Најдобриот тренер на денешницата, Шпанецот Пеп Гвардиола пред своите фудбалери открил дека се развел од сопругата Кристина Сера, а неговата искрена исповед е забележана во новиот документарец „A Beautiful Obsession“. Емотивната сцена се случила по поразот на Манчестер Сити со 2:0 од Јувентус во Лигата на шампионите во декември 2024 година, во период кога тренерот минувал низ сериозни лични и професионални турбуленции.
Во еден момент, додека зборувал со тимот за страста и посветеноста, Гвардиола решил да ја сподели и својата лична болка.

– По ѓаволите, јас сум разведен од најубавата жена на планетата. Таа е мојата сопруга, мојата поранешна сопруга. Ја сакам неверојатно многу, но ја изгубивме страста – вели тој. Потоа им објаснил на играчите дека токму страста е она што недостасува и во фудбалот кога тимот не игра со вистинската енергија.

– Ја сакам апсолутно. Таа ме сака, да, но ја изгубивме страста. А така се игра фудбал. Играте поради нешто што го носите во себе – но каде е страста? Во животот, што и да правите, правете го со страст. Не сакам добри играчи, сакам играчи со страст – им вели Гвардиола.

Документарецот ги опишува последните две години на Пеп Гвардиола на клупата на Манчестер Сити. Пеп размислувал дали да замине уште во ноември 2024-та но го продолжи договорот и остана уште 18 месеци.

Инаку, Гвардиола и неговата сопруга Сера биле заедно околу 30 години, а во брак биле десет. Тие имаат три деца – Марија, Мариус и Валентина. Сера се преселила во Манчестер со децата кога тој ја презеде функцијата тренер на Сити во 2016 година, но во 2019 година се вратила во Барселона. Разделбата на двојката во јавноста беше објавена во јануари 2025 година, а медиумите тогаш пишуваа дека животот на различни места и огромната посветеност на тренерот кон фудбалот придонеле за заладување на односот.

Документарецот открива и колку целиот период му бил тежок на Гвардиола. По подоцнежниот пораз од Баер Леверкузен со 2:0 во ноември 2025 година, тој повторно им се обратил на играчите, овојпат уште поостро:

– Го давам целиот свој живот, мојот развод, моето семејство е далеку – и сето тоа за вас.

Потоа бил бесен поради начинот на кој тимот одиграл и им порачал дека ваквите настапи можат да доведат до доаѓање на нов тренер.
Посебно интересен е и коментарот на неговиот близок соработник Мануел Естиарте, кој во документарецот објаснува дека играчите морале да ја разберат човечката страна на својот тренер.

– Не играте со тренер кој може да биде малку импулсивен, малку интензивен… Гледате човечко суштество. Тој се разведува – вели Естиарте, додавајќи дека било важно фудбалерите за првпат да го видат Гвардиола не само како тренер, туку и како човек.
И покрај сето тоа, приказната можеби сè уште нема конечен крај. Според шпанската новинарка Лорена Васкез, која се појавува во документарецот, вратата за помирување меѓу поранешните сопружници не е целосно затворена. Таа сугерира дека е можно еден ден, кога Гвардиола ќе се пензионира и ќе се врати во Барселона, повторно да ја обноват врската. Во меѓувреме, тренерот ја заврши својата десетгодишна ера во Манчестер Сити, оставајќи зад себе шест титули во Премиерлигата и трофеј во Лигата на шампионите.

The post 🎥 „СЕ РАЗВЕДОВ ОД НАЈУБАВАТА ЖЕНА НА ПЛАНЕТАТА“ Гвардиола ја открил болката од разводот пред фудбалерите во соблекувална appeared first on plusinfo.mk.