ја продаваат нафтата на Куба не мора да имаат основано правно лице во САД и дека ограничувањата од дозволата издадена во јануари за широк извоз на венецуелска нафта нема да важат за Куба.

Повеќе од 25 години, Венецуела е главен снабдувач на сурова нафта и гориво за својот политички сојузник Куба преку билатерален договор.

Новата поволна политика за лиценцирање доаѓа во време кога големите трговски куќи, вклучувајќи ги Витол и Трафигура, ракуваат со голем дел од извозот на нафта од Венецуела, при што милиони барели се извезуваат во САД, Европа и Индија, а милиони други се складираат во карипските терминали за препродажба.

Претседателот на САД, Доналд Трамп, предупреди дека сојузниците на Венецуела, кои ја земаа нејзината нафта како дел од размена, отплата на долг и други договори, сега мора да плаќаат фер пазарни цени. Меѓу тие сојузници се Кина и Куба.

The post САД ЌЕ ДОЗВОЛАТ ПРОДАЖБА НА ВЕНЕЦУЕЛСКА НАФТА НА КУБА Услов е нафтата да не ја користи владата и војската appeared first on plusinfo.mk.

Американскиот претседател Доналд Трамп изјави дека ќе се сврти кон други царински овластувања и „дозволи“, откако Врховниот суд на САД минатата недела пресуди против неговата широка царинска програмано

Во објава на Truth Social, Трамп напиша дека пресудата на Врховниот суд „случајно“ му дала поголема моќ отколку што имал претходно..

Тој тврди  дека може да користи „дозволи“ за спроведување мерки против странски земји, особено оние за кои вели дека САД ги „ограбувале со децении“.

Во исто време, се пожали дека пресудата, како што тврди, не му дозволува да наплаќа такси за такви дозволи, но вели дека „сите дозволи имаат такси“.

Трамп појаснува дека судот „ги одобрил сите други тарифи“ и дека тие сега можат да се користат „на многу посилен и поиритирачки начин“ со „правна сигурност“.

Тој ги нарече судиите на Врховниот суд некомпетентни и рече дека треба да се срамат од себе, истакнувајќи дека ги исклучува „Големата тројка“ од критиките, без да разјасни на кои судии мисли.

The post ТРАМП ЌЕ КОРИСТИ ДРУГИ ОВЛАСУВАЊА, ПА И ЛИЦЕНЦИ ЗА КАЗНУВАЊЕ НА ЗЕМЈИТЕ Тој тврди дека Врховниот суд „случајно“ му дал повеќе овластувања appeared first on plusinfo.mk.

Најмалку 6 од 10 лиценцирани компании за производство на канабис во медицински цели, по извршените контроли, се во постапка да ги изгубат лиценците, изјави министерот за здравство Азир Алиу за ТВ Телма.

– Од досега процесираните компании, од 10 најмалку 6, сега се во постапка на одземање на лиценците, затоа што не ги исполнуваат условите за лиценцирање предвидени во законот – рече Алиу.

Тој рече дека не може да даде повеќе детали кои ја довеле до заклучок стручната комисија ан министерството да покрене постапка за одземање на лиценците, затоа што постапката е сѐ уште е во тек.

На прашање дали може да ги соопшти имињата на тие компании, министерот Алиу рече дека не сака тоа да го направи во оваа рана фаза, и дека процесот ќе заврши во вторник кога ќе бидат соопштени причините и имињата на компаниите за кои Комисијата на министерството за здравство утврдила дека не ги исполнуваат условите.

The post 6 ОД 10 ФИРМИ ПРОИЗВОДИТЕЛИ НА КАНАБИС ЌЕ ГИ ИЗГУБАТ ЛИЦЕНЦИТЕ Министерот Алиу ги соопшти првичните наоди на стручната контрола appeared first on plusinfo.mk.

Целокупната документација и наодите од извештаите на комисиите во врска со работењето на Стоматолошката комора, се доставени до Јавното обвинителство за натамошно разгледување и постапување, согласно законските надлежности, потврдија за МИА од Министерството за здравство.

„Доставени се трите извештаи за работа на комисијата за вршење надзор над законитоста на работата во вршење на јавното овластување на Стоматолошката комора од 25 февруари 2025 година, од 15 мај 2025 година и од 21 мај 2025 година“, посочуваат од Министерството.

Тие додаваат дека дополнително е доставено и известување до Стоматолошката комора од 11 март 2025 година, како и списи и документација од секторот за стоматолошка здравствена заштита.

„Во врска со процедурата за добивање или за продолжување лиценца на докторите по стоматологија, за што времено ги презедовме надлежностите, докторите може да ја достават документацијата во нашата архива, до сектор за стоматолошка здравствена заштита“, информираат за МИА од Министерството за здравство.

The post СТОМАТОЛОШКАТА КОМОРА ПОД ИСТРАГА Министерството за здравство сега ќе ги издава и ќе ги продолжува лиценците на стоматолозите appeared first on plusinfo.mk.

Министерството за здравство од денеска ги презема надлежностите за лиценцирање на Стоматолошката комора, соопшти министерот за здравство Азир Алиу.

Тој на денешната прес-конференција информираше дека одземањето на надлежностите, односно на јавното овластување на Стоматолошката комора се се додека не се воспостави систем преку кој Комората ќе работи законито, транспарентно и професионални.

– Овој чекор не е казна. Ова е почеток на реформата, реформа што ќе врати довербата, ќе обезбеди интегритет и ќе гарантира дека секој стоматолог ја продолжува лиценцата со знаење и со вештини усогласени со најновите светски стандарди – појасни Алиу.

Според него, надзорот на документите на Стоматолошката комора покажале сериозни пропусти, односно едукации преку нерегистрирани здруженија и сертификати кои неправилно се користеле за продолжување на лиценците.

– Надзорите и документите покажаа сериозни пропусти како договори склучени ретроактивно спротивно на закон, одлуки и документи без потпис и со невалидна документација. Дополнително, игнорирање на привремената мерка и конечноста на одлука на Уставниот суд повеќе од една година, иако судот утврдил дека условите за стручно усовршување биле спротивни на законот – истакна Алиу.

Информираше дека има и сомнеж за финансиска злоупотреба.

– Имаме сериозни сомнежи за финансиски злоупотреби на Комората за кои финансиската полиција истражува, има прибавено обемна документација за која веруваме дека за брзо време ќе има епилог – нагласи Алиу.

Порача дека ова е директен удар врз една од петте столбови на неговата визија за здравството. И додаде дека Комората мора да има кредибилен законски и транспарентен систем за лиценцирање.

The post МИНИСТЕРСТВОТО ЗА ЗДРАВСТВО ЈА ПРЕЗЕМА КОНТРОЛАТА ВРЗ ЛИЦЕНЦИРАЊЕТО НА СТОМАТОЛОЗИТЕ Ставаме крај на пропустите и на сомнежите за злоупотреби appeared first on plusinfo.mk.

Министерот за транспорт Александар Николоски, одговарајќи на пратеничко прашање, попладнево порача дека министерството има надлежност само за градби од А категорија, а за сите објекти за кои секојдневно зборува градоначалничката Данела Арсовска е одговорен Град Скопје.

– Сакаме да ја информираме јавноста дека целосна надлежност за тие објекти има градоначалникот на Град Скопје, преку градежната инспекција. Наместо спектакли и настапи во медиумите, нека излезат со инспекција и нека утврдат дали објектите се дивоградби – рече Николоски.

Тој додаде дека ако се утврди дека станува збор за бесправна градба, Градот има право и обврска да постапи – да распише тендер за рушење, а трошоците да ги сноси инвеститорот, како и да поднесе кривична пријава до Јавното обвинителство. Доколку се утврди дека објектите се градени на државно земјиште, имотот може да се конфискува.

– Ништо од ова досега не е направено од страна на градоначалничката Арсовска. Наместо постапување според закон, секојдневно се гледаат спектакли во јавноста, без правни дејствија. Тоа нè води до други заклучоци – дали позадината е политичка и дали се работи за релации со функционери од ДУИ – праша Николоски.

Градоначалничката на Град Скопје, Данела Арсовска, во нејзиниот стил, со многу навреди реагираше на изјавата на министерот Николоски. Таа го прозва дека или не го знае законот или свесно манипулира со јавноста.

„Град Скопје, согласно закон, е единствена од 81 општина што нема градежна инспекција. Така е утврдено со закон. И тоа одамна. Наместо да манипулира, министерот Николоски нека се информира. Надлежен за постапување е Државниот инспекторат за градежништво, кој е под ингеренции токму на министерството со кое раководи Николоски“, рече Арсовска.

Градоначалничката потсети дека Министерството за внатрешни работи веќе поднело кривични пријави за дивоградби во Делчево и во Македонска Каменица, што според неа е доказ дека системот може да функционира, но не и во Скопје.

The post „АРСОВСКА СЕКОЈ ДЕН ПРАВИ ШОУ, А НИШТО НЕ ПРЕЗЕМА“ Николоски ја разоткри скопската градоначалничка appeared first on plusinfo.mk.

Во текот на изминатите две недели, царинските службеници низ целата држава пресекоа неколку обиди за шверц и нелегален увоз, откривајќи разнолика стока — од мотоцикл и игли за тетовирање, до цигари, детски сандали и фалсификувани документи.

Како што информираат од Царинската управа во некои случаи веднаш се поведени прекршочни постапки, додека за други е отворена и поширока истрага.

„Контролите се интензивирани и резултатите се видливи. Само во последниве 14 дена имаме привремено задржана стока во повеќе од десет случаи, од кои некои се особено сериозни – и по количината и по видот на прекршокот“, информираат од Царинската управа.

Еден од повпечатливите случаи се случил во Струмица, каде при увоз на моторцикл марка „Априлиа“ било утврдено дека документите се однесуваат на друг вид мотор, а вистинскиот мотор немал никаква правна основа. Моторциклот е веднаш запленет, а увозникот се соочува со прекршочна постапка.

На Меѓународниот Аеродром Скопје, цариниците во чекираниот багаж на патник со лет за Лондон пронашле 18 штеки цигари и 20 кутии тутун, сите без акцизни марки. Интересно е што патникот, македонски државјанин, се легитимирал исклучиво со бугарски пасош.

„Се работи за класичен обид за шверц. Кај овие видови стока, немаме компромис. Сè што нема документи и акцизни марки, се третира како шверц и се одзема веднаш“, објаснуваат од Управата.

Во друг случај, службата за мобилни скенери открила 5.476 парчиња опрема за тетовирање – игли, мастила и алат – скриени на горниот кревет во кабината на камион управуван од македонски државјанин. Ни за оваа стока не постоела никаква увозна документација.

Во близина на границата, во грмушки, се пронајдени 44 штеки и 9 кутии цигари, додека во друго возило при увоз се откриени дополнителни 12 штеки, без потребните документи. Во двата случаи се поведени прекршочни постапки, а во првиот случај акцијата е спроведена заедно со МВР.

Цариниците на граничниот премин Богородица во еден автомобил откриле 238 различни производи, од штитници и алат, до соларни рефлектори и играчки – сè тоа без соодветна документација.

Во камион со албански таблици на преминот Деве Баир, биле пронајдени 5.000 пластични делови за прозорци, исто така без документи, скриени во две кутии на горниот кревет во кабината.

Особено значаен случај е заплената на 3.755 пара детски сандали, 64 колички и 24 велосипеди на преминот Блаце. Стоката, натоварена во камион со косовски таблици, била со ознаки на заштитени трговски марки, а се сомнева дека се работи за фалсификати. Стоката е привремено задржана, а тече постапка за утврдување на нејзината оригиналност.

„Штетата што ваквата фалсификувана стока може да ја направи врз пазарот и потрошувачите е сериозна. Ние преземаме мерки веднаш штом се појави сомнеж“, додаваат од Царинската управа.

На граничниот премин Богородица, цариниците откриле и обид за користење на фалсификувана лиценца за меѓународен превоз. Возачот, македонски државјанин, приложил документ издаден на застарен, неважечки образец и не поседувал сертификат за професионална компетентност. Случајот е предаден на Секторот за контрола и истраги.

The post СПРЕЧЕН ШВЕРЦ НА ЦИГАРИ, АЛАТКИ ЗА ТЕТОВИРАЊЕ, ВЕЛОСИПЕДИ Царината со полни раце работа во претходните 2 недели appeared first on plusinfo.mk.

Голем број скопјани од вчера останаа без превоз откако дел од приватните автобуси беа повлечени од сообраќај. Се претпоставува дека причината за тоа се нередовни исплати од ЈСП Скопје и истечени договори кои беа склучени во 2023 година. Вчера ги немаше автобусите со број 23 и 45, а граѓаните беа останати зачудени на постојките незнаејќи што се случува со превозот. Претходно немаше никакви најави за прекин во превозот на некои линии или за проретчување на автобусите.

– Чекам 23-ка веќе 40 минути. Веќе стана многу топло, а автобус нема – вели скопјанка која чекаше на автобуската постојка кај Железничка станица.

Никој од засегнатите првозници и од Градот не кажува што точно се случува. Некои сопственици на приватни автобуси тврдат дека ЈСП доцни со исплатите. Еден од нив тврди дека за еден месец од минатата година не му биле ни признати извозените километри.

– Имам еден месец извозено од лани што не ми го признаваат. Ми велат – „системот не те евидентирал и нема пари“. Како да работам така? За секој ден на терен ми требаат околу 300 евра – гориво, возач, амортизација… Сето тоа го покривам од сопствен џеб, а ЈСП не ми плаќа навремено – вели сопственик на приватен автобус.

Според приватни превозници, проблемот се влошил откако договорите склучени пред две години им истекле, а нови немаат потпишано. Од Градот Скопје не се изјаснија во врска со застојот во превозот, ниту дали договорот со приватните превозници е продолжен, или тие деновиве возат на диво. Градот нема објавено нов повик за склучување договори со приватните превозници.

Додека не се реши проблемот со приватните превозници, граѓаните повторно се ставени во состојба да чекаат долго автобус кој воопшто нема да дојде.

Ниту еден претставник на приватните превозници деновиве не излезе да каже што се случува. Јовица Зафировски, кој досега честопати беше гласноговорник на барањата на приватниците, денеска не одговори на повиците од Плусинфо.

На крајот на мај истече двегодишниот договор кој во 2023 година го потпиша Градот со групацијата од три приватни превозници – „Јофи Бус“, „Вестор транс“ и „Радос компани“. До денес, ниту од Градот, ниту од ЈСП нема ниту потврда ниту демант: дали договорот е продолжен или не, дали има нов договор или повторно скопјани ќе се соочат со редуцирани линии.

Пред две години, градоначалничката Данела Арсовска ги прекина договорите со „Слобода превоз“ и „Макекспрес“, обвинувајќи ги за непочитување на договорни обврски. По неколку месеци на преговори и неуспешни јавни огласи, беше склучен нов договор со три приватни превозници и автобусите повторно се вратија на улиците.

Според законската регулатива, приватен превозник нема право да врши јавен превоз доколку нема валиден договор со локалната самоуправа или со Јавното сообраќајно претпријатие (ЈСП). Доколку, и покрај тоа, автобусите на приватните компании продолжат со работа, тие се изложуваат на санкции од страна на сообраќајната инспекција и полицијата.

The post ЗОШТО ГИ СНЕМУВА ПРИВАТНИТЕ АВТОБУСИ? Граѓаните извисени, не знаат што се случува со превозот appeared first on plusinfo.mk.