Капитенот на португалската фудбалска репрезентација Кристијано Роналдо може да ја заработи казната од 255 евра за околу 36 секунди. Толку покажува пресметката според најновата процена на „Форбс“ за неговите приходи од Ал Наср.

Дисциплинскиот совет на Португалската фудбалска федерација на 19 октомври му изрече и суспензија од 30 дена. Поводот беше самоволното напуштање на репрезентативниот камп во Копенхаген, пред натпреварот со Данска.

„Форбс“ ги проценува неговите клупски приходи за сезоната 2026/27 на 250 милиони долари. Износот вклучува плата и бонуси, пред одбивањето даноци и агентски провизии. Тоа се приближно 223 милиони евра, според курсот што Ројтерс го наведува на 19 октомври.

Распределена на сите секунди во годината, таа заработка изнесува околу 7,07 евра во секунда. Оттука произлегува и пресметката за казната. Станува збор за годишен просек, вклучително и времето надвор од теренот.

Бројката од 39 секунди ја објави португалскиот весник „А Бола“. Неговата пресметка користи приближна основна плата од 208 милиони евра годишно. Различната основа ја објаснува разликата во секундите.

Роналдо ќе може да биде повикан и за следните репрезентативни натпревари. Според „Тајмс“, суспензијата се пресметува од денот на натпреварот со Данска, па дел веќе изминал. Португалија повторно игра со Данска на 14 ноември, а со Велс на 17 ноември.

Неговото враќање сепак зависи од селекторот на Португалија Жорже Жезус. Несогласувањата се заострија откако Роналдо остана на клупата при победата над Норвешка со 2:1. Напаѓачот го обвини селекторот за прекршени ветувања околу неговата улога.

Жезус негираше дека постоел таков договор. Роналдо подоцна се извини за заминувањето и за тоа што не ги поздравил навивачите. Истовремено порача дека останува достапен за репрезентацијата по издржувањето на казната.

„А Бола“ потсетува и на поранешниот португалски репрезентативец Рикардо Карвалјо. Тој во 2011 година го напушти кампот откако сфати дека нема да биде стартер против Кипар. Федерацијата тогаш му изрече суспензија од 1 година.

Роналдо тогаш јавно го критикуваше својот соиграч.

– Никој нема загарантирано место во репрезентацијата. Игра оној што е во подобра форма и кого тренерот ќе го избере – изјави Роналдо во 2011 година, потсетува „А Бола“.

Португалецот во меѓувреме продолжи да постигнува голови за Ал Наср. Неговото враќање во клупскиот дрес на 9 октомври донесе гол во победата над Ал Диријах со 3:0.

Следуваше погодок и против узбекистанскиот Нефтчи на 12 октомври, во победата со 3:1 во азиската Лига на шампионите. Роналдо го постигна вториот гол на Ал Наср, во 42. минута.

Неговиот вкупен биланс достигна 981 гол за клубовите и за репрезентацијата. До границата од 1.000 му недостигаат уште 19 погодоци.

The post ГО „УДРИЈА“ РОНАЛДО ПО ЏЕБОТ, ЕДВАЈ ГО ЧЕПНАА Казната ја заработува додека да му се олади кафето appeared first on plusinfo.mk.

Кристијано Роналдо е привремено суспендиран од Португалската фудбалска федерација, која поведе дисциплинска постапка против капитенот на репрезентацијата поради напуштање на кампот на националниот тим.

Фудбалерот на Ал Наср го напуштил репрезентативниот камп по несогласување со селекторот Жорже Жезус околу неговата улога во тимот и времето што требало да го помине на теренот.

Роналдо претходно се извини за својата постапка и призна дека заслужува да сноси последици затоа што ги оставил соиграчите. Тој истакна дека е подготвен да ја прифати казната што ќе ја одреди федерацијата.

Дисциплинската постапка е означена како итна, а Роналдо е привремено суспендиран додека трае разгледувањето на случајот. Конечната одлука за санкцијата сè уште не е донесена.

Според правилникот на Португалската фудбалска федерација, неоправданото напуштање на обврските кон репрезентацијата може да биде казнето со суспензија од еден до шест месеци, како и со парична казна. Висината на евентуалната конечна санкција за Роналдо ќе биде позната по завршувањето на дисциплинската постапка.

Роналдо ќе биде во репрезентацијата веќе во ноември

Веднаш по објавената вест за суспензија на Кристијано Роналдо од Фудбалската федерација на Португалија, стигна најава дека тој брзо ќе се врати во националниот тим. Претседателот на ФФ на Португалија, Педро Проенса порача дека сите во репрезентацијата сите сакаат да го видат капитенот повотрно во дресот на репрезентацијата.

– Федерацијата, селекторот и фудбалерите се согласни дека го сакаат Кристијано повторно во тимот, а верувам дека повторно ќе биде во тимот – изјави Проенса.

Тој истакна дека и самиот Роналдо сакал враќање.

Според правилникот за казни на Роналдо му следува суспензија од еден до шест месеци, како и парична казна од 500 до 1.000 евра.

И самиот Роналдо е подготвен да се врати во репрезентацијата.

The post КАЗНА ЗА РОНАЛДО ПО НАПУШТАЊЕТО НА РЕПРЕЗЕНТАЦИЈАТА Му се заканува суспензија до шест месеци appeared first on plusinfo.mk.

Лионел Меси и Кристијано Роналдо би можеле да се најдат во ист тим на прошталниот натпревар на поранешниот аргентински репрезентативец Карлос Тевез. Двете фудбалски ѕвезди се меѓу имињата што Тевез сака да ги види на теренот за време на свечениот натпревар посветен на неговата кариера.

Според аргентинските и шпанските медиуми, натпреварот се планира за декември на легендарниот стадион „Ла Бомбонера“ во Буенос Аирес, домот на Бока Јуниорс. Како можен датум се споменува 19 декември, но точниот термин сè уште не е официјално потврден.

Тевез сака на едно место да ги собере поранешните соиграчи со кои настапувал во текот на својата богата кариера. Претседателот на Бока Јуниорс, Хуан Роман Рикелме, наводно дал согласност натпреварот да се одржи на „Ла Бомбонера“.

Засега нема официјална потврда дека Меси и Роналдо ќе учествуваат на натпреварот.

Тевез е меѓу ретките фудбалери што имале можност да играат со двајцата. Со Меси настапуваше во репрезентацијата на Аргентина, додека со Роналдо беше соиграч во Манчестер јунајтед.

Аргентинецот веќе ја изразил желбата двајцата да бидат во ист тим. Во изјава што повторно привлече внимание по најавите за прошталниот натпревар, Тевез рече дека ќе се погрижи лично да стапи во контакт со португалската ѕвезда.

Доколку прифатат да настапат, Меси и Роналдо би можеле да се најдат на иста страна на теренот во еден од најочекуваните егзибициски натпревари за љубителите на фудбалот.

The post МЕСИ И РОНАЛДО ВО ИСТ ТИМ Двете ѕвезди ќе играат заедно на „Ла Бомбонера“ appeared first on plusinfo.mk.

Фудбалската ѕвезда Кристијано Роналдо и неговата сопруга Георгина Родригез го проширија своето портфолио со луксузни недвижности со купување две вили на необична локација – остров во Црвеното Море до кој може да се стигне само со брод или хидроавион.

Имотите се дел од ексклузивниот комплекс „Нујума, Риц-Карлтон Резерв“, во Саудиска Арабија, кој е опкружен со бели песочни плажи и кристално чисто море. Островот е оддалечен околу 26 километри од копното, а изолираноста им овозможува на сопствениците речиси целосна приватност.

Двете вили се со различна големина. Поголемата има три спални соби и е наменета за престој со целото семејство, додека помалата има две спални соби и е предвидена за поинтимни одмори. Според медиумските извештаи, вредноста на недвижностите надминува осум милиони евра, иако точната купопродажна цена не е официјално објавена.

Роналдо и Георгина го посетувале ова место повеќепати од 2023 година, кога во регионот почнале да се отвораат првите луксузни туристички комплекси. Природната убавина и мирот ги поттикнале да купат сопствен дом на островот.

– Црвеното Море навистина е посебно место. Уште при првата посета, Георгина и јас почувствувавме поврзаност со островот и неговата природна убавина. Овде се чувствуваме спокојно. Сега кога имаме сопствен дом, можеме да поминуваме квалитетно време со семејството, во целосна приватност и мир, кога и да посакаме – изјавил Роналдо.

Комплексот „Нујума“ има само 19 приватни вили и е дел од големиот туристички проект „Црвеното Море“, со кој Саудиска Арабија сака да привлече гости што бараат луксузен одмор во природно опкружување. Во понудата се и активности поврзани со морето, вклучувајќи истражување на коралните гребени.

Роналдо и Георгина се меѓу првите купувачи на недвижности во резиденцијалниот дел од комплексот, а според инвеститорот „Ред Си Глобал“, размислуваат и за дополнителни вложувања во оваа дестинација.

 

View this post on Instagram

 

A post shared by Red Sea Global (@redseaglobal)

За португалскиот фудбалер, кој веќе поседува луксузни домови во Португалија, Шпанија и Обединетите Арапски Емирати, ова е уште една инвестиција во недвижности. Но, според неговите зборови, новиот имот не е само прашање на луксуз, туку и место каде што семејството ќе може да се повлече од јавноста.

На островот нема пристап со автомобил, па до вилите се стигнува со приватен или изнајмен брод, односно со хидроавион. Токму таа оддалеченост од секојдневната гужва е една од главните причини поради кои оваа локација е привлечна за богатите купувачи.

The post РОНАЛДО И ГЕОРГИНА КУПИЈА ДВЕ ВИЛИ ДО КОИ НЕ СЕ ОДИ СО КОЛА Луксузните имоти вредат повеќе од 8 милиони евра и се наоѓаат на изолиран остров во Саудиска Арабија appeared first on plusinfo.mk.

Фудбалскиот ас Кристијано Роналдо конечно ја раскажа својата верзија за конфликтот со португалскиот селектор Жорже Жезус. Во долго соопштение откри дека причината за заминувањето собирот на португалската репрезентација не била минутажата, туку изгубената доверба откако селекторот, како што тврди, двапати не го одржал зборот.

„Беше вторпат да не го одржи зборот што ми го даде. Решив да го напуштам собирот не чекајќи уште едно прекршување на дадениот збор. За мене вистината сè уште е најважната работа во односите меѓу луѓето“, порача Роналдо.

Сè почнало со планот што Жезус му го претставил по преземањето на репрезентацијата. Роналдо требало да игра на првиот и на последниот натпревар, додека неговото физичко оптоварување внимателно би се контролирало.

Интересно, Жезус му понудил и посебна привилегија. Роналдо можел воопшто да не патува со репрезентацијата во Норвешка и во Данска, но самиот ја одбил можноста.

„Тоа што не би играл на натпреварите во странство не значи дека треба да престанам да бидам капитен на нашиот тим. Таквата привилегија да останам во Португалија не би била добар пример“, објасни Роналдо.

Првиот проблем се појавил во Норвешка. Според Роналдо, на денот на натпреварот Жезус го прашал дали може да одигра 30 минути. Тој прифатил и почнал да се загрева уште од полувремето, но селекторот на крајот воопшто не го внел во игра.

Роналдо потоа не отишол да ги поздрави навивачите. Сега признава дека погрешил и им се извини на Португалците и на сите што дошле да го гледаат.

„Тоа е грешка за која сум исклучиво јас одговорен и која не смееше да се случи“, призна капитенот.

Договориле што ќе каже Жезус

Два дена подоцна следувал долг разговор меѓу Роналдо, Жезус и Симао Кутињо. Според фудбалерот, се договориле селекторот јавно да објасни дека Роналдо никогаш не барал загарантирана минутажа и дека било грешка да го испрати на загревање без да го внесе во игра.

Но, тука се појавува и најнеобичниот детал од целата приказна. Роналдо тврди дека бил составен и краток документ со точките што Жезус требало да ги каже на прес-конференцијата. Роналдо лично го одобрил документот, но настапот на селекторот пред новинарите, според него, бил сосема поинаков.

„Неговиот настап немаше никаква врска со нашиот состанок. Слушнав изрази и агресивност за кои сметам дека не ги заслужив“, наведе Роналдо.

Токму тоа, според него, било второто прекршување на дадениот збор. Роналдо вели дека тогаш целосно ја загубил довербата во селекторот и решил да си замине.

„Се спакував и си заминав“

Сепак, португалската ѕвезда не бега од сопствената одговорност. Роналдо призна дека не смеел да го напушти собирот и им се извини и на своите соиграчи.

„Не сум кој било играч, јас сум капитен на тимот и тоа е отежнителна околност. Веќе се извинив, но знам дека постапките мора да имаат последици“, порача Роналдо.

Тој очекува казна од Португалскиот фудбалски сојуз и вели дека не бара олеснителни околности. Но, целата драма не значи крај на неговата репрезентативна кариера.

Иако веќе се зборува за проштални натпревари, Роналдо вели дека сè уште размислува за натпреварување и за победи, а не за церемонијално збогување.

„Ако бидам физички подготвен, ако играм за својот клуб и, се надевам, постигнувам голови, откако ќе ја одработам суспензијата ќе бидам на располагање, како што сум бил секогаш досега, за да се натпреварувам и да победувам за нашата репрезентација“, порача Роналдо.

РОНАЛДО СИ ЗАМИНA, А 2,5 МИЛИОНИ ЈА ОТПИШАА ПОРТУГАЛИЈА Репрезентацијата остана без милиони следбеници на Инстаграм

The post СЕ ОГЛАСИ РОНАЛДО, РАСКАЖА ЗОШТО ГО НАПУШТИЛ СОБИРОТ „Селекторот двапати не го одржа зборот, веќе не му верував“ appeared first on plusinfo.mk.

Инстаграм-профилот на фудбалската репрезентација на Португалија за само неколку дена изгуби речиси 2,5 милиони следбеници, откако Кристијано Роналдо објави дека го напушта националниот тим.

Според португалскиот весник „Рекорд“, профилот на репрезентацијата имал повеќе од 25 милиони следбеници пред прес-конференцијата на селекторот Жорже Жесус.

Во рок од само 24 часа по прес-конференцијата, профилот го отпишале речиси два милиони корисници, а бројот на следбеници во меѓувреме паднал на околу 22,7 милиони.

Роналдо на 30 септември го објави своето заминување од репрезентацијата, по прес-конференцијата на Жесус. 41-годишниот напаѓач не настапи на натпреварот од Лигата на нации против Норвешка во второто коло, кој Португалија го загуби со 2:1.

Иако Роналдо најави заминување, Жесус во понеделникот порача дека вратата за негово враќање во репрезентацијата останува отворена.

– Може да се врати во тимот кога сака – изјави Жесус, говорејќи за петкратниот освојувач на „Златната топка“.

Роналдо е европски шампион со Португалија, двапати ја освои Лигата на нации и е рекордер на репрезентацијата со 146 постигнати голови.

Неговото влијание врз португалскиот фудбал очигледно се чувствува и надвор од теренот, а масовното отпишување од официјалниот профил на репрезентацијата се случи непосредно по најавата за неговото заминување.

The post РОНАЛДО СИ ЗАМИНA, А 2,5 МИЛИОНИ ЈА ОТПИШАА ПОРТУГАЛИЈА Репрезентацијата остана без милиони следбеници на Инстаграм appeared first on plusinfo.mk.

Фудбалскиот ас Кристијано Роналдо си замина од кампот на Португалија, додека во земјата се зборува за можниот крај на неговата 23-годишна репрезентативна кариера, исплива необичен детаљ од потрагата по наследник на Роберто Мартинез – Жозе Мурињо бил меѓу тренерите кои не сакале да ја преземат селекцијата додека Роналдо е во неа.

Според „АС“, Португалската фудбалска федерација веќе подолго време се подготвувала за разделба со својата најголема ѕвезда. Раководството очекувало Роналдо самиот да го објави повлекувањето по Светското првенство, но тоа не се случило.

Во периодот кога Федерацијата барала наследник на Роберто Мартинез, разговарала со повеќе тренери. Некои од кандидатите, според шпанскиот весник, поставиле јасен услов – би ја презеле Португалија само доколку Роналдо повеќе не биде дел од репрезентацијата.

Еден од нив бил токму Мурињо. „АС“ претходно објави дека Португалската федерација го контактирала искусниот тренер и дека тој бил еден од главните кандидати за селекторската функција. Мурињо на крајот го избрал Реал Мадрид, а Португалија му ја доверила репрезентацијата на Жорже Жесус.

Новиот детаљ добива дополнителна тежина токму сега, откако односите меѓу Роналдо и Жесус ескалираа.

Одлуката натпреварот против Норвешка да го почне на клупата била непосредниот повод за судирот. Жесус јавно застана зад својата одлука, а Роналдо потоа го напушти репрезентативниот камп во Копенхаген. Португалската федерација официјално потврди дека тој повеќе не е со тимот.

Роналдо при заминувањето им посакал среќа на соиграчите, што во Португалија било протолкувано и како можно конечно збогување со националниот дрес. Сепак, официјална објава дека ја завршил репрезентативната кариера сè уште нема.

Федерацијата, според „АС“, всушност очекувала таква одлука уште по елиминацијата од Шпанија на Светското првенство. Роналдо решил да продолжи и стигнал до 234 настапи и 146 голови за Португалија.

Во меѓувреме се огласи и самиот Мурињо. Тој оцени дека Роналдо и натаму може да биде важен за репрезентацијата, но дека на 41 година мора да прифати поинаква улога и дека повеќе не може да очекува да биде стартер на секој натпревар.

– Кристијано е победник. Тој го има тоа его затоа што 20 години тоа его носеше голови, титули и рекорди. Но сега мора да го скроти – изјави Мурињо.

Тој застана и зад правото на Жесус самиот да одлучува кој ќе игра.

– Играта не го чека. Телото повеќе не е исто. Сите го знаат тоа, го знае и тој – рече Мурињо.

Роналдо засега не објави дека се повлекува од репрезентацијата. По заминувањето од кампот порача дека „во свое време“ ќе им ја каже на Португалците вистината за причините поради кои ја напуштил селекцијата.

Тензијата почна неколку дена претходно, кога Жесус го остави Роналдо на клупата во победата од 2:1 над Норвешка. Селекторот првично планирал да го внесе во второто полувреме, но се премислил, а Роналдо по последниот свиреж заминал директно во соблекувалната наместо со соиграчите да ги поздрави навивачите.

Следните два дена тренирал одвоено во сала, иако од Федерацијата не била пријавена повреда.

Работите кулминирале во Копенхаген. Жесус на прес-конференција тврдеше дека нема конфликт и најави дека Роналдо ќе тренира, но капитенот не излегол на теренот и го напуштил кампот.

Подоцна Роналдо соопшти дека одлуката ја донел по разговор со претседателот на Федерацијата Педро Проенса и порача дека „во свое време“ ќе ја каже вистината за причините за заминувањето. Федерацијата го потврди неговото заминување, но не објави дека тој се повлекува од репрезентацијата.

The post РОНАЛДО СИ ОДИ, ИСПЛИВА ШТО БАРАЛ МУРИЊО Имал еден услов за да седне на клупата на Португалија appeared first on plusinfo.mk.

Кристијано Роналдо имал вечер за заборав во Лисабон. Португалија го победила Велс со 1-0 на стартот од Лигата на нации, но капитенот промашил неколку големи шанси, меѓу кои и една пред практично празен гол, а кога конечно ја сместил топката во мрежата – ВАР утврдил офсајд.

Роналдо бил во центарот на нападот и упатил седум удари, три повеќе од кој било друг фудбалер на теренот. Но, топката едноставно не сакала во гол.

На почетокот од второто полувреме ја добил најголемата шанса. Рубен Невеш испратил одлична топка од десната страна, Роналдо останал сам во шеснаесетникот, но од непосредна близина ја испратил над голот. По промашувањето клекнал зад гол-линијата и не можел да поверува што пропуштил.

Неколку минути подоцна повторно се нашол пред практично празна мрежа, но ниту тогаш не успеал да ја претвори шансата во гол.

WTF WAS RONALDO DOING HERE https://t.co/4TZ8ZuqlUX

— fezztalks (@Fezztalks) September 24, 2026

Околу еден час игра Роналдо конечно го совладал голманот Дени Ворд и ја затресол мрежата. Радоста траела кратко – ВАР утврдил дека Португалецот бил во офсајд и голот бил поништен.

Седум минути подоцна Жорж Жезус го повлекол од игра. Роналдо го симнал капитенското лентче и го напуштил теренот со видливо незадоволство, но домашната публика го испратила со силен аплауз.

Она што не му успеало на Роналдо, му успеало на Жоао Феликс. Во 22. минута тој шутирал од работ на шеснаесетникот, топката го закачила капитенот на Велс, Бен Дејвис, и завршила во мрежата за конечни 1-0.

Португалија доминирала и создала далеку повеќе шанси, но Феликс останал единствениот стрелец. Тоа била и првата победа на Жорж Жезус како селектор на Португалија.

За 41-годишниот Роналдо натпреварот бил 234. настап за националниот тим. По Светското првенство тој навестил дека се приближува крајот на неговата репрезентативна кариера, но потоа решил да продолжи и бил повикан во првиот состав на Жезус.

The post 📽️ РОНАЛДО НЕ ПОГОДИ НИ ПРЕД ПРАЗЕН ГОЛ ПРОТИВ ВЕЛС Кога конечно ја затресе мрежата, ВАР покажа офсајд appeared first on plusinfo.mk.

Кристијано Роналдо вели дека знае зошто децата го сакаат и дека е свесен за одговорноста што ја носи неговиот статус на фудбалска ѕвезда и пример за најмладите.

Напаѓачот на Ал-Наср и капитен на репрезентацијата на Португалија во разговор за „Yahoo Sports“ порача дека сака и по завршувањето на кариерата да остане пример за децата.

– Знам зошто децата го сакаат Кристијано. Тие ме гледаат како пример и јас ќе продолжам да го правам тоа. Среќен сум со себе. Не е важно дали ќе играм утре или ќе одморам за следниот натпревар, за мене најважно е да се чувствувам добро – изјави Роналдо.

41-годишниот Роналдо и понатаму е дел од репрезентацијата на Португалија, иако по Светското првенство во 2026 година најави дека тоа било негов последен Мундијал. Новиот селектор Жорже Жезус го повика во својот прв состав, со што ги прекина шпекулациите дека Роналдо веднаш ќе се повлече од репрезентативниот фудбал.

Роналдо претходно изјави дека не сака да поставува датум за крај на репрезентативната кариера и дека е подготвен да замине кога стручниот штаб ќе процени дека повеќе не може да ѝ помогне на репрезентацијата.

Во меѓувреме, Португалија денес ја започнува новата сезона во Лигата на нации со натпревар против Велс во Лисабон. Жорже Жезус потврди дека Роналдо ќе биде стартер во натпреварот на „Естадио Жозе Алваладе“.

По дуелот со Велс, Португалија ќе игра на гости против Норвешка на 27 септември, а на 1 октомври ќе гостува кај Данска. На 4 октомври следува домашен натпревар против Норвешка.

Роналдо во новата сезона влегува и со лична цел – приближување до границата од 1.000 голови во кариерата. Според актуелните податоци, му недостигаат уште 21 гол до оваа бројка.

The post РОНАЛДО ОТКРИ ЗОШТО ДЕЦАТА ГО САКААТ „Ме гледаат како пример и ќе продолжам да го правам тоа“ appeared first on plusinfo.mk.

Кристијано Роналдо со години ги поместува границите на спортската долговечност, а ниту на 41 година не покажува знаци дека забавува. За неговата исхрана и неверојатната физичка подготвеност се зборува со години, но спортскиот нутриционист Џони Ондина тврди дека зад сето тоа не стои никаква чудотворна намирница.

Зборувајќи за исхраната на португалската фудбалска ѕвезда за шпанскиот „Ас“, Ондина вели дека менито на Роналдо всушност е прилично досадно. Се базира главно на природни и едноставни намирници, а не на производи што се недостапни за обичните луѓе.

– Тајната на исхраната на Кристијано Роналдо е состојка што ја немаат 90 отсто од обичните луѓе, па дури и врвните спортисти, а тоа е доследноста – вели нутриционистот.

Според него, токму способноста со години да се придржува до навиките што му одговараат е една од причините поради кои Роналдо успева толку долго да ја одржува физичката форма. По повеќе од две децении професионален фудбал, тој не бара постојано нови диети и трендови, туку се држи до она што веќе знае дека функционира.

Ондина предупредува дека луѓето често бараат брзи и магични решенија, особено под влијание на социјалните мрежи. Како пример ги наведува младите кои купуваат хималајска сол или веруваат дека со екстремен пост можат за кратко време да постигнат резултати какви што има професионален спортист.

– Проблемот е што има 18-годишници кои купуваат хималајска сол или прочитале на социјалните мрежи дека ако постат 15 дена, одеднаш ќе постигнуваат неверојатни резултати. Не функционира така – вели тој.

Нутриционистот открива и дека Роналдо не се придржува до правилото здравата исхрана да биде апсолутна и без исклучоци. Според неговите зборови, околу 95 отсто од времето фудбалерот се храни здраво, додека во преостанатите пет отсто си дозволува поинаков избор, вклучително и храна со едноставни шеќери или ултрапреработена храна.

Токму тој пристап, според Ондина, е важен и за да не се претвори односот кон храната во опсесија. Поентата, како што објаснува, не е човекот постојано да бара совршена диета, туку да создаде навики што може да ги одржува на долг рок.

The post КОЈА Е ТАЈНАТА СОСТОЈКА НА РОНАЛДО? Нутриционист откри што му помага на фудбалерот да ја одржува формата и на 41 година appeared first on plusinfo.mk.