Подготовките на македонската машка сениорска кошаркарска репрезентација продолжуваат со комплетирање на играчкиот ростер за завршниот дел од претквалификациите за Европското првенство 2029 година.

Селекторот Жозеп Мариа Берокал упати повик и до Нејт Систина, кој ќе биде дел од тренажниот процес и ќе биде во конкуренција за настап на двата натпревари од јулскиот ФИБА „прозорец“ против Ирска и Луксембург.

Систина, кој изминатиот период беше дел од составот на новиот шампион на Италија, Олимпија Милано, се очекува да се приклучи на репрезентативниот табор на следниот утрински тренинг во салата „Лазар Лечиќ“ во Скопје.

По денот предвиден за одмор и индивидуална рекуперација, подготовките на македонските репрезентативци продолжија со нови имиња во составот.

Првиот тренинг со новите репрезентативни колеги го одработи ДиВејн Стјуард Јуниор, а во работната група се приклучи и Андреј Јакимовски, кој ги пропушти воведните тренинзи и контролниот натпревар против Бугарија во Самоков.

Со приклучувањето на Јакимовски, Стјуард и Систина, практично се комплетира составот на кој ќе смета селекторот Берокал со својот стручен штаб во пресрет на клучните натпревари од претквалификациите.

Македонската репрезентација на 2 јули во Скопје ќе ја пречека Ирска (18:00 часот, сала „Лазар Лечиќ“), додека три дена подоцна, на 5 јули, ќе гостува во Луксембург.

Пред овие дуели, „црвено-жолтите“ ќе имаат уште една проверка на формата. На 25 јуни во Скопје ќе гостува селекцијата на Бугарија, а натпреварот е закажан за 18:00 часот во салата „Лазар Лечиќ“.

The post НЕЈТ СИСТИНА Е НОВОТО ИМЕ ВО РЕПРЕЗЕНТАЦИЈАТА Македонија влегува во решавачкиот дел од циклусот appeared first on plusinfo.mk.

Кошаркарите на МЗТ Скопје Аеродром ја одбранија титулата првак на Македонија, откако вечерва во третиот натпревар од финалната серија го совладаа дебитантот КК Маџари со 80:74 и со максимални 3-0 во победи го затворија финалето.

За МЗТ ова е вкупно 13. шампионска титула во клупската историја.

Домашниот тим добро го отвори натпреварот и ја доби првата четвртина со 26:21, но МЗТ возврати во вториот период и на пауза замина со предност од 42:46.

Маџари не се предаде и во третата четвртина целосно ја врати неизвесноста, израмнувајќи на 66:66 на пет и пол минути до крајот. Сепак, во завршницата искуството и рутината на МЗТ беа решавачки за конечна победа и нова титула.

Најефикасен во редовите на шампионот беше Војдан Стојановски со 17 поени, додека Душан Танасковиќ постигна 16 поени.

Кај Маџари се истакна Амар Хот со 20 поени и дури 18 скокови.

МВП признанието на финалната серија му припадна на Војдан Стојановски.

The post МЗТ ЈА ОДБРАНИ ТИТУЛАТА Аеродромци дојдоа до 13 шампионска круна appeared first on plusinfo.mk.

Македонската кошаркарска репрезентација денеска го продолжува квалификацискиот циклус за Евробаскет 2029 со натпревар против селекцијата на Луксембург, воедно и прв официјален меч под водство на новиот селектор Жозеп Мариа Берокал.

Дуелот од третото коло во групата А се игра вечерва во салата „Градски парк“ во Скопје со почеток во 18 часот.

Македонскиот состав влегува во мечот со максимален ефект по првите две кола, откако забележа победи против Азербејџан на домашен терен и Република Ирска на гости. И денешниот противник Луксембург има две победи, што навестува израмнет и важен дуел во групата.

Берокал за вечерашниот натпревар се одлучи за следниот состав: Војдан Стојановски (капитен), Андреј Магдевски, Виктор Ташовски, Лука Стојановски, Марин Петков, Виктор Ефремовски, Валмир Какруки, Адем Мекиќ, Стојан Ѓуроски, Андреј Јакимовски, Етан Хап и Теодор Симиќ.

Македонија ќе се обиде да ја продолжи победничката серија и да направи значаен чекор кон врвот на табелата во групата А.

The post ДЕБИ НА СЕЛЕКТОРОТ БЕРОКАЛ ВО СКОПЈЕ Кошаркарите ја бркаат третата победа во групата appeared first on plusinfo.mk.

Најтрофејниот македонски клуб се соочува со финансиски колапс. Играчите и стручниот штаб јавно објавија дека не примиле плата осум месеци. Кошаркарите тврдат дека состојбата е алармантна. Велат дека ветувањата не се исполнети, а спортскиот директор не одговарал на повиците.

„Ова не е само финансиски проблем, ова е системско непочитување. На патувања сме оставени сами на себе, често навивачите ни ги покриваат трошоците за превоз. Срамно е клуб со ваква историја да функционира без основна логистика и опрема“, стои во соопштението.

Општината ја отвори реновираната сала „Градски парк“, која ќе го носи името на легендата Лазар Лечиќ. Но, ниту еден играч или член на стручниот штаб не бил поканет на настанот. Кошаркарите тоа го доживеале како понижување.

Тимот постави јасен рок. Доколку не се исплатат заостанатите средства, најавија дека нема да настапат на следните натпревари.

„Ние не бараме привилегии, бараме основни услови за работа и почит. Секое понатамошно игнорирање ќе значи директно уништување на спортскиот интегритет на клубот“, порачаа играчите и тренерите.

Во петок салата треба да биде домаќин на репрезентацијата на Македонија против Луксембург. Но, прашањето останува што ќе се случи со Работнички викендов.

The post НАЈТРОФЕЈНИОТ МАКЕДОНСКИ КЛУБ ПРЕД КОЛАПС? Осум месеци без плата, играчите најавија бојкот на натпреварите appeared first on plusinfo.mk.

Шпанскиот кошаркарски стручњак Жозеп Мариа Берокал од денеска и официјално е селектор на машката македонска кошаркарска репрезентација. Новиот македонски селектор веќе започна со работа, одржа два тренинга и ги изнесе своите први импресии пред медиумите.

– Ви благодарам за можноста да бидам тука, привилегија е да се биде селектор на Македонија. Знам дека периодот за подготовки е краток, но во овие само два тренинга со репрезентацијата видов дека има голем простор за напредок. Мислам дека треба да размислуваме на долги патеки, да го унапредуваме тимот и важно е за иднината кои млади играчи ќе доаѓаат во националниот тим – вели селекторот.

Шпанскиот тренер објасни и како дошло до почетокот на оваа, како што сите се надеваат, долгорочна соработка.

– Што се однесува до македонската кошарка, поврзан сум со неа преку Владо Илиевски, на кого му бев тренер пред 23 години. Некои од играчите во репрезентацијата ги познавам, му бев тренер на Војдан Стојановски во Украина, а некои ги знам од Шпанија. Среќен сум. Знам дека на почетокот нема да биде лесно, ќе биде долг процес, но ќе се обидеме да извлечеме максимум од овие играчи. На кошаркарите им реков дека треба да се натпреваруваат сами со себе, да бидат подобри и да имаат шампионски менталитет. Да не гледаме премногу далеку во иднината, туку да се фокусираме на она што ни претстои – изјави Берокал на денешната промоција.

На прес-конференцијата, претседателот Томе Главчев информираше дека во стручниот штаб со Берокал е вклучен Ѓорѓи Кочов, тренер со меѓународно искуство, а во работата со репрезентациите е ангажиран и Владо Илиевски.

– Како федерација, остануваме цврсто определени кон професионализација, развој на домашните играчи и враќање на препознатливиот репрезентативен дух. Пред нас се сериозни предизвици, но и можности – и веруваме дека со заедничка работа, поддршка од јавноста и медиумите можеме повторно да ја позиционираме македонската кошарка на нивото кое го заслужува – порача првиот човек на македонската кошарка.

Ѓорѓи Кочов се враќа во македонскиот сениорски национален тим. Овој пат во улога на асистент во стручниот штаб на новиот селектор Хозе Мариа Берокал.

За новиот предизвик, Кочов вети многу работа.

– Чест ми е и задоволство што сум повторно во стручниот штаб на Македонија. За се треба време, ама има само еден начин да станеш подобар, тоа е да тренираш. Понудата од федерацијата ја прифатив затоа што мислам и сметам дека треба тоа што сум го стекнал надвор како искуство, да го пренесам на нашите домашни играчи. Да помогнам на некои тренери што немаат можност многу да видат како се работи надцор и тренира и мислам дека со промена на тренингот и пристапот, сите заедно може да направиме нешто и да промениме. Знаеме во моментов во каква ситуација е клупската кошарка, а репрезентативната е одлик на клупската. За наша земја, мала земја како Македонија, ние тренерите мораме да се потрудиме да бидеме на највисоко ниво што можеме. Да дадеме најдобри можни услови за играчите за да очекуваме некаков напредок. Ако не успееме тоа да го направиме, не може да очекуваме резултат. Јас по природа сум позитивен, но зборувам објективно. Во последните пет години доволно ја пратам македонската кошарка – смета Кочов, кој во последните сезони е асистент во германскиот бундеслигаш Кемниц.

Македонската кошаркарска легенда Владо Илиевски се врати во македонската кошарка, како координатор на сите национални репрезентативни селекции.

Неговото огромно меѓународно искуство, длабокото познавање на репрезентативниот систем и авторитетот што го ужива во кошаркарските кругови ќе бидат ставени во функција на унапредување на работата на сите сениорски и младински национални селекции, подобра координација меѓу нив, како и дефинирање на стратешки насоки за нивен долгорочен развој.

– Ја прифатив оваа функција да го предадам моето име, моето искуство што сум го стекнал триесет години на Македонија и заедно со оваа екипа да направиме исчекор и систем, во чија иднина очекуваме млади генерации да ги наследат денешните. Се надевам дека долги години по нас ќе оставиме нешто, систем, начин на работа и позитивна средина која ќе ни даде голем број на добри кошаркари. Благодарност до претседателот Главчев што ми ја даде оваа одговорност и се надевам дека ќе одговорам на овој предизвик. Почнуваме со нов селектор, нова енергија и не очекуваат добри резултати во иднина и секако, нови дечиња, девојчиња, кои ќе ја претставуваат Македонија во најдобро можно светло – изјави Илиевски.

Македонските кошаркари првиот натпревар под водство на Берокал ќе го одиграат в петок од 18 часот во Градски парк, а противник е Луксембург. Со овој дуел стартуваат претквалификациите за Европското првенство 2029 година.

The post БЕРОКАЛ ГО ПРЕЗЕМА КОРМИЛОТО Шпанецот веќе одржа тренинзи со кошаркарската репрезентација appeared first on plusinfo.mk.

Четвртфиналниот дуел од Купот на Македонија меѓу Куманово и Пелистер, најавуван како дерби на воведната рунда, беше прекинат по неполни 5 минути игра.

При резултат 8:6 за домаќинот Куманово, судиската тројка го запре натпреварот. По кратко чекање, кошаркарите на Пелистер се повлекоа во соблекувалната.

Причината била тоа што навивачката група на Пелистер, Чкембари, не добила дозвола за влез во салата во Куманово. Гостинскиот тим реагирал со напуштање на теренот.

The post 📽️ ЧКЕМБАРИ НЕ ВЛЕГОА, МЕЧОТ НА КРАТКО ЗАПРЕ Драма на Купот на Македонија по само 5 минути игра appeared first on plusinfo.mk.

Кошаркарската федерација на Македонија ја информира јавноста дека донесе одлука за именување на г. Жозеп Мариа Берокал за селектор на машката сениорска репрезентација на Македонија.

Во продолжение следи соопштението на КФМ:

„Г. Берокал е искусен шпански тренер со импозантно портфолио зад себе, со повеќе од 35 години тренерско искуство, од кои 21 година во професионална кошарка, како и 14 години искуство во Евролигата, најелитното европско клупско натпреварување.

Во својата богата кариера како главен и помошен тренер, г. Берокал има освоено вкупно 21 трофеј, меѓу кои и две титули во Евролигата, а работел во 13 различни национални лиги и девет држави, што го вбројува меѓу најискусните интернационални тренери во европската кошарка.

Неговиот професионален ангажман вклучува работа во врвни европски клубови како Барселона, Панатинаикос, Басконија, Макаби од Тел Авив, Баерн Минхен, како и во повеќе национални првенства на највисоко ниво (AЦБ – Шпанија, Евролигата, израелската лига, Лигата на Турција, украинската лига и други).

Г. Берокал соработувал со некои од најголемите имиња во светската кошарка, меѓу кои: Светислав Пешиќ Чави Пасквал, Душко Ивановиќ, Јоргос Барцокас, Велимир Перасовиќ, Одед Каташ и Гордон Херберт, што дополнително го потврдува неговиот стручeн и професионален кредибилитет.

Покрај работата со сениорски екипи, Берокал има и значајно искуство во развој на млади играчи, со 15 години работа во младински категории, вклучително и освојување на две шампионски титули во Шпанија со У18 селекции.

Неговата работа е препознаена како системска, дисциплинирана и насочена кон долгорочен развој на играчи и тимови.

Ангажманот на г. Жозеп Мариа Берокал претставува дел од стратешката определба на кошаркарската федерација на Македонија за подигнување на стручните стандарди, воспоставување на јасен систем на работа и градење конкурентна сениорска репрезентација, во тесна поврзаност со младинските селекции.

Федерацијата изразува уверување дека искуството, знаењето и меѓународниот авторитет на новиот селектор ќе придонесат за стабилност, напредок и јасна визија во натамошниот развој на македонската кошарка“.

The post БЕРOКАЛ ДОАЃА, МАКЕДОНСКАТА КОШАРКА СЕ БУДИ Шпански стратег со 21 трофеј ја презема репрезентацијата appeared first on plusinfo.mk.