Росалија беше главната ѕвезда на 27. доделување на „Латино Греми“, одржано во Лас Вегас. Таа вечерта ја заврши со шест освоени награди од седумте категории во кои беше номинирана, а најважната – за албум на годината – ја доби за албумот „Lux“.

Со ова стана првата жена во историјата на „Латино Греми“ која трипати ја освоила наградата за албум на годината. Претходно ја доби за „El Mal Querer“ во 2019 година и за „Motomami“ во 2022 година. Овојпат, покрај албум на годината, освои и признанија за најдобар алтернативен албум, песна на годината и најдобра поп-песна за „La Perla“, најдобро кратко музичко видео за „Sauvignon Blanc“ и најдобра тонска реализација на албум.

Кога ја прими наградата за албум на годината од рацете на колегата Хуанес, Росалија не можеше да ги скрие солзите. Таа се потсети на почетоците на кариерата и на неговата поддршка во времето кога настапувала пред само стотина луѓе во една сала во Мадрид.

– Се сеќавам кога ја почнував кариерата. Ти беше меѓу првите што ми подадоа рака и доаѓаше на моите настапи кога имаше само сто луѓе. Многу ми помогна на почетокот и сè уште си тука за мене. Ти благодарам од срце – му рече таа.

Зборувајќи за албумот „Lux“, пејачката го опиша како голем личен ризик.

– Ако „El Mal Querer“ беше сон, а „Motomami“ беше облог, „Lux“ за мене беше скок во празно. Мислам дека е многу важно да ја кажеш својата вистина и да им дозволиш на другите да ја кажат својата. Овој албум е мојата вистина – рече Росалија.

Во емотивниот говор им се заблагодари на семејството, пријателите и соработниците, а посебна порака имаше за мајка си.

– Благодарам, мамо, што ме направи ваква. Ќе ти го донесам ова Греми дома. Не знам дали ќе има место за уште едно, но сепак ќе ти го донесам. Ти секогаш наоѓаш начин за сè – рече таа низ солзи и насмевка.

На крајот објасни дека албумот го нарекла „Lux“ затоа што зборот на латински значи светлина, посакувајќи му на светот уште повеќе светлина.

The post 📽️ РОСАЛИЈА СЕ РАСПЛАКА НА „ЛАТИНО ГРЕМИ“ И ИСПИША ИСТОРИЈА Шпанската пејачка освои шест награди, меѓу кои и за албум на годината appeared first on plusinfo.mk.