Државната комисија за спречување на корупцијата (ДКСК), со цел навремено и транспарентно информирање на сите државни институции, политичките партии, учесниците во изборниот процес како и јавноста за законитоста на користењето и располагањето со буџетските средства, согласно Законот за спречување на корупцијата и судирот на интереси и Изборниот законик денеска испрати укажување на следните состојби за период од денот на донесување на одлуката за распишувањето на Локални избори во Република Северна Македонија во 2025 година па до завршувањето на изборите за избор на градоначалник или членови на советот, односно до конституирањето на советот на општините и градот Скопје.

Во овој период има забрана за нови инвестиции и вонредни исплати односно, како што се наведува во соопштението не може да започне изградба со средства од буџетот или од јавни фондови или со средства на јавни претпријатија или други правни лица што располагаат со државен капитал на нови објекти во инфраструктурата, како патишта, водоводи, далноводи, канализација и други објекти или на објекти за општествени дејности – училишта, градинки и други објекти, освен ако за таа намена претходно се обезбедени средства од буџетот, односно се работи за реализација на програма донесена врз основа на закон во тековната година. Не може да се вршат исплаќања на плати, пензии, социјална помош или други исплати и материјални надоместоци од буџетски средства или од средства на јавните фондови кои не се редовни месечни исплати, односно сите едногодишни трансфери и исплати или еднократни трансфери од буџетски средства или од средства на јавни фондови, ниту да се отуѓува државен капитал, ниту да се потпишуваат колективни договори, а не може да се започне и постапка за вработување на нови лица или постапка за престанок на работен однос во државни и јавни институции, додека започнатите постапки се ставаат во мирување, освен во случаи на итни и неодложни работи.

Од ДКСК укажуваат и на забрана за користење противправни и анонимни извори на финансирање за време на избори.

„Политичката партија или кандидатот на изборите не смеат да прибираат и користат средства противправно или од анонимни извори“, се наведува во соопштението.

Исто така не може имотот во сопственост на: Република Северна Македонија или на единиците на локалната самоуправа или буџетски средства или средства од јавни фондови, јавни претпријатија, јавни установи или други правни лица што располагаат со државен капитал, преку инвестициони работи или на друг начин, да се користат за изборна кампања или за финансирање на друга политичка активност.

Од Антикорупциска посочуваат и дека не смее да се врши поткуп при избори и гласање, давање или ветување подарок или друга корист за себе или за друг, на избирач при избори, за да гласа или да не гласа или да гласа за определен кандидат.

Во периодот од 20 дена пред започнувањето на изборна кампања до завршувањето на изборите за избор на градоначалник или членови на советот, односно до конституирањето на советот на општините и градот Скопје, не може да се одржуваат јавни настани по повод започнувањето на изградба или пуштање во употреба на објекти со средства од Буџетот или од јавни фондови, или со средства на јавни претпријатија или други правни лица што располагаат со државен капитал во инфраструктурата како патишта, водоводи, далноводи, канализација, спортски игралишта и други објекти или објекти за општествени дејности училишта, градинки и други објекти.

Под забрана за одржување на јавни настани не се подразбира особено давање на јавна изјава на носител на јавна функција или кандидат за носител на јавна функција на митинг, интервју на медиум, дебата на медиум или одговор на новинарско прашање.

Од денот на донесувањето на одлуката за распишување на избори до нивно завршување согласно со резултатите од изборите, Министерството за финансии е должно сите буџетски исплати, освен редовните плати, пензии и комунални трошоци, да ги објавува јавно на интернет страница во посебна база за буџетски трошоци во изборен период и Министерството за финансии две недели по распишување на изборите поднесува предизборен финансиски извештај во кој ќе биде опфатен преглед на сите планирани и реализирани приходи и расходи од Буџетот по ставки во периодот од почетокот на фискалната година до денот на поднесувањето на извештајот кој се објавува на веб страницата на Министерството за финансии.

Забрането е користење на канцелариски простор, канцелариска опрема и службени возила на државните органи, освен лицата на кои се однесуваат посебните прописи за заштита на личноста.

Во рок од десет дена од денот на донесувањето на одлуката за распишување на избори, јавните фондови, јавните претпријатија и сите други правни лица што располагаат со државен капитал, се должни до ДКСК да достават податоци за бројот, видот, регистарската таблица и возната состојба на моторните возила со кои располагаат, во електронска форма на образец пропишан од  Државната изборна комисија, објавен на веб страницата на ДКСК.

Забрането е вршење и обид за вршење притисок и заплашување на гласачи или членови на нивните семејства или ним блиски лица.

ДКСК, како што се нагласува, ќе го следи целиот изборен процес и во случаите на основи за сомневање за прекршување на одредбите од Законот за спречување на корупцијата и судирот на интереси и Изборниот законик. ДКСК ќе ги смета за одговорност на одговорните лица на државните органи и други субјекти, ќе презема мерки за утврдување на таквите сомневања, ќе ги извести надлежните органи и ќе бара преземање активности во рамките на нивното надлежно постапување.

Во периодот на спроведување на активностите поврзани со Локалните избори во Република Северна Македонија 2025 година односно, изборите за избор на  членови на советите на општините и Советот на градот Скопје и за избор на градоначалник на општина и градоначалник на градот Скопје, ДКСК согласно одредбите на Законот за спречување на корупцијата и судирот на интереси нeма надлежност и не дава мислења по доставени барања за мислења поврзани со начинот на постапување на органите на државната и на локалната власт и други државни органи основани согласно со Уставот и со закон, фондовите, агенциите, дирекциите, јавните претпријатија, регулаторни тела, трговски друштва основани од државата и други институции основани од државата.

ДКСК, како што се наведува, во функција на следењето и контролата на законитоста на финансирањето на изборната кампања и на севкупниот изборен процес ќе остварува непосредна соработка со медиумите, здруженијата на граѓани и со граѓаните и за таа цел ја охрабрува целокупната јавност навремено да пријавува случаи на прекршување на забраните утврдени во Законот за спречување на корупцијата и судирот на интереси и во Изборниот законик. 

The post ЗАБРАНА ЗА НОВИ ВРАБОТУВАЊА, ПОТКУП, КОРИСТЕЊЕ ДРЖАВЕН ИМОТ ЗА КАМПАЊА Потсетување од ДКСК на забраните од денот на распишувањето на изборите appeared first on plusinfo.mk.

Проблемот со употребата на дроги кај децата во Северна Македонија станува сè позагрижувачки, покажува анализата за состојбата и третманот на деца кои користат дроги и други психотропни супстанци во Северна Македонија изработена од Народниот правобранител. Според анализата, системот за превенција, рано откривање, третман и рехабилитација на овие деца е недоволно развиен, а институционалните капацитети остануваат ограничени.

– Третманот на деца корисници на дрога и натаму претставува сериозен предизвик со оглед дека препорачавме специфични програми во здравствените институции кои сѐ уште не се изработени – рече Васка Бајрамовска Мустафа, заменик народен правобранител на денешната презентација на анализата.

Согласно податоците од анализата, таа информираше дека се намалува долната граница на деца кои нудат и употребуваат дроги, а оваа појава станува сѐ поголем проблем и бара итен и координиран одговор од институциите.

Најмалото евидентирано дете во Македонија кое зема дрога, е под 5-годишна возраст, соопшти Бајрамовска-Мустафа.

Бајрамовска го потенцираше фактот што меѓуопштинските центри за социјална работа одговориле дека нивните стручни тимови не се специјализирани за работа со деца корисници на дрога.

– Од 21 Меѓуопштински центар за социјална работа кои одговориле дека имаат стручни тимови за работа со деца во ризик, под кои спаѓаат и децата корисници на дрога, сите изјавиле дека тимот не е специјализиран за деца корисници на дроги – информираше таа.

Најголемите предизвици кои се издвоени во анализата се тоа што во моментов, релевантните институции не го препознаваат доволно ризикот од употреба на дроги кај децата, што резултира со недоволна интервенција во критичните моменти.

Стручните лица во здравствените и социјалните установи немаат потребна обука и знаење за работа со оваа ранлива група, а воедно недостигаат соодветни просторни капацитети и технички ресурси за ефективно лекување и грижа.

Дополнително, нема развиени програми за рехабилитација и ресоцијализација, со што децата кои употребуваат дроги остануваат без соодветна поддршка за нивно интегрирање во општеството. Советувалиштата и дневните центри, кои би можеле да играат клучна улога во нивната поддршка, се недоволно развиени и застапени и на локално и на национално ниво.

Институциите истовремено се соочуваат со сериозни проблеми во координацијата, што резултира со неусогласени пристапи кон третманот, различни методологии за евиденција и недостиг на унифицирани процедури.

Недостигот на јасни регулативи дополнително ја отежнува работата на институциите, а ограничената вклученост на граѓанските организации во создавањето на политики ја намалува ефикасноста на мерките за заштита.

Народниот правобранител препорачува развивање на специјализирани програми за третман, рехабилитација и ресоцијализација, како и подобрување на координацијата меѓу институциите за интегриран пристап во третманот.

Оттаму велат дека е потребно да се воспостави централизирана база на податоци за евиденција и следење на состојбата со цел да се подобри планирањето на превентивни мерки и политики.

Дополнуваат дека зголемувањето на ресурсите и кадарот во здравствените и социјалните установи е клучно за обезбедување квалитетна грижа, а поголемата вклученост на граѓанските организации би придонела кон развивање на поефикасен и одржлив систем за заштита на овие деца.

Бајрамовска потенцираше дека препораките од анализата ќе ги достават до надлежните министерства и до сите клучни чинители, со цел да започнат со преземање мерки и додаде дека ќе го следат нивното имплементирање.

The post НАЈМАЛОТО ДЕТЕ КОЕ ЗЕМАЛО ДРОГА Е ПОД 5 ГОДИНИ Сѐ помала е возраста за користење и делење дрога во земјава appeared first on plusinfo.mk.

Новата мобилна апликација „Мое здравје“ овозможува брз и лесен пристап до здравствени услуги за граѓаните, вклучувајќи закажување термини, следење медицински податоци и комуникација со матичните општи лекари, стоматолози и гинеколози.

Според Министерството за здравство, апликацијата ќе им помогне на корисниците да закажуваат прегледи без чекање во ординациите и да добиваат известувања за резултати од анализи.

– Со оваа алатка значително се олеснува пристапот до здравствениот систем и се намалуваат административните процедури – велат од Министерството.

Апликацијата е достапна за „Android“ и за „iOS“ корисниците, а нејзината употреба е бесплатна. Нуди можност за дигитално чување на здравствени документи, што ќе овозможи побрза и поефикасна здравствена грижа.

Граѓаните веќе изразуваат позитивни реакции за новата услуга.

– Ова ќе ни заштеди време и нема да мораме да одиме физички во амбуланта за закажување термин. Процедурата за активирање е многу едноставна, само ви треба корисничкото име и лозинката од порталот е-услуги и целиот просец е лесен. За да ја испробам се јавив кај матичниот лекар, ми требаше упат, оттаму ми кажаа кога има слободен термин кој мене ми одговараше. По неколку минути ми пристигна известување на апликацијата во колку часот, кога и кај кој лекар имам закажно преглед – вели скопјанец кој веќе ја симнал апликацијата и закажал преглед.

Од Министерството за здравство велат дека „Мое здравје“ е значаен чекор кон модернизација на здравствениот систем во земјата.

– Целта на оваа апликација е да им го олесниме пристапот до здравствени услуги на сите граѓани, со што ќе се намалат административните процедури и ќе се забрза комуникацијата помеѓу пациентите и здравствените установи – истакнуваат од Министерството.

Апликацијата „Мое здравје“ овозможува граѓаните на Македонија да имаат брз и лесен пристап до своите здравствени податоци, директно од мобилен телефон или од компјутер. Оваа дигитална платформа е создадена со цел да ја подобри комуникацијата помеѓу пациентите и здравствените установи, овозможувајќи преглед на медицинската историја, рецепти, упати и вакцинален статус на едно место.

Што нуди „Мое здравје“?

Апликацијата ги поврзува корисниците со здравствениот систем и им овозможува:

– Пристап до личните здравствени податоци – корисниците можат да ги прегледаат своите медицински информации во секое време, без потреба од физички посети на лекар.

– Преглед на минати и тековни прегледи, рецепти и упати – апликацијата содржи детали за дадените рецепти, нивната важност и достапноста на лековите во аптеките.

– Следење на вакциналната историја – овозможува проверка на примените вакцини, вклучително и ковид-19 вакцинацијата.

– Подобро управување со здравјето – граѓаните можат навремено да се информираат за нивниот здравствен статус и да донесуваат одлуки во координација со нивните лекари.

Кој може да ја користи „Мое здравје“?

Апликацијата е достапна за сите граѓани, без разлика на возраста, и е наменета за оние кои сакаат брз и лесен пристап до своите здравствени податоци. За поголема достапност, таа е преведена на македонски, албански и англиски јазик.

Во делот Мои податоци се наоѓа пристапот до профилите на малолетните лица кои се пријавени на здравственото осигурување на родителот.

Како да ја користите „Мое здравје“?

Апликацијата е достапна во мобилна и десктоп верзија и има едноставен и интуитивен интерфејс. Корисниците се најавуваат преку Националниот портал за е-услуги, што значи дека не треба да создаваат нов кориснички профил – најавата се врши директно преку eID.

Со „Мое здравје“, граѓаните добиваат побрз, побезбеден и поедноставен начин да ги следат своите здравствени потреби. Ако имате проблеми со најавата, повеќе информации и решенија може да најдете на официјалниот портал за е-услуги.

Кои податоци ви се достапни преку „Мое здравје“?

Апликацијата ви овозможува увид во сите реализирани прегледи кај матичен лекар, специјалистички, лабораториски, дијагностички и болнички упати, рецепти, вакцини и други поважни медицински податоци. За секоја од наведените категории, корисникот има пристап до подетални информации како датум на закажан преглед, датум на извршување на услугата, здравствена установа и здравствен работник кој ја извршил услугата, извештаи, резултати, отпусни писма, сертификати и решенија за вакцинација.

Податоците се поделени во две категории: активни и архивирани. Активни се сите актуелни документи, додека во архивата се наоѓаат сите документи за изминатите години.

Како да ја користите апликацијата „Мое здравје“?

Апликацијата е лесна за користење и не бара специјални технички вештини. По првичната најава преку вашиот eID профил, потребно е да поставите ПИН код кој ќе го користите за секоја следна најава во апликацијата. После секоја најава, ќе се појави почетна страна со можност за директен пристап до различните видови лични податоци.

На почетната страна можете да се информирате за вашето здравствено осигурување. Ако притиснете на иконата ⓘ која се наоѓа веднаш до вашето име, ќе добиете информација за тоа дали вашето здравствено осигурување е активно или не.

Специјалистички и лабораториски упати

Во делот за специјалистички упати, корисниците можат да видат информации како датум на закажан преглед, број на упат, доктор и институција каде треба да се изврши прегледот, како и статус на упатот (дали е со термин, без термин или итен). Архивата за специјалистички упати содржи информации за тоа дали упатот бил реализиран или не, како и извештајот од прегледот.

Лабораториските упати се исто така поделени во активни и архивирани. Во активните упати ќе бидете информирани за бројот на упатот, датумот на важност и институцијата каде треба да се изврши прегледот.

Болнички упати и отпусни писма

Во категоријата „болнички“, апликацијата нуди увид во активните болнички упати, со информации за кога и каде е издаден упатот и видот на упат. Отпусните писма од болниците ќе бидат достапни веднаш по нивното изготвување и можат да се прегледуваат во апликацијата.

Дијагностички упати

За дијагностичките упати, исто така, достапни се сите релевантни информации како број на упат, кога и каде треба да се изврши прегледот, како и архивираните документи со извештајот од прегледот по реализацијата.

Витални параметри

Една од корисните функции на апликацијата е следењето на виталните параметри. Апликацијата ви овозможува да ги внесете и следите вашите витални знаци како висина, тежина, низок и висок крвен притисок. Со додавањето на овие податоци, апликацијата автоматски ќе пресмета вашиот индекс на телесна маса (BMI) и ќе ги визуелизира резултатите преку графикони, што ви помага да ги следите вашите здравствени трендови со текот на времето.

Рецепти

Во апликацијата „Мое здравје“, корисниците можат да имаат увид во сите издадени рецепти. Овде ќе видите кои рецепти можат веднаш да се реализираат во аптеките, а кои рецепти се за лекови кои не се на товар на Фондот за здравствено осигурување. Архивата содржи и сите претходно издадени рецепти, како и информации дали се реализирани или не.

Прегледи кај матичен лекар

Корисниците ќе имаат увид во сите податоци за прегледи кај матичен лекар, вклучувајќи го датумот на закажување и реализација на прегледот, лекарот кој го извршил прегледот, дијагноза и креираните упати и рецепти.

Вакцини и ковид-19 сертификати

Категоријата „вакцини“ содржи информации за сите вакцини кои сте ги примиле, заедно со датумите на примени дози и ревакцинација. Исто така, тука можете да пристапите до ковид-19 сертификатите и решенијата за изолација ако сте биле позитивни на тестот за ковид-19.

Странично мени и подесувања

Преку страничното мени кое се отвора со кликнување на иконата со три цртички, можете да ги прегледате вашите лични податоци, да ја промените јазичната поставка, да го промените ПИН кодот, телефонскиот број или e-mail адресата. Во секој момент можете да ја смените вашата ПИН шифра или да пријавите технички проблеми.

Апликацијата „Мое здравје“ е моќен и лесен за користење инструмент кој им овозможува на граѓаните да ги следат и управуваат со сите аспекти на своето здравје. Со нејзиното користење, корисниците можат лесно да го следат своето здравје, да пристапат до важни медицински документи и да имаат потполна контрола над своето здравствено осигурување.

The post ПРЕКУ АПЛИКАЦИЈАТА „МОЕ ЗДРАВЈЕ“ ИМАТЕ ПРЕГЛЕДНОСТ ЗА СИТЕ ПОСЕТИ НА ЛЕКАР Со еден клик го имате здравствениот картон во вашиот мобилен телефон appeared first on plusinfo.mk.

Според пријавата, во периодот од 08.07.2021 до 07.08.2024 година, тој неовластено присвоил ехо апарат M9 Mindray, кој му бил доверен како донација од Министерството за труд и социјална политика. Вредноста на апаратот изнесува 2.134.482 денари.

Како што информираа од полицијата, ова дејство било сторено со намера да се стекне со противправна имотна корист. С.Т. е обвинет дека ја злоупотребил својата позиција како директор на болницата, кога се појавила сомнителна недоследност во евиденцијата на опремата.

• КАДЕ Е ДОНИРАНИОТ ЕХО АПАРАТ? Мистериозно исчезнување на опрема во кичевската болница

„Пријавениот во своето својство како директор, неовластено го присвоил ехо апаратот кој му бил доверен како донација за потребите на болницата, што претставува кривично дело“, велат од полицијата.

Иако апаратот беше пријавен како исчезнат, полицијата започна со истрага по добиени сознанија, а првичните информации укажуваат на намерната злоупотреба на доверената опрема. Засега, обвинетиот С.Т. се соочува со обвинение за проневера во службата, а истрагата продолжува за утврдување на сите детали.

The post ПРОНАЈДЕН ИСЧЕЗНАТИОТ ЕХО АПАРАТ Кривична за поранешниот директор на кичевската болница appeared first on plusinfo.mk.

Не мислам дека треба да се расфрламе со имотот на граѓаните и тој имот да се користи на начин којшто е надвор од законот, посочи премиерот Христијан Мицкоски, коментирајќи го случајот со дипломатските пасоши кои ги бараат антикорупционерите.

Мицкоски денеска на поставувањето на камен-темелник за изградба на нова градинка во Трубарево, во одговор на новинарско прашање поврзано со барањето дипломатски пасоши од страна на членови на Државната комисија за спречување корупција (ДКСК) рече дека Министерството за надворешни работи ќе даде информација дали членовите побарале или не побарале дипломатски пасоши, како и која е политиката на Министерството по ова ова прашање.

– Немам информација во врска со дипломатските пасоши на луѓето коишто се дел од Антикорупциска комисија. Се надевам министерот за надворешни работи даде одговор на ова прашање и мислам дека Министерството за надворешни работи ќе ви даде информација дали побарале или не побарале дипломатски пасоши и која е политиката на Министерството – рече Мицкоски.

Досега дипломатски пасош добила само претседателката на ДКСК Татјана Димитровска, која вели дека е легитимно право на секој член да си побара, а институцијата ќе цени дали им следува. Според Димитровска, дипломатските пасоши им се потребни на членовите на ДКСК поради честите службени патувања во странство и затоа што се тие функционери именувани од Собранието.

The post „НЕ МИСЛАМ ДЕКА ТРЕБА ДА СЕ РАСФРЛАМЕ СО ИМОТОТ НА ГРАЃАНИТЕ“ Вака Мицкоски го коментираше барањето за дипломатски пасоши на антикорупционерите appeared first on plusinfo.mk.

Западот „директно се бори“ против Русија во Украина, рече рускиот министер за надворешни работи Сергеј Лавров во седиштето на ОН во Њујорк.

– Можете тоа да го наречете како сакате, но тие (Западот) се борат против нас, тие се борат директно против нас – рече Лавров на маргините на седницата на Генералното собрание на ОН и додаде дека тоа е хибридна војна, која ја менува реалноста.

– Тоа што тие де факто се борат против нас користејќи ги Украинците, мислам дека сите овде што се заинтересирани за ситуацијата во Украина многу добро знаат дека Американците, Британците и другите се борат пред се за да обезбедат се повеќе и повеќе оружје – рече изјави шефот на руската дипломатија.

САД и европските земји кои испорачуваа системи за вооружување на Киев од почетокот на руската инвазија во февруари 2022 година, инсистираат на тоа дека не се во војна со Москва, туку и помагаат на Украина да се одбрани.

Лавров предупреди дека е во „заеднички интерес да се избегне спирала на војна од големи размери и да се спречи конечниот колапс на механизмите за меѓународна соработка поставени во ОН“.

The post ДИРЕКТНА ВОЈНА НА ЗАПАДОТ СО РУСИЈА ПРЕКУ УКРАИНА Лавров ги обвини големите сили дека ги користат Украинците за конфликт со Москва appeared first on plusinfo.mk.

Работните тимови на претпријатието, според информацијата, се на терен е работат на надминување на проблемот.

„Ги замолуваме сите граѓани да не ја користат водата за пиење до следното известување“, порачуваат од ЈП „Водовод и канализација“ – Струга.

The post СТРУЖАНИ ОСТАНАА БЕЗ ЧИСТА ВОДА ЗА ПИЕЊЕ Забрана за консумирање поради дефект на водоводната мрежа во Струга appeared first on plusinfo.mk.

Скопјани пред неколку дена на располагање добија 500 електрични тротинети паркирани на повеќе локации низ Скопје, но несовесните граѓани веќе оштетија неколку од нив.

На социјалната мрежа Твитер се појавија фотографии на кои може да се забележи дека еден тротинет заврши во контејнер, а друг остана без екран.

Ние сме еден фин и мирољубив народ, освен во дадени моменти кога не сме такви.. pic.twitter.com/AAEF1UrViG

— Kolace (@kollace12) May 22, 2023

Викендов ги имаше насекаде оставени по тротоари и раскрсници, токму пред пешачките премини, каде што им пречат на минувачите.

Инаку една од најуспешните компании за изнајмување на електрични тротинети во Турција од пред неколку дена се појави и на македонскиот пазар. Имено, на скопјани на располагање им се 500 електрични тротинети паркирани на повеќе локации низ Скопје, од Ѓорче до Ново Лисиче.

Така, едноставно може да изнајмите електричен тротинет кој може да го пребарате со неколку клика од вашиот паметен телефон, да се превезете до посакуваната дестинација и тротинетот да го оставите каде ви одговара низ Скопје, а истиот ќе биде пронајден од компанијата преку ГПС-системот.

Сите изнајмувања и користења согласно правилата се вршат преку мобилната апликација BinBin.

За да се користи електричен тротинет, граѓаните ќе треба да ја симнат апликацијата, за која бар-код има на пунктовите, кои инаку се отстапени од ЈП Градски паркинг. Самата паликација нуди повеќе начини на плаќање.

Цената за изнајмување на тротинет е 9 денари минута, но доколку преку апликацијата ставите средства од 300 денари, добивате плус 45 денари гратис, а доколку ставите 500 денари, добивате плус 100 денари гратис. Така, цената испаѓа околу 7,3 денари за минута возење.

The post (ФОТО) ЕДЕН ЗАВРШИ ВО КОНТЕЈНЕР, ДРУГ ОСТАНА БЕЗ МОНИТОР Новите тротинети во Скопје не издржаа многу, веќе се бројат дефектите appeared first on plusinfo.mk.

Берлин побара од Швајцарија да им ги продаде тенковите „Леопард 2“ од германско производство, кои се зачувани во магацини, така што ќе може да влијае на зголемувањето на воената помош за Украина, соопшти денеска владата во Берн.

Германија сака Швајцарија да ги продаде тенковите на нивниот производител Рајнметал.

Полска, Германија, Португалија, Фиска и Шведска се меѓу земјите кои испраќаат „леопарди“ во Украина, а со тоа ја ослабуваат сопствената одбрана.

Германските министри за одбрана и економија Борис Пасториус и Роберт Хабек го информираа Берн дека тенкови од Швајцарија нема да бидат испратени во Украина.

Врз основа на законот за неутралност и ембаргото за оружје, Швајцарија не смее да испраќа оружје директно во Украина.

Швајцарската министерка за одбрана Виола Амхерд му одговори на Берлин дека евентуалната продажба ќе бара од швајцарскиот парламент официјално да заклучи дека тенковите не се оперативни.

Швајцарската армија користи 134 тенкови „Леопард 2“, додека 96 се во складиште, според Ројтерс.

Берн веќе ги отфрли барањата на Германија, Шпанија и Данска да дозволи испраќање муниција од швајцарско производство од тие земји во Украина.

The post БЕРЛИН ОСТАНА БЕЗ ТЕНКОВИ! Германија бара од Швајцарија да им купи „Леопард 2“ appeared first on plusinfo.mk.

Западните влади се вознемирени од доказите дека кинеските технолошки компании и помагаат на Комунистичката партија и нејзините разузнавачки служби да собираат големи количини на податоци ширум светот – со посебен фокус на високи политички и безбедносни цели.

Висок функционер изјави дека на целиот персонал му е наредено да го отстранат ТикТок од нивните официјални уреди, но и од нивните лични уреди доколку на нив се инсталирани апликации поврзани со работата.

Членовите на персоналот мора да ги избришат деловните апликации од нивните приватни уреди доколку инсистираат да го задржат Тик Ток.

Другите институции на Европската унија, вклучително и Советот и Парламентот, веројатно ќе го следат примерот за забрана на кинеската апликација, иако може да потрае многу подолго за Европскиот парламент да спроведе таква политика.

Забраната најверојатно ќе биде јавно објавена на редовниот пладневен брифинг на Комисијата.

Соединетите Американски Држави веќе го забранија ТикТок на многу владини уреди, додека Холандија размислува за забрана.

The post НЕМА ПОВЕЌЕ ГЛЕДАЊЕ СМЕШНИ ВИДЕА Вработените во ЕК добија забрана за користење ТикТок appeared first on plusinfo.mk.