Норвешка со големо внимание ја очекува пресудата за Мариус Борг Хоиби, синот на крунската принцеза Мете-Марит, кој се соочува со 40 обвиненија, меѓу кои и четири за силување.

Обвинителството бара седум години и седум месеци затвор, додека одбраната смета дека евентуалната казна не треба да надмине година и пол.

Четири обвиненија за силување

Хоиби ги негира најтешките обвиненија, но признал дел од делата поврзани со дрога, сообраќајни прекршоци и кршење на судски мерки.

Според обвинителството, четирите силувања се случиле додека жените спиеле или биле во состојба што не им овозможувала да дадат согласност.

Жените кои сведочеа во процесот останаа анонимни, а судот забрани нивно фотографирање и јавно идентификување.

Семејна драма зад судските врати

Случајот доаѓа во исклучително тежок период за норвешкото кралско семејство.

Мајката на Хоиби, крунската принцеза Мете-Марит, неодамна беше ставена на листа за трансплантација на бели дробови поради сериозно влошување на нејзината здравствена состојба.

И покрај болеста, таа и престолонаследникот Хакон го посетиле својот син во притвор, каде што се наоѓа од почетокот на февруари.

Кралското семејство под силен притисок

Иако Мариус Борг Хоиби формално не е член на кралското семејство, неговиот случај предизвика силни потреси во норвешката монархија.

Дополнителен товар за угледот на дворот претставуваат и контроверзиите околу пријателството на Мете-Марит со осудениот сексуален престапник Џефри Епштајн, тема која повторно се отвори во текот на судскиот процес.

Поради кризата, норвешкото кралско семејство веќе ги откажа дел од планираните јавни настани, вклучувајќи ја и прославата на 25-годишнината од бракот на престолонаследничката двојка.

Пресуда што може да ја потресе монархијата

Експертите во Норвешка предупредуваат дека случајот одамна ја надминал рамката на обично судење и прераснал во сериозна институционална криза.

Доколку Хоиби биде осуден на долга затворска казна, тоа дополнително би го зголемило притисокот врз кралското семејство, кое веќе со месеци се обидува да ја врати довербата во јавноста.

The post СИНОТ НА НОРВЕШКАТА ПРИНЦЕЗА В ПОНЕДЕЛНИК ЌЕ ЈА ЧУЕ ПРЕСУДАТА Обвинет е за четири силувања appeared first on plusinfo.mk.

Основното јавно обвинителство (ОЈО) Скопје поведе постапка и предложи притвор против 36-годишник кој синоќа вршел семејно насилство и телесно ги повредил сопругата и нејзината мајка. Тој се заканил дека ќе ги задави сопствените деца, а кога пристигнале шурата со таткото го пуштил шарпланинецот и го гризнал за надлактицата и потколеницата.

Oд Обвинителството велат дека осомничениот почнал да вика и да се заканува на сопругата и на нивните две малолетни деца на возраст од 6 и 4 години со намера да ги заплажи. Кога жената побарала да престане, тој ја фатил за раката и ја турнал, повредувајќи ја..

„Потоа осомничениот започнал да ја крши покуќнината и со клуб маса замавнал кон мајката на сопругата, која исто така телесно ја повредил на ногата и во градниот кош. Се заканувал дека сите ќе ги убие, па и дека ќе го задави сопственото дете, при што во еден момент извадил и нож со кој замавнувал, предизвикувајќи чувство на загрозеност, несигурност и страв кај оштетените“, информираат од ОЈО Скопје.

Сопругата на 36-годишникот во еден момент успеала телефонски да ги повика своите брат и татко, а кога пристигнале, осомничениот продолжил и ним да им се заканува со нож. Потоа од дворот го пуштил и своето куче од расата „шарпланинец“ кое гризнало еден од оштетените на надлактицата и потколеницата.

Осомничениот 36-годишник се сомничи за кривичните дела телесна повреда, загрозување на сигурноста и предизвикување општа опасност. Поради опасност од бегство и опасност од повторување на семејното насилство, Основниот кривичен суд до ОЈО Скопје достави предлог за определување мерка притвор.

The post СКОПЈАНЕЦ СЕ ЗАКАНУВАЛ ДЕКА ЌЕ ГИ ЗАДАВИ ДЕЦАТА Маж ја претепал сопругата и тештата, пуштил куче да го гризне шурата appeared first on plusinfo.mk.

Основното јавно обвинителство Скопје предложи притвор за 21-годишникот кој прегази и усмрти пешак во скопско Марино. Осомничениот се гони за тешки дела против безбедноста во сообраќајот.

„Осомничениот 21-годишник, вечерта на 24 март во Марино, управувал автомобил ‘КИА’ без да поседува возачка дозвола и под дејство на алкохол со концентрација од 0,94% во крвта. Брзината на движење на возилото не ја приспособил кон сообраќајните услови и не обрнал внимание на пешакот Оливер Младеновски, кој веќе започнал да го преминува коловозот. Бидејќи не успеал навреме да запре, осомничениот со автомобилот удрил во телото на пешакот и му нанел тешки телесни повреди од кои тој починал“, соопшти Основното јавно обвинителство.

Според напишаното, Јавниот обвинител бара притвор поради неколку основи. Постои опасност од бегство. Постојат и сомнежи дека може да влијае врз сведоци. Дополнително, се проценува ризик од повторување на делото.

Несреќата се случила на улицата „500“ во селото Марино. Пешакот, 52-годишник, починал на самото место.

УАПСЕН 21-ГОДИШНИОТ ВОЗАЧ ШТО УСМРТИ ПЕШАК ВО МАРИНО Ќе се вештачи автомобилот, телото е на обдукција

The post ПОБАРАН ПРИТВОР ЗА ВОЗАЧОТ КОЈ УСМРТИ ПЕШАК ВО МАРИНО Постои ризик дека може да го повтори делото appeared first on plusinfo.mk.

Основното јавно обвинителство Скопје поведе постапка против 52-годишен маж осомничен за телесна повреда во случај на семејно насилство. Според информациите, тој физички ја нападнал својата 32-годишна вонбрачна партнерка, која била во вториот месец од бременоста.

Инцидентот се случил во домот на улицата Рајко Жинзифов во Скопје. По расправија, осомничениот започнал да ја удира жената со тупаници и шлаканици, нанесувајќи ѝ гребаници, отоци и хематоми на главата и телото.

Од Основното јавно обвинителство Скопје информираат дека насилството ескалирало кога жената почнала да вика и да бара помош.

– Колку посилно викала оштетената со намера да ја слушнат соседите и да повикаат полиција, толку поагресивен станувал осомничениот, при што во еден момент ја притиснал со рацете за вратот со цел да ја замолчи – велат од Обвинителството.

Во обид да се спаси, жената го убедила напаѓачот да одат кај гинеколог за да направат ЕХО-преглед. Додека се движеле со автомобил и застанале на семафор на булеварот Св. Климент Охридски, таа успеала да избега од возилото и влегла во блиско кафуле.

Од лице кое седело во кафулето позајмила мобилен телефон и веднаш го пријавила случајот во полиција.

– Јавниот обвинител достави предлог до судијата на претходна постапка за определување мерки на претпазливост, вклучувајќи обврска осомничениот да се јавува кај надлежен орган, привремено одземање на патната исправа и забрана за приближување и воспоставување контакт со оштетената – информираат од Основното јавно обвинителство Скопје.

The post БРЕМЕНА ЖЕНА ПРЕТЕПАНА ВО СКОПЈЕ Успеала да избега на семафор и да побара помош appeared first on plusinfo.mk.

Основното јавно обвинителство Скопје покрена постапка против сопственикот и управител на угостителскиот објект „Јужна пруга“ во Скопје, откако, и покрај изречената забрана за работа, локалот продолжил да прима гости.

Според Обвинителството, на објектот претходно му била изречена забрана за вршење дејност од овластен инспектор за животна средина од Општина Аеродром, а решението било јасно истакнато на влезната врата. Наместо да ја почитува одлуката, сопственикот го отстранил службениот знак и продолжил со работа.

„При контролата беше констатирано дека угостителскиот објект работи и покрај забраната и дека во него има присутни гости“, информираат од Основното јавно обвинителство Скопје.

Со ваквото постапување, како што наведуваат од Обвинителството, осомничениот покажал целосно непочитување на службените акти и ја нарушил функцијата на институциите задолжени за надзор.

„Симнувањето на службениот знак и продолжувањето со работа претставува директно попречување на работата на државните и јавните институции“, појаснуваат од ОЈО.

Поради основано сомнение дека е сторено кривичното дело симнување и оштетување на службен печат или знак, јавниот обвинител побарал од Судот да му бидат изречени мерки на претпазливост.

„Побарана е забрана осомничениот да врши угостителска дејност, како и целосно спроведување на решението на надлежните инспекциски служби, сè додека трае кривичната постапка“, додаваат од Обвинителството.

Постапката е во тек, а од ОЈО Скопје порачуваат дека непочитувањето на законите и инспекциските одлуки ќе биде санкционирано.

The post ИНСПЕКЦИЈА ЈА ЗАТВОРИ „ЈУЖНА ПРУГА“, СОПСТВЕНИКОТ ЈА ОТВОРИ Кривична за газдата што ги симнал печатите appeared first on plusinfo.mk.

Маж од Битоле е осомничен за тешка телесна повреда и полов напад врз својата вонбрачна партнерка. Обвинителството во Битола истражува настан од 18 декември. Мажот кој има 56 години ја нападнал жената со тупаници и предмети од домаќинството во заедничкиот дом на улицата „Васко Карангелевски“, соопшти Обвинителството.

По ударите, како што се вели во написот, таа добила повеќе телесни повреди. Мажот, според наводите, ѝ се заканувал дека ќе ја фрли од тераса, а потоа насилно ја соблекол и ја принудил на полови дејствија.

Јавниот обвинител побарал мерка притвор, наведувајќи реална опасност осомничениот да избега или повторно да изврши семејно насилство врз жртвата со која живеат во ист дом.

The post ЈА ТЕПАЛ, РЕКОЛ ДЕКА ЌЕ ЈА ФРЛИ ОД ТЕРАСА, ЈА СИЛУВАЛ Побаран притвор за маж од Битола appeared first on plusinfo.mk.

Основното јавно обвинителство Куманово отвори истражна постапка против 84-годишен маж поради обид за убиство од ниски побуди. Нападот се случил на 4 декември во еден кумановски хотел.

Според написот на ОЈО Куманво, осомничениот утрото го искористил моментот кога друг гостин ја отворил вратата и влегол во објектот. Се упатил до собата во која престојувала жената со нејзиниот неподвижен сопруг.

Кога го забележала, таа станала и тргнала да ја затвори вратата, но мажот извадил нож и ја нападнал, нанесувајќи ѝ удар во главата. Во мигот кога ножот му паднал, жената почнала да вика и да бара помош. Нејзиниот син, кој бил во соседната соба, истрчал и го совладал напаѓачот.

Судија го прифатил предлогот на јавен обвинител и за напаѓачот одредил притвор.

The post НОЖОТ ПАДНАЛ, СИНОТ СКОКНАЛ ДА ГО СОПРЕ НАПАЃАЧОТ Обид за убиство во кумановски хотел appeared first on plusinfo.mk.

Кучето питбул кое било изгризано во организираните борби во битолско Црноец било во сопственост на грчки државјанин вмешан криминалот, се вели во соопштение на Јавното обвинителство. Песот кој изгризал е американски стафорд, сопственот на косовски државјани.

Познати се детали за мачењето животни. ОЈО покрена обвинение за две лица од Македонија, еден грчки и еден косовски државјанин.

На четворицата осомничени судот во Битола им одреди куќен притвор, иако јавен обвинител предложи затворски притвор. Битолското обвинителство најави жалба на оваа одлука.

• ОРГАНИЗИРАЛЕ БОРБИ СО КУЧИЊА, ФАТЕНИ НА ЛИЦЕ МЕСТО Деветмина уапсени, од кои четворица од Косово

Борбите со кучиња, според обвинителството, биле организиране преку 44-годишен посредник и 43-годишник кој во дворот на семејната куќа подготвил заграден ринг.

Според соопштението на ОЈО, осомничените на 1 ноември од користољубие, организирале борба помеѓу кучињата. Питбулот, како што се вели во текстот, се здобил со бројни повреди од угризи, а борбата ја следеле повеќе лица од Македонија, Косово и Грција.

При интервенција на полицијата, биле пронајдени парични средства во евра и во денари. Сопствениците на кучињата успеале да побегнат, но обвинителството наведе дека тие се идентификувани и дека по нив се трага.

The post ПИТБУЛОТ КОЈ СЕ БОРЕЛ ВО ЦРНОЕЦ БИЛ НА ГРК, СТАФОРДОТ НА КОСОВЕЦ Четворицата осомничени успеале да избегаат, парите ги оставиле appeared first on plusinfo.mk.

Основното јавно обвинителство Скопје отвори истрага против 23-годишен скопјанец осомничен за недозволено поседување оружје и муниција. Против него е поведена постапка за кривично дело – „Неовластено изработување, држење, посредување и тргување со оружје или распрскувачки материи“, по член 396 став 3 во врска со став 1 од Кривичниот законик.

Вчера, во неделата, по судска наредба и по налог на обвинителството, полицијата извршила претрес во неговиот дом и таму пронашла полуавтоматски пиштол и 51 куршум од калибар 9 мм, како и рамки и додатоци за оружјето, кое осомничениот го поседувал без дозвола.

Обвинителството поднесе предлог до судија на претходна постапка за определување мерка притвор, со образложение дека постои опасност осомничениот да се даде во бегство или да го повтори делото доколку се брани од слобода.

The post 23-ГОДИШЕН СКОПЈАНЕЦ ФАТЕН СО ПОЛУАВТОМАТСКИ ПИШТОЛ И СО 51 КУРШУМ Обвинителството бара притвор поради ризик од бегство и од повторување на делото appeared first on plusinfo.mk.

Јавен обвинител од специјализираното одделение задолжено за дела сторени од припадници на полицијата и затворската служба ја активирал истрагата против еден полициски службеник од ОВР Гостивар, кој, како што велат од Обвинителството, бил сериозно вмешан во – да го наречеме народски – присвојување службен џепарлак.

Па, што се случило?

Според информациите, осомничениот работел како крим-техничар и бил испратен на увид каде што биле најдени пари и накит: точно 25.000 евра во кеш и прилично количество злато. Ги фотографирал, ги подигнал и уредно ги евидентирал во службените книги и електронските системи. Дотука – процедура како по книга.

Но тука почнува да се расплетува приказната. Неколку пати, велат од обвинителството, се обидувал да ги предаде доказите на јавниот обвинител. Но бидејќи таму немало услови да се чуваат, по насоки на обвинителот, ги ставил во својот шкаф на работа. Заклучено, чисто, наводно безбедно.

Само што… во еден момент одлучил дека ќе си ги присвои. Почнал постепено да зема дел од парите и од накитот, златото го менувал во златарници за кеш, а потоа – најверојатно притиснат од долгови – ги трошел парите за да ги покрие.

И за да ја затвори приказната, направил нешто што звучи како сцена од евтин трилер: ја извадил бравата од шкафот и инсценирал дека му е обиен. Да изгледа како некој друг да го направил „чистењето“.

Но вчера, кога колегите му јавиле дека се врши увид во неговата канцеларија поради, замисли, „обиениот“ шкаф – дошол и веднаш ја признал целата работа. Изразил каење, што е, велат од обвинителството, барем мала олеснителна околност.

Сега предметот е пред судија за претходна постапка, каде што обвинителот ќе предложи мерка притвор за полицискиот службеник.

The post КРИМ-ТЕХНИЧАР СИ ПРИСВОИЛ НАКИТ И 25.000 ЕВРА Го менувал златото за пари, па глумел дека го ограбиле appeared first on plusinfo.mk.