конзервативна партија Archives - plusinfo.mk

ЌЕ ГИ ЗБЛИЖАМ ПАРТИЈАТА И ЗЕМЈАТА Сунак на сопартијците им вети дека ќе им служи со интегритет и понизност

МИА — Mon, 24 Oct 2022 16:50:07 +0000

Велика Британија се соочува со сериозни економски предизвици и има потреба од стабилност и единство, изјави денеска Риши Сунак, во својот прв јавен говор откако беше прогласен за лидер на владејачката Конзервативна партија и иден премиер.

– Нема сомнеж дека се соочуваме со голем економски предизвик – рече Сунак.

Тој истакна дека на Британија сега и треба стабилност и единство и оти негов приоритет ќе биде да ги зближи Конзервативната партија и земјата.

– Се колнам дека ќе ви служам со интегритет и понизност – изјави Сунак.

Тој додаде дека континуирано ќе работи во корист на британскиот народ.

Сунак рече дека му е чест што ја има поддршката од своите колеги пратеници и што е избран за лидер.

– Најголемата привилегија во мојот живот е што можам да и служам на партијата што ја сакам и да и вратам на земјата на која и должам толку многу, нагласи тој.

Сунак во говорот и одаде признание на Лиз Трас за нејзиното достоинствено лидерство во тешки околности во странство и дома.

The post ЌЕ ГИ ЗБЛИЖАМ ПАРТИЈАТА И ЗЕМЈАТА Сунак на сопартијците им вети дека ќе им служи со интегритет и понизност appeared first on plusinfo.mk.

ЈАС СУМ БОРЕЦ КОЈ НЕ СЕ ОТКАЖУВА Британската премиерка се држи за сламка, инфлацијата е највисока во последните 40 години

МИА — Wed, 19 Oct 2022 14:37:12 +0000

Британската премиерка Лиз Трас изјави дека е „борец кој не се откажува” додека се обидува повторно да воспостави авторитет над Конзервативната партија во услови на сè почести медиумски извештаи дека се интензивираат повиците за нејзина смена. Трас се обидува да собере поддршка во партијата, откако беше принудена да се откаже од планот за намалување на даноците, поради што некои конзервативни пратеници побараа нејзина смена од лидерската функција само неколку недели по преземањето на премиерската функција.

Таа призна дека нејзините радикални економски планови отишле „премногу далеку и пребрзо” откако инвеститорите им свртеле грб на фунтата и државните обврзници.

Но, бидејќи каматните стапки растат и официјалните бројки покажуваат дека инфлацијата е највисока во последните 40 години, Трас – избрана од конзервативните пратеници со ветување дека ќе ги намали даноците и ќе ја одржи јавната потрошувачка – се соочува со битка да ја убеди јавноста и нејзината партија дека може да одговори на кризата со трошоците за живот.

Анкетите покажуваат дека конзервативците заостануваат околу 30 поени зад главната опозициска Лабуристичка партија, а нејзиниот рејтинг е катастрофален.

– Јас бев многу јасна дека се извинувам и оти направив грешка – им рече Трас на опозициските пратеници додека одговараше на прашања во парламентот. Јас сум некој кој е подготвен да се соочи со тоа. Подготвена сум да донесам тешки одлуки – додаде Трас.

Шпекулациите за иднината на премиерката продолжуваат да растат, а медиумите пишуваат дека бунтовните конзервативци одмеруваат кој треба да ја замени а не дали треба да замине.

Додека беше испрашувана за нејзините пресврти во економската политика, конзервативните пратеници изгледаа забележливо непријатно, коментираат медиумите.

Трас, исто така, се соочи со потсмев од лидерот на лабуристите Кир Стармер, кој коментираше дека се пишува нова книга за нејзиниот мандат која треба да излезе до Божиќ.

– Дали е тоа датумот на излегување или насловот? – праша тој и подоцна рече дека таа му поставувала прашања за политиката на лабуристите бидејќи „ние сме влада во чекање”.

Трас и нејзиниот нов министер за финансии Џереми Хант очајнички се обидуваат да ги балансираат финансиите откако нејзината сега веќе укината економска програма ја разниша довербата на инвеститорите. Тие, исто така, се обидуваат да избегнат отуѓување на конзервативните пратеници или губење на понатамошната јавна поддршка. Таа во Парламентот рече дека е посветена на зголемување на државните пензии во согласност со инфлацијата, откако министрите со денови одбиваа да гарантираат дека ќе се случи тоа, што предизвика широки критики. Но, таа одби да го даде истото уверување за социјалната помош и за странската помош.

Таа, исто така, се обиде да го заобиколи конзервативното противење на фракингот со ветување дека подоцна ќе даде детали за тоа како локалните заедници ќе можат да дадат согласност за какви било идни проекти.

Објавата ќе се совпадне со гласањето на лабуристите за тоа дали треба да има целосна забрана за фракинг, откако владата минатиот месец го укина мораториумот во Англија што беше во сила од 2019 година.

Конзервативните политичари, одговорни за спроведување на партиската дисциплина меѓу пратениците, испратија порака дека гласањето ќе се третира како „глас за доверба на владата”.

Коментаторите велат дека победата во ова гласање може да им овозможи на неа и на нејзините поддржувачи да кажат дека партијата има доверба во нејзиното раководство.

The post ЈАС СУМ БОРЕЦ КОЈ НЕ СЕ ОТКАЖУВА Британската премиерка се држи за сламка, инфлацијата е највисока во последните 40 години appeared first on plusinfo.mk.

ВО МОМЕНТОТ КОГА ЛИЗ ТРАС НАЈАВИ ОДЛУЧНА БОРБА СО ПУТИН Инцидентот во студиото ја преплаши министерката

плусинфо — Wed, 27 Jul 2022 08:06:28 +0000

Во моментот кога британската министерка за надворешни работи, Лиз Трас, објаснуваше дека доколку Владимир Путин победи во Украина тој нема на тоа да застане, неочекувано во телевизиското студио се слушна силен тресок, по што емисијата во живо набргу беше прекината.

Лиз Трас учествуваше на ТВ дебата со главниот конкурент Риши Сунак, во пресрет на партиските избори за лидерската позиција во Конзервативната партија на Велика Британија. Една од темите на дебатата беше и односот кон војната во Украина, каде од февруари се одвиваат операциите на руската армија. И двајцата кандидати за премиерската функција изразија мошне цврст став контра политиката предводена од рускиот претседател.

Сепак, во еден момент се слушна тресок, а од лицето на Трас можеше да се претпостави дека се работи за ужасна глетка и таа за момент како да ја загуби присебноста и ладнокрвноста. Од телевизијата којашто го вршеше преносот, подоцна беше објавено дека водителката на дебатата се онесвестила и се струполила на сред емисија. Сепак, таа е добро и падот не оставил сериозни последици по нејзиното здравје.

The post ВО МОМЕНТОТ КОГА ЛИЗ ТРАС НАЈАВИ ОДЛУЧНА БОРБА СО ПУТИН Инцидентот во студиото ја преплаши министерката appeared first on plusinfo.mk.

ДЕВЕТМИНА ВО ТРКАТА ЗА НАСЛЕДНИК НА ЏОНСОН Лидерот ќе се избере до октомври

МИА — Sun, 10 Jul 2022 13:11:31 +0000

Девет конзервативци засега се во трката за наследник на Борис Џонсон на функцијата британски премиер.

Во трката најверојатно ќе доминира темата за даноците поради високата инфлација, зголемувањето на животните трошоци, стагнирањето на раст и релативно високите даночни стапки.

Поранешните министри за здравство Џереми Хант и Саџид Џавид ветија дека ќе го намалат данокот на добивка откако и двајцата одделно ги објавија своите понуди за лидерското место на ториевците.

И министерот за финансии Надим Захави и министерот за транспорт Грант Шапс најавија учество во трката за лидер на Конзервативната партија, и исто така најавија намалување на дaноците во Велика Британија.

Хант, Џавид и Захави не се меѓу најпопуларните членови на Конзервативната партија според неодамнешните анкети, но тие се меѓу најистакнатите кои почнаа кампањи.

Претходно кандидатура најави и поранешниот министер за финансии Риши Сунак, кој го помогна бунтот во владата, што доведе до оставка на Џонсон,

Покрај нив кандидатура најави и Шапс, но според анкетите тој не е фаворит.

Јавната обвинителка и заговорничка на Брегзит, Суела Браверман, релативно непознатиот поранешен министер за рамноправност, Кеми Баденох и пратеникот Том Тугендат, исто така, ги објавија своите кандидатури. Во трката се вклучува и пратеничката Пени Мордоунт.

Се очекува во трката да влезе и актуелната шефица на британската дипломатија, Лиз Трас, која според анкетите е една од најпопуларните ториевски политичари.

Најголема поддршка според анкетите има министерот за одбрана Бен Волас, но тој изјави дека нема да се кандидира за лидерското место во Конзервативната партија.

Џонсон, чиј тригодишен премиерски мандат беше обележан со скандали, излегување на земјата од Европска Унија и пандемијата со ковид-19, изјави дека ќе остане на функцијата додека не се избере неговиот наследник.

Членовите на Конзервативната партија треба да го изберат својот нов лидер пред партиската годишна конференција на почетокот на октомври, кога 358 пратеници ториевци ќе гласаат во повеќе кругови додека не се изберат двајца кандидати за завршниот круг.

The post ДЕВЕТМИНА ВО ТРКАТА ЗА НАСЛЕДНИК НА ЏОНСОН Лидерот ќе се избере до октомври appeared first on plusinfo.mk.

ЌЕ ЈА СОЧУВА ЛИ ЏОНСОН ПРЕМИЕРСКАТА ФОТЕЛЈА? На конзервативците им е доста од неговите скандали

плусинфо — Mon, 06 Jun 2022 10:30:16 +0000

Британскиот премиер Борис Џонсон денес ќе се соочи со гласање за доверба од страна на пратениците на владејачката Конзервативна партија, им кажа на пратениците претседавачот на Комитетот 1922 Греам Брејди, пренсува Ројтерс.

„Надминат е прагот од 15 отсто од пратениците на парламентарната партија кои бараат гласање за доверба на лидерот на Конзервативната партија“, порача тој.

Доколку Џонсон изгуби во гласањето во кое учествуваат 359 пратеници на Конзервативната партија, тој ќе биде сменет како лидер на таа партија и премиер. Ако победи, ќе биде безбеден од некое ново гласање за доверба една година.

Џонсон со месеци е во центарот на скандалите, најмногу поради забавите кои биле одржување во зградите на владата додека на сила бил карантинот поради ковид.

Британската министерка за надворешни работи Лиз Трас кажа дека го поддржува Џонсон во гласањето за доверба.

„Премиерот ја има мојата стоотстотна поддршка на денешното гласање и силно ги охрабрувам колегите да го поддржат. Тој пружи поддршка во заздравувањето од ковид и ја поддржа Украина соочена со руска агресија. Се извини за направените грешки. Сега мора да се фокусираме на економскиот раст“, напиша Трас на Твитер.

The post ЌЕ ЈА СОЧУВА ЛИ ЏОНСОН ПРЕМИЕРСКАТА ФОТЕЛЈА? На конзервативците им е доста од неговите скандали appeared first on plusinfo.mk.