Втората група македонски граѓани евакуирани од ОАЕ пристигна во Скопје, соопшти вечерва Министерството за надворешни работи и надворешна трговија.

„На Меѓународниот аеродром – Скопје пристигна втората група македонски граѓани кои безбедно полетаа од Дубаи и ја напуштија територијата на Обединетите Арапски Емирати. Станува збор за вкупно 150 патници, од кои 125 македонски државјани, седум државјани на Србија, 11 државјани на Косово, двајца државјани на Босна и Херцеговина, двајца државјани на Албанија, еден државјанин на Германија, еден државјанин на Ерменија и еден државјанин на Црна Гора“, се наведува во соопштението.

Врз основа на претходно утврден план и во координација со надлежните институции, летот беше организиран од страна на Министерството за надворешни работи и надворешна трговија, а трошоците за неговата реализација беа целосно покриени од државата.

„Во текот на утрешниот ден се очекува во Приштина да пристигне третата група граѓани, за кои е предвидено да полетаат од Ријад, Кралството Саудиска Арабија“, најавија од Министерството.

The post ЕВАКУИРАНА ВТОРАТА ГРУПА МАКЕДОНСКИ ГРАЃАНИ ОД ЕМИРАТИТЕ Во Скопје слета авион со 150 патници appeared first on plusinfo.mk.