лажни тестови Archives - plusinfo.mk

СКАНДАЛ ВО ТОЈОТА Ги фалсификувале тестовите за моќност на моторот на автомобилите

плусинфо — Mon, 10 Jun 2024 08:47:24 +0000

Акциите на јапонскиот производител на автомобили Тојота Мотор паднаа за повеќе од 5,4%, откако јапонското Министерство за транспорт откри дека фирмата користела лажни податоци при тестирање на одредени модели на автомобили.

Пазарната вредност на јапонската компанија падна за само една недела за 2,45 трилиони јапонски јени, или за повеќе од 14,5 милијарди евра, пренесоа медиумите.

Истрагата покажа дека тестовите за моќност на моторот биле фалсификувани, додека тестовите за судар и воздушни перничиња користеле несоодветни или застарени податоци.

По овој скандал, Toyota Motor го суспендираше производството на три модели на возила, Corolla Fielder, Corolla Akio и Yaris Cross.

Претседателот на јапонската компанија Тојота Мотор, Акио Тојода, веднаш по избивањето на скандалот на 3 јуни, се извини за масовното мамење при тестирањето на седум модели на автомобили.

– Искрено се извинуваме – им рече Тојода на прес-конференциите на кои компаниите се извинуваат за лошото однесување.

Компанијата на 8 мај објави дека нејзината добивка за фискалната година која заврши на 31 март се удвои на рекордни 4,94 трилиони јапонски јени, или околу 29,6 милијарди евра.

Во истиот период, приходите на Тојота исто така соборија рекорд, бидејќи пораснаа за 21,4 отсто на годишно ниво, на 270,4 милијарди евра.

The post СКАНДАЛ ВО ТОЈОТА Ги фалсификувале тестовите за моќност на моторот на автомобилите appeared first on plusinfo.mk.

„ШКИПМЕДИЈА“ ИЗЛЕЗЕ СО СКАНДАЛОЗНО ТВРДЕЊЕ Лажни тестови за ковид-19 се продаваат во Тетово

плусинфо — Sun, 05 Sep 2021 14:50:29 +0000

Откако многу земји во светот ги условија патувањата со негативен тест за ковид-19, за приватна лабораторија во Тетово дојдоа „петте минути“, пишува „Шкипмедија“.

Во лабораторијата чии сертификати се меѓународно прифатени, јавна тајна е дека безмалку една година може да платите одредена сума евра и да го направите „негативниот тест“ без воопшто да ви биде направен тест.

Порталот тврди дека илјадници албански емигранти летово го купиле тестот и ги наполниле болниците во Швајцарија, Германија, Италија, Данска итн.

„Сето ова никогаш немаше да биде возможно доколку во ова злосторство не беше вклучена приватна лабораторија од Тетово, чие име ќе биде објавено од надлежните институции доколку ја започнат истрагата, но веруваме дека секој во Тетово знае која е таа. Полицијата, обвинителите, сите надлежни знаат за тоа“, пишува „Шкипмедија“.

The post „ШКИПМЕДИЈА“ ИЗЛЕЗЕ СО СКАНДАЛОЗНО ТВРДЕЊЕ Лажни тестови за ковид-19 се продаваат во Тетово appeared first on plusinfo.mk.

Со лажни ПЦР тестови сакале да летнат од Скопје за Швајцарија

МИА — Mon, 22 Feb 2021 11:22:23 +0000

Полициски службеници на Граничниот премин „Меѓународен аеродром“-Скопје синоќа привеле четири лица со место на живеење во Швајцарија за приложување на лажни ПЦР тестови, соопшти денеска Министерството за внатрешни работи.

„Синоќа во 19:20 часот на Граничниот премин „Меѓународен аеродром“-Скопје, полициски службеници ги привеле С.С.(38) од Куманово, со место на живеење во Швајцарија, Е.Џ.(43) од Босна и Херцеговина, со место на живеење во Швајцарија, М.Р.(59) од Швајцарија и П.С.(45) од Швајцарија, поради постоење основи на сомнение дека приложиле лажни негативни ПЦР тестови“, се наведува во соопштението на Министерството.

Од Министерството информираат дека бил извршен разговор со нив и било утврдено дека тестовите им ги набавил нивни пријател по цена од 30 евра по тест. Лицата биле задржани за понатамошна постапка.

The post Со лажни ПЦР тестови сакале да летнат од Скопје за Швајцарија appeared first on plusinfo.mk.

Запленети 17.000 лажни тестови за ковид-19, уапсени 407 лица

МИА — Wed, 22 Jul 2020 13:21:19 +0000

Полицијата заплени 17.000 лажни комплети за тестирање за ковид-19, кои биле пронајдени во операции против шверц на нелегална храна и пијалаци во десетици земји, соопшти денеска Интерпол.

Полицијата запленила фалсификувани или нестандардни производи во вредност од 34,5 милиони евра во 77 земји и уапсила 407 лица во операција која траела од декември 2019 до јуни 2020 година.

Меѓу производите има млечни производи, месо од незаконски заклани животни и прехранбени производи лажно обележани како лекови, објави Интерпол.

Полицијата пресретнала и илјадници фалсификувани медицински производи, во време кога земјите ширум светот побрзаа да се снабдат со медицински материјал поради блокадата воведена за да се спречи ширењето на коронавирусот.

– Додека земјите ширум светот продолжуваат со напорите да го контролираат ковид-19, криминалните мрежи кои ги дистрибуираат овие потенцијално опасни производи само ја покажуваат својата решеност само да заработат – изјави генералниот секретар на Интерпол, Јирген Шток.

Покрај лажните тестови за ковид-19, во акциите биле пронајдени средства за дезинфекција, па дури и пратка морска храна во Јужна Африка со потекло од Азија, која била лажно декларирана како лична заштитна опрема.

„Другите нелегални производи што се пронајдени вклучуваат козметика, чевли, облека, торби, делови за автомобили, електроника, тутун и лекови, во вредност од околу 3,1 милиони долари“, соопшти Интерпол.

Ова е деветта година на агенцијата за координирана акција во рамките на операцијата Опсон против фалсификувана или нестандардна храна и пијалоци, која редовно запленува илјадници тони фалсификувани и потенцијално штетни производи.

The post Запленети 17.000 лажни тестови за ковид-19, уапсени 407 лица appeared first on plusinfo.mk.