СВР Охрид поднесе кривична пријава против сопственик на фирма од Охрид и против самата компанија, поради сомнение дека со сериозни пропусти во работните услови директно придонеле за смртта на 28-годишниот Кристијан Љушев.

Кривичната пријава е поднесена против С.М. (43), сопственик и управител на правниот субјект, поради сомнение за кривично дело „повреда на правата од работен однос“.

Според полицијата, Љушев не бил пријавен како вработен, ниту бил здравствено и пензиско осигуран, иако извршувал работни задачи на градилиште изложено на сериозни опасности. Тој работел како помошник монтер, без претходна обука за безбедност и здравје при работа и без задолжителен лекарски преглед по медицина на трудот.

Дополнително, сопственикот му дозволил пристап до високоризично работно место, без соодветни упатства и без преземени основни мерки за заштита.

Трагедијата се случи на 12 јануари 2026 година, околу 15 часот, кога Кристијан Љушев падна од петти кат во окно од лифт во зграда која била во изградба во Охрид.

По падот, тој бил итно пренесен со возило на Итна медицинска помош во Специјалната болница за ортопедија и трауматологија „Св. Еразмо“, каде лекарите се обиделе да го реанимираат, но повредите биле фатални.

„Лекар констатирал смрт, а увид на местото на настанот извршиле јавен обвинител и увидна екипа на СВР Охрид“, информираа од полицијата.

Истрагата треба да утврди целосна одговорност за условите под кои работел младиот охриѓанец, кој во јавноста беше познат како снимател, фотограф и продуцент.

ТРАГИЧНО НАСТРАДА МЛАД ОХРИДСКИ ФОТОГРАФ, СНИМАТЕЛ И ПРОДУЦЕНТ Кристијан Љушев паднал од зграда во изградба

The post КРИСТИЈАН ЉУШЕВ РАБОТЕЛ БЕЗ ОСИГУРУВАЊЕ И БЕЗ ОБУКА Поднесена кривична за газдата и фирмата по смртта на починатиот снимател appeared first on plusinfo.mk.

Во трагичен настан што се случи вчера во станбена зграда во изградба во Охрид, животот го загуби младиот охридски снимател, фотограф и продуцент Кристијан Љушев, објавија охридските портали.
Засега нема потврдени информации за причините кои довеле до незгодата, но неофицијално, младиот Љушев паднал во окно од лифт во зграда во изградба.

Како што пренесуваат Супер радио и Охрид прес, повредениот Љушев вчера, околу 15:00 часот, бил донесен во Специјалната болница за ортопедија и трауматологија „Св. Еразмо“ во Охрид, каде биле направени обиди за негова реанимација, но тие за жал биле неуспешни.

Познат по својата работа, 28-годишниот Кристијан, со неговата продуцентска куќа „Шпанец“ уживаше углед помеѓу колегите, како вреден, талентиран и исполнителен професионалец, кој има работено на бројни проекти, документарни емисии, видео спотови и останати материјали.

Кристијан Љушев ѝ припаѓаше на новата генерација креативци кои со својот израз и енергија оставија препознатлива трага на домашната сцена. Зад себе остави бројни аудиовизуелни проекти што допреа до широка публика, работејќи во различни формати – од рекламни кампањи и музички видеоспотови до документарни и интернационални продукции. Како автор и креативен соработник, соработуваше со низа познати музички имиња, меѓу кои Александар Јосифоски, Мартин Милески, Влатко Броз, групата „Марама“ и други.
Особено место во неговото творештво имаа проектите инспирирани од македонската традиција, духовност и културно наследство. Со својата камера ги бележеше традиционалните настани и секојдневието во Охрид и регионот, а беше вклучен и во значајни проекти посветени на Бигорскиот манастир.

„Неговата работа сведочеше за искрена посветеност, чувствителност кон просторот и луѓето, и за автор со јасна визија, чиј творечки пат прерано згасна“, пишуваат негови колеги на социјалните мрежи, кои со голема тага и неверување се простуваат од него.

The post ТРАГИЧНО НАСТРАДА МЛАД ОХРИДСКИ ФОТОГРАФ, СНИМАТЕЛ И ПРОДУЦЕНТ Кристијан Љушев паднал од зграда во изградба appeared first on plusinfo.mk.