– Ние сме свесни дека напластените проблеми не се решаваат преку ноќ, но очекуваме некакво раздвижување и постепено да се решава она што нѐ спречува побрзо да го развиваме секторот. Задоволни сме што се работи на инфраструктурата што ќе даде додадена вредност на туризмот, што се прават обиди да се донесат туристи надвор од туристичката сезона. Тоа ќе помогне да се задржат работниците и да се влезе во сезоната со помали загуби, но треба да се направи многу повеќе работи – да се донесе стратегија која ќе се реализира, да се работи на комуналната инфраструктура и решавање на другите проблеми кои го загрозуваат развојот на туризмот – вели претседателот на здружението на хотелиери Крсто Блажевски.

Дел од хотелите на охридското крајбрежје веќе се реновираат и се очекува да бидат подготвени за сезоната која годинава можно е да биде далеку подобра иако остануваат проблемите со недостиг на работници и комуналните проблеми на општините.

– Како и минатите години проблемот со работниците ќе го решаваме како знаеме. Добро е што лани увезовме работници и се надеваме и годинава на тој начин да го премостиме периодот кога нашите работници заминуваат да работат во други земји – вели Блажевски.

Тој очекува државата да почне поинаку да се однесува кон туризмот за да може оваа гранка повеќе да придонесува за економскиот развој. Тој смета дека е добро тоа што државата се обиде да донесе повеќе гости надвор од сезоната.

– Хотелиерите веќе примаат гости од Германците коишто ги најави државата во соработка со домашни и германски тур-оператори кои се пренесуваат со авиокомпанијата „Фрибрд ерлајнс“. Но цената што ја дадоа Германците е ниска, 25 евра за полупансион. Дел од хотелите се согласија на оваа цена, дел сметаат поинаку, но проценката на секој хотел е поединечна и зависи што се сака да се постигне и дали ќе прифати гости по таа цена – вели тој.

И Влатко Сулев, претседател на Националната асоцијација за дојдовен туризам (НАИТМ), вели дека државата треба повеќе да размислува како да му помогне на туристичкиот сектор побрзо да се развива и да го држи чекорот со регионот кој веќе се искачи на врвот на светскиот туризам.

– Треба многу повеќе да се инвестира во туризмот, не мислам само во градење на објекти иако и тоа ни треба, туку во поттик од државата тој да се развива. Дали тоа ќе биде со давање кредити за реновирање или обнова на хотелските капацитети или преку пренасочување на дел од парите за енергетска ефикасност во овој сектор со што ќе се добијат енергетско ефикасни објекти кои ќе имаат помали трошоци, не е важно. Но, важно е да се инвестира во туристичкиот сектор и да се создаваат нови приказни кои ќе ја издвојат Македонија како туристичка дестинација и ќе придонесат за привлекување поголем број туристи. Притоа е важно, инвестирањето да не биде само од државата туку тоа да биде додадена вредност од самостојното инвестирање на сопствениците на хотелите. Во тој однос е добро што дел од хотелите веќе се реновираат, па владата може да им помогне во тоа – вели Сулев.

На тој начин, додава тој, државата ќе покаже дека верува дека туристичкиот сектор може да биде носител на економскиот раст, како и останатите сектори.

– Тука еднаква улога имаат и државата која ќе направи стратегија која ќе ја спроведува и туристичките работници кои ќе дадат сѐ од себе за да најдат нешто изворно македонско и да го продадат во светот. Пример може да ни биде Албанија која се искачи на врвот на светскиот туризам. Оваа држава не ја продава само приказната за морето, туку и за таму каде што нема никаков допир со вода – вели Сулев.

Но, вели тој, државата треба да покаже верба во туризмот.

– Без верба, како што се правеше досега и без вложување на државата во секторот, не може да се очекува земјава да се трка со регионот и ќе се задоволува со трошките што ќе остануваат од регионалниот туристички колач – додава тој.

Според него, за да се постигнат високи резултати во туризмот треба да се работи на диверзификација на туристичките пазари од кои ќе се носат туристи во земјава.

– Да не се фокусираме само на еден пазар, на пример турскиот или холандскиот бидејќи тоа само носи заситеност, туку да се фокусираме секаде во светот и да се обидуваме да најдеме различни туристи, бидејќи само така ќе овозможиме преку целата година да имаме туристи и да не зависиме само од два или три туристички пазари – вели тој.

Владата се обидува да го подобри бројот на туристи и приходите во туризмот преку низа активности. Зголемен е бројот на саеми на кои ќе се претстави земјава како туристичка дестинација, а се промени и начинот на субвенционирање на авиокомпаниите од домашните аеродроми. Се субвенционираат дојдовните патници наместо тие што заминуваат.

Според податоците на Државниот завод за статистика, за периодот јануари 2024 година јануари 2025 година бројот на туристи изнесува 1.260.425, што е повеќе за 4,4%. Бројот на странски туристи изнесува 830.179 или повеќе од лани за 10,8%. Тие направиле 1.532.639 ноќевања или повеќе за 16,5 %.

The post ГЕРМАНЦИТЕ САКААТ ПОЛУПАНСИОН ВО ОХРИД ЗА 25 ЕВРА Зошто Македонија ги собира само трошките од туризмот? appeared first on plusinfo.mk.

Недостигаат работници во сите сегменти на работа во секторот: готвачи, помошници на готвачи, келнери, собарки, рецепционери, шанкери …

Новиот претседател на туристичко угостителската комора на сојузот на стопански комори Аркан Керим неодамна изјави дека во соработка со организациите од Туркије, како комора можат да обезбедат 5.000 квалификувани работници кои веднаш ќе почнат да работата во домашните капацитети ,доколку надлежните институции овозможат нивно вработување под условите кои важат и за македонските државјани.

– Прашањето треба да се реши мошне брзо за да се спречи веќе во март, април следната година да немаме затворање на фирми. Мој предлог е да се размислува на темава бидејќи од Туркије веќе се подготвени овој број на работници да дојдат во земјава и да работат. Увоз на кадар може да се направи и од други земји. На пример во Србија има работници од Куба, Индонезија, Кина … Но, како што реков институциите треба да бидат подготвени да овозможат нивно вработување како домашни државјани. Сега институциите се зафатени со политички проблеми, но тоа не значи дека треба да заборават и на бизнисите кои се обидуваат да го решат проблемот со одлив на кадар – вели Керим.

Дел од хотелските капацитети ова лето за да го ублажат проблемот вработуваат и обучуваат деца од 14, 16 и 17 години на одделни позиции. Практиката пак покажува дека следната година процентот на вработени деца и необучен кадар ќе се зголеми на 70 отсто.

– Околу 15 до 20 отсто од вработените се на возраст од 16 и 17 години. Тие секако се вработени како помошен кадар, но за нас тоа е трошок бидејќи на едно работно место, ако досега еден човек ги извршувал работите сега се потребни двајца. Добро е што има интерес од овие деца за работат за што и се платени, се запознаваат со работата и потоа полесно одлучуваат дали ќе останат во секторот, но на ниво на држава мора да договориме како ќе се одвива плаќањето на нивните плати. Со оглед на актуелните состојби очекуваме владата да реагира и да помогне односно да плаќа барем 50 отсто од трошоците за плати на овие деца. Ова наше размислување како асоцијација ќе ѝ го доставиме на владата по завршување на сезоната кога ќе направиме анализа и ќе видиме што друго треба да се промени во регулацијата на нашето работење и решавањето на актуелниот проблем со одлив на кадарот – вели Крсто Блажески, претседател на Асоцијацијата на хотелиери (ХОТАМ).

И Славе Сирачевски од туристичката агенција „Аурора“ која има хотел во Берово вели дека недостасува кадар со години.

– За хотелите е загрижувачко што имаме недостиг од обучен кадар главно готвачи и келнери, што битно влијае во квалитетот на услугата бидејќи сме принудени да вработување необучен кадар кој не може да одговори најквалитетно на потребите на гостите што пак влијае на опаѓање на нивото на услугата – вели Сирачевски.

Тој вели дека високите плати во странство се причина дел од кадарот да заминува на работа надвор од земјава.

– Ние не можеме да ги дадеме платите за кои заминуваат во странство. Нашиот стандард не може да се мери со тој во Италија, Хрватска или Германија. Таму, па да речеме и во соседна Грција ручекот е 150 евра, а кај нас сметаме со денари. Далеку сме од заработката на хотелиерите во странство и овде – вели Сирачевски.

Според него, добра е идејата да се увезува обучен кадар од странство, но законите не го дозволуваат тоа.

– Секој сопственик на хотел за да го одржи нивото и квалитетот на услугата би увезол кадар од странство, но факт е дека нашите закони не дозволува увоз на работници. На овој проблем треба заеднички да поработиме со институциите за да не се доведеме во ситуација да имаме туристи, но да немаме кој да ги услужи – вели Сирачевски.

Прашавме што планира на овој план министерството за труд и социјална политика кое е задолжено за работничкото законодавство, но не добивме одговори.

Вработувањето на странци во земјава е регулирано со посебен закон за вработување и работа на странци во кој се предвидени одредени квоти и дозволи за работа.

Квотата за работни дозволи за странци кои можат да бидат работно ангажирани на територија на земјава до Владата ја предлага министерот надлежен за работите од областа на трудот по предлог на Агенцијата за вработување во соработка со министрите одговорни за соодветните области, согласно со законските прописи, за која свое мислење може да даде и Економскиот социјален совет. Квотата не може годишно да надминува 5% од населението на земјава кое законски е вработено, според податоците на Државниот завод за статистика. На работниците им се даваат работни дозволи до 1 година или на неопределено време. Тие се издаваат само за државјани од земји со кои земјава има ратификувани договори.

The post НАШИТЕ ГОТВАЧИ СИ ЗАМИНАА Хотелите и кафеаните ќе увезуваат кадар од странство appeared first on plusinfo.mk.

Туристите, пак, кои деновиве се во овој туристички центар, велат дека поскапувањето е многу поголемо иако е претсезона, а за некои услуги дури се наплаќа 100 отсто повисока цена.

– Во Охрид и годинава по традиција сѐ е поскапо. Макијато чини од 100 до 130 денари, а еспресото е 80 денари. Топка сладолед може да се купи за цена од 30 до 50 денари. Помфритот е 80 до 150 денари. Парче пица чини 80 денари. Да не зборуваме за порција риба или нешто друго… Сѐ е поскапо, па дури и одделни услуги  како возење колички за деца, задоволство за кое наместо 50 денари како лани, сега чини 100 денари – вели еден турист.

Хотелиерите не кријат дека цените се повисоки за 20 отсто споредено со лани, но велат дека на ова зголемување влијаат повисоките трошоци во работењето и посебно цените на производите што ги користат.

Моменталните цени на сместување во двокреветна соба, во зависност од тоа колку ѕвездички има хотелот, се движат од 18 до 30 евра на ден, а престојот во апартман чини и до 66 евра дневно. Нови цени има и во угостителските објекти.

– Сѐ е поскапено, почнувајќи од струјата, па до продуктите што се користат во рестораните. Цените на продуктите бележат висок пораст, па и нашиот краен производ мора да биде поскап. Кај нас порција храна се пресметува 1 наспрема 3. Така што, ако основните прехранбени продукти, на пример, чинат 100 денари, порцијата ќе чини 300 денари, бидејќи во неа се пресметуваат и работната рака и услугата. Сезоната ја почнавме со зголемување на цените од 20 отсто, бидејќи нашите трошоци се зголемија, а логично е што никој не сака да работи со загуба. Имаме работници, а дел од хотелиерите имаат и кредити. Сето тоа треба да се има предвид – вели Крсто Блажевски, претседател на хотелската асоцијација (ХОТАМ).

Според него, ако продолжи растот на инфлацијата, цените на хотелското сместување во текот на сезоната ќе растат.

– Нашите цени не се фиксни и ќе трпат промени доколку има промени на цените на другите производи. Но, да потсетам, во нашиот сектор има резервации однапред, кои најчесто ги користат странците, каде што цената не се менува. Дополнително треба да се има предвид дека Охрид е туристички центар и треба да се споредува со такви центри во светот. Неразбирливо е кога туристите реагираат на цена на кафето од 80 или 150 денари кога се во Охрид, а на ум не им паѓа да реагираат кога, на пример, во некој италијански туристички центар плаќаат филџан кафе 12 или повеќе евра. Но и во Охрид може да се напиете поевтино кафе ако одите на зелениот пазар, или ако купите кафе од банкомат, каде што не се пресметува услугата – додава тој.

Цената на струјата и на другите трошоци влијаеше да се зголемат и цените за престој во приватните издавачи на соби. Издавачите на соби велат дека засега зголемувањето на цените е само за 100 денари. Така, изнајмување на апартман за двајца чини 1.500 денари дневно, ако престојот е една недела. Цените се поинакви за еднодневно и повеќедневно изнајмување.

The post НЕ МОЖЕ КАФЕТО ВО ОХРИД ДА Е ПОЕВТИНО ОД ТОА ВО ВЕНЕЦИЈА! Туристите незадоволни, хотелиерите велат цените растат заедно со инфлацијата appeared first on plusinfo.mk.

Дополнително раздвижување на двата крајезерски града ќе овозможат домашните гости, дел сместени кај приватни сместувачи, а поголем дел и во сопствени викенд станови.

Од организираните гости, за Велигден, според Блажески, најбројни ќе бидат туристите од Бугарија и Грција, а неизостануваат и индивидуалните посети на Срби, Албанци, во мал дел и од земјава.

– Исполнетоста од 40-50 отсто во хотелските капацитети е незадоволителна бројка. Но сепак нешто почнува. Пред пандемијата, за Велигден сме биле исполнети по 80-90 отсто и сме се радувале на исполнетост – вели Блажески.

Со оглед на тоа дека Велигден е домашен празник, забележа дека интересот на гостите од земјава не е голем. Според претседателот на ХОТАМ, во туристичкиот сектор има мало раздвижување во однос на семинарите, но значително помалку од годините пред пандемијата.

– Од надворешните влијанија и војната во Украина, ќе зависи и претстојната туристичка сезона. Ако има сигурност и престанат наглите покачувања на цените на се, народот да осети дека може да потроши пари на одмор, ќе имаме добра туристичка сезона. Исполнетоста на капацитетите во јули и август не се доволни да го извадат туристичкиот сектор за 12 месеци – смета Блажески.

Забележа и на пролонгираните летови на холандските туристи, кои претходните години почнуваа на почетокот на мај, а сега се одложени за крајот на месецот, што значително го намалува бројот на ноќевања. Пред пандемијата, во мај капацитетите на хотелите биле исполнети по 80, па и 90 отсто.

Директорот на Агенцијата за промоција и поддршка на туризмот, Љупчо Јаневски е оптимист во однос на претстојниот период, најавувајќи повеќе директни авио летови на Охридскиот аеродром.

– На охридско-струшката ривиера почнати се кружните патувања на Германски и турски групи. АППТ за 2022 година заедно со туристичкиот сектор ја постави стратегијата со поголема промоција и фокус на регионот и традиционалните пазари, се надевам 2023 година ќе ја надмине 2019 во квантитет, а се надевам и во квалитет на туристи – изјави Јаневски.

Тој очекува добра туристичка сезона, да ја надмине минатата и да се вратиме на бројките од 2019 година, но, како што рече, за да се постигне тоа треба сите да ги засукаме ракавите и заеднички да работиме.

The post ПРАЗНИЦИТЕ ЌЕ ГО НАПОЛНАТ ОХРИД СО ТУРИСТИ Се очекуваат гости од Србија, Грција, Бугарија и Албанија appeared first on plusinfo.mk.

Но, и покрај тоа тие веќе подготвија интересни и евтини програми за патување и дочек на Нова година. Хотелските капацитети, пак, во земјава се обидуваат да остварат приход со најинтересни понуди за гостите за дочек на Нова година и зимските месеци.

Но, и едните и другите се жалат дека интересот на граѓаните е незначителен, што го отвора прашањето дека и зимата за туристичкиот сектор ќе биде една од најлошите.

Хотелиерите велат дека поради мерките за исполнетост на капацитетите на половина и инсистирањето да се дозволи влез само на вакцинираните, речиси и да нема интерес кај домашните и странските гости за Нова година.

– Има само мал интерес за дочекот на Нова година, а ако им понудиш плус пола или цел пансион никој не прифаќа. За дочекот имаме трошоци за музика, греење и за храната кои овој пат имаат многу повисоки цени. Ако се успее и половина сала да се пополни, и тоа нема да ги покрие трошоците. За некакви приходи не станува збор – вели Крсто Блажески, претседател на Асоцијацијата на хотелиери (ХОТАМ).

Тој додава дека за Нова година се очекува зголемување на загубите што хотелиерите ги бележат веќе подолг период.

– Поголемите хотели досега имаат најава за 10 отсто пополнетост на капацитетите. Кај помалите хотели процентот е нешто повисок до 20 отсто, но тоа не ветува некаква работа за празникот, туку трупање дополнителни загуби. Ако на ова се додаде дека за зимската сезона скоро и да нема најава за гости, поради затворањето на границите во голем број земји голем број од хотелите ќе бидат принудени да размислуваат за опстанок или отпуштање на работници, што никој не го посакува – вели Блажевски.

Хотелиерите, додава тој, во овој период не можат ништо да очекуваат од државата.

– На досегашната пандемска и економска криза која почна со високите цени на енергенсите сега веќе се надоврза и политичката криза, така што и не можеме да очекуваме никаква помош од државата, ниту, пак, имаме надеж дека ако доставиме некакви барања и предлози ќе се реализираат. Според тоа треба да бидеме подготвени да се бориме да преживееме што опфаќа и ослободување од работната сила, иако не сме многу расположени за тоа. Но кога си ставен пред свршен чин ќе мора да одлучиш меѓу затворање и банкрот или намалување на бројот на работници – вели Блажески.

Агенциите, пак, велат дека ги прават последните напори за преживување. И покрај големиот ризик да ги изгубат и последните пари вложени за опстанок, веќе ги подготвија програмите за Нова година и зимските одмори. Закупени се собите во хотели во најразлични земји, но интерес од граѓаните нема.

– Сѐ е во застој поради новиот сој на коронавирусот. Речиси и да нема интерес за прогрмаите кои вообичаено ги нудиме за овој период од годината кои малку ги освеживме. Ќе почекаме да видиме што ќе се случува. Последниве месеци интересот за патувања е драстично намален, иако летово имавме мало раздвижување. Знаете, ние продаваме луксуз, а во криза каква што е моменталната прво се крати на луксузот за да се преживее. Граѓаните покрај пандемијата ги мачат и високите цени на енергенсите и цените на она што им е неопходно за живот. Сепак, се надевам дека следната година ќе има помрднување во однос на патувањата – вели Асим Меџедовиќ, првиот човек на туристичката агенција „Фибула Македонија“.

Според прегледот направен на интернет страници на агенциите има новогодишни пакети кои се за неколкудневен престој со дочек на Нова година кои се движат од 79 евра за дочек на Нова година со две ноќевања во Солун во кој е вклучен и автобуски превоз, па се до деветдневни крстарења по реката Нил во Египет чија цена е 1.300 евра. Патниците дополнително плаќаат за тестови и за визи во земјите каде што се бараат.

Агенциите велат дека се подготвени за следната сезона, само им се потребни луѓе кои ќе патуваат.

– Скоро сите агенции имаат објавено програми. Тоа значи дека веќе закупиле соби како за Нова година, така и за зимската сезона. За тоа се плаќа капар од 70 до 100 отсто, зависно колку евтини цени сакаш да понудиш во сезоната и чекаш патници. Но во овие услови кога имаме нов бран од нов вид на коронавирусот интересот е сè помал кај граѓаните. Дополнително сите земји веќе имаат мерки со кои се ограничува дозволениот претстој само за вакцинирани. Значи треба да ги најдеме тие што се вакцинирани и што сакаат да патуваат што е тешко да се реализира. Дополнителен проблем е и тоа што економската криза влијаеше неповолно на стандардот на граѓаните и тие многу малку одлучуваат да трошат на патување – вели Дончо Нацевски од Арбо травел.

Во уште полоша состојба се агенциите кои имаат и сопствен превоз кои треба да одлучат дали ќе ги остварат турите, кога имаат минимален број на заинтересирани туристи.

– Дел од турите нема да се реализираат иако веќе имаме закупени соби во хотели, бидејќи ако нема доволен број на патници во автобусите загубата е уште поголема, па одлуката е да не се реализира турата. Во сегашни услови кога цените на енергенсите скокнаа до небо, ние сè уште возиме со стара цена, па даваме и попусти, но ако нема доволен број на патници мораме да одлучиме да не ја реализираме одредена тура. Не знам како моите колеги формираат толку ниска цена на патување, кога автобускиот превоз не е нивни, а е многу поскап од вообичаено по зголемувањето на цените на нафтата – вели Нацевски.

Според Нацевски, последните години, се историски најлошите за светскиот туризам.

– Пандемијата и економската криза предизвикана од високите цени на енергенсите го намалија стандардот на граѓаните, а мерките на владите ги ограничија во можноста да патуваат каде што сакаат. Сето тоа, мошне неповолно се одрази на туризмот кој тешко дека ќе преживее до 2025 година, до кога се очекува, дека овие проблеми ќе се надминат. Но, кој ќе преживее до тогаш? – додава Нацевски.

Граѓаните, сепак се оптимисти дека за еден месец ќе се расчисти состојбата и ќе ги остварат желбите за патување.

– Моментално секој па и јас, кој многу често патува, се двоумам дали да патувам за Нова година и зимската сезона. Поголемиот дел од земјите веќе се затворија поради новиот вид на коронавирусот, па многу е тешко да се донесе одлука за повеќедневен престој некаде. ризикот е голем ако се уплати еден месец порано, бидиејќи не се знае дали ќе може да се патува во моментот кога треба да се реализира патувањето. Не е проблем вакцинацијата , тоа го сторив одамна, но проблем е тоа што ќе остаеш со кратки ракави, ако нема да можеш да го реализираш патувањето, па ќе треба цела наредна година да преговараш со агенцијата да ги искористиш парите, можеби и на друго понеинтересно патување. Се надевам следната година ќе биде подобра за нас кои сакаме да патуваме, но и за агенциите кои претрпеа најголем шок поради пандемијата – вели Димитар С. од Скопје.

The post ПОПУСТО СЕ ТУРИТЕ ПОДГОТВЕНИ, А ХОТЕЛИТЕ ЗАКУПЕНИ На туристичките агенции им фалат туристи appeared first on plusinfo.mk.

Премиерот Зоран Заев најави дека српските туристи ќе бидат ослободени од плаќање патарини на патувањето низ земјава како благодарност за вакцините. Тој рече дека ќе им се даваат картички на сите возила со српски регистарски таблички, но не кажа во кој период би се реализирала активноста. Дополнително и директорот на Агенцијата за промоција и поддршка Љупчо Јаневски побара хотелиерите, угостителите, како и општините и институцииите од културата поврзани со туризмот да обезбедат попусти или бесплатен паркинг и бесплатен влез во музеите за овие туристи.

Од Јавното претпријатие за државни патишта кое стопанисува со патарините иако слушнале за предлогот на премиерот, нѐ упатија во владата за повеќе инфромации.

Оттаму, пак, рекоа дека допрва ќе се разлгедува предлогот во владините институции посебно економскиот тим.

– Мерката е предвидено да се реализира  во летниот период – мај  јуни јули и август кога српските туристи ќе дојдат во нашата земја. Ќе се даваат вињетки на секое возило на српските државјани на граничните премин – рече  Заев вчера како одговор на наше прашање.

Тој додаде дека сегашните пресметки се однесуваат на 35.000 српски граѓани колку што ја минале границата лани односно вкупен трошок од 700.000 ерва.

– Трошокот е 20 евра за патарина пати 35.000 туристи. Но, ќе се прават дополнитлени пресметки за бројот на туристи од претходните години и ќе се види колку ќе биде. Имаме време до мај да ја донесеме оваа одлиука – рече Заев.

Владата планира да ја покрие загубата на јавното претпријатие за државни патишта за оваа мерка.

Засега сигурно е дека хотелиерите ќе им дадат попуст од 10 до 20 отсто за престој на српските туристи и тоа во периодот од мај до крајот на годината.

– Уште минатата недела се договоривме да дадеме попусти за туристите од Србија како благодарност на српскиот народ за вакцините. Попустите ќе се реализираат од мај до крајот на годината и за  новогодишните празници. Во мај и јуни попустот ќе биде 20 отсто, а во јули и август доколку има поголем број на туристи и ако капацитетите бидат исполнети попустот ќе изнесува 10 отсто. Потоа до крајот на годината ќе биде 20 отсто – вели претседателот на хотелската асоцијација Крсто Блажевски.

На ваков начин, додава тој, се очекува да се зголеми бројот на српски туристи во земјава, кој во последните години расте.

–  Српските туристи сите информации околу попустите ќе можат да ги добијат на вебсајтот на ХОТАМ и хотелите поединечно – додава Блажевски.

Хотелиерите размислуваат и за попусти и на другите туристи, но во каков пакет ќе бидат тие дополнително ќе одлучат.

Засега се воздржани угостителите кои лани и од почетокот на годината делумно работеа и не се сигурни дали ќе работат во периодот кога ќе почне туристичката сезона.

Од Туристичко-угостителската комора на Сојузот на стопански комори пак велат дека секоја фирма  ќе реагира според можностите.

– Претпријатијата од туристичко-угостителскиот сектор согласно можностите се трудат да креираат што поповолни понуди за да може да привлечат што повеќе гости. Она што нѐ изненадува е тоа што директорот на АПП наместо да ги остварува надлежностите и да организира сериозна кампања за промоција на нашата држава во светот како безбедна дестинации за одмор со цел да се спаси престојната туристичка сезона, се впушта во креирање на комерцијални политики на приватните субјекти – велат од ТУК.

Директорот на Агенцијата за промоција и поддршка на туризмот Љупчо Јаневски смета дека преку обезбедување попусти во хотелите, рестораните, како и бесплатните влезници во музеи и бесплатниот паркинг во општините, дополнително ќе се мотивираат српските туристи да престојуваат во земјава.

– На овој начин ќе се овозможи нивна посета во градовите и поголем број остварени ноќевања, со што ќе се помогне на туристичкиот сектор во РС Македонија. Токму затоа се повикани и локалните самоуправи во рамките на нивната можност да помогнат на туристите при нивниот престој во дестинациите – вели Јанвески.

Агенцијата, додава тој реализира и субвенционирање на странските туристи кои престојуваат преку туроператорите и за различни дестинации предвидените субвенции се различни што исто така не претставува проблем при третирањето на туристите и дестинациите.

– Македонија создаде зелени коридори со Албанија, Косово, Србија, Црна Гора за брз трансфер на патници и слободно патување без потреба на ПЦР тестови со што очекуваме поголем број туристи од регионот во 2021 година. Агенцијата подготви и ѝ предложи на Владата дополнителни стимулации за домашните туроператори кои ќе ја продаваат нашата дестинација на домашни туристи, стимулирајки ги да создадат конкурентни аранжмани за Македонија и нив да ги понудат на регионалните и на домашните туристи – вели Јаневски.

Се обидовме да добиеме одговор и од општините и музеите во туристичките општини кои треба да обезбедат бесплатен паркинг и бесплатен пристап до музеите за српските туристи, но нивните телефони денеска останаа затворени.

Во 2019 година земјава  ја посетиле 59.567 туристи и се  остварени 106.103 ноќевања,  додека лани имало 11.517 туристи и се остварени 25.109 ноќевања.

The post Добредојде со попуст до 20 отсто за српските туристи во хотелите appeared first on plusinfo.mk.

Според Асоцијацијата на хотелиери сѐ ќе зависи од резултатите кои ќе ги даде вакцината за ковид-19 во светтски рамки, и посебно во земјата.

– Ако вакцинацијата која е почната во светот покаже добри резултати се очекува веќе во март да почнат резарвациите, а од мај да почнат да доаѓаат гости. Сѐ уште се активни договорите со странските туроператори направени на крајот на 2019 година кои требаше да се реализираат лани. Секако не можеме да очекуваме бројот на гости да биде повисок од она што го остваривме во 2019 година, но ќе биде доволно да почнеме поинтензивно да работиме – вели претседателот на Хотелската асоцијација (ХОТАМ) Крсто Блажевски.

Според него, ваквите очекувања многу ќе зависат од тоа како ќе се одвива вакцинирањето и состојбата со ковид-19 во земјава.

– Знаете дека туристите за да дојдат во земјава треба да бидат сигурни дека се безбедни. Годинава безбедноста е поврзана со здравствената криза и од тоа колку ќе биде можноста да бидат заразени ако патуваат во земјава ќе зависи дали туристите ќе се одлучат да престојуваат во неа. Се надеваме дека со почетокот на вакцинирањето ќе се подобрува и оваа безбедност за туристите, за да можеме да очекуваме и гости – додава Блажевски.

Според него, и сега престојот во големите хотелски капацитети е безбеден бидејќи се почитуваат сите протоколи, но со намалувањето на можноста за инфицирање се зголемува и можноста туристите да изберат да престојуваат во хотел.

– Хотелите се придржуваат на протоколите за растојание, број на присутни гости, чистењето, дезинфекцијата и озонирањето на собите. Големите хотели ги даваат тие погодности и поголема сигурност на гостите. Сепак, за враќање на конгресниот туризам кој е дел од меѓусезонската работа на хотелите потребно е многу повеќе, односно враќање на нормалното живеење – вели Блажевски.

Тој смета дека како и лани планинскиот туризам има повеќе можности да привлече туристи и годинава бидејќи се реализира во мали групи и на отворено.

– Покрај ова, добро ќе котираат и викендичките и селскиот туризам и тие треба да се искористат од страна на државава при привлекувањето на странски туристи – додава тој.

Според последните податоци на Државниот завод за статистика, кои се однесуваат за октомври лани, бројот на туристите во овој месец изнесувал 33.929, а бројот на ноќевањата 80.612. Од нив 25.403 туристи престојувале во хотелите во земјава. Тие оствариле 53.022 ноќевања. Според овие податоци, домашните туристи оствариле 35.482, додека странците скоро половина помалку или 17.540 ноќевања. Најмногу ноќевања во октомври лани се направени во хотелите со четири ѕвездички и тоа 25.999 ноќевања.

The post Хотелиерите очекуваат првите странски гости во земјава да пристигнат во мај appeared first on plusinfo.mk.