Откако минатата година низ серија прес-конференции насловени како „Афера – провизии кои чинат животи“ ја истакнавме инволвираноста на Венко Филипче како тогашен министер за здравство во трагедијата во која живи изгореа 14 наши сограѓани, а за која Љупчо Коцевски цврсто ги чуваше кривичните пријави и доказите за Филипче во некоја од неговите фиоки, деновиве поранешната обвинителка Лејла Кадриу, исто така, потврди дека работата е забошотена, рече денеска Валенитин Манасиевски од ВМРО-ДПМНЕ.

– Имено, Кадриу вечерта на кобната трагедија била повикана како јавен обвинител да помогне во истрагата, а по неа дошол и тогашниот државен јавен обвинител Љубомир Јовески, кој со свои двајца обвинители се приклучил во истрагата. Тие, според обвинителката Кадриу, имале обврска да ја држат работата под контрола. Имено, Светската банка тогаш одобрила средства за изградба на модуларни болници на територијата на цела  Македонија биле обезбедени околу 30 милиони евра за изградба на овие објекти. Филипче, кој инаку е познат по својот сенс за криминал и корупција, ја искористил шансата веројатно, да направи модуларни болници за кои тој лично ја скроил техничката спецификација – вели Манасиевски.

Во истрагата, обвинителката Кадриу вели дека во свои разговори со останати лица, градбата на модуларната болница била направена од панели рециклирани со пурпена, кои тогаш не чинеле повеќе од 5 до 6 евра, додаде Манасиевски.

– Додека пак, оние подобрите и поквалитетните, како на пример панели со камена волна кои не горат и до 40 минути, чинеле околу 17 евра. Во превод, според Кадриу, овие модуларни болници кои Филипче ги изгради чинеле околу 300.000 евра, сите заедно, а за оваа намена биле обезбедени 30 милиони евра. Каде заминале овие пари и во чиј џеб завршиле, никој нема одговор. Можеби Филипче го има и се наоѓа во некоја акција во индиска авиокомпанија, стан во Дубаи или пак некоја фирма во Бугарија – рече Манасиевски.

Трагедијата во Тетово во која загинаа 14 наши сограѓани, додаде тој, можела да биде спречена доколку Филипче потпишал минимум технички спецификации и ако направил елаборат за електрична енергија, со што не би дошло до спој, а доколку панелите биле малку поскапи и подобри, можеби и ќе се избегнел пожарот.

– Но, Филипче, по сè изгледа алчен за парите, искористил минимум од обезбедените средства. Згора на сè , ова можеби би било спречено и доколку Филипче ја прифател понудата на тогашниот медицински директор во тетовската болница, кој понудил сместување на ковид пациенти на двата спрата кои биле слободни во истоимената болница и биле оставени така празни. Филипче ова го одбил поради тоа што овие модуларни болници морале да бидат изградени – рече Манасиевски.

Сведоштвото на обвинителката Лејла Кадриу, додаде тој, вели дека вистинските виновници не се зад решетки.

– Оние кои велеле дека не треба да има модуларна болница и нуделе други решенија, сега се осудени, за жал, само по 3 години, а вистинскиот виновник денес води политичка партија во опозиција. Утре продолжуваме со нови информации и за тоа зошто обвинителката Кадриу била суспендирана токму поради овој случај – рече Манасиевски.

The post ИМАЛ НА РАСПОЛАГАЊЕ 30 МИЛИОНИ ЕВРА, АМА МОДУЛАРНИТЕ БОЛНИЦИ ГИ ИЗГРАДИЛ ЗА 300.000 ЕВРА Филипче искористил минимум од парите, објектите се градени од евтини материјали appeared first on plusinfo.mk.

Сведоштвата на обвинителката Лејла Кадриу од поранешното СЈО, се доказ за тоа како Зоран Заев го отвори правосудството како пупка. СЈО бил претворен во партиски штаб на СДСМ, изјави Валентин Манасиевски, член на ЦК на ВМРО-ДПМНЕ на денешната прес-конференција.

– Зоран Заев и СДСМ во тоа време ветуваа некаква вистина и правда за Македонија, но освен политички прогон, политичко монтирани случаи и изживување врз поранешни политичари, друго граѓаните не добија.

Обвинителката Кадриу, во интервју сведочи дека во еден момент, дури 4 адвокати на Зоран Заев, дошле во СЈО, да ги убедуваат обвинителите да се пуштат лица од притвор за предметот „Пуч’’. Биле убедувани да дадат позитивно мислење за да може предметот да се преземе од ОЈО ГОКК, за да може предметот да биде работен од токму СЈО. Истиот овој предмет, потоа бил и донесен во СЈО, спакуван во некакви кутии и обвиен со заштитна фолија. Овој предмет требало да го работат обвинителките Ленче Ристоска и Лиле Стефановска. Толку бил влечкан овој предмет и обвинителките не оделе на рочиштата, што според обвинителката Кадриу, овој предмет ден денес ако го најдеме некаде се уште би бил во некоја заштитна фолија, ниту отворен, ниту разгледан.

Дополнително, обвинителката Кадриу сведочи дека во уште минимум два предмети, додека таа била во СЈО, биле политички монтирани. Едниот е случајот за кој беше обвинета поранешната министерка за внатрешни работи, Гордана Јанкуловска, а другиот е случајот со Нешковски, случај со кој СДСМ излажа многу граѓани, ветуваше некаква вистина, за на крај да излезе дека нема никаква институционална одговорност.

Заев и СДСМ тогаш беа спремни да направат се само за да дојдат на власт и успеаја во намерите. Го лажеа својот народ и му ветуваа приказни, кои и ден денес се потврдуваат дека се лажни. СЈО и Катица Јанева беа користени само за Зоран Заев и СДС да дојдат на власт. По нивното искористување, сите знаеме како заврши таа приказна.

Затоа, го повикуваме ЈО да покаже дека се ослободило од канџите на Зоран Заев и СДС, и да ги истражи овие сведоштва на поранешната обвинителка од СЈО, Лејла Кадриу, за вистината конечно да излезе на виделина – рече Манасиевски.

The post АДВОКАТИ НА ЗАЕВ ГИ УБЕДУВАЛЕ ОБВИНИТЕЛИТЕ ДА УКИНУВААТ ПРИТВОРИ Манасиевски тврди дека СЈО функционирало како штаб на СДСМ appeared first on plusinfo.mk.

„Најостро ги демантирам клеветите и измислените наводи изнесени од адвокатката Лејла Кадриу во интервју во емисијата „Вечерното шоу на Богдан Илиевски” на ТВ Алфа, емитувано на 07.02.2026 година“, вели јавниот обвинител Гаврил Бубевскки во своето писмено обраќање до јавноста.

„Наводите кои се однесуваат на моето постапување и на работата на поранешното СЈО се невистинити и креирани со цел да наштетат на мојот личен и професионалениот углед, за што веднаш по емисијата иницирав постапка со која од неа побарав извинување за јавно изнесените лаги. Доколку не добијам извинување во законски предвидениот рок, ќе поднесам граѓанска тужба за клевета и во суд ќе се докаже дека се што беше кажано во наведената емисија е апсолутна невистина.

Иако сметав дека изнесените клевети не заслужуваат да им се дава јавно внимание, сфаќам дека нашето општество веројатно не е доволно отпорно на лаги.

Вистината е дека јас никогаш во мојот живот не сум имал 4 мобилни телефони. Додека бев јавен обвинител во СЈО имав еден телефонски број кој го користев за цело време додека бев во тоа обвинителство. По враќањето во ОЈО Скопје исто така користам само еден телефон. Мојот единствен, во моментов приватен телефонски број го знаат сите новинари и многу граѓани, бидејќи вистински верувам во начелото на транспарентност и на тој телефон секогаш сум бил и останувам отворен и достапен за сите прашања.

Ги отфрлам сите наводи за какво било влијание и стојам зад секоја одлука која сум ја донел.

Во голем дел од ситуациите кои беа претставени, како што е предавањето на прислушуваните материјали во СЈО, јас лично воопшто не сум бил присутен, за што имам и соодветни докази.

На страна од тоа, записник за тие материјали постои и тој е дел од доказите во предметот Таргет-Тврдина.

Од позиција на поранешна јавна обвинителка за чие оддалечување најпрвин од СЈО, а потоа и од редовното обвинителство, причините се многу добро познати во јавнообвинителската организација, каде и се водени и соодветни постапки за одговорност, Кадриу се обидува да го загрози мојот професионален интегритет и да влијае врз моето извршување на јавнообвинителската функција.

Мотивите за овој и други вакви слични настапи мене ми се јасни, но немам намера во ниту еден момент да им подлегнам на тие лаги и манипулации. Ќе ги искористам сите законски механизми за заштита, како што веќе направив и поднесов тужба и за лагите изнесени од уште еден адвокат – поранешен обвинител кој јавно настапува со истите намери и мотиви.

Очекувам во судска постапка да се докаже вистината наспроти лагите со кои „храбрите” поединци ја манипулираат јавноста подолг временски период, а со тоа да се утврди и нивната кредибилност како извори за информации во медиумите по однос на вистинските состојби во правосудството“ – се вели во јавното обраќање на обвинителот Бубевски.

The post ГАВИЛ БУБЕВСКИ БАРА ИЗВИНУВАЊЕ ОД ЛЕЈЛА КАДРИУ Во спротивно ќе тужи за клевета appeared first on plusinfo.mk.

Во случајот „Тенк“, набавката на блиндираниот „мерцедес“, Владата не била обврзана да објавува оглас, односно да распишува тендер, вели екс-обвинителка Лејла Кадриу во врска со работата на некогашното Специјално јавно обвинителство (СЈО). Зборувајќи во Вечерното шоу на Богдан Илиевски таа изјави:

– Значи, Владата не била должна. Можела да го купи „мерцедесот“ со спогодба во четири очи, затоа што законот тоа го дозволува, бидејќи е специфична набавка. Се набавува возило што ќе се користи за специјални услови, како за нашето државно раководство, така и за гости кои доаѓаат. Такви автомобили поседуваат и други држави, а тие што немаат или имаат потреба од повеќе такви возила во одредени ситуации, плаќаат огромни пари за рентирање. И гледано и од човечки и од професионален аспект, тука, осудените луѓе беа „земени на врат“. И жал ми е, и жал ми е за госпоѓа Јанкулоска, затоа што таа тогаш имаше бебе. Ја одвоија од бебето и ја затворија за ништо. Државата нема штета во тој случај. Злоупотребата би постоела ако има штетна последица. А во овој случај, кому е направена штета? Никому! А Јанкуловска дури и спровела јавна набавка, а не била должна – го објаснува случајот „Тенк“, Кадриу, која кратко беше и во СЈО на Катица Јанева, а долги години поминала и како еден од најпрофесионалните државни обвинители во правосудниот систем на нашата земја.

На прашањето како во СЈО се набавуваа автомобили, кога веќе за „мерцедесот“ луѓето беа осудени, таа одговара:

– На колегиум се зборуваше од кого ќе се набават автомобили. Велеа „ајде да земеме од овој, зашто имаме договорено со него“. Јас ги слушав разговорите, но не учествував во набавките, зашто не бев дел од тие што беа во екипа за јавни набавки.

Според нејзиното тврдење, во почетокот од работата на СЈО, со парите раководела Елизабета Јосифовска.

– Ние сè уште немавме вработен за таа дејност, а Јосифовска го знаеше занаетот од мајка ѝ, па така, како што кажуваше и она, тоа се работеше“, вели Кадриу која вели дека во СЈО трескавично се трошеле парите за да не дозволат на крајот на годината да се вратат во буџетот, па така кон крајот на 2015 година за два ипол месеци потрошиле милион евра, а во наредните години трошеа по 4 милиони евра, меѓу другото делејќи си и бонуси.

Таа раскажува и за случајот со Мартин Нешковски, за кого беше искреирана ситуација дека тогашната Влада и министерската Јанкуловска сакале да го забошотат случајот, па тоа беше и дел од нелегалните снимки кои Зоран Заев нелегално ги употребуваше, а смртта на момчето беше користена и во „Шарената револуција“.

– Тој разговор, за Мартин Нешковски, го слушав. И го прибавив, бидејќи тоа беше пресуден предмет, го прибавив од судот. Да се види дали тука има или нема криминал. Го проучив предметот и требаше да направам стратегија да ги сослушам лицата кои се спомнуваат – кој каде бил, што и каде направил, со кого комуницирал, каде Мартин бил, како настрадал и како дошло до смртна последица. Значи, тоа го испитував. И дојдов до заклучок дека тука предметот е чист, потврден од Стразбур. Но, тие го користеа Игор Спасов, го носеа ваму-таму, и на крај ништо не испадна од тоа. Тоа што јас го реков од самиот старт, од моето преиспитување на целиот предмет, тие го работеа уште година ипол – истакнува Кадриу.

За предметот „бонуси во СЈО“, поради што настрада обвинителот Мустафа Хајрулахи бидејќи не сакаше да го затвори случајот зашто според него, тука има криминал од специјалните обвинители, Кадриу вели:

– Па тоа е тоа. Требаше да се потрошат парите. И измислуваа како и сè излегуваше од рамките на законот. Тоа не смееше да се дозволи, тоа не смееше да го дозволат ниту обвинителите, ниту Јанева имаше право тоа да го дозволи. Се знае колку изнесува обвинителската плата, плус додатоците до 35 отсто. Порано, републичкиот јавен обвинител ќе определеше за некои посебни услови доверливост, за ризик и ќе додели 35 отсто. Тие не смееле да излегуваат од тие 35 отсто, но не – на тие 35 отсто тие си додавале уште по околу две илјади евра. Тоа е тотално незаконито – вели Кадриу.

За обвинителката Ленче Ристовска која неодамна бараше извинување од премиерот Мицкоски и која тврди дека ги заслужила тие пари (бонусите од СЈО за што има предмет во ЈО), Кадриу вели дека таа отсекогаш изигрувала жртва:

– Не може, не оди тоа така. Немаме ние мајмунска меморија, па по три дена да заборавиме се што се случувало. Помниме, знаеме како се однесуваше, а потоа излезе со изјава дека Катица е криминалец. Иако со неа беше нон стоп. Како сега ѝ текна да излезе? Сега повторно изигрува жртва. Таа постојано бара некое внимание и изигрува жртва за да ги постигне своите цели – тврди Кадриу.

НА РАКА ИМ ДАВАА ЗАПИСНИЦИ ВО СЈО, ТОА ЛИЧЕШЕ НА ШТАБ НА СДСМ! Екс-обвинителката Кадриу изнесе шокантни детали од работата на некогашната институција

The post ЈАНКУЛОСКА И ОСУДЕНИТЕ ЗА МЕРЦЕДЕСОТ БЕА ЗЕМЕНИ ЗА ВРАТ Не постоела обврска да се распише тендер за набавка appeared first on plusinfo.mk.

Екс-обвинителката од Специјалното јавно обвинителство, Лејла Кадриу, во вчерашното издание на емисијата ВЕЧЕРНОТО ШОУ со Богдан Илиевски, излезе со лични сведоштва од работата во СЈО. Како тоа многу повеќе делувало на штаб на СДСМ, отколку на обвинителство.

Инаку Кадриу била избркана од СЈО лично од Катица Јанева, со образложение дека „не била тимски играч“.

– Имавме кујна и еден ден отидов да си земам кафе. Излегувам од канцеларијата и ги гледам Зоран Заев и Шеќеринска, така на колена нешто со некои хартии. Ги гледам Ленче (Ристовска, нз.), Фатиме (Фетаи, н.з.), беа и Лиле (Стефанова, н.з.) и Гаврил (Бубевски, нз.). Велам, луѓе, што прават овие овде, што прават Заев и Шеќеринска тука?. Што бараат да влезат во Обвинителството. Ни шефот на Обвинителство, Јанева, не е тука, ниту останатите обвинители не се тука. Што бараат овие двајца тука? Ленче ми рече дека ги донеле материјалите. Молам? А, ја прашувам, кој ќе пишува записник за примопредавање и како ќе ги примите тие материјали кога шефот не е тука. Но, очигледно овие четворица беа шефови. Па, ми вели Ленче, нема да пишуваме записник за примопредавање. Значи, држава паѓа. Цел свет слуша муабети со кои Зоран Заев мавта на плоштадот, а во Обвинителство се внесуваат без записник за примопредавање. Нечуено – вели Кадриу.

– Не, не. Ниту обвинители не смеат да се согласат на тоа, зашто единствен кој имаше право на потпис на сите акти што ги донесуваат обвинителите беше Катица. Значи ние не потпишувавме наши акти што ги работевме. Ние ќе изработиме, она ќе става потпис. И како сега овие четворица и искусни, демек, обвинители, значи газат по закон – вели Кадриу.

На прашањето како тие знаеле дека треба да дојдат на работа, кога Јанева рекла тој ден да не се доаѓа и како знаеле дека тука ќе бидат Заев и Шеќеринска, Кадриу вели:

– Па очигледно дека Катица не морала да доаѓа, бидејќи изгледа не била некој фактор таму. Испаѓа дека важно било овие четворица да бидат таму. После тоа не поминаa ни две недели, бев категорична и цело време инсистирав на тоа како може да се примаат материјали без записник Тоа значеше компромитирање на цела држава со тие глупости. Компромитираме цела држава, примаме материјали без записник. Значи во секое време може секој да додаде, да одземе и никому ништо – зборува за хаосот во СЈО, Кадриу.

Според Кадриу, таа четворка, Фетаи, Бубевски, Стефанова и Ристовска, секогаш го наметнувала своето мислење, а Бубевски се заканувал дека без него ништо не може да помине. И тоа го кажувал пред другите обвинители.

– Тој доаѓаше на колегиум со четири телефони на маса. Внимавајте, за сите нас се проверуваше да немаме камери и да немаме микрофони, да не се снимаат нашите меѓусебни разговори, а тој доаѓаше со 4 телефони на маса. На среде колегиум ќе му заѕвони еден телефон, другите три остануваат. Излегува и доаѓа, кажува што да правиме. Значи, на крај се покажа дека тоа повеќе личеше на штаб на СДСМ, отколку на СЈО кое треба да се занимава со некој висок криминал – вели Кадриу.

За трошењето пари од четирите милиони евра годишно, истакнува дека имало листи за тоа кој се земал плата, а на тие листи имало роднини на политичари, нивни деца или, како што опишува со еден збор – „чуда“.

А еден ден, во нејзината канцеларија влегол некој човек.

– Добар ден, обвинителке, ми вели, јас сум советник на министерот за внатрешни работи, Оливер Спасовски. Го прашувам што бара тука. Тој знаеше кој предмет го работам, а таа информација ја имаше само Катица. И пак го прашувам што бара кај мене во канцеларија. А, тој ми вели: Знаете обвинителке, вие го работите тој и тој предмет, ама треба да се прошири“. И ми ги кажува лицата против со кои тој предмет треба да се прошири. Му велам, ти си советник таму на политички поставена личност, а доаѓаш кај мене, јавен обвинител под заклетва, да ми кажуваш што да правам со моите предмети. Надвор да те нема. Надвор да те нема од канцеларија. И го избркав – тврди Кадриу.

Таа смета дека советникот на Спасовски тоа го правел и кај другите обвинители, само што тие си молчеле.

– Тоа беше лов на вештерки. Значи се донесоа тие материјали и беа предадени без записници, ама требаше да се врши притисок и врз судиите за да напишат тоа што мора да помине. Материјалите да станат доказ и да се прифат обвиненијата да се создадат услови да се врши притисок на сите судии што да напишат глупо за тоа мора да помине. Сите беа под лупа, да се соработува. Значи, тоа не беше обвинителско и професионално однесување, тоа беше каубојско однесување – вели Кадриу.

Според неа, самото СЈО и Законот за СЈО биле спротивни на Уставот и на законите на нашата држава.

– И на Уставот и на законите. Се донесе некој  специјален закон за тоа Обвинителство, за нелегално прислушуваните разговори. Се донесе таков еден „лекс специјалис“ кој имаше неколку членови, што уредуваа со кои материјали може да се занимава тоа Специјалното јавно обвинителство. Значи, само што ќе произлезе од тие нелегално прислушувани разговори и ништо друго. Требаше да се види и да се најде дали може да се докаже кривично дело. А самите разгвоори не покажуваа крининал зашто вербален делик не постои. И само беше прашање да се провери дали од тие нелегално прислушуваните разговори, може да произлезе некое кривично дело – вели Кадриу.

Таа тврди дека и содржински самиот Закон беше „накрвиво“ поставен, бидејќи обвинетите немаа право на жалба на одлуките на обвинител од СЈО што е спротивно на Уставот, како и на самиот Закон за СЈО.

– Тоа што тие што беа предмет на СЈО немаа право на жалба беше спротивно на Законот. Општите правила велат дека некој мора да ги проверува одлуките на обвинителот. Тука немаше такво нешто. Катица се ставаше над законот. Во еден случај, јас донесов такво решение со право на жалба пред Вишото јавно обвинителство. Таа ми рече дека тоа не доаѓа во предвид, нема каде да се жалат, „ние сме алфа и омега“ – ги цитира зборовите на Катица Јанева, Кадриу.

Таа истакнува дека по изборот на првиот тим на обвинители во СЈО, седум од нив, тие не смееле да положат заклетва се додека во тимот на Катица Јанева не биде не биде донесен и Гаврил Бубевски, доскорешен раководител на скопското ОЈО.

– Катица велеше дека мора да биде Гаврил. Како може да се почне без Гаврил. Мораме тоа да го направиме, нема да одеме на заклетва, велеше. Не верувам дека се знаеле од порано, бидејќи тој е од Берово, а таа од Гевгелија, така што немаа допирни точки. Но, веројатно е дека некој и го сугерирал Бубевски, бидејќи потоа се покажа дека тие заедно направија некои работи кои можеби некому друг не му паѓаа в очи, но мене ми пречеа.

При почетокот на основањето и постоењето на СЈО, таа вели дека ништо не се работело. Имале обуки со странци, како што вели, „од некои служби“. Ништо друго.

– Знаете, Јанева велеше дека таа е девојка од милион долари. И бидејќи веќе беше 15 октомври 2015 година, а СЈО имаше на сметка милион евра, мораше да се потрошат тие пари, зашто на крајот од годината, ако останеа непотрошени, државата ќе ни ги земеше назад во буџетот. Така, за два ипол месеци мораше да се потрошат милион евра, инаку ќе ни ги земат – вели Кадриу.

Годишниот буџет на СЈО беше четири милиони евра, но на почетокот, на 15 октомври 2015 г. имале еден милион евра и за два ипол месеци морале да ги потрошат, иако ништо не работеле.

– Не знам како, но најдоа начин да ги потрошат. И тоа трошење треба да се провери. Тука треба да се направи добра финансиска истрага. Не е чесно кон граѓаните на нашата држава“ истакнува таа, додавајќи дека само за кафе, за лешници, за бадеми и сл. се трошеле по две илјади евра месечно.

Кадриу денес е адвокат. За себе таа вели:

– Имам завршено два правни факултети, на Тетовскиот и на Приштинскиот универзитет. Магистер сум по форензички науки. Тој дел го завршив на Факултетот за безбедност, тука во Скопје. Мотив за магистратурата за форензика, беше токму тоа што бев обвинител, и сакав да знам и да бидам сигурна како да се наоѓаат трагите, како да се докаже кривичното дело, за да можеш во судница да влезеш, што се вели, со чист образ и со докази. Новиот Закон за кривична постапка предвидува една законска норма која вели дека сè што е сомнително оди во полза на обвинетиот. Во многу случаи се влегува во судница со несигурни докази. Со такви докази никогаш не сум сакала да влезам во судница. Инаку мајка на четири, факултетски образовани деца, со докторати. Значи, една горда мајка.

The post НА РАКА ИМ ДАВАА ЗАПИСНИЦИ ВО СЈО, ТОА ЛИЧЕШЕ НА ШТАБ НА СДСМ! Екс-обвинителката Кадриу изнесе шокантни детали од работата на некогашната институција appeared first on plusinfo.mk.