Секторот за внатрешни работи Струмица поднесе кривична пријава до Основното јавно обвинителство Струмица против 56-годишниот З.Г. од Струмица, поради основано сомнение дека сторил кривично дело „злоупотреба на службена положба и овластување“ по член 353 став 2 и 5, во врска со став 1 од Кривичниот законик.

Како што информира МВР, пријавениот, кој бил директор на Јавното претпријатие за комунална дејност од Струмица, во текот на 2022 година за потребите на претпријатието набавил вреќи за отпад од струмичка фирма, по фактури, во вредност од 1.239.000 денари. Истото го повторил и во 2023 година, кога набавил нова количина вреќи за отпад во вредност од 1.872.660 денари.

Набавките биле спроведени без да се почитува законската процедура за јавни набавки и без да се распише конкурс за избор на идејно решение, со што З.Г. постапил спротивно на член 40 од Законот за јавни набавки.

Дополнително, како директор, З.Г. имал обврска да предложи годишен план за јавни набавки и да донесе одлука за набавка на средства неопходни за работењето на претпријатието. Тој не ја исполнил оваа обврска, со што го прекршил член 34 од Статутот на претпријатието.

Со ваквите дејствија, според наводите на полицијата, на правното лице од Струмица му овозможил да се стекне со противправна имотна корист во вкупен износ од 3.111.660 денари.

The post ПРАВЕЛ ДУБАРИ СО ВРЕЌИ ЗА ОТПАД Ексдиректор на струмичко комунално претпријатие пријавен за злоупотреба на 3 милиони денари appeared first on plusinfo.mk.

Исар должи пет милиони, тешко е и во Пробиштип и во Виница

Најголемото комунално претпријатие во регионот „Исар“-Штип за само неколку месеци има натрупано долг за струја, од околу 600.000 евра, а голема главоболка на раководството се и старите долгови, кои достигнаа околу пет милиони евра. Директорот на ЈП „Исар“-Штип, Трајче Здравков вели дека во вакви услови немаат можност за вработување на потребниот кадар, кој е и дефицитарен.

– Долговите се трупаат најмногу за електрична енергија. Сите комунални претпријатија го имаат тој проблем. Се надевам дека ќе направиме притисок и да издејствуваме од централната власт да се најде решение за цената на струјата. Мораме некако да дејствуваме, бидејќи со вакви цени и трошоци нема да можеме нашите обврски да ги извршуваме редовно – изјави Здравков.

Забележа дека направени се спогодби за плаќање на долговите за струја на рати, но според Здравков ова решение не е долгорочно.

– Во декември лани киловат час беше пет денари, а сега е 25,26 или 27 денари. Оваа цена едноставно не зависи од јавните претпријатија, ниту пак од нас како раководители. Едноставно принудени сме по таа цена на струјата да работиме и да плаќаме високи сметки – рече Здравков.

Директорот на ЈП „Никола Карев“-Пробиштип, Драганчо Ристовски вели дека за разлика од лани, оваа година  месечните сметки за струја се повисоки за 400 посто.

– Енергетската криза во нашете претпријатие се одрази многу, бидејќи поскапувањето доведе до процент, односно 400 посто е зголемена струјата. Сметката за струја лани пред покачувањето беше околу 180.000 денари, а во периодот на поскапување  достигна сума од околу еден милион денари – изјави Ристовски.

Најлоша е состојбата во виничкото комунално претпријатие „Солидарност“. Директорот на ЈП „Солидарност“-Виница, Илија Јованов информира дека доцнат со исплата на платите, што се околу две третини од нивните вкупни приходи.

– Покачувањето на цената на струјата е сериозен проблем за комуналното претпријатие во Виница, ако направиме паралела за споредба, еве во март минатата година имаме фактура за струја од 330.000 денари, а март оваа година имаме 1.200.000 денари. Тоа е енормно покачување. Имавме и неколку фактури неплатени, заостанат долг и пред неколку дена направивме спогодба со ЕВН и целиот долг да го платиме шест еднакви рати и со плаќање на тековните фактури – вели Јованов.

Посочи дека сметката за струја зафаќа една четвртина од месечните приходи на претпријатието „Солидарност“. Смета дека ситуацијата не е воопшто добра, имајќи во предвид  дека има и зголемување на цените на репроматеријалите, резервните делови за водоводна, канализациона мрежа, камионите, како и на нафтата. Јованов забележа дека ова се должи и на преврабротеноста, како и на ниските цени на комуналните услуги.

Комуналните претпријатија молат за помош

Повластена тарифа за струја, субвенции, ослеснување за кредити, поставување на сончеви централи на препумпните и филтер станиците, каде најмногу се троши струја за да пристигне водата до домаќинствата, како и на објектите се дел од барањата на претпријатијата, кои на граѓаните секојдневно до чешимите им диструбуираат вода за пеење, го изнесуваат сметот на депониите, уредуваат парковите површини и ги метат улиците и тротоарите.

Пробиштип ќе ги менува водомерите и ќе поставува фотоволтаици

– Решение за излегување од оваа енергетска криза е поставување на фотоволтаици на местата на кои може да ги поставиме, а тоа се на резервоарите, Филтер станицата, Градскиот пазар. Во соработка со Општина Пробиштип, градоначалникот, со кои ги изготвуваме тие проекти, во наредниот период ќе се изготват проектите и ќе дојде до реализација. Претпоставувам дека самата реализација ќе биде некаде за околу два месеци – вели Ристовски.

Тој посочи дека до Министерството за животна средина веќе доставиле проект за промена на водомери. Средствата се околу шест милиони денари и со нив ќе бидат променети околу 300 водомери во домаќинствата. Со ова, наведе Ристовски, ќе ја намалат и загубата на водата за пиење низ мрежата, која во моментов изнесува околу 40 проценти.

Штип ќе ја санира старата водоводна мрежа за да ги намали загубите

Старите наслеби во Штип од десната страна на река Отиња дваесетина дена имаат проблеми со редовното водоснабдување, од причина што старата азбестна водоводна мрежа не може да издржи на големиот притисок на вода што доаѓа преку цевководот на Хидросистемот „Злетовица“. Директорот на ЈП „Исар“-Штип, Трајче Здравков за МИА појаснува дека водоводната мрежа низ градот Штип е во должина од 120 километри, од нив 30 километри е систем стар и над 50 години.

– Тоа е долгорочна инвестиција, која не може во една година финансиски да се издржи, така што ние заедно со локалната самоуправа сме решени да инвестираме, што се вели, под земја, односно да ги заменуваме водоводните линии, затоа што водоснабдувањето е една од примарните дејности на јавното претпријатие, но и затоа што секој граѓанин бара редовно водоснабдување со квалитетна вода – вели Здравков.

Честите дефекти на водоводната мрежа повторно на маса ги ставија парите, што повеќе од 20 години стојат замрзнати на посебна сметка на општина Штип. Бидејќи се собрани со учество на сите граѓани по пат на самопридонес, во деведесетите години за изградба на брана Козјак, ќе мора на референдум да се одлучи за пренамена на средствата. Градоначалникот на Општина Штип, Иван Јорданов вели дека пред да се распише референдум за овие пари да се пренаменат ќе побара мислење од граѓаните  и од сите политички партии.

– Со години наназад не се користат средствата од самопридонесот и се подложни на инфлација, затоа што од година во година губат вредност, за истите тие средства да ги консултираме нашите граѓани, заедно со сите политички чинители во нашиот град. Штета е да останат не искористени во време кога имаме наталожени проблеми кои настануваат од застарената водоводна мрежа – рече Јорданов.

Средства не се доволни за планираниот инфраструктурен зафат, но ќе бидат солидна финансиска потпора за започнување и реализација на провеќегодишниот проект за градот Штип.

The post КОМУНАЛНИТЕ ПРЕТПРИЈАТИЈА ОД БРЕГАЛНИЧКИОТ РЕГИОН ПРЕД КОЛАПС Се трупаат долговите за струја, Исар“ од Штип должи 5 милиони евра appeared first on plusinfo.mk.

Скопјани сè уште немаат каде достојно да ги закопаат или кремираат своите миленичиња, по примерот на други градови во регионот. Мачките, кучињата и другите животни завршуваат во дворовите на оние кои имаат куќи, по разни илегални локации на Водно и Скопска Црна Гора, а доколку се најдат во контејнер или да скапуваат на улица ги собира комуналната служба на Скопје и ги носи во една посебна јама во депонијата „Дрисла“.

Додека системски решенија за ова се очекуваат од градот Скопје или од државата, шпекулациите велат дека постојат луѓе кои на повик илегално ја завршуваат работата која би требало да ја направи некое идно јавно, или приватно претпријатие. И до 50 евра се плаќаат за некој друг да го земе вашиот миленик и „да ја заврши работата“ наместо вас. Значи, сепак гробишта за миленици би можел да биде одржлив бизнис? Колку би чинела услугата ако тоа беше легално? За жал, уште не знаеме колкав е бројот на починати миленичиња годишно за да извлечеме заклучоци.

– Статистика за тоа колку миленичиња или општо животини починуваат во државата уште не се води. Луѓето понекогаш се јавуваат кај ветеринарите кога животното ќе почине во домашни услови и тоа тие го регистрират во ВИС електронскиот систем од АХВ, Агенцијата за Храна и тогаш тие имаат евиденција. Но, тој систем од 2017 година важи само за чипираните животни. Има многу нечипирани, а и многу од сопствениците не се јавуваат – вели Жарко Радовиќ, ветеринар од „Пет Свет“.

Меѓу 50 и 200 евра чини кремирање, превоз и достоен закоп во Софија, Загреб, Истанбул …

Ако побарате на интернет, во соседна Софија постојат неколку центри за кремирање на миленичиња. Негде околу 50 евра ако миленичето има до 5 килограми, а до 100 евра ако животното има до 50 кг се плаќа во Бугарија за заедничко, а дупло од тие цени за засебно кремирање. Гробници пак, за миленичиња, мапата покажува дека има во Белград, Истанбул, во соседна Грција.

На сајтот на една фирма за кремирање во Загреб наведени се следните услуги: преземање на телото (на миленичето), кремирање, полагање на останките во касета и вкопување на касетата во гробно место. Компанијата врши превоз од повеќе хрватски градови до гробиштата во Загреб и тоа се наплаќа посебно, а цените за закопот се меѓу 15 и 200 евра. Според каталогот, гробовите на милениците имаат површина од пола до 2,5 метри квадратни.

Потребни се простор, луѓе, комунална дозвола и приватна иницијатива

Плусинфо разгоравараше со неколку ветеринарни амбуланти и со експерти. Сите тие се сложуваат дека одговорот е во Град Скопје кој мора да го скрои планот.

– Решението можат да го дадат инспекциските служби во комбинација со комуналните. Ние како приватни вет-амбуланти тоа одамна го бараме, но не можеме да го организираме. Тоа може да се реши на ниво на општина, на град или на држава. Ќе бидат потребни комунални дозволи, избирање на простор како прв чекор – вели д-р Жарко Радовиќ од „Пет Свет“.

Според него, комуналното одлагање на лешови од сопствениците во моментот не е јасно регулирано.

– Граѓаните немаат лично пристап до таа јама, односно гробница во депонијата „Дрисла“ – додава тој.

Надлежноста на КХС е само за јавните површини, за друго треба фирма

Со други зборови, само Комуналното претпријатие на Скопје има надлежност да одлага мрша во јамата и тоа само од јавни површини, што вклучува и починати коњи, оставени животни, починати улични кучиња и слично.

– Гробните места за миленичињата не се во ингеренција на КХС. Претпријатието порано имаше ингеренција да заловува на Вардариште, но сега Вардариште е под Лајка, а КХС има надлежност само за собирање на мршите со посебно возило кои се носат во специјалната јама во „Дрисла“. Одиме и на повик од граѓани, но само ако тоа е на јавна површина – вели Анамарија Бранѓолица, портпаролка на Комунална Хигиена Скопје.

Достојното погребување значи и одржување на гробното место, чистење, практично истите нешта кои ги има во гробница за луѓе.

– За гробиштата кои се луксузна варијанта, препоставувам потребна ќе биде приватна иницијатива. Исто како што скопските гробишта во Бутел се приватни и некој ги одржува – вели Живко Радовиќ од „Пет Вет“.

Имало крематориум на Ветеринарниот факултет, веќе не функционира

– Порано во рамките на Ветеринарниот факултет, функционираше т.н. кафилерија, каде што ги спалуваа животните. Но, тоа веќе не функционира со години. Печките се скап проект и треба да се испита колку тоа ќе влијае на загадувањето – вели д-р Јасминка Серафимовска од ветеринарната болница „Ветенал“, додавајќи дека вакво нешто постои во Белград и Загреб.

Според неа, Факултетот има одреден договор со „Дрисла“ за одлагање на трупови, но за тоа се плаќа и до 6.000 денари, но тоа важи само за итни случаи, кога Комуналното претпријатие може да излезе во пресрет на институциите. Граѓаните сè уште немаат пристап до институција, јавна или приватна кај што ќе може да ја изврши целата услуга за нив.

– Верувам дека ќе има голем интерес. Постојат многу кучиња во Скопје. Скопјани ги третираат како член на семејството и треба еден ваков простор. Мислам дека би можело да функционира – смета Серафимовска.

The post ЗОШТО ВО СКОПЈЕ НЕМА ГРОБИШТА ЗА МИЛЕНИЦИ? Сте го чувале 15 години, а треба да го фрлите на ѓубриште appeared first on plusinfo.mk.