Хрватскиот град Дрниш, а со него Хрватска и поширокиот регион, тагува по 19-годишниот Лука Миловац, момчето кое во саботата вечерта беше убиено од Кристијан Алексиќ кому Лука му доставил пица. Лука следниот петок требало да ја прослави матурската вечер, а неговото семејство сега се подготвува за последното збогување со него.

Погребот ќе се одржи во вторник на гробиштата „Свети Иван“ во Дрниш. Неговата мајка одлучила Лука да биде погребан во оделото што требало да го носи на матурската прослава, пишува РТЛ.

Од Лука емотивно се прости и неговата инструкторка по возење Андријана Цигиќ, кај која пред неколку недели го положил возачкиот испит. Таа вели дека Лука работел за време на викендите за да не им биде товар на родителите.

– Беше дете желно за учење, знаење и чесна работа, вреден и трудољубив. Слушнав дека имал просек 5,0 на училиште. Пред него беше иднината. Лично не ги познавам неговите родители, но слушам дека станува збор за прекрасно и вредно семејство. Сметам дека ова е трагедија за целата наша држава и дека вакво нешто никогаш никому не смее да му се повтори – изјави Цигиќ.

Цела Хрватска е завиена во црно по страшното убиство на 19-годишниот матурант Лука Миловац во Дрниш.

Жителите на Дрниш за убиеното момче зборуваат само со пофални зборови. Лука планирал студии во Сплит и животот допрва бил пред него.

Граѓаните на Хрватска со право се прашуваат како Алексиќ, кој убил жена уште во 1994 година, бил осудуван и за напад во затворот Лепоглава, а во 2023 година кај него било пронајдено оружје, сепак бил на слобода. Жителите на Дрниш, како што пренесуваат медиумите, со години се плашеле од него.

Со Лука во последните мигови од неговиот живот бил неговиот пријател Иван. За ХРТ раскажа дека Лука се плашел да ја однесе храната на таа адреса, па му предложил да одат заедно.

– Како негов долгогодишен пријател, му понудив да одам со него. Му реков дека ќе бидам покрај него, дека сѐ ќе биде во ред и дека сум тука за него. Се качувавме по скалите, стигнавме до терасата, Кристијан ја отвори вратата и рече: „Влези, влези“, но Лука му пријде за да ја предаде доставата и во тој момент Алексиќ пукаше – раскажал потресениот Иван.

Тој потоа опиша што се случувало веднаш по пукањето.

– Кога го видов Лука како паѓа на подот, почнав да бегам, ги прескокнав скалите и влегов во автомобилот, но возилото се изгаси. Ја отворив вратата и го видов Алексиќ како трча кон мене, па и јас почнав да бегам. Стигнав до пицеријата и пријавив што се случило, им реков веднаш да одат во полиција – изјавил пријателот на Лука за ХРТ.

Полицијата утрото во понеделникот околу 6:20 часот соопшти дека Алексиќ е уапсен по речиси 28 часа бегство.

– Осомничениот 50-годишник е лишен од слобода и приведен во службените простории на полицијата, каде што е во тек криминалистичка истрага – соопшти полицијата.

Станува збор за маж кој уште во 1994 година со 17 убоди од нож убил 22-годишна девојка. „Индекс“ претходно објави и дека во 2020 година бил осуден за семејно насилство.

Министерот за внатрешни работи Давор Божиновиќ потврди дека против Алексиќ постоела уште една кривична пријава за насилно кривично дело додека бил на издржување затворска казна.

ГРЕШКАТА Е ОД 2023-ТА, ЗА АЛЕКСИЌ НЕМАЛО ПРИТВОР Убиецот од Дрниш се испрскал со бибер-спреј, бегал по пруга и по бункери

The post ЛУКА ЌЕ БИДЕ ПОГРЕБАН ВО ОДЕЛОТО ШТО РОДИТЕЛИТЕ МУ ГО КУПИЈА ЗА МАТУРА Убиството на младиот разнесувач на пица им го скрши срцето на сите во регионот appeared first on plusinfo.mk.

Хрватскит адвокат Анто Нобило жестоко го критикуваше хрватското обвинителство по апсењето на Кристијан Алексиќ, осомничен за убиството на 19-годишен доставувач на пица во Дрниш.

Нобило вели дека системот потфрлил уште во 2023 година, кога кај Алексиќ било пронајдено оружје и против него била поднесена кривична пријава.

– Мораше да биде притворен уште во 2023 година. Ова е школски пример каде што се изрекува притвор – изјави Нобило за „Слободна Далмација“.

„Мораше да биде зад решетки“

Нобило потсети дека Алексиќ претходно бил осуден за брутално убиство на девојка во 1994 година и оти токму поради тоа постоел сериозен ризик од повторување на кривични дела.

Според него, обвинителството морало да реагира веднаш кога повторно било пронајдено оружје кај човек со такво криминално минато.

– Ако некој што извршил толку сериозно кривично дело повторно дојде во ситуација со оружје, тоа е јасен сигнал за опасност – рече Нобило.

„Апсолутно е вина на обвинителот“

Хрватскиот адвокат оцени дека постапката против Алексиќ неоправдано се одолговлекувала и покрај сериозноста на случајот.

– Ова е апсолутно вина на обвинителот или на државниот обвинител – изјави Нобило.

Тој додаде дека доколку Алексиќ бил во притвор, предметот ќе морал да се води со забрзана постапка.

Бибер спреј, бункери, пруга 

Кристијан Алексиќ беше уапсен ноќеска околу 2:30 часот во областа Дрниш, по повеќечасовна потрага.

Според истрагата, тој во саботата навечер го убил 19-годишниот доставувач на пица.  Поради претресот, сите влезови и излези во градот беа затворени, а граѓаните беа повикани да не ги напуштаат своите домови. Полицијата го бараше од саботата до рано утринава во понеделникот, кога конечно беше пронајден и уапсен на стотина метри од неговата куќа.

Според неофицијални информации, тој бил уапсен без облека, а наводно зад себе попрскал бибер спреј во обид да ги измами полициските кучиња трагачи и да ги спречи да го следат.
Мештаните велат дека тој избегал преку железничката пруга што води недалеку од неговата куќа. Според нив, во областа каде што се обидел да се скрие има и бункери.

„Требаше да го облече матурското одело“

Градот Дрниш е сè уште во шок по убиството на 19-годишен доставувач на пица. Градоначалникот Томислав Џелалија изјави дека граѓаните поминале две непроспиени ноќи и дека утре ќе биде прогласен Ден на жалост и ќе се одржи погреб за починатиот млад човек.

– Настрада млад човек чиј живот штотуку почнуваше. Тој требаше да има матурска забава на 29 мај и да купи костум. Тешко ми е да зборувам за тоа – изјави градоначалникот.

Тој вели дека утрово излегол во градот и го нашол сосема празен, со пазари и улици на кои немало минувачи.

The post ГРЕШКАТА Е ОД 2023-ТА, ЗА АЛЕКСИЌ НЕМАЛО ПРИТВОР Убиецот од Дрниш се испрскал со бибер-спреј, бегал по пруга и по бункери appeared first on plusinfo.mk.