Првиот заменик-претседател на Владата и министер за европски прашања, Беким Сали, учествуваше на Бизнис форумот Македонија – Турција во Истанбул, каде што ја нагласи важноста од продлабочување на економската соработка и отворање нови партнерства меѓу двете земји.

Во своето обраќање, Сали истакна дека Македонија и Турција имаат исклучително блиски и пријателски односи, изградени врз доверба, заемна почит и долгорочна соработка.

Тој посочи дека Турција претставува еден од најзначајните економски партнери на државата, со силно присуство на турски компании во индустријата, инфраструктурата, банкарскиот сектор, образованието и туризмот, кои, како што рече, придонесуваат за економски раст и отворање нови работни места.

Осврнувајќи се на владините приоритети, Сали нагласи дека Реформската агенда и Планот за раст на Европската Унија за Западен Балкан претставуваат значајна можност за забрзан економски развој и зголемена конкурентност.

– За првпат, европската интеграција е директно поврзана со конкретни инвестиции, економски раст и постепена интеграција во Единствениот европски пазар. Тоа отвора нови можности за компаниите, инвеститорите и граѓаните – истакна Сали.

Тој ги охрабри турските компании да ги искористат можностите што ги нудат ИПА фондовите, Планот за раст на ЕУ и Инвестициската рамка за Западен Балкан (WBIF), посочувајќи дека Коридорите 8 и 10 остануваат клучни стратешки инфраструктурни проекти во регионот.

Сали додаде дека постои значителен потенцијал за соработка во обновливите извори на енергија, дигиталната трансформација, иновациите, современите технологии и производствениот сектор, оценувајќи дека европската интеграција е процес на модернизација, конкурентност и долгорочен просперитет.

The post СИЛЕН ЕКОНОМСКИ СИГНАЛ ОД ИСТАНБУЛ Сали повика на нов бран инвестиции меѓу Македонија и Турција appeared first on plusinfo.mk.

Трибина на тема „Инфраструктурен бум – Ги градиме темелите на промените“ се одржа вечерва во Гевгелија, во организација на ВМРО-ДПМНЕ. На трибината говореа претседателот на ВМРО-ДПМНЕ и премиер Христијан Мицкоски, вицепремиерот и министер за транспорт Александар Николоски, директорот на ЈП Железници инфраструктура Синиша Ивановски, директорот на ЈПДП, Коце Трајановски, градоначалник на Општина Гевгелија, Андон Сарамандов и пратеничката во македонското Собрание, Ангелинка Петкова.

-Бугарија даде ветување дека ќе работиме заеднички на пругата по Коридор 8, а акцентот го ставаме и на пругата по Коридор 10, истакна – претседателот на Комисија за инфраструктура, урбанизам и транспорт на ВМРО-ДПМНЕ, и директор на ЈП ЖРСМ, Синиша Ивановски.

Ивановски посочи дека пругата станува број еден транспорт во цела Европа, па како резултат на тоа и Македонија ќе го следи тој чекор.

– Свесни сме дека и на европско ниво пругата станува број еден транспорт за сите граѓани во цела Европа, и ние мораме да го следиме тој огромен чекор за да дојдеме до некое исто ниво. Во Македонија пругата е многу едноставна Север-Југ од Србија до Грција, и Исток-Запад од Бугарија према Албанија, ќе имаме брза пруга од Србија према Грција поминувајќи низ Гевгелија, но паралелно се гради во моментот од Скопје према Софија поделено на три дела, првиот од Скопје до Куманово веќе постои одамна, Куманово до Бељаковце завршен овој февруари, моментално се гради Бељаковце-Крива Паланка тој е околу 35 километри, имаме прогрес околу 30-35 отсто со некој рок за завршување отприлика за едно година и пол – објасни Ивановски.

Тој нагласи дека Бугарија на состанокот во Брисел дала ветување дека заеднички ќе се работи на изградбата на тунелот.

– Можам да кажам дека, вчера јас лично бев во Брисел на покана на ЕУ каде што Македонија и Бугарија имаа состанок околу решавањето на тунелот, вчера и Бугарија сериозно ветување дадоа дека ќе работиме заеднички да го работиме овој тунел а паралелно они веќе почнуваат со постапки за пругата од Бугарија кон граница со Македонија во четири дела да биде реконструирана, изградена со тоа што ќе добиеме пруга од Скопје до Софија со некоја идеална брзина од 100-120км на час, но акцентот во железничкиот транспорт во Македонија ќе биде од влез од Србија до Македонија до излез кај Гевгелија према Грција да имаме со 160 на час патнички сообраќај со минимален број на застанувања – истакна Ивановски.

– Кога ВМРО-ДПМНЕ е на власт работи и ние оставаме дела зад себе, рече Коце Трајановски, директор на Јавното претпријатие за државни патишта на вечерашната трибина во Гевгелија.

На трибината Трајановски информираше за тоа каква состојба затекнал во претпријатието и што се е направено за овој краток период од една година Влада.

– Кога дојдов за директор верувајте дека сите делници беа замрени, не се работеше механизацијата или ја немаше или пак не работеше. Успеавме да направиме патишта, експресни и автопати во должина од 100 километри – кажа Трајановски.

Пред присутните на трибината информираше за реализираните патни правци во овој период.

– Од Страцин до Крива Паланка, од Градско до Дренево од Дреново до Фариш, го пуштивме и патот од Врбјани до Ботун кој по 11 години беше пуштен. Тоа е одлика на наше домаќинско и одговорно работење. Ние поставуваме нови стандарди за работење во сите институции – вели Трајановски.

Додаде дека тука не се сопира и оти се работи на уште многу други патни правци.

– Работиме на еден од најважните правци Кичево – Охрид, интензивно работиме за по 13 години или се надевам следната година да го пуштиме и тој патен правец – изјави Трајановски.

Според директорот на Јавното претпријатие за државни патишта, Македонија се наоѓа во една експанзија на патна инфраструктура.

– Веќе го објавивме тендерот за Скопје – Блаце за оние фамозни 10 километри. Тие почнаа од Блаце кон Скопје и направија само два километри кои завршуваат во еден дол – информираше Трајановски.

Дел од вечерашната трибина беше и градоначалникот на Општина Гевгелија, Андон Сарамандов. Тој потенцираше дека Коридорот 10 ќе биде од огромно значење за општина Гевгелија, која, според него, е транзитен центар, а ги спомена и индиректните бенефити кои ќе влијаат на развојот на туризмот во Гевгелија. Ги спомена и двете инвестиции кои во моментов се во фаза на реализација и кои ќе овозможат 500 нови работни места.

– Општина Гевгелија има добра местоположба. Се наоѓа во близина на граничниот премин Богодорица, но тука минува и коридорот 10 којшто од страна на министерот за транспорт, Александар Николоски е веќе најавен и во иднина ќе треба да се реализира, рече Сарамандов.

– За нас како град за граѓаните на Гевгелија е од посебно значење. Пред се за локалниот економски развој со обнова на асфалтниот пат и изградба на оваа пруга. Во Гевгелија ќе се создадат предуслови да биде уште повеќе отворена кон овој голем транзитен коридор. А секако ќе придонесе, ќе се отворат можности за нови инвестициони вложувања во нашата општина – рече градоначалникот.

Според Сарамандов патиштата отвораат само нови можности за општина Гевгелија.

– Во моментов, како резултат на нашата досегашна работа, имаме две инвестиции кои се во тек на реализација. Едната на влезот во градот на површина од 20000 м2, а другата на патот на граничниот премин до Богородица на 7000 м2. Овие две инвестиции ќе овозможат 500 нови работни места се надевам до крајот на оваа година – истакна Сарамандов.

Според него, од големо значење е индиректниот бенефит, со цел да се развие туризмот во општина Гевгелија

– Но уште поважно за мене како градоначалник е индиректниот бенефит, тие да придонесат да имаме што поголем број на туристи во нашиот град – заклучи Сарамандов.

На денешната панел дискусија на тема „Инфраструктурен бум, ги градиме темелите на промените“ се обрати и пратеничката од ВМРО-ДПМНЕ, Ангелинка Петкова.

Петкова истакна дека амандманот за покачување на правото на посебен додаток и правото на попреченост е изгласан и зголемен за 50 милиони денари, со што со тој амандман ќе добијат покачување сите лица со попреченост до 26 години, и лицата над 26 годишна возраст кои го користат правото на посебен додаток.

– Оваа недела се заврши амандманската расправа за ребалансот на Комисијата за финансирање и буџет, како човек кој доаѓа од социјалната заштита горда сум што сум потписник заедно со моите колеги од ВМРО-ДПМНЕ на еден амандман со кој баравме 50 милиони денари за покачување на правото на посебен додаток и правото на попреченост. Амандманот беше прифатен, со овој амандман ќе добијат покачување сите лица со попреченост и тоа лицата до 26 годишна возраст кои го користат правото на посебен додаток, како и лицата над 26 годишна возраст кој го користат правото на попреченост – рече Петкова.

Пратеничката посочи дека Законот за заштита на децата кој бил закочен во 2023 година, со законските измени е откочен и повторно е воспоставен процесот на работење на Комисија за давање лиценци кои се главен критериум за вработување во градинките.

– Ние како Влада и како пратеници ќе продолжиме и понатаму да се грижиме за оваа категорија на лица и да носиме закони кои ќе го подобрат нивниот начин на живеење. Друг закон кој е од големо значење за граѓаните е законот за заштита на децата, со овие законски измени ние го откочивме процесот на работење на Комисијата за давање на лиценци, за лица кои сакаат да бидат вклучени во системот на згрижување на деца од предучилишна возраст, оваа Комисија застана со работа со месец октомври 2023 година, и од тогаш па до денес немаше можност за издавање на лиценци, а лиценците се главен критериум и основен услов за вработување во градинките – децидна е Петкова.

The post ИНФРАСТРУКТУРЕН БУМ – ГИ ГРАДИМЕ ТЕМЕЛИТЕ НА ПРОМЕНИТЕ Трибина на ВМРО-ДПМНЕ во Гевгелија за една година влада appeared first on plusinfo.mk.

– Дел од овие тези ги пласираа оние кои на коруптивен начин сакаа да ја добијат работата за третата фаза за пругата кон Бугарија. Случајот има неколку елементи. Првиот и клучен елемент е предвидената цена на чинење. Тоа се 24 милиони евра по километар, што е поскапо и од автопатот. Само за илустрација, цена на чинење на брза пруга каде било во Европа со 200 километри на час е 4 до 10 милиони евра, зависно од теренот. Овде за пруга која ќе оди со 60 километри на час е 24 милиони евра – објаснува Николоски.

Според него исто како за потегот кон Блаце, избрана е како што вели најтешката траса.

– Не знам дали знае јавноста, но единствен начин да се изгради третата делница е само преку пруга како на каубојските филмови. Толку теренот е планински и лош, па само преку пруга може да се носат материјали, работници. Камион не може да пристапи. Невидена работа – кажа Николоски.

Николоски упати прашање до неговите претходници велејќи „зошто тоа е проектирано така, зошто покрај тунел кој завршува нигде испроектирани се два тунели под Крива Паланка?”.

– Тоа ни Швајцарија не го прави. Јас се сметам за прошетан човек, но никаде во Европа и светот не сум видел да се градат тунели под градови. Има покрај градови, низ планини, но под градови нема – вели Николоски кој укажува дека прво, многу е јасно оти е пумпана цената.

Ние не сме глупави, категоричен е Николоски, да прифатиме таква пумпана цена за проект кој веројатно нема да се изгради никогаш.

– Второ, зошто на проектот се пријавија само несериозни компании? Трето, зошто Бугарија не работи ништо од нивна страна? Да поедноставам, ние сакаме и ќе ја изградиме пругата кон Бугарија, но поевтино и порационално, вака не.

Според Николоски потребна е нова траса која ќе се совпадне со Бугарија.

– Не знам дали видовте, Бугарија рече дека индикативна цена за нивниот дел е 1,2 милијарди евра. Кај ќе ги најде Бугарија тие пари? Многу пари се за која било држава. Ние трошиме 560 милиони евра, а тие 1,2 милијарди евра за пруга што ќе вози 60 километри на час – изјави Николоски.

Во однос на Коридор 10, Николоски додава дека таква е географијата на Македонија, која е идеално поделена на два дела со реката Вардар.

– По Вардар одат најбитните коридори и за тие коридори светски и балкански војни се воделе во историјата. Сега ние треба да сме паметни и тоа да го искористиме. Автопат за среќа имаме, треба да изградиме и брза пруга и буквално како лего коцки од левата и десната страна од брзата пруга да наредиме економски зони, каде ќе има фабрики кои ќе бидат основната додадена вредност во македонското стопанство, бидејќи секој што произведува ќе сака робата брзо да ја транспортира и извезе. Таа роба ќе излегува на 2 големи пристаништа (солунското и атинското) и ќе може со брза пруга за неколку часа да е во Будимпешта, Виена или во Прага – смета Николоски.

Министерот во интервјуто говори и за проблемите во работењето со кои се соочуваат Македонски пошти и Железници Транспорт.

– Во однос на Пошти, проблемот е што Агенцијата за пошти има дадено премногу лиценци на приватни пошти кои се нелојална конкуренција на Македонски пошти. Најголем дел од лиценците се на косовски компании. Тоа е проблемот со Пошти и ќе го решаваме – посочи Николоски.

Тој информира и за состојбата во однос на Железници Транспорт, односно за идните планови.

– За да генерира приходи Железници мора да има локомотиви. Претходниот директор сите локомотиви ги има онеспособено, актуелниот директор ги враќа во функција. Сега имаме 3 активни локомотиви, до крај на годината ќе имаме 10. Профитот е во товарниот сообраќај, патничкиот сообраќај е субвенциониран. Кога ќе имаме 10 локомотиви, Железници-Транспорт, а со тоа и Инфраструктура, зашто плаќаат за користење на пругата, ќе бидат профитабилни компании – вели Николоски.

The post ТОА Е ПРЕСКАПО ЗА ПРУГА КОЈА ЌЕ ОДИ СО 60 КИЛОМЕТРИ НА ЧАС Поевтино и порационално ќе ја изградиме пругата кон Бугарија, вели Николоски appeared first on plusinfo.mk.