Институтот за судска медицина утврди дека во парчињата салама што ги најдоа деца во Расадник, Кисела Вода, во близина на детско игралиште, има присуство на инсектицидот метомил (во јавноста познат како ланате).

Станува збор за високо токсичен инсектицид, одамна забранет за употреба и за увоз во земјите на ЕУ и во Македонија, поради неговата енормна токсичност и можност за злоупотреби, најмногу со цел да се трујат животни, алармира Јавното претпријатие Лајка.

„Во Расадник такво масовно труење имаше на 15 мај, кога угинаа повеќе домашни и улични кучиња и мачки, а отровот беше расфрлан и пред влезови од зградите. По ова, совесни граѓани преку флаери залепени на речиси секој влез во Расадник предупредија да се внимава на расфрлена храна со бела прашкаста материја, па така и децата кои сега ги пронашле парчињата салама, веднаш ги известиле родителите.

Загрижените родители се обратија до ЈП Лајка, по што сомнителната храна ја однесовме во Институтот за судска медицина на токсиколошко испитување. Таму се потврдија сомнежите дека станува збор за ланате – отров од кој животните умираат во агонија, со нагло паѓање или губење сила, пена од уста, грчеви, неконтролирано мокрење/дефекација и гушење.

Тој е опасен при голтање, вдишување и контакт преку кожа, а само еден грам од овој инсектицид може да предизвика смрт кај човек од 70 килограми.

Со оглед на сѐ поголемата злоупотреба на овој инсектицид, се надеваме на превенција, соработка и навремена реакција од сите надлежни институции, со цел да се утврди кој ја расфрла отровната супстанца на јавни површини и како истата се внесува во земјава.

Воедно, изразуваме огромна благодарност до Институтот за судска медицина и до директорот, проф. д-р Александар Станков кој изрази подготвеност и во иднина да се вршат токсиколошки анализи на сомнителни токсични супстанци расфрлани на јавни површини.

Труењето со ланате во современите држави веќе не се третира само како злоупотреба на пестицид, туку и како еколошки криминал, кривично дело и опасност по јавното здравје, а во Македонија веќе има примери за смртни последици по луѓе кои дошле во допир со овој инсектицид. За расфрлањето на вакви отрови, предвидени се затворски казни, според членот 232 од Кривичниот законик – за неовластено производство, постапување и промет со опасни материи.

ЈП Лајка изразува сериозна загриженост, бидејќи во случајов не се загрозуваат само животите на домашните и улични животни, туку и животите на сите граѓани, а особено на децата, кои можат да дојдат во допир со отровот.

Апелираме до сите граѓани, доколку забележат сомнителна храна со бела прашкаста материја:

• Да не ја допираат, освен со заштитни ракавици,

• Веднаш да ги оддалечат децата и животните од местото,

• Да пријават во МВР и во ЈП Лајка,

• Доколку е можно, да ја фотографираат локацијата,

• Да споделат со јавноста, со цел да бидат предупредени што повеќе граѓани.

Во прилог испраќаме фотографии од наодот на Институтот за судска медицина, од расфрланата храна и вознемирувачки фотографии пратени од граѓани од домашни и улични кучиња и мачки кои настрадаа од токсичниот инсектицид во Расадник, Кисела Вода“ – се вели во соопштението на ЈП Лајка.

The post 📷 (ВОЗНЕМИРУВАЧКО) ДЕЦА ВО КИСЕЛА ВОДА ПРОНАЈДОА САЛАМИ СО ОТРОВ СО КОЈ СЕ ТРУЕНИ КУЧИЊА! Станува збор за високотоксичен инсектицид метомил, познат како ланате appeared first on plusinfo.mk.