Премиерот Христијан Мицкоски, пред денешната средба со претседателот на Европскиот совет Антонио Кошта истакна дека ставот на земјата е непроменлив во поглед на условот за продолжување на преговорите со Европската Унија.

– Немам намера како претседател на Влада да поддржам авантура, без притоа да знам дека ќе има извесен крај. Ние покажуваме дека сме компетитивни, дека имаме капацитет, знаеме и сакаме да го изодиме овој процес бргу. Имаме знаење, без да имаме извесен крај не можеме да влеземе во таква авантура, бидејќи три ипол децении граѓаните во оваа наша земја беа сведоци на таков тип политички авантури и гимнастики. Нефер и несериозно е да се очекува дека кога наеднаш ќе дојде висок европски политичар ние ќе ја промениме позицијата, тоа нема да се случи. Треба сите да знаат дека без ВМРО-ДПМНЕ оваа работа не бива. Може да имаме политички аналфабети кои ја држат темата на дневна основа, бидејќи така им рекле, но само губат и ги нарушуваат опозициите на Владата. Јас кога би бил од страна на бугарската Влада, кога гледам дека внатре имам човек кој ги урива позициите на владата, тогаш би си седел мирен и би се радикализирал, зошто би барал решение. Имаме такви национално исплакнати луѓе кои единствено нешто кое сакаат да го направат е некој денар плус. Ние таква политика не водиме и немаме намера да водиме – дециден е Мицкоски во одговорот на новинарско прашање за очекувањата од денешната средба со Кошта.

Премиерот посочи дека јасно е она кое е пред нас, прифаќањето на минатата Влада на уставни измени, француски предлог, протокол 1, протокол 2, но ајде да видиме, рече Мицкоски, што има бугарската влада пред себе.

– Тоа се 14 пресуди од Судот за човекови права во Стразбур. Оваа работа мора да има доверба, а тоа се создава ако имате двонасочна улица, ако е еднонасочна, тогаш не можете да изградите доверба. За да ја изградиме довербата треба да видиме испорака и од таа страна. Ако сите европски политичари се едногласни дека нема да има повеќе условувања, тогаш најмалку што можеме ние да добиеме како држава се нови заклучоци, на тој начин ќе се потврди поддршката и довербата – посочува тој.

На средбата со Кошта, Мицкоски вели дека би пренел негово мислење дека најпрво треба да почнеме да градиме доверба за да разговараме, бидејќи како што рече, ние не разговараме.

– Ценам дека во едно демократско општество треба да се разговара. Ценам дека треба да се посветиме на испораката на рефорската агенда каде ние сме вистински фронтранери, а не останатите земји од Западен Балкан. Прво би разговарал за овие теми, нешто што би било брза испорака. Дури потоа да видиме доколку постои простор да се изгради таа доверба да влеземе во една следна фаза – нагласи Мицкоски.

Премиерот денеска попладне, во 17:25 часот, ќе оствари тет-а-тет средба со Кошта, по што ќе следи состанок помеѓу владината делегација и делегацијата предводена од претседателот на Европскиот совет.

Во 18:30 часот Мицкоски и Кошта ќе одржат заедничка прес-конференција во Владата.

The post НЕМА ДА ПОДДРЖАМ АВАНТУРА СО НЕИЗВЕСЕН КРАЈ Мицкоски пред средбата со Кошта ја повтори непроменетата позиција на Македонија appeared first on plusinfo.mk.

Посетата на претседателот на Европскиот совет Антонио Кошта треба да се анализира во поширокиот контекст на актуелните односи меѓу Европската Унија и Република Македонија, но и во контекст на состојбите на Западниот Балкан и предизвиците со кои се соочува политиката на проширување на Унијата.

Несомнено е дека Кошта и досега, а и денес, останува на ставот дека Македонија треба да ги исполни обврските што произлегуваат од преговарачката рамка усвоена во 2022 година. Тоа подразбира и внесување на Бугарите во Уставот како услов за формално продолжување на пристапниот процес. Не очекувам тој да се откаже од таа позиција, бидејќи тоа би значело доведување во прашање на веќе усвоени одлуки на Европскиот совет и на земјите членки.

Меѓутоа, политичката реалност денес не е иста како пред неколку години. Во меѓувреме се случија неколку важни процеси. Република Македонија продолжи со спроведување на реформите, доби позитивни оценки во одделни сегменти од европската агенда, обезбеди пристап до нови европски фондови и финансиски инструменти, а истовремено Европската Унија се соочува со нови геополитички предизвици кои ја прават политиката на проширување повторно актуелна.

Војната во Украина, засиленото руско влијание во одредени делови од Балканот, кинеското економско присуство и општата потреба за зацврстување на европската безбедносна архитектура го вратија Западен Балкан високо на агендата на Брисел. Во такви околности, прашањето за кредибилитетот на Европската Унија станува сè поважно. Не е случајно што сè почесто во европските кругови се слушаат оценки дека Унијата мора да покаже дека ги исполнува сопствените ветувања кон земјите кандидати.

Токму тука треба да се бара и значењето на средбата меѓу Кошта и Мицкоски. Владата во изминатиот период настојуваше дебатата да не се сведува само на прашањето дали ќе има уставни измени, туку да се отвори и прашањето за гаранциите. Од аспект на Владата, суштината не е само во исполнувањето на една обврска, туку во добивањето уверување дека по евентуалното исполнување на таа обврска нема да следуваат нови барања и нови блокади.

Тоа е прашање што има и внатрешно-политичка и европска димензија. Внатрешно, затоа што по Преспанскиот договор, промената на името, уставните измени и бројните отстапки направени во изминатите години, кај значителен дел од македонската јавност постои сомнеж дали секоја следна концесија навистина го приближува членството во Европската Унија. Европска димензија има затоа што секој нов услов што би се појавил по исполнувањето на договореното дополнително би го нарушил кредибилитетот на европската политика на проширување.

Од тие причини, денес можеби не е најважно прашањето дали Кошта ќе го повтори добро познатиот став за уставните измени. Тоа е речиси извесно. Поважно е дали во неговите пораки ќе има елементи што упатуваат на разбирање на македонските аргументи за потребата од поголема предвидливост на процесот и за потребата европските институции поактивно да гарантираат дека договореното ќе биде почитувано од сите страни.

Секако, треба да се биде реален. Европската Унија нема правен механизам со кој може однапред да гарантира како ќе се однесува која било земја членка во иднина. Ниту Кошта може самостојно да понуди таква гаранција. Но, ЕУ може политички да испрати порака дека нема простор за нови условувања надвор од договорената рамка, може поактивно да посредува во евентуалните спорови и може појасно да го дефинира патот што следува по исполнувањето на преземените обврски.

Оттука, не очекувам посетата да донесе спектакуларен пресврт, нов договор или драматично поместување на позициите. Но, очекувам таа да биде уште еден обид да се намали јазот меѓу две реалности: од една страна, инсистирањето на Европската Унија на исполнување на преземените обврски, и од друга страна, барањето на македонската Влада за политичка и институционална извесност дека процесот нема повторно да биде заложник на билатерални спорови.

Во суштина, клучната дилема повеќе не е дали Европската Унија сака уставни измени. Тоа е одамна позната позиција. Вистинската дилема е дали Европската Унија е подготвена да ја врати довербата во процесот на проширување и да покаже дека исполнувањето на договореното навистина води кон напредок, а не кон отворање на нов круг условувања. Токму низ таа призма треба да се чита и посетата на Антонио Кошта на Република Македонија.

The post Посетата на Антонио Кошта – помеѓу исполнување на обврските и барањето гаранции appeared first on plusinfo.mk.

Предупредувањето на американскиот претседател Доналд Трамп дека ќе ги прекине трговските односи со Шпанија поради критикување на војната меѓу САД и Израел против Иран претставува „закана за Европа“, изјави потпретседателот на Европската комисија за просперитет и индустриска стратегија, Стефан Сежурне.

Сежурне, поранешен шеф на француската дипломатија, исто така, рече дека заканата за Европа е „закана за сите“, објави Фајненшл тајмс.

„Заканата за Европа е закана за сите. Го видовме тоа во контекст на Гренланд, (во Европа) постои единство по тоа прашање“, рече Сежурне, поранешен генерален секретар на партијата „Ренесанса“ на францускиот претседател Емануел Макрон.

Трамп ја нарече левичарската влада на Шпанија, предводена од социјалистот Педро Санчез, „ужасна“ и најави прекин на сите трговски врски, наведувајќи дека САД „не сакаат ништо да имаат со Шпанија“.

Санчез вчера му одговори на заканите на Трамп, велејќи дека ставот на шпанската Влада е „Не за војна“. Тој, исто така, апелираше да „не се повторат грешките од минатото“, осврнувајќи се на американската инвазија на Ирак во 2003 година, за која рече дека не успеала да ги постигне своите цели, создала несигурност и го влошила животот на многу луѓе.

Антонио Коста, претседателот на Европскиот совет, синоќа разговараше со Санчез по телефон, кој ја изрази својата солидарност со Шпанија.

„ЕУ секогаш ќе се грижи интересите на земјите-членки да бидат целосно заштитени. Ја потврдуваме нашата цврста посветеност на принципите на меѓународното право и меѓународниот поредок заснован на правила насекаде во светот“, напиша Кошта на Икс.

The post „ЗАКАНАТА НА ТРАМП КОН ШПАНИЈА Е ЗАКАНА КОН СИТЕ НАС“ Европската комисија демонстрира солидарност appeared first on plusinfo.mk.

Претседателот на Европскиот совет, Антонио Кошта денеска упати честитки по повод Денот на македонската независност.

„По повод националниот ден на Северна Македонија, упатувам срдечни честитки до нејзиниот народ и власти“, наведе Кошта во објава на Икс.

Тој во честитката додава дека Европската унија останува посветена на нашата заедничка иднина и на европскиот пат на земјата.

The post ЕВРОПСКАТА УНИЈА ОСТАНУВА ПОСВЕТЕНА НА НАШАТА ЗАЕДНИЧКА ИДНИНА Антонио Кошта по повод Денот на независноста appeared first on plusinfo.mk.

Претседателот на Италија Серџо Матарела, како пријател на Македонија, но и голем пријател на Западен Балкан, веќе разговарал со господинот Антонио Кошта, но и со госпоѓата Урсула Фон дер Лајен, за она што нам ни се случува и рекол дека „не смее Европската унија да дозволи ние да бидеме жртва на идентитетски прашања, или на билатерализација врзана за идентитетските прашања“, информираше кабинетот на претседателката Гордана Сиљановска Давкова во соопштение за средбата на Сиљановска Давкова со Матарела во Рим.

Италијанскиот претседател ги информирал челниците на ЕУ дека Македонија не смее да биде жртва на идентитетски прашања.

„Очекува тој, и јас очекувам да дојде до разговори со нашите соседи да видиме кое е можеби најдоброто решение, рече претседателката и додаде дека ги реафирмирала заложбите за гаранции“, соопшти Кабинетот.

Претседателката Сиљановска Давкова се сретна со италијанскиот колега по средбата со Папата Лав XIV.

Од кабинетот на претседателката соопштуваат дека со Матарела било разговарано за македонскиот евроинтегративен пат, „при што беше констатирано дека Италија, како дел од неформалната група ‘Пријатели на Западен Балкан’, ја препознава важноста на проширувањето на ЕУ“.

Сиљановска Давкова му заблагодарила на Матарела за силната поддршка на Италија како наш важен политички и економски партнер.

„Претседателката Сиљановска Давкова истакна дека ако ова биде уште една од промените на којашто укажува Европската унија, не само што ние нема ништо да добиеме, туку нема да добие ништо ниту Балканот, бидејќи приказната за ветото и приказната за билатерализацијата на евроинтеграцијата ќе се повтори“, се додава во соопштението.

Македонската претседателка утрово имаше аудиенција кај Поглаварот на Римокатоличката црква, Папата Лав XIV со кого во подолг разговор е потврдено пријателството помеѓу државава и Ватикан. Осврнувајќи се на посетата на Италија, Сиљановска-Давкова изјави дека и Папата и претседателот на Италија, биле и остануваат наши пријатели и дека навистина нема да ги заборават ниту принципите на ЕУ.

Како што велат од Кабинетот, претседателката, на средбите потсетила дека „ЕУ без принципи и вредности не може да биде филозофија, не може да биде престижна и инспиративна заедница“, но исто така ја нагласила и потребата „да седнеме културно со соседите во случајот со Бугарија и да го решиме проблемот”.

The post ЕУ ДА НЕ ДОЗВОЛИ МАКЕДОНИЈА ДА БИДЕ ЖРТВА Матарела и Сиљановска Давкова очекуваат културен дијалог со Бугарија appeared first on plusinfo.mk.

Во процесот на европската интеграција не смееме да бидеме колатерална штета на ветото и на билатерализацијата на процесот на евроинтеграција, нагласи претседателката Гордана Сиљановска-Давкова на средбата со претседателот на Европскиот совет, Антонио Кошта.

Истакнувајќи дека земјава e фокусирана на спроведување на реформската агенда заради достигнување на европските стандарди, Сиљановска-Давкова, како што соопшти нејзиниот Кабинет, нагласила дека Копенхагенските критериуми се, и треба да останат единствените услови за членство во Европската Унија.

Сиљановска-Давкова потенцирала дека единствено со добра волја, меѓусебно разбирање и почит, може да се решат бугарско-македонските недоразбирања и спорови.

-Преговорите за историјата, културата и јазикот не се во духот меѓународното и европското право и значат негирање на европските вредности и принципи, утврдени во конститутивните документи на ЕУ во коишто се гарантираат националниот и културниот идентитет, како и интегритетот и дигнитетот на граѓаните – нагласила претседателката.

Предупредувајќи дека македонскиот преседан може да има домино ефект, проширувајќи се и на други држави од регионот, но и пошироко, со што ќе се загрози политиката на проширување на ЕУ, таа побарала од Европскиот совет да предложи решение за оневозможување нови барања и условувања коишто ќе го дефокусираат нашето внимание од реформите на идентитетски прашања.

Претседателката укажала дека бројката од 36 уставни амандмани за триесеттина години, од коишто најголемиот број се иницирани однадвор, ја релативизира важноста на уставот како највисок правен акт, од една страна и најширок и најважен општествен договор на граѓаните, од друга.

Сиљановска-Давкова потсетила и на редовното искуство при секоја измена на Уставот, на предложените амандмани да им се придружат нови, чие усвојување е услов за поддршка на првите.

Потенцирајќи дека интегрирањето на Западен Балкан е јасен приоритет за ЕУ, претседателот на Европскиот совет Кошта искажал разбирање за националните чувства и состојбата во која се наоѓа државата и изразил став дека не очекува дополнителни политички условувања на македонскиот пат кон ЕУ.

Кошта смета дека треба да го искористиме моментов на зголемен интерес на ЕУ за проширување, во функција на обезбедувањето поголема безбедност и сигурност, покрај европеизацијата на регионот.

The post НЕ СМЕЕМЕ ДА БИДЕМЕ БИЛАТЕРАЛНА ШТЕТА ОД ВЕТОТО Сиљановска Давкова на средбата со Кошта потсетила и на Копенхагенските критериуми appeared first on plusinfo.mk.

Премиерот Христијан Мицкоски изјави дека Република Македонија е меѓу оние земји членки на НАТО кои веќе ги надминуваат стандардите за буџетски издвојувања за одбраната, со повеќе од 2,5 проценти од Бруто домашниот производ (БДП).

– Македонија одамна има буџет за одбраната кој е над 2 проценти. Со проектите за модернизација на Армијата и инфраструктурните проекти, овие трошоци ќе растат – изјави премиерот Христијан Мицкоски на заедничката прес-конференција со претседателот на Советот на ЕУ Антонио Кошта.

Тој додаде дека новите насоки од најголемата земја членка на НАТО не се за зголемување на лимитот на 5 проценти, туку за поставување на 2 проценти како минимум.

– Ние сме одамна над тие 2 проценти. За жал, голем дел од земјите членки на НАТО се сè уште под тие два проценти – нагласи премиерот.

Претседателот на Европскиот совет, Антонио Кошта, денеска е во еднодневна посета на Скопје, каде покрај со премиерот Христијан Мицкоски ќе се сретне и со претседателката Гордана Сиљановска-Давкова.

Целта на неговата регионална посета е да ја потврди посветеноста на ЕУ кон регионот и перспективата на земјите од Западниот Балкан за членство во Унијата. Кошта веќе ги посети Белград и Сараево.

The post МАКЕДОНИЈА ОДАМНА ТРОШИ ПОВЕЌЕ ОД МИНИМАЛНИТЕ 2% ЗА ОДБРАНАТА Мицкоски вели дека оваа бројка ќе расте appeared first on plusinfo.mk.

Претседателот на Европскиот совет Антонио Кошта како дел од неговата турнеја во земјите од Западен Балкан, денеска ќе престојува во еднодневна посета на Скопје, каде ќе оствари средба со премиерот Христијан Мицкоски и со претседателката Гордана Сиљановска-Давкова.

По средбата што ќе се одржи во Владата предвидена е заедничка прес-конференција на Мицкоски и Кошта.

Кошта претходно ги посети Белград и Сараево, а целта на неговата регионална посета е да ја потврди посветеноста на ЕУ кон регионот и перспективата на земјите од Западниот Балкан за членство во Унијата.

– Зајакнувањето на соработката со Западен Балкан е врвен политички приоритет за ЕУ и за мене лично – порача Кошта во пресрет на неговата западнобалканска турнеја.

Тој нагласи дека заминува во посета на регионот за да разговара со лидерите на земјите од Западниот Балкан, кои „се соочуваат со постојани предизвици“ и за да покаже дека ЕУ е подготвена да им помогне.

Премиерот Христијан Мицкоски, во врска со посетата на Скопје на претседателот на Европскиот совет, истакна дека ќе бидат пренесени нашите ставови во врска со уставните измени.

– Нашите ставови се јасни во врска со уставните измени и тука нема промена, затоа што од другата страна не гледаме барем во овој момент било каков сигнал дека има промена во однесувањето, односно од страна на нашиот источен сосед. Ќалам што е тоа така и се надевам дека во периодот што следи повеќе ќе зборуваме за решенија отколку за проблеми, истакна Мицкоски.

Додаде дека на покана на Кошта ќе го придружува на неговиот лет од Скопје до Тирана, каде што претседателот на Советот на ЕУ ќе приреди вечера за лидерите на Западен Балкан, додека в петок ќе имаат состанок на Европската политичка заедница во Тирана.

Полскиот амбасадор во земјава Мариуш Бримора, чија земја е актуелен претседавач со ЕУ, во интервју за МИА во петокот, рече дека посетата на претседателот на Советот на Европската Унија Антонио Кошта на Скопје следната недела, е уште еден силен сигнал на приоритетите на ЕУ и оти фактот што го посетува Западен Балкан и што доаѓа во Скопје, е доказ дека се подготвени за проширување.

– Од моја перспектива, исто така можам да споменам дека нашиот премиер Доналд Туск, ќе го посети Скопје во следните неколку месеци и ова ќе биде уште еден сигнал дека ние се грижиме за Северна Македонија, дека ја поддржуваме државата, дека Претседателството, Советот на ЕУ го поддржуваат процесот на отворањето преговори и тоа е силен знак дека ќе чекаме одговор од македонска страна, нагласи амбасадорот – рече Бримора за МИА.

The post ПРЕТСЕДАТЕЛОТ НА СОВЕТОТ НА ЕВРОПСКАТА УНИЈА КОШТА ДОАЃА ВО СКОПЈЕ Што ќе им каже на Мицкоски и на Сиљановска-Давкова? appeared first on plusinfo.mk.

Премиерот Христијан Мицкоски, во врска со утрешната посета на Скопје на претседателот на Европскиот совет Антонио Кошта, истакна дека ќе бидат пренесени нашите ставови во врска со уставните измени.

– Нашите ставови се јасни во врска со уставните измени и тука нема промена, затоа што другата страна ние не гледаме барем во овој момент каков било сигнал дека има промена во однесувањето, односно од страна на нашиот источен сосед. Јас жалам што е тоа така и се надевам во периодот којшто следи повеќе ќе зборуваме за решенија отколку за проблеми – истакна Мицкоски, одговарајќи на новинарско прашање какви се очекувањата од посетата и какви пораки ќе бидат пренесени.

Мицкоски кажа и дека на покана на Кошта ќе го придружува на неговиот лет од Скопје до Тирана, каде што претседателот на Советот на ЕУ ќе приреди вечера за лидерите на Западен Балкан, додека в петок ќе имаат состанок на Евроспката политичка заедница во Тирана.

Полскиот амбасадор во земјава Мариуш Бримора, чија земја е актуелен претседавач со ЕУ, во интервју за МИА во петокот, рече дека посетата на претседателот на Советот на Европската Унија Антонио Кошта на Скопје следната недела, е уште еден силен сигнал на приоритетите на ЕУ и оти фактот што го посетува Западен Балкан, тоа што доаѓа во Скопје, е доказ дека се подготвени за проширување.

– Од моја перспектива, исто така можам да споменам дека нашиот премиер Доналд Туск, ќе го посети Скопје во следните неколку месеци и ова ќе биде уште еден сигнал дека ние се грижиме за Северна Македонија, дека ја поддржуваме државата, дека Претседателството, Советот на ЕУ го поддржуваат процесот на отворањето преговори и тоа е силен знак дека ќе чекаме одговор од македонска страна, нагласи амбасадорот – рече Бримора за МИА.

Посетата на Кошта на Скопје е дел од неговата турнеја во земјите од Западен Балкан, во чии рамки претходно ги посети Белград и Сараево.

Целта на посетата на Кошта на регионот е да ја потврди посветеноста на ЕУ кон регионот и перспективата на земјите од Западниот Балкан за членство во Унијата.

– Зајакнувањето на соработката со Западен Балкан е врвен политички приоритет за ЕУ и за мене лично – порача Кошта во пресрет на неговата западнобалканска турнеја.

Тој нагласи дека заминува во посета на регионот за да разговара со лидерите на земјите од Западниот Балкан, кои „се соочуваат со постојани предизвици“ и за да покаже дека ЕУ е подготвена да им помогне.

The post НЕМА ПРОМЕНИ ВО НАШАТА ПОЗИЦИЈА, НИТУ ОД БУГАРСКА СТРАНА Мицкоски ќе му го соопшти на Кошта ставот за уставните измени appeared first on plusinfo.mk.

Решени сме да ги исполниме сите обврски и да ги завршиме преговорите за влез во ЕУ во 2027 година, изјави денеска албанскиот премиер Еди Рама по средбата со претседателот на Европскиот совет Антонио Кошта во Брисел.

– Денеска е добар ден, отвораме нови преговарачки поглавја, истакна тој. Ова е исклучително важно во моментов, охрабрен сум од овие случувања – додаде Рама.

Тој му се заблагодари на Кошта за мудроста со која се однесува кон својата земја и регионот.

– Проширувањето со земјите од Западен Балкан е јасна задача за ЕУ, тоа е најважната геополитичка инвестиција во мирот, напредокот и стабилноста на континентот, рече Кошта. Тој додаде дека се чувствува охрабрен од напредокот што Албанија го постигна на овој пат. Нашата цел е да отвориме повеќе преговарачки поглавја со Тирана оваа година, имаме јасен распоред и сакаме да напредуваме. Ова е важно за Албанија и е знак за целиот регион – посочи претседателот на Европскиот совет.

Тој најави дека кон средината на мај ќе ги посети сите шест земји од Западен Балкан. Според него, на денешните разговори со Рама ќе се разговара за подготовките за претстојниот состанок на Европската политичка заедница на 16 мај во Тирана.

– Европа е повеќе од ЕУ, важно е да бидеме обединети, така сме посилни. На светот му треба посилна Европа – резимира Кошта.

Подоцна денеска во Луксембург, каде се состануваат министрите за надворешни работи на ЕУ, е закажана четвртата меѓувладина конференција со Албанија. Тирана започна суштински преговори со ЕУ во октомври минатата година.

Денеска е предвидено да започнат преговорите во областа на внатрешниот пазар, која ги опфаќа слободното движење на стоки, работници и капитал, правото на основање и слободата на давање услуги, правото на трговски друштва и правото на интелектуална сопственост, политиката за конкуренција, финансиските услуги и заштитата на потрошувачите.

The post АЛБАНИЈА МОЖЕ ДА ГО ИЗОДИ ЕВРОПСКИОТ ПАТ ДО 2027 ГОДИНА Рама го поздрави отворањето ново поглавје во преговорите appeared first on plusinfo.mk.