Властите во САД ќе наменат дополнителни 500 милиони долари за рударството и за нови капацитети за преработка на критични минерали, со акцент на материјалите потребни за производство на батерии и енергетски технологии, бидејќи Вашингтон се стреми да ја намали зависноста од странски синџири на снабдување. Иницијативата е насочена кон минерали како што се литиум, бакар, графит, никел и алуминиум.

– Предолго време, Соединетите Американски Држави се потпираа на непријателски странски субјекти за снабдување и обработка на критичните материјали што се неопходни во производството на батерии и преработката – изјави секретарот за енергетика на САД Крис Рајт.

Според властите, зајакнувањето на домашните синџири на снабдување ќе ѝ помогне на земјата да ја задоволи растечката побарувачка за енергија и електрична енергија поврзана со вештачката интелигенција, а воедно ќе ги поддржи и пошироките цели за енергетска безбедност.

Иницијативата беше поддржана во време кога заменичката секретар за енергетика на САД, Одри Робертсон, присуствува во Јапонија, каде што разговара за соработка во однос на отпорноста на синџирот на снабдување, како и за очекуваниот трилатерален договор меѓу Вашингтон, Токио и Брисел за заеднички ископ и преработка на руди.

– Преработката на критични минерали е витална компонента за базата на снабдување со критични минерали на нашата нација. Зголемувањето на домашното производство, вклучително и преку рециклирање, ќе ја зајакне националната безбедност и ќе обезбеди Соединетите Американски Држави и нашите партнери да бидат подготвени да се соочат со енергетските предизвици на 21 век – истакна Робертсон.

Проектите ќе бидат избрани во три главни области: преработка на критични минерали од сурови суровини, рециклирање на критични материјали и производство на материјали и компоненти за батерии. Овој потег е дел од поширокиот напор на Вашингтон за обнова на домашните синџири за снабдување со критични минерали, кои во моментов се доминирани од надворешни центри за преработка, особено во Кина.

Од набројаните минерали, најверојатно најголема битка ширум светот ќе се води за бакарот. Бакарот влегува во нов суперциклус – цените остануваат високи, а војната во Иран го забрзува геополитичкото прегрупирање. Прогнозите на кредитната куќа „Фич“ за 2026–2028 година сега се повисоки, а глобалните аналитичари предупредуваат: светот влегува во ера на структурен недостиг на бакар што ќе ја промени индустријата, енергетиката и меѓународните односи.

Според UNCTAD, телото на Обединетите Нации за трговија и развој, светот влегува во долгорочен дефицит на бакар, што би можело да ја забави енергетската транзиција. Над 50% од светските резерви се концентрирани во пет земји – Чиле, Австралија, Перу, Конго и Русија, што го прави пазарот исклучително чувствителен на политички и општествени превирања.

Аналитичарите од „J.P. Morgan“ предвидуваат дека во 2026 година глобалниот дефицит на преработен бакар ќе достигне околу 330 илјади тони, а цените би можеле да скокнат на 12.500 долари за тон во вториот квартал од годинава.

Бакарот долго време беше ‘рбетот на индустријата, но во 2026 година се очекува да биде геополитички ресурс на „прва линија“. Електричните автомобили, батериите, обновливата енергија, центрите за податоци, инфраструктурата со вештачка интелигенција – сите бараат огромни количини на бакар. Во исто време, рударството е во застој, а конфликтите во клучните региони дополнително го потресуваат пазарот.

Од друга страна, Македонија има само еден активен рудник за бакар, иако според одредени проценки земјава поседува големо количество од овој ресурс. Работи единствено рудникот за бакар Бучим, заедно со новиот капацитет „Боров дол“, каде преработката дава околу 7.000 до 7.500 тони чисто злато и бакар годишно. Според извештаите на USGS, Геолошкиот завод на САД, кои датираат од пред неколку години, Македонија располага со околу 510 милиони тони бакар. Тие наведуваат дека само на локалитетот „Иловица-Штука“ се проценува дека има околу 410.000 тони чист бакар (во склоп на 237 милиони тони руда), а локалитетот „Кадиица“ кај Пехчево крие најмалку 100 милиони тони бакарна руда.

Се очекуваа оваа пролет пратениците во земјава да ги разгледуваат предложените закони за рударство и геологија, по што ќе биде јасно дали новоусвоените европски стандарди во индустријата ќе резултираат со развој на гранката, која со години има се помало учество во растот на индустриското производството и покрај огромниот потенцијал.

The post НОВА ФИНАНСИСКА ИНЈЕКЦИЈА ЗА РУДНИЦИ ВО САД Се бараат бакар и литиум поради глобалниот недостиг appeared first on plusinfo.mk.

САД, Европската Унија и Јапонија вчера објавија воспоставување стратешко партнерство насочено кон подобрување на снабдувањето со критични минерали. Цел на партнерството е „значително да се унапреди економската и националната безбедност преку заедничко зајакнување на отпорноста на синџирите на снабдување со критични минерали“, се вели во заедничката изјава објавена по министерскиот состанок во Вашингтон.

– Со развивање на овој акционен план, сакаме да поставиме основа за обврзувачки мултилатерален договор за критични минерали со земји кои мислат исто – рече трговскиот претставник на Белата куќа (USTR) Џејмисон Грир.

Протоколот за соработка меѓу САД, ЕУ и Јапонија има за цел „да идентификува области на соработка за стимулирање на побарувачката и диверзификација на понудата“ за потписниците, се вели во соопштението за медиумите.

Главната цел е да се намали глобалната зависност од Кина, која во голема мера го контролира снабдувањето со критични минерали потребни во бројни стратешки сектори.

Меѓу мерките предвидени со овој протокол се поддршка за нови рударски проекти и проекти за рафинирање, производство и рециклирање. Планот предвидува забрзување на истражувањето и развојот во тие области и „зајакнување на размената на информации за достапните залихи“.

Вашингтон потоа објави сличен акционен план со Мексико, со речиси исти инструменти како оној потпишан со Брисел и Токио.

Кина е најголемиот светски производител на индустриски метали и минерали. Нејзините извозни ограничувања, кои се применуваат од 2023 година за галиум, германиум, волфрам, индиум, молибден, антимон и тешки ретки минерали како што се диспрозиум и тербиум, ги нарушија меѓународните синџири на снабдување.

Критичните минерали се клучни за сектори како што се автомобилската индустрија, одбраната и дигиталната технологија.

The post СЕ СОЗДАВААТ СТРАТЕШКИ ПАРТНЕРСТВА ОКОЛУ КРИТИЧНИТЕ МИНЕРАЛИ Европската Унија, САД и Јапонија го објавија првото appeared first on plusinfo.mk.

Кога се обраќаме на јавноста како личности имаме обврска да даваме точни информации, а не шпекулации кои ни се од лична корист. Мораме да одговориме на неколку клучни прашања кои ја загрижуваат јавноста кога зборуваме на темата „Рудни богатства“. Јас вообичаено говорам за металични суровини и тоа пред сè во делот на нивната скапоценост.

Меѓутоа со голема загриженост констатирам дека постојат личности кои воопшто не се загрижени за општественото уредување на Македонија и тоа во делот на економијата, образованието, демографијата и животната средина. Овие личности со сето право ги нарекувам „лажњаци“ и тие доаѓаат од фелата професорска, академска (МАНУ) и  од политичката.

Од делот на професорите „во око“ ми падна личност од еден од факултетите при универзитетот „Климент Охридски“ кој вели дека е професор на шест предмети. Оваа личност првпат ја забележав кога објави колумна на еден медиум во која вели дека е првиот кој дал чист дигитален ТВ сигнал на сателит некаде во 2025 година. Еве што вели:

– Слушнав дека мојата станица е единствената што има ап -линк (наменет за испраќање сигнали кон сателитот) не само од аматерските, туку и од професионалните, односно комерцијалните телевизиски станици во Македонија – вели професоров.

Почитуван професоре прв дигитален ТВ сигнал емитуваше ТВ БТР на ромски јазик во 2004 година, а од 2008 година постојат две телевизии кои имаат таква лиценца. Имаше десет вакви ТВ станици на една од нив јас бев управител.

Но, овој за мене професионален „лажњак“ не застанува и вели на 27 Август 2025 година сега во рударството:

„Литиумската треска веќе ја зафати Србија, а беше само прашање на време кога експлоатацијата на литиумот ќе стане актуелна и во Македонија. Во нашата земја се откриени резерви на литиумска руда, најверојатно во форма на минерали како сподумен или лепидолит. Според процените, овие резерви се вредни околу 10 милијарди долари, со вкупно приближно 1 милион тони литиум“.

Ова е најголемата лага што сум ја слушнал за рудните богатства на Македонија и не можам да го разберам поривот на ваквата изманичка теорија објавен на медиум.

Македонија НЕМА ЛИТИУМ, има само траги кои се незначителни. Еден од најголемите експерти нормално професор по хидро и пиро металургија Македонец кој живее во Австралија јасно и недвосмислено ми соопшти дека Македонија нема искуство со литиум зошто го нема.

НО едно големо НО. Македонија е на природната рударска линија или „жица“ во источна и мал дел во средна Македонија каде поседуваме рудни богатства пред сè на во огромни количини на БАКАР и задоволителни на ЗЛАТО.

Бакарот, Европската Унија го стави на списокот на критични метали и доживува експанзија во ценовната политика. Ако внимателно ги слушаме нашите аналитичари, а последен од нив е г-динот Методи Хаџи Јанев кој даде јасна и недвосмислена изјава: „Не е важно како ќе заврши конфликтот во Украина, туку кој ќе ја обновува“. Поуката е, нашиот бакар па макар и со најмал процент на светско ниво ќе игра важна улога на целокупниот пазар сконцентриран на тлото на Европската Унија.

А кога зборуваме за златото иако е еден од најшпекулативните скапоцени металични елементи кој секогаш оди рака под рака со бакарот, сепак игра многу значајна улога на светските берзи. Според рударски информации на неотворените рудници каде има количини на злато, а кој никогаш не ми ги демантираа моите информации поседуваме 200 тони чисто злато. И ова значи прв турнус на експлоатација на овој скапоцен метал во првите осум до дванаесет години. По овој период геолозите велат можно е, напомнувам можно е да се најде нова „жица“ што засега е не може да се прогнозира, но не се исклучува како можност.

Но, да се вратиме на постоечката количина 200 тони злато во овој момент значат на пазарот 28 милијарди евра. Ако го земеме само овој елемент и да го игнорираме бакарот согласно нашите закони за рударска рента од четири проценти која мора да се исплаќа годишно на општините каде се наоѓаат рудниците со докажани количини како што се Пробиштип, Босилово и Ново Село, како и пределот на планината Кожув (за рудникот Петрошница во Кумановско не би сакал пред време да шпекулирам) тоа се 1,130 милијарда евра за периодот кој го наведов.

Многумина „лажњаци“ работат ова богатство да го дадат на туѓи сили кои Македонија ниту ја сакаат во НАТО ниту пак ја сакаат во Европската Унија. Нивните усти се полни со изрази дека ќе сме заложници на колонијалистички сили и сеат страв меѓу населението.

Затоа сакаат да нема квалитетно образование, да немаме народ во селата и малите градови. Тие се тие кои сакаат да ни донесат „туѓинци“ кои ќе работат под секое економско достоинство. Овие личности ја распродаваат Македонија. Овие личности ги глорифицираат Грета Тунберг и Виола фон Крамон Таубадел. Најголемите измамнички на светската сцена за заштита на животната средина

Владата на Македонија мора да се сконцентрира на сопственото богатство и на сопствената наука.

Нашите деца има да ги воспитаме дека да убаво е да се иде во Европската Унија и на останати места. Ама туристички. Македонија е нивниот дом.

The post Немаме литиум, имаме злато, бакар и „лажњаци“ appeared first on plusinfo.mk.