Истрагата за случајот со шпионажа во кабинетот на претседателката е во завршна фаза, додека предметот „Мазут“ е во постапка пред Вишото јавно обвинителство, од каде се очекува одлука во законски предвидениот рок.

Вака информира јавниот обвинител Ненад Савески. Тој вели дека станува на принципиелниот став да не коментира политички изјави, но нагласи дека комуникацијата со извршната власт, вклучително и контактите со премиерот, не ја смета за спорна и потенцира дека таа не влијае врз независноста во одлучувањето.

Во контекст на зголемените јавни критики и изјави од политичкиот врв за работата на обвинителството, Савески истакна дека очекувањата за резултати се легитимни, но дека самостојноста на институцијата е загарантирана со Устав и закони.

– Сè уште стојам на ставот дека нема да коментирам изјави на политичари, вклучително и функционери, или конкретно претседателот на Владата. Меѓутоа, како што кажав и претходно, секој има право да ги изнесува своите ставови, а ние имаме обврска да ги исполниме очекувањата и да дадеме резултати, што е сосема природно, изјави Савески

Во однос на изјавите на премиерот дека „трпението му е при крај“, како и неговото право да комуницира со обвинителството, Савески вели дека не гледа ништо спорно во самата комуникација.

– Не знам во колкава мера е тоа надлежност на премиерот, покрај останатото, да се јавува кај јавен обвинител, меѓутоа, како и секој друг што има право да ми се јави, ми се јави и премиерот, односно претседателот на Владата, и тука не гледам ништо спорно. Сум истакнал и во моите претходни изјави дека секогаш сум за соработка меѓу институциите. Во овој случај, комуникацијата помеѓу Јавното обвинителство и другите институции сметам дека е неопходна, со цел постигнување резултати. А за да се постигнат резултати, потребно е да се обезбедат и услови. Во голем дел, токму извршната власт има задача и улога да обезбеди услови за работа на јавните обвинители – рече Савески.

Тој ја отфрли можноста ваквите комуникации да влијаат врз самостојноста на Обвинителството.

– Самостојноста е неспорна и е предвидена и во Уставот и во матичните закони по кои постапува Јавното обвинителство. Така што, било каква реакција не можам да ја сметам како влијание врз мене при носењето одлуки или постапувањето. Во оваа прилика испраќам порака и до сите јавни обвинители – без оглед на различни активности, дејствија или изјави – да не дозволат тоа да се одрази врз нивното секојдневно постапување и одлучување – изјави јавниот обвинител.

Во однос на актуелните предмети, Савески информира дека истрагата за случајот со шпионажа во кабинетот на претседателката е во завршна фаза.

– Она што е најново е дека имаше состанок со истражителите, односно со истражителите од МВР и тимот на истражители кој работи на овој случај во Обвинителството за гонење организиран криминал и корупција. Имаше координативен состанок на кој присуствував и јас. Се изготви план за понатамошни истражни дејствија. Според информациите со кои имав увид, како од надлежниот јавен обвинител, така и од истражителите, истражните дејствија се во завршна фаза, така што сметам дека во скоро време ќе има јавнообвинителска одлука во врска со тој случај – рече тој, додавајќи дека видеоснимките се предадени и се предмет на анализа.

За предметот „Мазут“, пак, посочи дека моментално е во Вишото јавно обвинителство Скопје.

– Последниот податок што го имам е дека предметот веќе е предаден – и како физички предмет – од страна на Обвинителството за гонење организиран криминал до Вишото јавно обвинителство Скопје. Релативниот рок од 30 дена сè уште тече, така што очекувам дека во разумен рок, кој му е потребен на надлежниот виш јавен обвинител, ќе биде донесена јавнообвинителска одлука и јавноста ќе биде соодветно информирана – посочи тој во изјава за медиуми по денешната седница на Советот на јавни обвинители.

The post ВИДЕОСНИМКИТЕ СЕ АНАЛИЗИРААТ, ИСТРАГАТА Е ПРИ КРАЈ Савески најави обвинителска одлука за случајот со шпионажа во претседателскиот кабинет appeared first on plusinfo.mk.

Одлуката беше донесена со акламација, односно ја поддржаа сите 189 присутни пратеници на седницата на Парламентот.

Од следниот месец основната бруто плата на унгарските народни избраници ќе изнесува 3.690 евра. Според владејачкото мнозинство, заштедите од оваа мерка ќе бидат доволни за покривање на годишните трошоци за функционирање на Парламентот.

Со одлуката се укинува и надоместокот за мобилни телефони, а се намалуваат и парламентарните додатоци за канцеларии, станови и персонал.

Новоизбраниот премиер Петер Маѓар ја поврза реформата со мерките за фискална дисциплина и борба против корупцијата во Унгарија.

Според Ференц Биро, раководител на независен антикорупциски орган, за време на 16-годишното владеење на Виктор Орбан, корупцијата ја чинела Унгарија најмалку 186 милијарди евра.

The post ЗА 40 ОТСТО СИ ГИ СКРАТИЈА ПЛАТИТЕ Унгарските пратеници доброволно се откажаа од дел од своите примања appeared first on plusinfo.mk.

Уште 13 лица завршија зад решетки во аферата што со месеци ја бранува Грција.

Рано утрово грчката полиција започна голема операција во регионите околу Кожани и Агринио. Цел на акцијата била мрежа осомничена дека преку лажни пријави и фиктивни барања незаконски присвоила повеќе од 2,5 милиони евра европски земјоделски субвенции.

Меѓу уапсените има управител и вработен во Центар за прием на барања за субвенции. Истрагата опфаќа вкупно 39 лица.

Според грчката полиција, случајот се истражува како измама на штета на финансиските интереси на Европската Унија и давање лажни изјави.

„Се проценува дека незаконската финансиска корист надминува 2,5 милиони евра, а паралелно се утврдени и даночни прекршоци“, соопштија истражителите.

Но ова е само ново поглавје во многу поголем скандал.

Две акции за неколку дена, десетици уапсени

Само минатата седмица грчките власти спроведоа две одвоени операции во Солун, Кукуш, Сер, Атина и на Крит. Во тие акции беа уапсени уште 39 лица.

Според истрагата, преку различни шеми биле извлечени повеќе од седум милиони евра европски средства. Сега властите проверуваат дали двете мрежи биле поврзани и дали зад нив стоел поширок систем што функционирал со години.

Токму тоа прашање ја претвори аферата од полициски случај во политичка бомба.

Како функционирала шемата?

Во центарот на скандалот е грчката агенција ОПЕКЕПЕ, задолжена за распределба на европските земјоделски субвенции. Истражителите тврдат дека со години лица кои немале земјиште, добиток или реална земјоделска активност успевале да добијат европски пари.

Системот особено се проширил по реформите на Заедничката земјоделска политика на Европската Унија во 2014 година. Оттогаш субвенциите повеќе се врзувале за пријавена површина отколку за бројот на грла добиток.

Недоволно средениот катастар и нејасната сопственост на дел од земјиштето создале простор за масовни злоупотреби.

Имало и случаи на земјоделски површини во воени зони. Во истрагата се споменуваат дури и насади на банани на подрачја каде такво производство практично не постои.

Афера што ја прекрои владата

Политичките последици веќе се видливи. Откако европските обвинители ги проширија истрагите, во април неколку високи функционери поднесоа оставки.

Меѓу нив беа и тогашниот министер за цивилна заштита Јоанис Кефалојанис, министерот за земјоделство Костас Цијарас и заменик-министерот за здравство Димитрис Варцопулос.

Следуваше реконструкција на владата. Мицотакис беше принуден да менува министри во обид да ја намали политичката штета и да покаже дека државата има контрола врз ситуацијата.

Иако најновата акција се однесува на околу 2,5 милиони евра, се шпекулира дека вкупниот износ што го истражуваат грчките и европските органи е далеку поголем.

АФЕРАТА СО ЛАЖНИ ФАРМЕРИ ЈА ПРЕКРОЈУВА ГРЧКАТА ВЛАДА Од фантомски пасишта со години се „цицале“ милиони евра

The post НОВИ АПСЕЊА ВО АФЕРАТА СО ЛАЖНИТЕ ФАРМЕРИ ВО ГРЦИЈА Во Кожани и Агринио паднаа 13 лица appeared first on plusinfo.mk.

Приведен е поранешниот директор на Царинската управа и поранешен висок функционер во СДСМ, Стефан Богоев, според неофицијални информации.

Освен него, во акцијата на финансиската полиција се приведени уште три лица, а за други се преземаат истражни дејствија.

Акцијата се спроведува во координација со Основното јавно обвинителство за гонење организиран криминал и корупција, а според првичните информации, се однесува на сомнежи за местење тендер и за незаконитости во постапка за јавна набавка поврзана со Царинската управа, при што била стекната противправна имотна корист од големи размери.

Осомничените се товарат за злоупотреби, финансиски малверзации и за други незаконитости поврзани со тендерската постапка. Постапката произлегува од претходна предистрага насочена кон откривање кривични дела извршени од службени лица.

Надлежните институции засега не откриваат повеќе детали за предметот, а во текот на денот се очекуваат официјални информации од Финансиската полиција и од ОЈО ГОКК.

Од ОЈО ГОКК само потврдија дека под нивна координација Управа за финансиска полиција спроведува акција поради постоење на основано сомнение за сторени кривични дела од коруптивна природа. Акцијата сè уште трае, па обвинитеството не може да  сподели детали.

Стефан Богоев е поранешен потпретседател на СДСМ, поранешен пратеник, поранешен градоначалник на Општина Карпош од 2017 го 2021 година. За директор на Царина беше поставен во јуни 2023 година, а функцијата ја извршуваше до јули 2024 година.

The post ПРИВЕДЕН СТЕФАН БОГОЕВ, ПОРАНЕШЕН ПОТПРЕТСЕДАТЕЛ НА СДСМ И ЕКСДИРЕКТОР НА ЦАРИНАТА Акција на финансиската полиција за кривични дела поврзани со корупција appeared first on plusinfo.mk.

Министерот за внатрешни работи Панче Тошковски денеска од собраниска говорница одговори на барањата на опозоцијата за негова оставка, потенцирајќи дека бројките говорат за работата на Министерството во изминатиот период.

– Говорам дека добро е што нема разлика помеѓу СДСМ, Левица и ДУИ и добро е што во ист ден повторно вие барате оставка од мене врз основа на вашата перцепција, а Левица повикува на интерпелација. Кај и да е, во текот на денов ги очекувам и овие од ДУИ да излезат – рече Тошковски.

МВР во изминатите две години, истакна тој, по сите параметри и статистики има најдобри резултати.

– Она што вие го правите е искучиво во рамки на вашиот личен интерес и да ги задржите овие неколку столчиња кои што ги чувате со предходните парламентарни избори. Јас ве уверувам пред целокупната македонска јавност на наредните парламентарни избори, вака ако продолжите, ќе имате само некое столче минус. А времето ќе каже дали сум бил во право или не сум бил во право – рече Тошковски.

Пратеникот Миле Талевски од СДСМ обвини дека МВР е нефункционално, побара одговори како пет тони дрога поминаа низ нашата граница, за убиства, криминал, а праша и дали вицепремиерот за добро владеење Арбен Фетаи, кој не доаѓа на работа, има обезбедување.

Тошковски одговори:

– МВР дава подобри резултати откога вашиот сопартијец го раководеше. МВР дава подобри резултати компарирано со последните 20 години. И тоа се бројки. Тоа е факт. Откривачката дејност во МВР е на ниво од 67,2 проценти која што е најдобра откривачка дејност во последните 20 години. Вие треба да се гордеете со тоа, што сме дошли на такво ниво. Вие треба да се гордеете со тоа, а не да измислувате приказни цела време дека било така или така. Тоа се факти, тоа се бројки. Вкупниот криминалитет, господине Талевски е најмал во последните 20 години, и тоа се бројки, тоа се статистики кои што се добиени од страна на луѓето кои што работат во МВР и тоа е факт, тоа се бројки. И сега вие велите, најнебезбедно од една страна, а од друга страна, согласно, бројкиве коишто ги имаме од страна на службите кои што работат во Министерството, велат имаме најмал вкупен криминалитет во последните 20 години. И тоа е факт којшто вие не можете туку така лесно да го изманипулирате – рече Тошковски.

Од аспект на семејното насислтво, посочи дека за околу 60 отсто е зголемен вкупниот криминалитет, а тоа е така бидејќи овој пратенички состав изврши измена на одредбите од КЗ и предвиде по службена должност да се водат одредени постапки што во минатото биле заташкувани.

– Сега, постапуваме многу поажурно и многу подобро. И жртвите се охрабруваат да пријават семејно насилство. И ги охрабрувам и во иднина. Секој еден кој е жртва на семејно насилство да го пријави. И да, овие бројки ќе се зголемуваат. Зошто, заради тоа што сега имаме институционален одговор кој што е побрз. Имаме итни мерки по кои што постапуваат судовите, имаме отстранување од домот на насилниците и имаме институционално делување кое што е подобро  од претходно. Тоа е факт. Дали вам ви се допаѓа или не, тоа е ваша работа. Дали е така, така е. Дали е доволно, не е. Не е – рече министерот.

Обвини дека опозоцијата манипулира со јавноста.

– Што сме направиле за овие две години. Многу сме направиле. И во делот на борба против организиран криминал, и во делот на борба против економски криминал, и во делот на борба против корупција, и во делот на пасошите, хаосот што го оставивте ако ви текнува, и во делот на сето она кое што значи сообраќај, и во делот на она кое што значи управни служби, и во делот на она кое што значи склучување на договори со нашите соседи од аспект на имплементирање на вистински ОнеСтоп како што доликува. Дали доволно сме направиле. Не. Дали треба уште да работиме. Да. Ама народот гледа дека има огромна разлика од тоа што вие го правивте до тоа што ние го правиме денес. Се откриваат милионски скандали кои што биле злоупотребувани, народни пари од претходно – рече Тошковски.

Тој забалежа дека не му е јасно „како така добро опозицијата се координира со дел од обвинителските служби“ и во јавноста оди со информации во рамки на предистражни постапки што се работат во МВР во согласност со наредби и напатствија дадени од страна на јавните обвинители.

– Оваа говорница не ве штити од информации изнесени во јавност кои што се поврзани со нарушување на тој принцип на тајност. Не ве штити да знаете – рече Тошковски.

Во однос петте тони дрога, Тошковски повтопри дека Македонија и Србија имаат билатерален договор и оти во рамки на ОнеСтоп, Србија го контролира нејзиниот влез во државата.

– Има една народна поговорка „Сто пати повторена лага станува вистина“. Тоа не значи дека МВР пуштило пет тони дрога, Македонија и Србија имаат билатерален договор и секој влез го чува својата држава, Србија го чува својот влез. Мене ми е жал што вие не го имплементиравте ОнеСтоп – рече Тошковски.

Ваков пристап има и со Косово и со Србија, а системот треба да се имплементира и со Албанија.

– Српската полиција ги штити влезовите во Република Србија согласно договорот што го имаме, а кој стои зад компанијата, кој стои зад тоа…? Ама пак да не се чешате после тоа. Јас нема да прекршам тајност во рамки на предистражни постапки по насоки на јавен обвинител. Овие постапки ќе завршат еден ден – рече Тошковски.

На прашањето на пратеникот Миле Талевски од СДСМ за тоа дали вицепремиерот Арбен Фетаи користи службено обезбедување, Тошковски рече дека не води дневна евиденција и побара за тоа да се поднесе писмено барање на кое ќе одговори.

The post MВР ДАВА НАЈДОБРИ РЕЗУЛТАТИ СПОРЕДЕНО СО ПОСЛЕДНИТЕ 20 ГОДИНИ Тошковски одговори на повиците за оставка appeared first on plusinfo.mk.

Апелациониот судија Ѓоко Ристов, кому истражителите му најдоа 350.000 евра скриени во ѕид во домот на неговите родители во Неготино, денеска на почетокот на судскиот процес во Кривичниот суд се изјасни како невин за кривичните дела што му се ставаат на товар.

– Не се чувствувам виновен ниту за првото, ниту за второто кривично дело со оглед на правната квалификација – изјави Ристов пред судот.

Обвинителката Искра Хаџи Василева, пак, тврди дека  рече дека Ристов свесно презел дејствија спротивно на одговорноста на која го повикува судската тога. Обвинителството, како што беше кажано, ќе докажува дека Ристов како судија во Апелационен суд, дал лажни податоци за својата имотна состојба, а ќе се докажува и за прикривање на податоци за имотот на обвинетиот. Ќе се докажува дека Ристов го користел делот од куќата каде биле најдени парите, кои биле криени, според обвинението, зад кујнски елементи.

Обвинетиот, за кого беше кажано дека е женет, татко на две деца, рече дека разбрал што му се става на товар, но, не се чувствува виновен ниту за првото, ниту за второто. Ристов нагласи и дека за перење пари мора да има кривично дело од кое потекнуваат тие пари.

Од одбраната на Ристов, во судницата денеска беа присутни бранителите Ѕвонко Давидовиќ и Душко Јанковиќ. Давидовиќ, меѓу другото, рече дека одбраната во текот на оваа постапка ќе се судри со теоријата на Обвинителството наречена „ѕидовите зборуваат, а доказите молчат“. Тој наведе дека за среќа, чувствата во судница не зборуваат, туку зборува ладнокрвноста на доказите.

– Мојот клиент со децении професионално ја извршувал својата професија и пред да се појави во судницата, во јавноста веќе беше осуден – додаде бранителот во неговиот говор во судницата.

Ниту еден доказ, како што подвлече тој, не ги поврзувал Ристов и неговата функција.

Давидовиќ рече дека во текот на постапката, одбраната на судот ќе му докаже за легалното потекло на имотот на родителите на обвинетиот. Според одбраната, легалните докази ќе покажат дека неговите родители легално го спечалиле овој имот.

Давидовиќ рече и дека неосновано е поврзувањето на парите со обвинетиот.

На 17 април, Јавното обвинителство на Репбулика Северна Македонија соопшти дека биле преземени повеќе дејствија и претреси, при кои на 18.01.2026 година во дом на родители на судија во Неготино, пронајдени биле вкупно 350.000 евра за чие потекло, тој немал доказ и не ги пријавил.

„Парите беа пронајдени спакувани во 13 поединечни пакувања, и тоа вкупно 610 банкноти во апоени од по 500 евра и 225 банкноти во апоени од по 200 евра, од кои дел со обележани рачно испишани износи на средствата, скриени во заѕидан простор во шуплините од цигли во ѕидот на една од собите. Ова предизвика основано сомнение дека овој осомничен во периодот од 10.02.2020 година, како службено лице судија во Апелациониот суд Скопје, спротивно на законската должност за пријавување на имотна состојба или нејзина промена давал лажни податоци за својот имот и имотот на неговото семејство и не пријавил имот, кој во големи размери ги надминува неговите законски приходи“, објави ЈО.

Притоа Обвинителството информираше дека од поведувањето на постапката, јавниот обвинител презел повеќе дејствија, со кои обезбедил цврсти докази во однос на сопственоста на паричните средства.

Судскиот процес го води судијката Билјана Коцевска.

Следното рочиште е на 9 јуни.

The post СУДИЈАТА РИСТОВ НЕГИРА ВИНА ЗА СОЅИДАНИТЕ 350.000 ЕВРА Одбраната ќе докажува дека парите ги стекнале неговите родители appeared first on plusinfo.mk.

Давид Санчез, братот на шпанскиот премиер Педро Санчез денеска седнува на обвинителна клупа во Бадахоз. Давид Санчез е обвинет дека добил јавна функција преку политички врски и влијание. Скандалот доаѓа откако сопругата на премиерот беше обвинета за скандал со тендери.

Според шпанската телевизија RTVE, судењето на Диего Санчез ќе започне до 4 јуни. Обвинителите тврдат дека работното место за координатор на активностите на окружните музички конзерваториуми било создадено токму за Давид Санчез. Под сомнеж е целиот процес.

10 кандидати биле одбиени

Позицијата била отворена во Бадахоз кратко откако Педро Санчез ја вратил контролата врз Социјалистичката партија во 2017 година. Давид Санчез, кој тогаш бил невработен музичар, потпишал договор два 2 месеци подоцна. Совпаѓањето отвори сомнежи.

Според RTVE, 10 кандидати претходно биле одбиени за работното место. Десничарски организации и опозициски партии тврдат дека позицијата била создадена специјално за братот на премиерот. Скандалот доби политичка тежина.

Меѓу обвинетите има и поранешни функционери на Социјалистичката партија во Бадахоз. Случајот го презеде локален суд. Рочиштата веќе почнаа.

„Сè се темели на претпоставки“

Одбраната на Давид Санчез ги отфрла обвиненијата. Адвокатите тврдат дека нема кривично дело и дека случајот се темели на „претпоставки и хипотези“. Семејството негира вина.

Во меѓувреме, притисокот врз Педро Санчез расте и поради други истраги поврзани со неговото семејство и со владејачката партија PSOE. Шпанската опозиција бара одговорност.

Проблематичните тендери на Бегона Гомез

Сопругата на премиерот, Бегона Гомез, е обвинета за фаворизирање компании и претприемачи додека била ко-директор на постдипломски курс на Универзитетот во Мадрид. Таа тврди дека е невина.

Во средата полицијата изврши рација и во седиштето на PSOE во Мадрид. Истражителите барале документи и податоци поврзани со сомнежи за корупција и нелегални финансиски шеми. Аферата се шири.

Педро Санчез изјавил дека неговата партија соработува со истражителите и повикал на презумпција на невиност. Тој ги отфрлил барањата на опозицијата за предвремени избори.

The post ОДБИЛЕ ДЕСЕТМИНА ЗА ДА ГО ВРАБОТАТ БРАТОТ МУЗИЧАР НА САНЧЕЗ Скандал ја тресе владата во Мадрид  appeared first on plusinfo.mk.

До кога СДСМ ќе размислува, дејствува и ќе реагира на ваков начин како што реагира цело време откако Венко Филипче е на чело на партијата? Секогаш кога ќе се отвори прашањето за криминал, корупција и барања судиите и обвинителите професионално, одговорно и согласно законот да си ја вршат работата, веднаш почнуваат приказните за „притисок врз обвинителството“ и „загрозена независност на судството“.

Па што треба да значи тоа? Дека предметите треба повторно да собираат прашина по фиоки, а криминалот да останува неказнет поради застарување или пак тешките кривични дела да завршуваат со благи казни како што беше во нивното време?

Граѓаните не заборавија колку случаи поминаа неказнето додека СДСМ беше на власт. Не заборавија како големи афери се развлекуваа со години, како предмети застаруваа, како обвинети функционери се спасуваа со процедурни игри, а правдата никако да стигне до тие што го оштетија народот и државата. Наместо одговорност, гледавме политички калкулации, селективна правда и заштита на блиски луѓе.

Доста ни е од судии и обвинители кои дресовите ги пресоблекуваа на дневна основа, зависно од тоа кој е на власт. Доста ни е од неказнивост на тие што треба да ја делат правдата. Не може во оваа држава драстично построго да биде казнет човек што украл 100 ќебапи, а да биде ослободен некој што го ограбил народот за стотици милиони евра.

Токму затоа, пораката дека „трпението е при крај“ не е ништо страшно, туку сосема оправдано и нормално предупредување дека институциите конечно мора да си ја работат работата. Мицкоски и досега покажа преголема трпеливост кон дел од обвинителите и судиите, но вакви и слични свесно сторени неправди повеќе не смеат да се премолчуваат, а најмалку за нив да не се одговара.

Не смее повеќе да се толерираат несовесни, некадарни и корумпирани судии и обвинители кои со години дозволуваа криминалот да остане неказнет, а довербата на граѓаните во правосудниот систем целосно да биде уништена. Народот е уморен од двојни аршини, селективна правда и институции што молчат пред моќниците, а се строги само кон обичниот човек.

И сега, кога некој јавно зборува дека институциите не смеат да молчат, дека предметите не смеат да собираат прашина, а судиите и обвинителите конечно треба да постапуваат професионално и непристрасно, СДСМ повторно се крие зад приказните за „загрозена независност“ на правосудството, истото она судство и обвинителство што токму тие го дорастурија и го доведоа до ова дереџе додека беа на власт. Наместо да поддржат расчистување на криминалот и јавно да кажат стоп на криминалот и корупцијата тие повторно ја вртат приказната за наводни политички притисоци, напади и дефокусирање.

Целата оваа нервоза и паника што јавно ја демонстрираат СДСМ и Филипче секогаш кога ќе се повикаат судиите и обвинителите на совесно работење и да не потпаѓаат под политички влијанија, најверојатно е резултат на стравот дека правдата конечно може да стигне и до нив. Јас барем не можам поинаку да ги протолкувам ваквите нивни реакции. Претпоставувам дека и затоа е толкава нервозата и паничните обиди секоја критика кон нефункционалниот систем да се претстави како притисок врз независноста на судството и обвинителството.

И затоа со полно право го поставувам прашањето. Во што е поентата? Дали треба арамиите да останат неказнети? Дали треба и понатаму судиите и обвинителите на арамиите да им го легализираат украденото од народот? Дали повторно треба да гледаме како милиони народни пари исчезнуваат, а никој да не одговара?

Е, малку морген Филипче и компанија. Народот не е наивен и добро памети. Луѓето сакаат правда, а не нови изговори. Ако некој крадел, злоупотребувал функција или се богател на грбот на граѓаните, треба да одговара, без разлика дали е од ВМРО-ДПМНЕ, СДСМ, ДУИ или ВЛЕН или која било друга политичка партија.

Конечно дојде време да се стави крај на овој неправен башибозук во кој криминалците се чувствуваа недопирливи, а правдата беше резервирана само за слабите и незаштитените. Државата мора да покаже дека законот важи за сите подеднакво и дека никој повеќе нема да биде над правдата.

Посебно загрижува улогата на дел од медиумите кои без никаква анализа и критичка дистанца пренесуваат вакви политички конструкции, обидувајќи се секое барање за правда и одговорност да го претстават како закана за демократијата и независноста на правосудството. Наместо да бараат одговори зошто толку предмети останаа без разрешница и зошто криминалот со години не добиваше судски епилог, дел од медиумите свесно или несвесно стануваат заштитници на оние што стравуваат од соочување со правдата.

Но народот веќе не верува во тие приказни. Луѓето сакаат правда, одговорност и еднаквост пред законот. Ако некој крадел, злоупотребувал функција и се богател на грбот на граѓаните мора да одговара, без разлика на функцијата, партијата или презимето. Само така државата може да врати доверба кај народот и конечно да покаже дека законот важи подеднакво за сите.

Затоа е потребно уште поголемо и секојдневно потсетување до судиите и обвинителите дека имаат обврска својата работа да ја вршат совесно, законски и во интерес на правдата, а не во интерес на партии, бизнис-центри и политички ментори. Независно судство не значи молк, замижување и заштита на криминалот, туку бескомпромисна и неселективна правда и одговорност за сите кои се огрешиле од Уставот и законите.

The post Дали правдата тропа на вратата на СДСМ – На што се должи паниката и хистеријата? appeared first on plusinfo.mk.

Премиерот Христијан Мицкоски денеска од Охрид испрати порака дека трпението за борбата против корупцијата е при крај, порачувајќи дека правдата мора да стигне до сите што, како што рече, „ѝ се смеат на државата и на законите“.

Во обраќањето на свечената академија „Од слово до вечност“, што се одржа во црквата Света Софија по повод Денот на сесловенските просветители Свети Кирил и Методиј, Мицкоски се осврна и на незадоволството кај граѓаните од бавната испорака на правда.

– Го разбирам незадоволството и негодувањето кај луѓето кои сè повеќе губат трпение. И јас не сум до крај задоволен и сметам дека може многу подобро и со многу побрзи резултати. Немојте да мислите дека не ги слушам криците на луѓето кои гледаат како некои ѝ се смеат на правдата и мислат дека се недопирливи – порача Мицкоски.

Премиерот упати критики и до дел од обвинителството, оценувајќи дека институциите мора побрзо да постапуваат.

– На оние што денес се најгласни критичари, а вчера ја злоупотребувале државата, како и на дел од обвинителството кое сè почесто бара изговори, им порачувам дека трпението е при крај. Правдата ќе ги стигне сите. Внимателно следам што се случува – истакна премиерот.

Тој додаде дека нема да молчи кога смета дека институциите грешат или кога, како што рече, предметите стојат во фиоки без реакција.

– Не влегов во политика за да смислувам изговори, туку за да воведеме ред, правда и владеење на законите. Нема да отстапам од намерата да им дишеме во врат на оние што се богатат на маката на народот. Ова е последна шанса на оваа генерација да остави нешто вредно зад себе – порача Мицкоски.

The post ТРПЕНИЕТО Е ПРИ КРАЈ, ПРАВДАТА ЌЕ ГИ СТИГНЕ СИТЕ Мицкоски со остра порака до дел од обвинителството appeared first on plusinfo.mk.

Бизнисменот Тимур Миндич, кој важел за близок пријател и поранешен деловен партнер на украинскиот претседател Володимир Зеленски, поднел тужба со која бара да се поништат санкциите воведени против него минатата есен.

Според судските записи, Миндич во мај поднел тужба до Касацискиот административен суд во Украина.

Тој бара санкциите да бидат прогласени за нелегални, а претседателскиот декрет да биде поништен.

Украинските власти го сомничат Миндич дека стоел зад корупциска шема тешка околу 100 милиони долари поврзана со државниот нуклеарен оператор „Енергоатом“.

По отворањето на истрагата, Зеленски на 13 ноември вовел санкции против Миндич и бизнисменот Олександр Цукерман, кој исто така е осомничен во случајот.

Екстрадиција од Израел? – Тешко

Миндич, кој има израелско државјанство, ја напуштил Украина непосредно пред да биде обвинет.

И Цукерман ја напуштил земјата.

Украина оваа пролет побарала нивна екстрадиција од Израел.

Детективот Олександр Абакумов, кој го води случајот, изјавил дека екстрадицијата од Израел е исклучително сложена процедура.

– Израел е многу тешка земја кога станува збор за екстрадиција. За да екстрадирате лице, во пракса мора да го предадете целиот материјал од кривичниот случај – изјавил Абакумов.

Нова истрага за перење пари

Во меѓувреме, против Миндич била отворена и нова истрага за перење пари поврзано со изградба на луксузен комплекс во близина на Киев.

Во истиот случај се обвинети уште6 лица.

Според извештаите, меѓу нив има и поранешни високи функционери од украинската власт. Случајот се смета за една од најголемите антикорупциски истраги откако Зеленски е на власт.

The post „МОЗОКОТ“ НА АФЕРА ТЕШКА 100 МИЛИОНИ СО БАРАЊЕ ДО ЗЕЛЕНСКИ Поранешниот партнер на украинскиот претседател поднесе тужба appeared first on plusinfo.mk.