Пентагон забрзано развива планови за можна воена операција на Куба во случај американскиот претседател Доналд Трамп да издаде наредба за интервенција, дознава Ју-Ес-Еј Тудеј.

Станува збор за конкретни воени подготовки што би можеле да се активираат на краток рок, изјавија два извори запознаени со планирањето, зборувајќи под услов на анонимност бидејќи не се овластени да зборуваат со медиумите.

Ваквите директиви би претставувале ескалација на тензиите меѓу САД и Куба што почнаа во јануари, кога администрацијата на американскиот претседател Доналд Трамп ги намали испораките на нафта за Куба, како дел од пошироката кампања за притисок врз комунистичката влада на островот.

Ју-Ес-Еј Тудеј контактираше со Министерството за војна на САД и Јужната команда на САД за коментар на овие тврдења, но не доби одговор.

Но, Пентагон одговори на прашањето од руски медиуми дали САД планираат воена операција против Хавана. Министерството посочи дека нема да коментира „хипотетички сценарија“, но потврди дека постојат различни оперативни планови што би можеле да бидат активирани во случај да биде потребно.

Информациите за можни планови за ескалација прво беа објавени на платформата Substack на порталот Zeteo, по што се проширија низ политичките кругови во Вашингтон.

САД и Куба потврдија дека се во рана фази од обидите да најдат излез од кризата, но не е јасно колку отстапки е подготвена да направи секоја страна.

Ју-Ес-Еј Тудеј објави во март дека двете земји разговараат за можен историски економски договор што би можел да ги намали тензиите.

И покрај тоа што фокусот на администрацијата на Трамп во последните недели се префрли на војната со Иран, тензиите меѓу Вашингтон и Хавана дополнително се зголемија. Трамп неодамна посочи дека очекува наскоро да „има чест да ја земе Куба, во некоја форма“, додавајќи: „Без разлика дали ќе ја ослободам или ќе ја земам – мислам дека можам да правам што сакам со неа“.

– Можеби ќе застанеме на Куба кога ќе завршиме со ова – изјави Трамп завчера во Белата куќа, осврнувајќи се на конфликтот со Иран.

Кубанскиот претседател Мигел Дијаз Канел вели дека САД немаат никакво оправдување за воена интервенција или обид за негово соборување од власта.

– Ќе се бориме, ќе се браниме и ако паднеме во битка, умирањето за нашата земја значи живот – рече тој во интервју за „Њузвик“.

Тензиите дополнително се зголемија откако тајната американска операција на почетокот на јануари, со која поранешниот претседател Николас Мадуро беше извлечен од Венецуела, ја шокираше кубанската дијаспора и предизвика шпекулации дека Куба би можела да биде следната цел.

Во операцијата беа убиени 32 кубански војници кои го чуваа Мадуро, што предизвика стравувања од поширок регионален конфликт.

Портпаролот на Кремљ, Дмитриј Песков, изјави дека Русија е против каква било форма на притисок врз Куба.

– Куба е долгогодишен партнер и пријател на Русија. Не би сакале да видиме инвазија, блокада или каков било друг притисок врз таа земја – изјави Песков.

Тој додаде дека Москва нема да ги коментира геополитичките цели на САД, нагласувајќи дека тие прашања се во надлежност на американското раководство.

САД размислуваат за воена интервенција во Куба со децении, што датира од 1959 година, кога комунистот Фидел Кастро ја презеде власта и ја поврза земјата со Советскиот Сојуз.

Најновата криза е влошена поради блокадата на снабдувањето со нафта од страна на САД, што ја втурна кубанската економија во длабока енергетска и економска криза и ги засили политичките тензии на островот.

The post КУБА Е СЛЕДНА? Пентагон забрзано подготвува воена интервенција, Кремљ е против каков било притисок врз земјата appeared first on plusinfo.mk.

Претседателот на САД, Доналд Трамп, рече дека „Куба е следна“ за време на говорот на инвестициски форум во Мајами, во кој го пофали успехот на американските воени акции во Венецуела и во Иран.

Иако Трамп не прецизираше точно што планира да направи во однос на таа островска држава, тој често изјавува дека верува оти владата во Хавана, соочена со тешка економска криза, е на работ на колапс.

Во последните недели, неговата администрација отвори преговори со делови од кубанското раководство, додека самиот Трамп наговести дека воената акција е можна.

– Јас ја изградив оваа голема војска. Реков: „Никогаш нема да мора да ја користите“. Но, понекогаш мора да ја користите. И Куба, патем, е следна. Но, преправајте се дека не го кажав тоа. Преправајте се дека не го кажав – рече вчера Трамп.

Кубанскиот претседател Мигел Дијаз-Канел призна дека земјата води разговори со Соединетите Американски Држави за да се обиде да избегне можна воена конфронтација. Кубанската економија е сериозно погодена од прекините во увозот на нафта, од кои зависи работењето на електраните и на транспортот.

Пред американската операција во која сега соборениот венецуелски лидер Николас Мадуро беше уапсен во јануари, Венецуела обезбедуваше голем дел од потребите на Куба за нафта, но новата влада во Каракас, под притисок од Вашингтон, ги суспендираше тие испораки.

Порано во март, Трамп рече дека Куба би можела да биде предмет на „пријателско преземање“, пажа додаде: „Можеби нема да биде пријателско преземање“.

The post КУБА Е СЛЕДНА, АМА ПРЕПРАВАЈТЕ СЕ ДЕКА НЕ ГО КАЖАВ ТОА Војската понекогаш мора да се користи appeared first on plusinfo.mk.