Според британските медиуми, принцот Хари и Меган Маркл заедно со своите деца, седумгодишниот Арчи и петгодишната Лилибет, слетале во Велика Британија, шест години откако го напуштија кралскиот живот и се преселија во САД.

Семејството пристигнало на аеродромот во Бирмингем денес (среда – 26.08) околу пладне, со приватен лет од Калифорнија, објави „Телеграф“, а информацијата ја пренесе и Индепендент. Нивното враќање доаѓа само една недела откако беше објавено дека планираат да поминат подолг период во Велика Британија.

Главната причина за враќањето во овој момент се децата. Арчи и Лилибет веќе се запишани во британски училишта, а новата учебна година треба да започне следната недела. Британската министерка за образование Луси Пауел го нарече нивното запишување „големо признание“ за британскиот образовен систем, но додаде дека малку е веројатно децата да посетуваат локално државно училиште.

Хари и Меган нема да се вселат во кралски имот. Според досегашните информации, семејството ќе живее на приватен имот надвор од Лондон, а како можна локација се споменува областа Котсволдс. Точната адреса не е објавена.

Сè уште не е потврдено колку точно ќе останат во Британија, но нивниот престој е опишан како „подолг период“. Во исто време, семејството ќе го задржи својот дом во Монтесито, Калифорнија, па не станува збор за целосно напуштање на животот во САД.

Хари и Меган исто така не се враќаат и на кралските обврски, нивниот статус останува непроменет и нема да преземаат официјални кралски должности.

Интересно е што нивното пристигнување се случува само неколку недели откако Хари и Меган заедно со децата го посетија кралот Чарлс во неговиот дом во Хајгроув. Тоа беше првата средба на кралот со Арчи и Лилибет по четири години.

Засега не е познато дали по враќањето ќе има нови средби со кралското семејство. Хари и Меган не ги објавија официјално причините за преселбата, иако извор близок до Меган не ги демантирал информациите дека таа добила понуда за актерска улога во проект што треба да се снима во Британија.

Прашањето за нивната безбедност исто така останува отворено. Британското Министерство за внатрешни работи одби да открие детали за безбедносните мерки околу семејството, објаснувајќи дека објавувањето такви информации би можело да ја загрози нивната безбедност.

Хари и Меган ја напуштија Британија во 2020 година, откако се повлекоа од функциите како високи членови на кралското семејство. Оттогаш живеат во Калифорнија, а нивното денешно пристигнување претставува нивно прво враќање во Британија со децата за подолг престој по преселбата во САД.

The post ХАРИ И МЕГАН СЛЕТАА ВО БРИТАНИЈА По шест години во САД, принцот и семејството пристигнаа со приватен лет од Калифорнија appeared first on plusinfo.mk.