Високиот претставник на меѓународната заедница Кристијан Шмит поднесе оставка од функцијата висок претставник во Босна и Херцеговина по речиси пет години на чело на Канцеларијата на високиот претставник.

Германскиот дипломат веќе го информирал Управниот одбор на Советот за спроведување на мирот и побарал да почне процедура за избор на наследник. Сепак, тој нема веднаш да ја напушти функцијата и ќе остане до именување нов висок претставник.

Заминувањето се случува во период на длабока политичка криза во БиХ, со блокади на институциите, сецесионистички пораки од Република Српска и постојани судири со Милорад Додик.

„Република Српска е неуништлива“

Милорад Додик заминувањето на Шмит го претстави како политичка победа.

Тој изјави дека Шмит ја напушта БиХ „како што дошол“, без легитимитет и без меѓународно право на своја страна. Додик додаде дека целиот негов мандат покажал оти „Република Српска е неуништлива“.

Властите во Бања Лука со години го оспоруваат легитимитетот на Шмит. Русија исто така тврди дека неговото именување не било потврдено во Советот за безбедност на ОН.

Шмит во претходните извештаи предупредуваше дека потезите на раководството на Република Српска ја поткопуваат државноста на БиХ.

„Американски ултиматум“

Германскиот весник „Франкфуртер алгемајне цајтунг“ објави анализа според која заминувањето на Шмит не било доброволно, туку резултат на американски притисок.

Во анализата се наведува дека интересите на претседателот на САД, Доналд Трамп, поврзани со гасните проекти во БиХ, можеби одиграле клучна улога.

Весникот тврди дека промената на политиката кон Додик би можела да биде поврзана со проектот „Јужна интерконекција“. Според дипломатски извори, постоеле шпекулации за неформален договор, во кој заминувањето на Шмит било дел од поширока политичко-енергетска пресметка.

Официјална потврда за таков договор нема.

„Меѓународната останува неопходна“

Шмит порача дека ќе продолжи да ги извршува должностите додека не биде избран наследник.

– Обединетата меѓународна заедница останува неопходна за стабилноста на Босна и Херцеговина – порача тој.

Тој ги повика политичките лидери од двата ентитета да работат со новиот висок претставник на реформите и на евроатлантските интеграции.

Заминувањето на Шмит отвора нова неизвесност околу иднината на меѓународното присуство во БиХ. Високиот претставник со години останува една од најспорните точки меѓу западните земји, Русија и раководството на Република Српска.

The post ШМИТ СИ ОДИ ПОД АМЕРИКАНСКИ ПРИТИСОК? Додик слави, „Српска е неуништлива“ appeared first on plusinfo.mk.

Во рамките на учеството на Анталија Дипломатскиот форум, министерот за надворешни работи и надворешна трговија, Тимчо Муцунски, оствари низа билатерални средби, информираше Министерството за надворешни работи и надворешна трговија.

„На маргините на форумот, тој се сретна со генералниот секретар на ОБСЕ, Феридун Х. Синирлиоглу, со високиот претставник во Босна и Херцеговина, Кристијан Шмит, со заменик-премиерот и министер за надворешни работи на Република Молдавија, Михаил Попшоју, со министерката за надворешни работи на Грузија, Мака Бочоришвили, како и со европратеникот во Европскиот парламент, Илхан Ќучук.

На средбата со високиот претставник Шмит, фокусот беше ставен на политичката состојба во регионот, европската перспектива на Западен Балкан и значењето на постојана ангажираност за стабилност, мир и помирување.

Средбата со генералниот секретар на ОБСЕ, Синирлиоглу, беше исклучително конструктивна – насочена кон размена на ставови за безбедносните предизвици и идентификување на потенцијалот за унапредување на регионалната стабилност и соработка.

На средбите со министрите за надворешни работи на Молдавија и Грузија беше потврдена одличната билатерална и мултилатерална соработка, со заедничка заложба за зајакнување на економските врски и интензивирање на поддршката во рамки на европските интегративни процеси.

На средбата со европратеникот Илхан Кјучук, министерот Муцунски ја истакна важноста од отворањето и водењето на пристапни преговори како најдобар механизам за обезбедување на неповратноста на реформските процеси и демократскиот развој. Притоа, нагласи дека е неопходно деескалирање на билатералните блокади и враќање на процесот на европска интеграција во неговата суштинска рамка – оценка според заслуги и исполнети критериуми.

The post МУЦУНСКИ ОСТВАРИ БРОЈНИ СРЕДБИ НА ФОРУМОТ ВО АНТАЛИЈА Со генсекот на ОБСЕ зборуваа за безбедноста на Балканот appeared first on plusinfo.mk.

– Јас сум заштитен со Виенската дипломатска конвенција и затоа уживам имунитет. И покрај тоа, Додик не би имал овластување да ме уапси или да нареди мое апсење, бидејќи нема овластување да дава инструкции на полицијата. Обвинителството прво би требало да го разјасни тоа – изјави Шмит во интервју за Франкфуртер алгемајне цајтунг, кое го пренесуваат медиумите во Босна и Херцеговина.

Коментирајќи ги најавите на Додик, Шмит рече дека планира да ја посети Република Српска во наредниве денови.

– Всушност, имам состаноци таму во следните неколку денови и недели, особено во Бања Лука, но и во други градови. Јас останувам на тоа и му препорачувам на Додик повеќе да не ја турка својата себична глупост – изјави Шмит.

Според него, Додик не ѝ носи ништо добро на Република Српска.

– Тогаш неговите поддржувачи ќе разберат дека тој не го прави секогаш она што го кажува и дека не ѝ носи ништо добро на својата земја – рече високиот претставник во БиХ.

Шмит додаде дека Додик веќе се обидел да го пријави во Република Српска, а „паметното јавно обвинителство во Бања Лука“, како мерка на претпазливост, веднаш оваа постапка ја препратило до Државното обвинителство во Сараево, од кое, како што рече, ништо повеќе не слушнал.

– Последно, но не и најмалку важно, однесувањето на Додик е шлаканица за ЕУ, која се обидува да го подобри владеењето на правото во Босна и Херцеговина. Во заблуда е ако мисли дека за него има посебни права или посебни прописи – посочи тој.

Високиот претставник во Босна и Херцеговина истакна дека Додик „треба да се подготви за некои прилично непријатни моменти“.

Коментирајќи ја можноста за замена на Додик, Шмит рече дека размислувањата за ова не се презентирани однапред, додавајќи дека Обвинителството на Босна и Херцеговина веќе води истрага против Додик.

– Ќе видиме како меѓународната заедница ќе се справи со некој кој со своите постапки масовно го торпедира европскиот пат на Босна и Херцеговина, а во исто време се однесува како близок сојузник на рускиот претседател Владимир Путин – заклучи тој.

Претходно Амбасадата на САД во Сараево соопшти дека заканата на Додик дека ќе го спречи високиот претставник на меѓународната заедница во БиХ да влезе на територијата на РС, е неуставна.

„Ова претставува уште еден намерен напад на господинот Додик врз Дејтонскиот мировен договор, врз уставниот поредок на БиХ и државата БиХ“ – соопшти Амбасада на САД на социјалната мрежа Х.

Амбасадата на САД наведува дека Шмит е одговорен за надзор на спроведувањето на цивилните аспекти од Дејтонскиот мировен договор, кој ги обврзува официјалните лица да соработуваат со него, а тој ужива дипломатски статус во цела БиХ според Виенската конвенција за дипломатски односи.

„Непромислените закани на Додик и налудничавите тврдења за статусот и овластувањата на високиот претставник се неприфатливи и претставуваат уште еден чекор на опасниот пат, што тој го избра кон изолација. САД целосно го поддржуваат високиот претставник и неговите овластувањата и ќе продолжат да ги сметаат за одговорни поединците со антидејтонско однесување“ – се посочува во соопштението на Американската амбасада.

The post „ДОДИК ДА ПРЕСТАНЕ СО СВОИТЕ СЕБИЧНИ ГЛУПОСТИ!“ Зовреа односите на Република Српска со ЕУ и САД appeared first on plusinfo.mk.

Во интервју за германскиот весник Зидојче цајтунг, Кристијан Шмит истакна дека негова обврска е да обезбеди цивилна имплементација на Дејтонскиот договор, како што е наведено во Анекс 10.

– Моја задача е да го променам тоа со притисок и насоки. Ако оваа политика не предизвика промени, меѓународната заедница мора да дејствува пред да има распад на БиХ – наведе Шмит.

Тој додаде дека на располагање му се овластувањата од Бон, кои вклучуваат смена на политичари кои го нарушуваат Дејтонскиот договор, но, истакнувајќи оти „не смееме да пукаме од најсмртоносниот топ додека има други средства“.

Шмит оцени и дека „е погрешно да се верува дека ништо не оди на Западен Балкан без експлозии и чад“.

Запрашан дали ЕУ згреши што не воведе санкции за Додик како САД, бидејќи Шпанија се спротивстави на тоа, Шмит посочи дека е среќен што поранешниот германски министер за надворешни работи Хајко Мас ја иницирал дебатата, а Аналена Бербок продолжи.

– Има и други членки на ЕУ кои го поддржуваат тоа. Јас сум оптимист и мислам дека ЕУ ќе најде начини да влијае врз Додик – нагласи Шмит.

Тој посочи дека Советот за имплементација на мирот претходно овој месец потврди дека секое прекршување на Дејтонскиот договор ќе има последици, но разговорите со Додик се во тек.

– Знам дека на Додик итно му требаат пари. Успешно соработувам со ММФ, Светската банка и ЕБРД за Додик да добива пари Додик само под строги услови – наведе Шмит.

The post ЈА ПРЕМИНА ГРАНИЦАТА НА РЕТОРИЧКО ПОТПАЛУВАЊЕ ОГАН Шмит бара казна за Додик пред да се распадне БиХ appeared first on plusinfo.mk.