Познатиот милијардер Бил Гејтс изјави дека сексуалниот престапник Џефри Епстин се обидел да го уценува со чувствителни информации од неговиот приватен живот.

– Никогаш не сум бил сведок ниту имал индикации дека Епстин бил вклучен во тековни криминални активности. Никогаш не сум бил на неговиот остров, ранч или дом во Флорида. Никогаш не сум жртвувал никого – изјавил Гејтс сведочејќи пред Комитетот за надзор на Претставничкиот дом на САД.

Според неговиот исказ, Епстин подоцна дознал информации за неверството на Гејтс во бракот со Мелинда Френч Гејтс.

„Се обиде да ме принуди“

Гејтс тврди дека Епстин се обидел да ги искористи тие информации за повторно да воспостави соработка.

– Како што јавноста сега може да види од објавените документи, Епстин се обиде да ги искористи информациите за моето неверство, заедно со многуте лаги што ги изгради врз нив, за да ме принуди повторно да соработувам – навел Гејтс во својата изјава.

Тој додал дека обидот не успеал, но покажал како Епстин ги користел контактите со влијателни луѓе за свои цели.

Средбите почнале во 2011 година

Гејтс изјавил дека првите средби со Епстин ги имал во 2011 година.

Според него, мотивот бил обид преку неговите контакти да обезбеди поддршка за глобални здравствени проекти и филантропски иницијативи.

– Фокусот секогаш беше на фактот дека тој познавал многу богати луѓе и тврдеше дека може да ги натера да донираат пари за глобалното здравство. Гледано од денешна перспектива, тоа беше ќорсокак – изјавил Гејтс.

Случај што продолжува да отвора прашања

Односот меѓу Гејтс и Епстин повторно дојде во фокусот по објавувањето на документи поврзани со случајот.

Комисијата се обидува да утврди дали Епстин користел компромитирачки информации за влијателни личности и дали преку такви методи градел мрежа на влијание.

The post ЕПСТИН СЕ ОБИДЕ ДА МЕ УЦЕНУВА, ВЕЛИ БИЛ ГЕЈТС Престапникот знаел кој е најголемиот „грев“ на милијардерот appeared first on plusinfo.mk.

Партнерството меѓу двете нации денес е поважно од кога било, истакна британскиот крал Чарлс Трети во говорот пред пратениците на давата дома на Конгресот на САД.

Кралот Чарлс посочи дека истата „непоколеблива решителност“ покажана по нападите на 11 септември 2001 година е потребна за заштита на Украина и на нејзиниот најхрабар народ, за да се обезбеди вистински праведен и траен мир.

– Кога Велика Британија и Америка се обединети врз основа на заедничките вредности, тоа е посебната состојка во нашите односи – нагласи британскиот монарх.

Тој изрази сочувство кон жртвите на сексуално насилство во контекст на скандалот со Џефри Епстин и ја нагласи „заедничката сила“ на Обединетото Кралство и на САД во поддршката на преживеаните.

Кралот го осуди обидот за атентат врз претседателот Доналд Трамп за време на медиумска вечера во Вашингтон, нагласувајќи дека „таквите акти на насилство никогаш нема да успеат“.

Во говорот во салата на Претставничкиот дом, преполна со публика и со новинари, Чарлс го истакна значењето на НАТО, вредноста на европските партнери на САД и потребата од ограничување на глобалните конфликти со запирање на „претворањето плуговите во мечеви“ – теми кои се меѓу приоритетите на Владата на британскиот премиер Кир Стармер.

– Почитувани членови на 119-от Конгрес, токму тука, во овие сали, духот на слободата и на ветувањето на основачите на Америка се присутни во секоја седница и во секој даден глас. Одлуките се носат не по волја на еден, туку преку дебата на мнозина, кои го претставуваат живиот мозаик на САД. Токму тоа што сме витални, разновидни и слободни општества ни ја дава колективната сила, вклучително и да ги поддржиме жртвите на злото што, за жал, постои и денес – рече Чарлс.

Кралот престојува во четиридневна државна посета на САД по повод 250-годишнината од американската независност. Во говорот тој се осврна и на историските врски меѓу поранешните противници – САД и Велика Британија.

– Сојузот што нашите две нации го изградија низ вековите, и за кој сме длабоко благодарни на американскиот народ, е навистина уникатен – посочи монархот.

Обраќајќи му се на претседателот на Претставничкиот дом, Мајк Џонсон, тој додаде:

– Ова партнерство, господине претседател, според мене денес е поважно од кога било.

The post ПАРТНЕРСТВОТО МЕЃУ САД И ВЕЛИКА БРИТАНИЈА ДЕНЕС Е ПОВАЖНО ОД КОГА БИЛО ДОСЕГА Кралот Чарлс се обрати пред американскиот Конгрес appeared first on plusinfo.mk.

Американскиот претседател Доналд Трамп ја отпушти министерката за внатрешна безбедност Кристи Ноем и најави дека за нејзин наследник ќе го номинира сенаторот од Оклахома Маркван Малин.

Трамп одлуката ја објави преку социјалните мрежи, само два дена откако Ноем се соочи со остри прашања за време на сослушување во Конгрес на САД, каде што ја критикуваа и републиканци и демократи.

И покрај разрешувањето од функцијата, Трамп најави дека Ноем ќе добие нова улога – специјален пратеник за иницијативата „Штитот на Америка“, нова стратешка безбедносна програма која, според него, ќе биде фокусирана на регионот на Западната хемисфера.

Со оваа одлука, Ноем станува првиот член на кабинетот што ја напушта функцијата во вториот мандат на Трамп.

Нејзиното заминување доаѓа по турбулентен период за Министерството за внатрешна безбедност, кога строгите мерки за спроведување на имиграциските закони предизвикаа протести и бројни тужби низ Соединетите Американски Држави.

The post ПОЛИТИЧКИ ЗЕМЈОТРЕС ВО ВАШИНГТОН Трамп ја отпушти министерката за внатрешна безбедност appeared first on plusinfo.mk.

Жилејн Максвел, поранешна соработничка на осудениот сексуален престапник Џефри Епстин, ќе се повика на уставното право да не сведочи за време на испрашувањето пред Надзорниот комитет на Претставничкиот дом. Тоа го потврди нејзиниот адвокат, додавајќи дека таа нема да одговара на прашања, вклучително и оние за шефот на САД Доналд Трамп.

Максвел се очекува виртуелно да се појави на сослушување зад затворени врати, од затвор во Тексас. Таму издржува 20-годишна затворска казна за трговија со луѓе за сексуална експлоатација.

Во претходна објава на социјалните мрежи, нејзиниот адвокат Дејвид Оскар Маркус рече дека Максвел е „подготвена да зборува целосно и искрено доколку претседателот Трамп ја помилува“.

Белата куќа претходно изјави дека „не се дава, ниту се дискутира за никакво помилување“ во врска со Максвел.

Петтиот амандман како штит

Адвокатот Дејвид Оскар Маркус потврди дека Максвел ќе се повика на Петтиот амандман од Уставот на САД.

– Можам да потврдам дека таа ќе се повика на Петтиот амандман – изјави Маркус за Би-Би-Си.

Наместо одговори, таа ќе прочита кратка подготвена изјава на самиот почеток на сослушувањето, најави демократскиот конгресмен Ро Кана.

Планирани прашања за Трамп и за соучесници

Кана во писмо до претседателот на комитетот, републиканецот Џејмс Комер, наведе дека има намера да ја праша Максвел за судски документ поднесен минатата година. Во него се споменуваат четири именувани соучесници и уште 25 лица кои не се обвинети во истрагата за Епстин.

Планирани се и прашања за социјалниот однос меѓу Епстин и Доналд Трамп, како и дали некогаш било разговарано за евентуално помилување на Максвел.

Трамп повеќепати негирал каква било кривична поврзаност со Епстин. Тој тврди дека контактот бил прекинат пред децении и дека никогаш не бил обвинет од жртвите на финансиерот.

Контрадикции и стари изјави

Кана оцени дека одлуката на Максвел да молчи е неконзистентна со нејзиното претходно однесување. Тој потсети дека таа не се повикала на Петтиот амандман кога лани се сретнала со заменик-јавната обвинителка Тод Бланш.

Според транскрипт од таа средба, Максвел изјавила дека не била сведок на несоодветно однесување од Доналд Трамп или од поранешниот претседател Бил Клинтон. Таа тогаш тврдела и дека наводната „листа на клиенти“ на Епстин не постои.

Милиони документи и притисок од жртвите

Сослушувањето беше одложено од минатиот август, на барање на одбраната, за да се почека одлука од Врховниот суд. Доаѓа во чувствителен момент, откако Министерството за правда на САД објави милиони страници документи од истрагата за Епстин.

Членовите на Конгресот од понеделник ќе можат лично да ги прегледуваат нередактираните материјали во Министерството за правда, објави Си-Би-Ес.

Во меѓувреме, група жртви на Епстин објави видео со повик за целосна транспарентност и за објавување на преостанатите редактирани документи. Бланш ги негираше сите обвинувања за прикривање, тврдејќи дека нема „скриени информации“ што Министерството намерно ги штити.

The post ЌЕ ЗБОРУВА САМО АКО ТРАМП ЈА ПОМИЛУВА? Соработничката на Епстин одлучи да молчи на сведочењето appeared first on plusinfo.mk.

Време е да се објават досиејата на Епстајн, бидејќи немаме што да криеме, напиша претседателот на САД Доналд Трамп на социјалните мрежи повикувајќи ги Републиканците да гласаат „за“. Според него, откривањето на документите ќе стави крај на, како што ја нарече, „измамата на демократите“ насочена кон оцрнување на неговото име.

Позицијата на Трамп доаѓа како изненадување, коментира Би-Би-Си.

„Главната промена во ставот на Трамп доаѓа откако потенцијално десетици републиканци сигнализираа дека се подготвени да ги напуштат редовите и да гласаат за објавување на документите“.

Американските законодавци, кои со месеци притискаат за декласификација на документите поврзани со истрагата против финансиерот Џефри Епстин, конечно се приближуваат до историска победа. Очекувањата се дека Претставничкиот дом ќе гласа во корист на предлог-законот, откако повеќе од сто републиканци застанале зад иницијативата, дел од нив и покрај првичниот отпор на раководството и на самиот Доналд Трамп, јави Политико.

Претседателот на Претставничкиот дом, Мајк Џонсон, деновиве изјави дека гласањето за објавување на документите би помогнало да се стави крај на шпекулациите дека Трамп имал поврзаност со Епстајн.

– Републиканците во Домот треба да гласаат за откривање на досиејата, бидејќи немаме што да криеме – напиша Трамп, повикувајќи на транспарентност.

Во објавата тој ги нападна „радикалните левичари“, обвинувајќи ги дека го користат случајот за да го свртат вниманието од, како што рече, „успесите на Републиканската партија“.

Во јавноста повторно се појавија документи што отвораат дилеми за мрежата на Епстајн, меѓу нив и е-пошта од 2019 година во која тој наводно пишува дека Трамп „знаел за девојките“. Белата куќа ги обвини демократите дека селективно објавуваат материјали за да го компромитираат поранешниот претседател.

Иако Трамп и Епстајн се фотографирани заедно на настани од 90-тите, Трамп тврди дека двајцата се скарале „пред да излезат обвиненијата“. По самоубиството на Епстајн во 2019 година, Трамп нареди Министерството за правда на САД да испита дали видни демократи имале поврзаност со финансиерот.

Трамп никогаш не бил обвинет во врска со случајот. Официјално, Епстајн почина во затвор додека го очекуваше судењето за сексуална трговија. Тој имал блиски врски со политичари и славни личности од целиот свет.

The post ПРЕСВРТ, ТРАМП ПОВИКА ДА СЕ ОБЈАВАТ ДОСИЕЈАТА НА ЕПСТАЈН Попушти пред притисокот на Републиканците? appeared first on plusinfo.mk.