Компанијата над 60 % од своите пласмани реализира на странските пазари, а очекува годината да ја заврши со консолидирани пласмани меѓу 355 и 360 милиони евра.

Од развојот на „Алкалоид“ и улогата на пазарот на капитал до можностите што ги отвораат интернационализацијата, иновациите и новите технологии – ова беа дел од темите на специјалниот разговор со Генералниот директор и Претседател на УО на „Алкалоид“ АД Скопје, Живко Мукаетов, на 25. Конференција на Македонската берза.

Во рамките на програмскиот сегмент „Специјални говори/Интервју на бина“, Мукаетов учествуваше во разговорот насловен „Искуство на македонска Blue-Chip компанија“, модериран од Иван Штериев, главен извршен директор на Македонска берза АД Скопје. Разговорот отвори повеќе теми поврзани со развојот на компаниите, улогата на пазарот на капитал, значењето на транспарентноста и можностите за раст и интернационализација.

„Континуираниот раст подразбира предизвици, приспособувања и внимателно пресметани одлуки засновани на веродостојни податоци. Фармацевтската индустрија е една од најдинамичните и најстрого регулираните, па зад секоја одлука стојат сериозни анализи и јасна визија. За нас отсекогаш било најважно трендот на раст да биде стабилен, здрав и одржлив“, истакна Мукаетов.

Како примери за долгорочни стратешки одлуки што ги донел или во чие донесување учествувал во текот на својата 27-годишна кариера во компанијата, Мукаетов ги наведе изборот на британската Medicines and Healthcare products Regulatory Agency за референтна агенција во 2007 година и добивањето на првата маркетиншка авторизација за пазарите во ЕУ, дигиталната трансформација со воведувањето на САП, инвестициите во истражување и развој, како и отворањето на „Алкалоид ИНТ“ во Љубљана како хаб за Европската Унија. Меѓу значајните развојни чекори ја посочи и одлуката да се инвестира во производство на цефалоспорини наспроти беталактами, благодарение на која „Алкалоид“ денес е најголем производител на цефалоспорини во Европа и во Евроазија според обемот на производството.

Говорејќи за актуелното работење, Мукаетов посочи дека и покрај сложеното глобално економско опкружување, резултатите на „Алкалоид“ и во 2026 година бележат раст. Компанијата над 60 % од своите пласмани реализира на странските пазари, а очекува годината да ја заврши со консолидирани пласмани меѓу 355 и 360 милиони евра, наспроти 339,3 милиони евра во 2025 година. Од 2006 година наваму консолидираните пласмани на „Алкалоид“ се зголемени речиси седумкратно.

Меѓународната експанзија останува еден од клучните столбови на долгорочната стратегија на „Алкалоид“, кој денес има 27 подружници надвор од Македонија и пласира производи на повеќе од 50 пазари во светот. Плановите се насочени кон натамошно проширување на теренското присуство со отворање нова подружница во Полска до крајот на годинава, додека меѓу пазарите од потенцијален интерес за следните години се Узбекистан, Јужна Америка и регионот ЛАТАМ.

Посебен акцент во специјалниот говор беше ставен и врз трансформациите во фармацевтската индустрија, инвестициите во истражување и развој, производите со додадена вредност и примената на вештачката интелигенција. Мукаетов нагласи дека „Алкалоид“ веќе применува решенија базирани на вештачката интелигенција во повеќе сегменти од работењето, со цел создавање нова вредност, развој на производи и услуги и подобрување на ефикасноста.

„Стратегијата ја градиме таму каде што имаме знаење и можност да создадеме додадена вредност. Не мора да бидете најголеми за да бидете иновативни. Важно е навреме да препознаете каде можете да направите разлика“, порача Мукаетов.

„Алкалоид“ е присутен на Македонската берза уште од нејзиното формирање во 1996 година, додека котацијата на првиот официјален пазар се случила на 13 ноември 2002 година. Котирањето донело повисоки стандарди на транспарентност и редовно објавување финансиски и деловни информации, а со тоа и поголема одговорност спрема акционерите, инвеститорите и јавноста.

The post МАЛ ПАЗАР, ГОЛЕМА МОЖНОСТ Мукаетов на 25. Конференција на Македонската берза appeared first on plusinfo.mk.

Да се создаде квалитетен производ е значаен успех, но да се изгради негово присуство надвор од домашниот пазар е сосема нов предизвик. За тоа се потребни познавање на локалните услови, силно позиционирање, релевантни контакти и поддршка што ќе ја претвори амбицијата во остварлив план. Бизнис Арена 2026 годинава го става токму овој предизвик во центарот на вниманието, отворајќи конкретна можност за македонските брендови да направат чекор кон шведскиот пазар.

Важноста на силните брендови за трговијата, инвестициите и економскиот развој ја нагласува и амбасадорот на Шведска во Северна Македонија, кој го најави своето учество и поддршка на Бизнис Арена 2026.

– Еден од главните приоритети на Амбасадата на Шведска во Скопје е да го поттикнува зголемувањето на инвестициите, трговијата и економскиот раст, како во Шведска, така и во Македонија. Клучен дел од оваа работа е создавањето врски, контакти и места за средба на инвеститори, претприемачи и етаблирани компании од двете земји, каде што ќе можат да разменуваат идеи, да градат партнерства и да започнуваат нови иницијативи. Градењето силни брендови, на национално, регионално и глобално ниво, е исклучително важен дел од овој процес и област во која Шведска низ годините постигнува значителни успеси – вели Ола Солстром, амбасадор на Шведска во Северна Македонија.

Конференцијата ќе се одржи на 14 октомври во DoubleTree by Hilton Skopje и ќе понуди програма насочена кон реалните прашања со кои се соочуваат компаниите што сакаат да растат надвор од Македонија. Преку студии на случај, панел-дискусии и разговори со домашни и меѓународни експерти, учесниците ќе добијат увид во градењето брендови, пристапот до капитал, изборот на вистински партнери, новите извозни можности и влијанието на европските интеграции и технологијата врз деловното работење.

Преку Brand Export Competition – Македонија кон светот, компании со амбиција за меѓународен раст ќе можат да конкурираат за Go-to-Sweden Acceleration Package – поддршка за поставување на нивниот производ или услуга на пазарот во Шведска. Апликациите ќе бидат отворени од 1 до 30 септември, а избраните брендови ќе добијат можност својата идеја за извоз да ја развијат во поконкретна пазарна перспектива.

Покрај содржинската програма, Бизнис Арена е поставена и како платформа за директно поврзување. Посебниот ден за вмрежување е предвиден за создавање најмалку три потенцијални деловни релации за секој учесник, усогласени со неговиот сектор и дејност. Така, знаењето од сцената се надополнува со контакти што можат да прераснат во партнерства, инвестиции или нови иницијативи.

Деталите за програмата, говорниците, Brand Export Competition и учеството на Бизнис Арена 2026 се достапни на официјалната веб-страница на конференцијата.

The post МАКЕДОНСКИ БРЕНДОВИ ЌЕ ИМААТ МОЖНОСТ ДА РЕАЛИЗИРААТ ИДЕИ ЗА ИЗВОЗ Конференција Бизнис Арена 2026 во Скопје со поддршка од шведската амбасада appeared first on plusinfo.mk.

Проширувањето веќе не е само технички пристапен процес. Тоа е стратешка инвестиција во безбедноста, стабилноста и конкурентноста на Европа. Безбедна и просперитетна Европа не може да биде целосна без целосна интеграција на Западен Балкан – порача шефот на македонската дипломатија Тимчо Муцунски во обраќањето на состанокот на министрите за надворешни работи на Процесот за соработка на Југоисточна Европа (ПСЈИЕ), што се одржа денска во Софија во рамките на бугарското претседавање со оваа најстара и најзначајна политичка иницијатива за регионална соработка во Југоисточна Европа.

Осврнувајќи се на актуелните геополитички и безбедносни предизвици, тој нагласи дека во услови на војна во Европа, хибридни закани, дезинформации, енергетска несигурност и киберризици, европската интеграција и регионалната соработка добиваат уште поголемо стратешко значење

Притоа тој нагласи дека кредибилитетот на процесот на проширување зависи од доследното почитување на преземените обврски, предвидливоста на процесот и принципот на заслуги.

– Мора да бидеме искрени: кредибилитетот на проширувањето зависи од испораката. Заслугите мора да имаат значење. Обврските мора да се почитуваат. Правилата на процесот мора да бидат предвидливи. На Западен Балкан му е потребен европски пат заснован на резултати, а не на постојано одложување – истакна Муцунски.

Состанокот во Софија е посветен на одбележувањето три децении од формирањето на ПСЈИЕ и се одржа под темата „Заеднички компас за стабилен, безбеден и одржлив регион – 30 години регионална сопственост и европска аспирација“. Во фокусот на дискусиите беа европската перспектива на регионот, унапредувањето на регионалната соработка, зајакнувањето на безбедноста и отпорноста, како и поттикнувањето на економскиот развој и конкурентноста во услови на сложени геополитички и безбедносни предизвици.

Во своето обраќање министерот Муцунски истакна дека ПСЈИЕ останува еден од најзначајните механизми за политички дијалог и соработка во регионот.

– ПСЈИЕ останува една од највредните автентични рамки за регионална соработка. Тоа е платформа создадена од регионот, водена од регионот и одржана од уверувањето дека заедничките предизвици бараат заеднички одговори – истакна Муцунски.

Осврнувајќи се на значењето на регионалната поврзаност и економската интеграција, министерот посочи дека Република Северна Македонија останува посветена на развојот на транспортната, енергетската и дигиталната инфраструктура, како и на понатамошното зајакнување на регионалната поврзаност преку коридорите 8 и 10, кои имаат стратешко значење за регионот и за европската интеграција.

Во овој контекст тој ја нагласи важноста на инвестициите во човечкиот капитал како предуслов за долгорочен развој и конкурентност.

– Човечкиот капитал е нашиот најголем ресурс. Без инвестирање во луѓето, ниеден инфраструктурен проект и ниедна економска реформа не може да го достигнат својот целосен потенцијал – посочи Муцунски.

Тој ја нагласи и важната улога на Советот за регионална соработка во унапредувањето на економската интеграција, поврзаноста и одржливиот развој во регионот.

– Треба да ја препознаеме важната улога на ПСЈИЕ во овој процес, како и вредниот придонес на Советот за регионална соработка во унапредувањето на поврзаноста, економската интеграција, безбедносната соработка и одржливиот развој – истакна Муцунски.

На крајот од обраќањето, министерот порача дека иднината на Југоисточна Европа е неразделно поврзана со иднината на Европа и дека регионот има потенцијал да биде активен придонесувач кон европската безбедност и просперитет.

– Со поддршка од нашите европски партнери и преку нашата сопствена посветеност на реформи и соработка, Југоисточна Европа може да не биде периферија на Европа, туку интегрален придонесувач кон европската безбедност, просперитет и иден развој – порача Муцунски.

Високите претставници на земјите членки на ПСЈИЕ за време на состанокот ја потврдија важноста на регионалната соработка како клучен предуслов за стабилноста и безбедноста во Југоисточна Европа, при што посебен акцент беше ставен на продлабочувањето на економската интеграција, подобрувањето на транспортната, енергетската и дигиталната поврзаност, како и на унапредувањето на заедничкиот регионален пазар како чекор кон постепена интеграција во единствениот пазар на Европската Унија.

Во рамките на состанокот беше усвоена заедничка декларација со која се реафирмираа поддршката за европската интеграција на регионот, добрососедските односи, демократските вредности и заедничките напори за градење поотпорен, поконкурентен и поодржлив регион.

Процесот за соработка на Југоисточна Европа, основан 1996 година токму во Софија, останува автентична регионална платформа за политички дијалог и соработка, која во изминатите три децении даде значаен придонес во зајакнувањето на довербата, стабилноста, поврзаноста и европската перспектива на регионот.

СИЉАНОВСКА-ДАВКОВА НА САМИТ НА ЗЕМЈИТЕ ОД ЈУГОИСТОЧНА ЕВРОПА ВО СОФИЈА Се среќава и со бугарската претседателка Јотова

The post ПРОШИРУВАЊЕТО НА ЕУ Е СТРАТЕШКА ИНВЕСТИЦИЈА ВО БЕЗБЕДНОСТА И СТАБИЛНОСТА НА ЕВРОПА Муцунски од Самитот на Југоисточна Европа во Софија appeared first on plusinfo.mk.

Реформата на јавната администрација не може да биде успешна доколку се спроведува исклучиво во институциите. Таа мора да се гради заедно со граѓаните, преку партнерство, транспарентност и активно учество во процесите на донесување политики. Токму ова беше централната порака што ја упати министерот за јавна администрација, Горан Минчев, на четвртата регионална конференција „Граѓаните на прво место: Деценија на унапредување на јавна администрација насочена кон граѓаните“, која се одржува во Белград, по повод десет години од иницијативата WeBER во Западен Балкан.

Конференцијата претставува значајна регионална платформа за размена на искуства и добри практики во реформата на јавната администрација, со учество на претставници на институциите, граѓанските организации, Европската Унија, ОЕЦД/СИГМА, ReSPA и други меѓународни партнери, посветени на создавање поотворени, потранспарентни и поефикасни институции во интерес на граѓаните.

Во своето обраќање, министерот Минчев истакна дека суштината на реформите не е само во институционалните промени, туку во создавањето администрација која испорачува конкретни резултати и ја зајакнува довербата на јавноста.

– Успешната јавна администрација не се мери само преку донесени закони, стратегии и институционални промени. Таа се мери преку довербата на граѓаните, квалитетот на услугите што ги добиваат и нивното чувство дека се активен дел од процесите на донесување одлуки – истакна Минчев.

Тој нагласи дека Владата и Министерството за јавна администрација спроведуваат сеопфатна реформска агенда која има за цел изградба на професионална, модерна и ефикасна јавна администрација.

Во таа насока, како особено значајни ги посочи новата законска рамка за административните службеници и вработените во јавниот сектор, законот за стручно усовршување и обука, како и законот за високата раководна служба, кој претставува историски чекор кон професионализација на највисоките раководни позиции во извршната власт.

Посебен акцент во неговото обраќање беше ставен на транспарентноста и инклузивноста во креирањето на јавните политики, истакнувајќи дека во подготовката на новите законски решенија уште од најраната фаза беа вклучени граѓанските организации, синдикатите, академската и експертската јавност, а истиот принцип се применува и при ревидирањето на Акцискиот план за спроведување на Стратегијата за реформа на јавната администрација.

– Граѓаните не смеат да бидат само корисници на јавните услуги. Тие треба да бидат активни партнери во нивното креирање, затоа што најдобрите политики се создаваат преку дијалог, партнерство и заедничка одговорност –  посочи министерот Минчев.

Владата и Министерството за јавна администрација ќе продолжат да градат политики засновани на транспарентност, отчетност и партнерство со граѓаните, затоа што само на тој начин ќе може да се создадат институции што ќе испорачуваат резултати и ќе ја зајакнат довербата во јавниот сектор.

The post УСПEХОТ НА АДМИНИСТРАЦИЈАТА СЕ МЕРИ СО ДОВЕРБАТА ОД ГРАЃАНИТЕ Минчев во Белград на регионална конференција appeared first on plusinfo.mk.

Долго време во високото образование меревме успех со бројот на запишани студенти, со бројот на факултети и со бројот на издадени дипломи, но денес мора искрено да признаеме – на економијата не ѝ треба само диплома. Ѝ треба знаење, вештини, иновации и носечки кадар. Не смееме повеќе да „штанцаме“ програми што не се тесно поврзани со реалниот пазар, беше речено на денешната конференција во Стопанската комора.

Како што порачаа учесниците, Македонија не смее веќе да произведува кадар со кој ќе го зголемува бројот на бирото на невработени и младите да ги подготвува за професии кои реално исчезнуваат.

-Високото образование ќе треба да стане партнер на економијата и мотор на развојот. Нам ни е потребна нова генерација инженери, технолози, ИТ експерти, машински и електроинженери, енергетичари, .. Потребни ни се практичари, не само теоретичари. Следните 10 години ќе победуваат државите со продуктивна индустрија, технолошка адаптација, сопствени иновации и стручен кадар кој создава додадена вредност, а таму треба да се најде и Македонија – истакна професорот Марјан Ѓуровски.

Според него, студиските програми треба да се креираат заедно со стопанството.

-Колку луѓе досега дипломирале, но и колку од нив создале економска вредност? Образовната политика не е само административен сегмент. Високото образование мора да стане развојна, а не административна политика -напомена Ѓуровски.

Од Стопанската комора потенцираа дека не смее академијата и бизнисот да живеат во тотално различни светови.

-Неопходно ни е создавање кадар кој ќе одговори на новата, современа економија преку комбинација на теорија и пракса, но и преку континуирана соработка помеѓу образовните институции и бизнис заедницата. Денешната економија бара млади луѓе не само со диплома, туку и со практични вештини, млади кои поседуваат употребни компетенции, кои имаат критичко размислување, кои ќе носат одлуки, но и ќе бидат иновативни и креативни –  подвлече Наташа Јаневска, советник за образование во Кабинетот на претседателот на Стопанската комора.

Претседателот на Комората Бранко Азески рече дека бизнисот сака оној што општеството го оспособува, да биде и практично корисен.

-Продуктивноста кај нас е најниско ниво. Ефикасноста е на најниско ниво. Може да се реши само на еден начин: високопрофесионални луѓе со високи примања. Ако тоа не го направи Македонија, си потпишала смртна пресуда-укажа Азески.

The post ЕКОНОМИЈАТА НЕ БАРА САМО МЛАДИ СО ДИПЛОМИ, ТУКУ И СО ПРАКТИЧНИ ВЕШТИНИ И КРЕАТИВНОСТ Експерти бараат студиските програми да се креираат според реалниот пазар на труд appeared first on plusinfo.mk.

Како компаниите создаваат конкурентска предност во време на брзи технолошки и пазарни промени, каква улога имаат иновациите, организациската култура и корпоративното претприемништво во процесот на трансформација и колку е важна соработката помеѓу бизнисот и академската заедница – беа главните теми на конференцијата „Што ги движи иновативните компании?“, на која од бизнис, истражувачка и академска перспектива се разговараше за корпоративното претприемништво во услови на пазарна трансформација.

Настанот, организиран од Реплек АД Скопје и Алумни организацијата на Економскиот факултет при Универзитетот „Св. Кирил и Методиј“ – Скопје, обедини бројни претставници од бизнис секторот и академската заедница, претставници на институции, медиуми, како и деловни партнери и соработници на Реплек. Преку презентации и панел-дискусии учесниците имаа можност да се запознаат со современите предизвици со кои се соочуваат компаниите и потребата од континуирана трансформација, агилност и иновативен пристап во работењето.

– Ние во Реплек веруваме дека иновацијата не е само нов производ, нова технологија или нов процес. Иновацијата е начин на размислување, храброст да се преиспитуваат постојните модели, подготвеност да се излезе од комфорната зона и визија што гледа подалеку од денес. Токму затоа, иновативниот пристап е во фокусот на нашето секојдневно работење – рече во своето поздравно обраќање заменикот генерален директор и директор за маркетинг и продажба на Реплек АД Скопје, Коста Котески.

Тој истакна дека денес успехот не им припаѓа на компаниите што се плашат од промени, туку на оние што имаат храброст да ги водат. При тоа нагласи дека Реплек во изминатите неколку години помина низ значајни промени, од модернизација на процесите, инвестиции во технологија и дигитализација, до организациски трансформации кои создадоа нова енергија и нов правец на развој, со јасен фокус на создавање култура што ги охрабрува идеите, иницијативата и претприемничкиот дух, затоа што ниту една стратегија, ниту една технологија и ниту една визија не можат да успеат без луѓето кои се движечката сила на Реплек.

Во своето обраќање деканот на Економскиот факултет, проф. д-р Мијалче Санта истакна дека современите економии бараат нов пристап кон образованието, претприемништвото и кон лидерството, а Реплек е одличен пример на компанија која ја следи ваквата формула на успех.

– Во денешниот свет компаниите функционираат во средина на постојани, динамични промени, кои бараат нов начин на размислување и нов модел на соработка помеѓу академската заедница и бизнис секторот. Само преку вакви партнерства можеме да создадеме знаење, иновации и кадри кои ќе бидат подготвени за актуелните предизвици, но и за оние што ги носи иднината – изјави деканот на Економскиот факултет.

Во рамки на првиот презентациски блок, Марија Талеска Велковски, директорка на секторот за стратешки развој, ја презентираше студијата на случај „Од лабораторија до пазар: како Реплек развива нови производи и создава конкурентска предност“. Во својата презентација таа говореше за процесот на развој на нови производи, инвестициите во модернизацијата, дигитализацијата и во производствените капацитети, како и за начинот на кој компанијата ја гради својата конкурентност на домашните и на странските пазари. Беше посочено дека Реплек денес е присутен на повеќе од 25 меѓународни пазари и континуирано инвестира во нови технологии, иновации и унапредување на оперативната ефикасност.

Сергеј Зафироски, генерален менаџер на Инсајдер ИД, во својата презентација „Психологија на потрошувачите: Како потрошувачите влијаат врз иновативноста и претприемништвото кај компаниите?“ говореше за современите навики на потрошувачите, важноста на анализата на однесувањето на пазарот и потребата компаниите постојано да ги следат промените во очекувањата на клиентите.

Во вториот дел од конференцијата, проф. д-р Стојан Дебарлиев, професор на катедрата по менаџмент на Економскиот факултет, ја одржа презентацијата „Како до иновативна клима во компаниите: модели и практики за поттикнување претприемништво, агилност и култура на промени“. Тој се осврна на организациската култура како еден од клучните фактори за поттикнување иновации и претприемништво во компаниите, нагласувајќи дека лидерството, агилноста и отвореноста кон промени се предуслов за создавање компании подготвени за идните предизвици.

Конференцијата заврши со панел-дискусијата „Што ги движи иновативните компании?“, на која учествуваа Марија Талеска Велковски, Сергеј Зафироски и проф. д-р Стојан Дебарлиев. Во рамки на дискусијата беше нагласено дека компаниите кои сакаат да создаваат долгорочна вредност мора континуирано да инвестираат во луѓето, новите технологии, организациската култура и знаењето, но и активно да ја поттикнуваат соработката помеѓу бизнисот и академската заедница.

Конференцијата е дел од пошироките активности на Реплек насочени кон поддршка на иновациите, развојот на човечкиот капитал и јакнење на соработката со академската заедница. Настанот уште еднаш ја потврди потребата од посилно поврзување помеѓу бизнисот и академската заедница, како предуслов за создавање иновативни, конкурентни и одржливи компании подготвени за идните предизвици.

The post ШТО ГИ ДВИЖИ ИНОВАТИВНИТЕ КОМПАНИИ? Реплек и Економскиот факултет отворија дебата за иднината на бизнисот appeared first on plusinfo.mk.

Демографските промени се реалност што бара одговорност, визија и системски политики, порача премиерот Христијан Мицкоски во обраќањето на Регионалната министерска конференција „Предводење на промените: Патеки кон демографска отпорност согласно потребите на луѓето“, што се одржува во Скопје во организација на Министерството за социјална политика, демографија и млади и УНФПА, под покровителство на Владата.

– Ова не е само уште една конференција, ова е разговор за иднината на нашите народи, за тоа какви држави ќе оставиме зад нас, дали ќе создадеме општества во кои младите ќе сакаат да останат, семејствата ќе сакаат да создаваат иднина, а повозрасните ќе живеат достоинствено – истакна Мицкоски во воведното излагање.

Премиерот нагласи дека демографската криза веќе има видливи последици и дека таа не смее да се третира исклучиво како прашање на статистика. Тој оцени дека досегашниот пристап, фокусиран главно на бројки, создал политики без долгорочна визија и вистинско влијание.

– Подолго време многу држави, вклучително и во нашиот регион, овие промени ги гледаа исклучиво низ призмата на бројките – колку нè има помалку, колку старееме, колку луѓе заминуваат. Таа таканаречена демографска вознемиреност често создаваше политики што реагираа доцна, фрагментирано и без долгорочна визија. Но суштината не е само во бројките. Суштината е во квалитетот на животот, во довербата што граѓаните ја имаат кон сопствената држава, во чувството дека тука можат да создадат дом, семејство, кариера и иднина – нагласи премиерот.

Според него, клучниот проблем е јазот во демографската отпорност, односно неподготвеноста навреме да се препознаат и менаџираат промените. Во тој контекст ја најави новата Стратегија за демографска отпорност 2026–2046.

– Нашиот пристап е јасен: наместо политика на страв, градиме политика на отпорност, наместо краткорочни мерки, создаваме долгорочна стратегија, наместо декларативни заложби, поставуваме системски решенија. Токму затоа ја подготвивме новата Стратегија за демографска отпорност 2026–2046 – не како формален документ што ќе остане на хартија, туку како национална рамка за иднината на државата – рече Мицкоски.

Тој потенцираше дека основата на стратегијата е вложувањето во луѓето и испрати порака за личната и колективната одговорност. До младите упати порака дека треба да сонуваат дома.

– Дома треба да сонуваме и дома треба да ја градиме нашата заедничка иднина, во нашата заедничка татковина. Колку посилно сонуваме и колку посилно работиме дома, толку посилен систем ќе имаме. Не придонесувајте во туѓи економии – иднината на вашата татковина се гради дома – рече премиерот.

The post ТРЕБА ДА СОНУВАМЕ ДОМА И ДА ГРАДИМЕ ИДНИНА ДОМА Порака на премиерот Мицкоски до младите appeared first on plusinfo.mk.

Македонски Телеком денеска организираше бизнис конференција под мотото „Следно ниво на дигиталната безбедност“, на која присуствуваа бројни претставници од деловниот сектор, институциите и експерти од областа на сајбер безбедноста.

Конференцијата беше посветена на актуелните предизвици во дигиталната безбедност, новата регулатива и современите решенија за заштита од сајбер закани. Посебен фокус беше ставен на новиот Закон за безбедност на мрежни и информациски системи, усогласен со европската NIS2 директива, како важен чекор во зајакнувањето на националната сајбер безбедност.

– Сајбер безбедноста денес повеќе не е избор, туку клучен приоритет. Затоа новиот закон е многу важен чекор за зајакнување на дигиталната безбедност на земјата. Нашата улога во овој процес е да останеме посветен партнер за дигитална трансформација, со сигурни и напредни решенија базирани на глобална експертиза. Нашата одговорност не завршува со инфраструктурата, туку продолжува преку безбедноста и довербата што ја градиме – изјави Горан Марковиќ, Главен извршен директор на Македонски Телеком.

Министерот за дигитална трансформација, Стефан Андоновски, ја истакна важноста на новиот закон и неговата улога во создавање сигурна дигитална средина.

– Со имплементацијата на Законот за безбедност на мрежни и информациски системи, за првпат воспоставуваме сеопфатна и усогласена рамка која ќе овозможи подобра заштита на институциите, бизнисите и граѓаните. Ова е клучен чекор кон усогласување со европските стандарди и градење отпорно дигитално општество – рече Андоновски.

Во рамки на конференцијата, експерти од Дојче Телеком и ги презентираа најновите глобални трендови во сајбер безбедност и споделија конкретни решенија и практики за заштита од сајбер закани.

Претставници од Министерството за дигитална трансформација зборуваа за имплементацијата на NIS2 директивата и новиот закон, додека експерти од индустријата дадоа осврт на актуелните сајбер закани и современите техники на напади.

На конференцијата повеќе од 300 посетители имаа можност да разменат искуства и да се информираат за актуелните регулативи и најновите трендови за дигитална безбедност.

The post САЈБЕР БЕЗБЕДНОСТA ПОВЕЌЕ НЕ Е ИЗБОР, ТУКУ КЛУЧЕН ПРИОРИТЕТ Бизнис конференција за сајбер безбедност на Македонски Телеком appeared first on plusinfo.mk.

Сајбер безбедноста повеќе не може да се третира како техничко прашање, туку како клучен фактор за отпорноста на државата и функционалноста на економијата, рече министерот за дигитална трансформација, Стефан Андоновски, обраќајќи се на денешната бизнис конференцијата за сајбер безбедност во организација на Македонски Телеком, посветена на новата регулатива за безбедност на мрежни и информациски системи и предизвиците во заштитата на дигиталната инфраструктура.

-Во услови на целосна дигитализација на услугите, комуникацијата и економските процеси, секој сајбер инцидент има потенцијал да се пренесе низ целиот систем. Затоа, отпорноста станува основа на дигиталната трансформација – нагласи Андоновски.

Тој рече дека со новиот Закон за безбедност на мрежни и информациски системи, кој е усогласен со европската NIS2 директива, се воспоставува систем таму каде што досега постоеше фрагментиран пристап.

– Со законот, за првпат поставуваме јасни линии на одговорност, дефинираме управување со сајбер ризик и воспоставуваме рамка за координирано делување и во приватниот и во државниот сектор. Ова не го правиме само заради усогласување со европската регулатива, туку како суштинска институционална реформа – рече Андоновски.

Тој посочи дека посебен акцент беше ставен на улогата на приватниот сектор, кој, како што беше нагласено, претставува суштински дел од националната сајбер отпорност.

– Најголемиот дел од критичната дигитална инфраструктура се наоѓа во приватниот сектор. Затоа законот не го третира како објект на контрола, туку како партнер во системот на безбедност. Овие обврски не се административен товар, туку механизам за заштита на самото функционирање на компаниите – посочи министерот.

Андоновски истакна дека сериозен сајбер инцидент денес може да предизвика прекин на работењето, финансиски загуби и нарушување на довербата, поради што безбедноста треба да се гледа како предуслов за одржливост и развој.

Во однос на имплементацијата, министерот најави дека Министерството за дигитална трансформација активно работи на зајакнување на националните капацитети, вклучително и воспоставување на Владин центар за одговор на сајбер инциденти (GOV-CSIRT), кој започнува со работа во наредниот период, како и унапредување на мониторинг системите и интероперабилноста меѓу институциите.

– Законот сам по себе не е доволен. Неговата вредност ќе се мери преку имплементацијата, преку координацијата и преку способноста системот да функционира во реални услови – нагласи Андоновски.

Тој додаде дека сајбер безбедноста носи и нови можности за инвестиции, иновации и развој на домашната ИТ индустрија, особено во делот на напредни безбедносни услуги и решенија.

На крајот, министерот порача дека сајбер безбедноста треба да се гледа како составен дел од економскиот и институционалниот развој.

-Без стабилни и безбедни дигитални системи нема доверба, а без доверба нема инвестиции и економски раст. Затоа оваа реформа е подеднакво безбедносна, економска и институционална – рече Андоновски.

На конференцијата учествуваа претставници на институциите, приватниот сектор и меѓународни експерти, кои дискутираа за најновите трендови, закани и решенија во областа на сајбер безбедноста.

The post ПРИВАТНИОТ СЕКТОР СЕРИОЗНО ДА ГО ИМПЛЕМЕНТИРА НОВИОТ ЗАКОН ЗА САЈБЕР БЕЗБЕДНОСТ Андоновски тврди дека државата активно работи на зајакнување на националните капацитети appeared first on plusinfo.mk.

Проширувањето треба да остане процес базиран на заслуги, но да не биде попречен од краткорочни политички пресметки. Aко стандардите се исти, тогаш и третманот треба да биде ист, истакна претседателот на Собранието Африм Гаши, на меѓународната конференција „Западен Балкан во вртлогот на новата геополитика на безбедноста“ во Љубљана –

– Да бидеме искрени дека земјите од Западен Балкан денес се во многу аспекти подобро подготвени од некои земји што се зачленија на претходните бранови на проширувањето. Оваа реалност заслужува да се препознае во политичкото одлучување и да се одрази во пофер пристап. Во овој случај Западен Балкан не е периферија што треба да се остави да чека, туку дел од Европа што се стреми да се комплетира – рече Гаши.

Тој верува дека похрабaр пристап би бил непосредната интеграција на сите шест земји од Западен Балкан како заеднички пакет.

– Колку побрзо станеме дел од ЕУ толку побрзо ќе се консолидираат демократските стандарди, ќе се зајакне владеењето на правото и ќе се решат билатералните прашања што во моментов го попречуваат напредокот. Историјата на самите европски земји покажа дека интеграцијата е најефикасниот инструмент за помирување и стабилност – рече Гаши.

Сепак, додаде тој, нашиот пат во оваа насока не беше линеарен и беше проследен со искушенија кои честопати ги надминуваа самата логика и критериумите на процесот за членство.

– Како што знаете, билатералните прашања оставија длабоки траги во темпото на нашата интеграција. И сепак, ние избравме дијалог наспроти конфликтот и компромис наспроти стагнацијата – рече тој.

Претседателот на Собранието рече дека денес се соочуваме со замор од проширување во рамките на Европската Унија, но во исто време, замор од стагнација кај земјите-кандидати.

– Овој јаз во кредибилитетот ризикува да создаде „постојана чекална“, што не само што ги обесхрабрува реформите, туку и ја поткопува довербата на граѓаните во европскиот проект; што за мене е поопасно – нагласи тој.

Во овој контекст, посочи дека е „важно да се биде искрен за две прашања: Дали ЕУ навистина сака проширување? И, колку е вистинската волја на земјите-членки за проширување. Бидејќи, како што рече, проширувањето, во суштина, е договор за доверба што бара одговорност и храброст од двете страни.

Како што соопшти собраниската прес-служба, настанот се одржува во присуство на истакнати политички и институционални личности од Европа, регионот и пошироко, вклучувајќи поранешни шефови на држави, високи претставници на ЕУ, како и специјални пратеници за Западен Балкан.

The post ЗЕМЈИТЕ ОД БАЛКАНОТ ВО МНОГУ АСПЕКТИ СЕ ПОПОДГОТВЕНИ ЗА ЕУ ОД НЕКОИ ЗЕМЈИ-ЧЛЕНКИ Спикерот Гаши побара пофер пристап при проширувањето appeared first on plusinfo.mk.