Американскиот претседател Доналд Трамп изјави за Ен-би-си дека е отворен за испраќање американски сили кои би ги презеле иранските нуклеарни залихи, но дека се надева оти тоа ќе се направи како дел од договор со Техеран.

Прашањето за иранската нуклеарна програма и залихите на високо збогатен ураниум, кои Трамп ги нарече „нуклеарна прашина“, се наоѓа во фокусот на актуелните тензии.

Тој рече дека, доколку се постигне договор, двете страни заеднички би ги уништиле тие залихи.

– Ако постигнеме договор, сега кога сме пријателски расположени, сите ќе одиме заедно. Тоа ќе биде наша опрема. Ќе ја изнесеме и ќе ја уништиме, било на лице место или надвор од локацијата – изјави Трамп.

Тој додаде дека, доколку не се постигне договор, САД „воено и остро“ би дејствувале против Иран, вклучително и со можност за влез на американски сили. Претседателот нагласи дека ќе се чека момент кога операцијата би била „целосно безбедна“ при преземањето на залихите.

– Ќе одиме со нив или без нив. Но нема да дозволиме луѓе да пукаат во нас, во ред? – рече тој.

Трамп ги отфрли критиките дека го прекршил своето предизборно ветување за држење на САД надвор од нови воени конфликти.

– Прво, јас не гарантирав дека нема да има војна. Зошто би ја градел најсилната војска во светот? – изјави тој.

Тој ги бранеше и своите воени потези во Венецуела и Иран, тврдејќи дека тие не се долготрајни како американските ангажмани во Ирак и Виетнам.

– Таму сме неколку месеци. Заканата е главно помината. Наскоро ќе исчезне. Но не можете да дозволите Иран да има нуклеарно оружје, инаку ќе ве разнесат – тврди Трамп.

Во изјавата тој се осврна и на, како што рече, „сериозно повредениот“ врховен лидер на Иран.

Според неговите зборови, иранскиот врховен лидер Али Хамнеи бил „многу сериозно повреден“, иако не се наведуваат дополнителни детали за ова тврдење.

– Договорот со Техеран е „многу блиску“, но сè уште остануваат „неколку“ спорни точки – рече Трамп во интервју емитувано во неделната емисија „Мит д Прес“, на Ен-би-си, кое заврши нагло откако Трамп се налути откако водителката го праша дали се уште тврди дека изборите во 2020 година биле наместени, иако, како што рече таа, нема докази за тоа.

ТРАМП СЕ СКАРА СО ВОДИТЕЛКАТА И СИ ЗАМИНА СРЕДЕ ИНТЕРВЈУ „Вие сте нечесна, корумпирана телевизија, доста ми е од вас!“

The post АКО НЕ СЕ ДОГОВОРИМЕ, ВЛЕГУВАМЕ ВОЕНО И ОСТРО ДА ИМ ГИ ОДЗЕМЕМЕ НУКЛЕАРНИТЕ ЗАЛИХИ! Трамп упати нови закани кон Иран appeared first on plusinfo.mk.