Група млади луѓе во црни маици и качулки ја прекинала манифестацијата Денови на српската култура во сплитскиот кварт Блатине. Присутните биле избркани со повици „За дом спремни“ и „Смеќа српска“, пренесуваат хрватските медиуми.

Настанот веднаш предизвикал лавина реакции.

Меѓу нападнатите биле членови на културно-уметничкото друштво од Нови Сад кои дошле да настапат на вечерната програма. Според полицијата, во нападот не било извршено физичко насилство, но атмосферата била исполнета со страв и навреди.

Притоа, нападнатите напуштиле просторијата додека полицијата започнала истрага за идентификација на сторителите.

Сведоци потврдиле дека меѓу насилниците имало и возрасни мажи кои ги предводеле младите. Некои од нив ги подигале десниците и извикувале националистички пароли.

– Петмина упаднаа во салата и бараа да го прекинеме настанот, велејќи дека „нема место за вакви програми во месецот кога се обележува Вуковар“ – изјави Илија Борковиќ, потпретседател на сплитскиот пододбор на Просвета.

Според организаторите, пред објектот имало најмалку сто млади лица во маскирни униформи, кои го блокирале влезот и заплашувале.

Градоначалникот Томислав Шута остро реагирал на настанот. – Сплит мора да биде град на сигурност, толеранција и почитување кон сите граѓани, без оглед на нивната национална или верска припадност – истакна тој.

Пратеничката Маријана Пуљак од Центар нагласила дека очекува решителна реакција од градските власти и полицијата. Партијата Можемо оценила дека се работи за „срамна епизода“ во животот на градот и повикала на итна осуда.

Сепак, најсилна била реакцијата на премиерот на Хрватска Андреј Пленковиќ, кој на социјалната мрежа Икс објави:

„Нajoстро ги осудуваме инцидентите во Сплит за време на културната манифестација на српската национална заедница. Очекуваме дека надлежните органи ќе ги процесуираат одговорните во најкраток можен рок“.

Хрватскиот премиер додаде дека во хрватското општество нема место за исклучивост или нетолеранција кон националните малцинства.

Јавноста остро го критикува растечкиот национализам и бара засилено полициско присуство за време на културни настани од малцински заедници.

Во меѓувреме, Прoсвета најавила дека манифестацијата Денови на српската култура ќе продолжи во други градови, под зајакнати безбедносни мерки.

The post 📽️ ЦРНИ КАЧУЛКИ И „ЗА ДОМ СПРЕМНИ“ НА СРПСКА МАНИФЕСТАЦИЈА ВО СПЛИТ Пленковиќ порача дека нема место за нетолеранција appeared first on plusinfo.mk.

– Преиспитувањето, во својата суштина е чин на пауза и повторно разгледување – момент кога поединецот свесно се соочува со сопствените мисли и чувства за да дојде до подлабоко разбирање. Во контекст на уметноста и уметничката креација, на преиспитувањето може да му се пристапи како на процес кој има двојна улога, на внатрешен импулс и пренесено искуство – вели организаторот на ликовната изложба „Преиспитувања“,  Јасмина Котевска од Центарот за креативни индустрии – НЕБО.

Изложбата на двајцата уметници, Тони Попов и Никола Пијанманов ќе биде отворена од 15 до 22 август во Културниот дом во село Суводол, Демир Хисар, во рамките на културната манифестација „Демир Хисар низ боите и звуците на уметноста“ која годинава се одржува по четврти пат.

Оваа културна манифестација не е интересна само поради тоа што е автентичен обид за иницирање и развој на независна културна сцена надвор од урбаните центри, туку и по тоа што посветува и особено внимание на маргинализираните групи, вклучувајќи ги и штитениците од Психијатриската болница во Демир Хисар.

Оттука и изложбата „Преиспитувања“ одлично се вклопува во програмата и претставува визуелна антологија на универзалните човекови искуства, во која уметниците преку својот сликарски јазик раскажуваат за универзалноста и кревкоста на човековите искуства и во своето сликарство го обработуваат мотивот на длабоките човечки искуства или психолошко-емотивни состојби.
Главниот наратив на изложбата е преиспитувањето, доловено од позиција на посматрач на надворешната манифестација на психолошките состојби кај човекот (Пијанманов) и состојбите на личното преиспитување и потрагата по автентичното во комплексноста на сопствената мисла (Попов). Едниот се фокусира на автопортретот како инструмент за лична саморефлексија, додека другиот се занимава со теми кои опфаќаат универзални човекови искуства.
Двајцата уметници кои ја сочинуваат оваа изложба ја делат потребата да навлезат под површината на секојдневието – во темната, често нејасна и понекогаш застрашувачка, но, бескрајно значајна област – внатрешниот свет на индивидуата, притоа изразувајќи ги преку автентичен ликовен јазик спознајните состојби, кои не само што се гледаат, туку и се чувствуваат.
Тони Попов го користи автопортетот како поле каде што се пресликуваат не само неговите надворешни физионимски црти, туку и неговите внатрешни борби, сомнежи и себепреиспитувања. Експресивни по колорит и сликарски потег, неговите автопортети се дијалог на уметникот со себе и ја прикажуваат сложеноста на човековата психа укажувајќи на борбата помеѓу себеси и сопствените стравовови, желби и неизвесности.
Од друга страна, Никола Пијанманов својот интерес го насочува кон универзалните човечки искуства како страв, болка, трагање по смислата. Преку боја, форма и композиција, неговите слики говорат за заедничката (колективна) човечка судбина и го повикуваат гледачот на преиспитување на сопствените искуства, каде преиспитувањето се претвора во колективен процес, спојувајќи го индивидуалното со општото.

Манифестацијата „Демир Хисар низ боите и звуците на уметноста“ започна со прикажување на театарската претстава „Синиот портокал“, а во рамки на програмата беа организирани и неколку работилници (работилница за креативно пишување под менторство на поетот Митко Гогов и визуелна работилница за цијанотипија со фотографот Иван Алушевски – долгогодишен соработник на манифестацијата).

Во рамките на манифестацијата има и посебна програмска активност посветена на штитениците од Психијатриската болница во Демир Хисар – па така се случи и музичката терапија под водство на музичарите Сашко Костов и Славчо Коцев, членови на здружението АРТ ГЕНЕРАТОР од Велес.

Како завршен настан, предвидена е премиерна проекција на документарниот филм „Железната тврдина – Демир Хисар“ од реномираниот македонски режисер Митко Панов. Филмот е снимен токму во Демир Хисар и претставува спој на документарна и уметничка визија, во кој покрај професионални актери како Игор Џамбазов и Синоличка Трпкова, учествуваат и локални жители, странски актери, членови на ЦКИ-НЕБО и штитеници од Психијатриската болница, кои се вклучени и како актери и како сценаристи.

The post ПРЕИСПИТУВАЊАТА НА ДВАЈЦАТА УМЕТНИЦИ Тони Попов и Никола Пијанманов со заедничка изложба во Демир Хисар appeared first on plusinfo.mk.

Галичко потекло има невестата Стефана, која на прес-конференција денеска рече дека е преплавена од емоции, чувствува среќа и возбуда и е почестена што со Даријан годинава ќе бидат младенци на Галичката свадба.

Како што рече, потеклото и е галичко по двете баби кои се родени таму, од фамилиите Чаловски и Веновски, а веќе десет години учествува на „Галичката свадба“ носејќи ја носијата на прабаба  ѝ Докија Чаловска.

– Верувам дека правилно ќе ја почувствуваме и ќе ја пренесеме галичката традиција која ни е оставена во наследство од нашите предци. Не треба да дозволиме нејзино искоренување. Ова беше моја желба,  но многу е важно кој ми ја исполни таа желба – му благодарам многу на Даријан што уште еднаш ми покажа што значи вистинска љубов и разбирање – истакна Стефана Димитрова.

Нејзиниот сопруг Даријан Кочоски рече дека со задоволство прифатил да биде зет на годинашната манифестација која секоја година ја посетуваат многу домашни гости, но и странски туристи. Се заблагодари на организаторот, Месната заедница Галичник, што ги избрала токму нив да бидат младенци на „Галичката свадба 2024“.

Институционален покровител на „Галичката свадба“ е претседателката на државата Гордана Сиљановска-Давкова, поддржувач е Министерството за култура и туризам, а Пивара Скопје веќе 50 години е партнер во организирањето на манифестацијата.

Свадбарските обичаи ќе почнат в сабота, 13 јули, со обредот „фрлање три пушки“ и со „виорење на свадбениот бајрак“. Вечерта в сабота е и пречекот на тапаните, свекрвиното оро, а членови на ансамблот Танец ќе го одиграат Тешкото – препознатливото оро за печалбарскиот Галичник.

Обичаите (канење на мртвите, канење на кумот, бричење на зетот, гледањето низ прстен, пречекот на сватовите, земањето на невестата, дарувањето…) и обредните песни и ора ќе продолжат в недела, на денот на венчавката на младенците во црквата во Галичник, а свеченоста ќе заврши со испраќање на тапанџиите и зурлаџиите.

На платото пред чешмата Упија во Галичник ќе биде обезбеден пренос, а целата манифестација во живо ќе може да се следи и на социјалните медиуми на Месната заедница Галичник.

Претседателот на МЗ Галичник, Александар Костиќ, на прес-конференцијата изрази задоволство што и по толку децении не спласнува интересот на младите да бидат дел од „Галичката свадба“.

– Напротив, интересот секоја година расте. Тоа е знак дека успеавме во нашата мисија да ги одржиме витални нашите обичаи и вредностите на традицијата која сме ја наследиле и ја пренесуваме на следните генерации – истакна Костиќ и додаде дека со поддршка на долгогодишните партнери, Галичник и годинава е подготвен на сите посетители да им ја презентира богатата и уникатна традиција.

Марија Мининчиќ од Пивара Скопје истакна дека кога една соработка трае половина век, јасно е, рече, дека двете страни ги врзуваат исти вредности – негување и грижа за традицијата и зближување на луѓето на настани кои се исполнети со позитивна енергија и заедништво.

– Цела генерација „пиварци“ се горди на оваа поврзаност меѓу „Галичка свадба“ и Пивара Скопје и на она што „Скопско“, како бренд кој годинава одбележува 100 години, се издигна на ниво како симбол на оваа исклучителна традиција – рече Мининчиќ.

Организаторите ја поканија јавноста да присуствува викендов во Галичник, но и повикаа на одговорно однесување кон природата и внимателност со фрлањето на отпадот, како и одговорно однесување во сообраќајот – возачите да не пијат алкохол и да го почитуваат сообраќајниот режим.

За почитување на „куќниот ред“ апелираше Костиќ нагласувајќи дека тоа ќе придонесе за беспрекорно организирање на настанот. Тој информираше дека движење на моторни возила низ Галичник ќе биде забрането од 21 до 1 часот по полноќ во петок (12 јули), од 18 до 22 часот во сабота (13 јули) и од 7.30 до 15 часот во недела (14 јули), односно забраната ќе важи и надвор од овие термини доколку се утврди потреба.

Од 12 до 14 јули не е дозволено ниту паркирање кај црквата „Свети апостоли Петар и Павле“ , на Упија и секаде каде што ќе се одвива свадбата. Непрописно паркираните возила ќе бидат отстранети со „пајак“.

The post НЕВЕСТА ГАЛИЧАНКА НА ГОДИНАШНАТА „ГАЛИЧКА СВАДБА“ Стефана Димитрова и Даријан Кочовски се младенците што ќе се венчаат по старите свадбени обичаи appeared first on plusinfo.mk.

„Ние сме многу среќни што се создадоа услови оваа година да продолжиме со оваа вековна традиција на Мијаците, која секако зазема посебно место во богатото македонското културно наследство. Подготвени сме да ги пречекаме и да им посакаме добредојде на сите посетители од земјава и странство кои ќе дојдат во Галичник да ги видат и одново да им се воодушевуваат на уникатните свадбарски обичаи и адети, проследени со богатиот колорит на народни носии и изворните песни и ора карактеристични за овие македонски краеви“, изјави Александар Костиќ од организацискиот тим на Месната заедница Галичник. Тој напомена дека од организациски аспект ќе бидат преземени сите превентивни мерки за заштита на здравјето на учесниците и посетителите, истовремено упатувајќи апел до сите што ќе дојдат во Галичник да ги почитуваат мерките и препораките за заштита од ковид-19.

Покровител на годинешната Галичка свадба е Претседателот Стево Пендаровски, а еден од традиционалните поддржувачи на манифестацијата и годинава е Министерството за култура.

„Галичка свадба е чувар на традицијата и наше драгоцено нематеријалното културно наследство. Министерството за култура останува силен поддржувач и промотор на оваа манифестација која го збогатува и чува препознатливиот македонски фолклор“, изјави министерката за култура, Ирена Стефоска, упатувајќи честитки до годинешните галички младоженци, посакувајќи им среќен и долг заеднички живот.

И оваа година, Пивара Скопје го продолжи традиционалното партнерство со манифестацијата, кое непрекинато трае веќе 47 години, од нејзините почетоци, до денес. Покрај финансиска поддршка која има големо значење за одржување на континуитетот и високото ниво на Галичка свадба, компанијата традиционално обезбеди и пијалаци за учесниците во свадбената церемонија.

Традиционално, официјалниот почеток на годинешната Галичка свадба ќе биде означен во сабота, на 17-ти јули, со поставување на свадбарското знаме и симболичниот чин на „фрлање три пушки“ од куќата на зетот. Венчавањето на младенците ќе се изврши во недела, 18-ти јули, во храмот „Св. Апостоли Петар и Павле“ во Галичник, а свеченоста ќе заврши со чинот на испраќање на тапанџиите и зурлаџиите. Инаку, според Програмата на годинешната Галичка свадба, која и овој пат изобилува со најразлични забавни и музички содржини, усогласени за сите генерации, започнува уште во петок, 16-ти јули, со настапот на групите Тоа е Тоа, Љубојна и БендОфф, а завршуваа во недела, 18-ти јули, со испраќањето на тајфата Мајовци и посакување „здравојживо видување вгодина“.

Поддржувачи и партнери на годинешната манифестација Галичка свадба се: Министерството за култура, Пивара Скопје АД, винарска визба Тиквеш, Стопанска Банка АД Скопје, Комерцијална Банка АД Скопје, МЕПСО АД Скопје, ЕВН Македонија, ЈПКД Маврово, Клиника Жан Митрев, Национален парк Маврово, Дигитал Центар, Ресторан Маџо 2.0, Шерпа Хорс Рајдинг, Здравствен дом Ростуше, Општина Ѓорче Петров, Солар Спектар, Тои Тои, Спортлајф обложувалници, Пакомак, Спајдер Груп, ЈСП, Алкалоид АД Скопје, Поко М, Орбита Транс, Општина Маврово и Ростуше, Дарма Филм, Вода Маја, ДТИРЗ, Вардар Градско, Славеј, Технокомерц, Пекабеско, Балкан Градба, Саник, Неотел и Делта Електрик.

The post По пауза од една година, во Галичник пак ќе свират зурли и тапани appeared first on plusinfo.mk.