Градот Скопје интензивно работи на решавање на долгогодишните проблеми со комуналната хигиена, а значително подобрување на состојбата се очекува веќе од септември, најави градоначалникот Орце Ѓорѓиевски на денешната прес-конференција.

Тој посочи дека при преземањето на функцијата биле затекнати само 16 функционални возила за собирање отпад, додека денес секојдневно на терен работат меѓу 50 и 60 возила.

– Не сакам да се жалам на состојбите што ги затекнавме, туку да зборувам за тоа што е направено и што се менува. Денес имаме значително повеќе возила на терен, иако голем дел од механизацијата е стара и често се соочуваме со дефекти – рече Ѓорѓиевски.

Тој нагласи дека со поддршка од Владата, Министерството за транспорт и Светската банка, Скопје ќе добие околу 40 нови возила од различен тип, наменети за комуналната хигиена.

Дополнително, Градот обезбедува уште четири нови возила и две претоварни станици, кои треба значително да ја подобрат ефикасноста во транспортот на отпадот.

Едната претоварна станица ќе биде поставена во Ѓорче Петров и ќе ги опслужува општините Ѓорче Петров, Карпош и Сарај, додека другата ќе биде лоцирана во Гази Баба.

Според Ѓорѓиевски, ова ќе овозможи камионите да не мораат постојано да патуваат до депонијата, туку побрзо да се враќаат на терен и да продолжат со собирање на отпадот.

Во тек е и набавка на 2.600 нови контејнери, кои треба да пристигнат за околу еден месец и претставуваат една од најголемите набавки во последната деценија.

– На многу локации контејнерите со години не биле заменети. Со оваа набавка решаваме уште еден сериозен проблем, кој директно влијае врз чистотата на градот – истакна градоначалникот.

Тој додаде дека во изминатиот период биле надминати и финансиски проблеми во ЈП „Комунална хигиена“, каде што биле наследени неисплатени плати и високи трошоци за работење.

– Полека, но сигурно го решаваме проблемот. Останува да пристигнат новата механизација и контејнерите, за целиот систем да биде ставен во целосна функција. Верувам дека од септември темата со отпадот повеќе нема да се третира како досега – порача Ѓорѓиевски.

The post ПРИСТИГНУВААТ 40 ВОЗИЛА И 2.600 КОНТЕЈНЕРИ ЗА ЃУБРЕ Ѓорѓиевски најави решавање на хаосот со отпадот во Скопје appeared first on plusinfo.mk.

Градоначалникот на Скопје, Орце Ѓорѓиевски, соопшти дека постапката за набавка на 100 автобуси е повторно отворена и изрази очекување дека овој пат ќе биде успешно завршена.

Тој истовремено најави и паралелен проект за воведување на брз автобуски систем – БРТ, кој треба значително да го модернизира јавниот превоз во главниот град.

– Денеска е реобјавена постапката за 100 автобуси, се надевам дека овојпат ќе биде успешна. Владата ќе обезбеди 100 автобуси, а јас многу скоро го започнувам БРТ проектот за кој градот ќе обезбеди 40 автобуси – изјави Ѓорѓиевски.

Според најавите, административните процедури за БРТ системот треба да бидат завршени до крајот на годината, а почетокот на реализацијата се очекува во следниот период.

Градоначалникот се осврна и на состојбата што ја затекнал во градот, посочувајќи дека веќе се водат повеќе контроли и проверки од надлежни институции.

– Во моментов има ревизија, а финансиската полиција и други институции работат на одредени предмети во Град Скопје. Верувам дека ќе има одговорност – рече тој.

Во делот на комуналната хигиена, Ѓорѓиевски информираше дека е завршена постапката за набавка на 40 нови камиони, дел од нив цистерни за миење улици.

Тој најави и нов систем за управување со отпад преку претоварни станици, со кој, како што рече, ќе се намали потребата камионите да патуваат директно до депонијата Дрисла.

– Отпадот од помалите камиони ќе се претоварува во поголеми, кои потоа ќе одат до Дрисла – појасни градоначалникот.

Според него, се работи и на набавка на околу 2.600 нови контејнери, што треба да придонесе за подобрување на хигиената во градот.

Градоначалникот повтори дека дивата депонија Вардариште ќе биде претворена во парк, а веќе започнало чистење на теренот.

– Стојам зад тоа дека Вардариште ќе стане парк. Почнавме со чистење на површинскиот отпад – рече тој.

Ѓорѓиевски се осврна и на жичарата на Водно, која моментално не работи, објаснувајќи дека е направена детална техничка проверка поради безбедносни причини.

Според него, утврдени се технички проблеми кај дел од сензорите, а системот е доведен во фаза на ремонт.

Во однос на луна паркот, градоначалникот информираше дека е избран изведувач и дека проектот треба да биде завршен во текот на следната година.

The post РЕОБЈАВЕН ТЕНДЕРОТ ЗА 100 АВТОБУСИ Градот влегува во нова фаза на јавен превоз appeared first on plusinfo.mk.

Јавното претпријатие Комунална хигиена Скопје викендов започна со сезонското машинско миење на булеварите и поголемите скопски улици, со употреба на автоцистерни. Машинското миење се реализира со цел одржување на највисокото ниво на хигиената и чистотата на јавните и сообраќајните површини во градот и значително придонесува за намалување на загадувањето на амбиенталниот воздух. Активностите ќе се одвиваат во доцните вечерни часови, кога е намалена фреквенцијата на возила и пешаци на улиците.

Во текот на изминатиов викенд, непознати сторители опожариле четири сада за одлагање отпад лоцирани на улицата Невена Георгиева-Дуња, во скопската општина Кисела Вода. Сите опожарени контејнери се целосно уништени и неупотребливи. Со цел да не се наруши динамиката на одлагање, собирање и транспорт на комуналниот отпад, ЈП Комунална хигиена во најкус можен рок опожарените садови ги замени со нови.

Во текот на 2025 година биле запалени вкупно 27 садови наменети за одлагање на комуналниот отпад, додека само од почетокот на годинава се опожарени 11 контејнери.

The post КОМУНАЛНА ХИГИЕНА ПОЧНА СО МАШИНСКО МИЕЊЕ НА СКОПСКИТЕ УЛИЦИ Лани биле запалени 27 контејнери, годинава 11 appeared first on plusinfo.mk.

Екипите на ЈП Комунална хигиена-Скопје расчистија две големи диви депонии на територијата на Скопје, на булеварот Никола Карев и во Старата скопска чаршија.

Првата интервенција била кај пресекот со улицата Максут Садик, веднаш до детско игралиште, каде што оваа локација подолго време важи за „црна точка“. Таму биле отстранети околу 25 кубни метри мешан комунален и кабаст отпад, по што просторот бил темелно измиен со автоцистерна.

Втората акција се реализирала во Чаршијата, во непосредна близина на Куршумли ан, каде што биле подигнати уште 20 кубни метри отпад, меѓу кои и градинарски и кабаст материјал.

Од претпријатието велат дека ваквите интервенции се сѐ почести поради несовесното однесување на граѓаните.

„Секојдневно се соочуваме со нови диви депонии. Апелираме до граѓаните да не фрлаат отпад на јавни површини, бидејќи со тоа директно ја загрозуваат животната средина и здравјето на сите“, велат од ЈП Комунална хигиена-Скопје.

Само во текот на изминатата недела, службите на претпријатието подигнале дури 575 кубни метри отпад од диви депонии низ градот.

The post ЧАРШИЈАТА И ПЛАСТИЧАРСКА РАСЧИСТЕНИ ОД ЃУБРЕ Несовесни граѓани прават депонии, реагираат од Комунална appeared first on plusinfo.mk.

Градоначалникот на Скопје, Орце Ѓорѓиевски, информира дека на територијата на градот започна широка и координирана пролетна акција за генерално чистење, со цел унапредување на јавната хигиена и заштита на животната средина.

Акцијата стартуваше во општината Кисела Вода, а во неа се вклучени екипи од повеќе јавни претпријатија. Од „Комунална хигиена“ интензивно ги чистат улиците и го отстрануваат отпадот, вклучително и неправилно одложениот смет. „Водовод и канализација“ спроведува перење на улиците и јавните површини, додека „Паркови и зеленило“ работи на уредување и одржување на зелените површини. Воедно, „Улици и патишта“ поставува метални столпчиња со цел спречување на узурпација на тротоарите и јавниот простор.

Градоначалникот Ѓорѓиевски истакна дека акцијата претставува почеток на нов пристап кон одржувањето на градот, каде редот, чистотата и одговорноста ќе станат секојдневие.

– Чистата животна средина не е луксуз, туку основно право на секој граѓанин. Градот може да чисти, но вистинската промена доаѓа кога сите заедно ќе ја преземеме одговорноста – порача градоначалникот.

Од Градот најавуваат дека акцијата ќе продолжи со засилено темпо и во наредниот период, а за непочитување на правилата ќе следуваат соодветни санкции. Граѓаните се повикуваат да придонесат со одговорно однесување, да го чуваат јавниот простор и да не фрлаат отпад на несоодветни места.

„Нашата цел е да создадеме почиста и поуредена урбана средина, а грижата за животната средина и подобрувањето на квалитетот на живеење остануваат врвен приоритет во работењето на Град Скопје,“ истакнуваат од градската администрација.

The post ГОЛЕМА ПРОЛЕТНА АКЦИЈА ВО СКОПЈЕ Ѓорѓиевски најавува чист град и уредени улици appeared first on plusinfo.mk.

Вработен во Јавното претпријатие „Комунална хигиена Скопје“ нападнал службаник кој извршувал внатрешна контрола во јавното претпријатие.

Полицијата, вчера во 14:50 часот во Скопје, на подрачјето на општина Аеродром, го лишила од слобода Д.С.(40) од Скопје, вработен во Јавното претпријатие „Комунална хигиена Скопје“. Тој бил пријавен дека околу 11:20 часот физички го нападнал Б.К.(48) од Скопје, додека извршувал службени дејствија во својство на внатрешна контрола во јавното претпријатие.

По целосно документирање на случајот ќе следува соодветен поднесок.

The post НАТЕПАЛ СЛУЖБЕНИК ОД ВНАТРЕШНА КОНТРОЛА Приведен вработен во „Комунална хигиена“ appeared first on plusinfo.mk.

Финансова полиција поднесе кривична пријава против поранешниот в.д. директор на ЈП Комунална хигиена Скопје Сабахадин Рустеми, против кого има основано сомнение за сторени повеќе кривични дела и тоа „злоупотреба на службена положба и овластување“, „фалсификување исправа“ и „проневера во службата“ – во обид, склучувајќи договори за интелектуални услуги и јавни набавки со фирми, а со намера да овозможи корист на договорните физички лица во вкупен износ од 68.500 евра.

Управата за финансиска полиција преку соопштение информира дека до Основното јавно обвинителство Скопје поднела кривична пријава против С.Р. во својство на поранешен в.д. директор на ЈП Комунална хигиена Скопје поради постоење основи на сомнение за сторено кривично дело „Злоупотреба на службената положба и овластување“ од член 353 ст.4  и ст.3 вв ст.1 од КЗ на РСМ,  „Фалсификување исправа“ од член 378, ст.1 од КЗ на РСМ и кривично дело „Проневера во службата“ – во обид од член 354 ст.2 в.в ст.1 в.в. член 19 од КЗ на РСМ.

– Пријавениот С.Р. во својство на в.д. директор на ЈП Комунална хигиена Скопје, со намера да ги исцрпи сите предвидени финансиски средства од склучениот Договор за интелектуални услуги со правниот субјект ВЕДА ДООЕЛ Скопје, во текот на 2025 година, два дена пред истекот на важноста на договорот, како и ден пред неговото завршување, во име и за сметка на претпријатието склучил пет договори со физички лица, во вкупен износ од 3.608.708 денари, од кои два фиктивни договора со висока нереална вредност од по 775.000 денари за интелектуални услуги – давање совети, имплементирање нови техники за заштита на животната средина во вкупна вредност од 1.550.000 денари, со лица кои биле негови лични познаници и за кои бил свесен дека немаат никаква експертиза во областа на заштита на животната средина. И покрај тоа што бил свесен дека услугите не се извршени, нема да бидат извршени, ниту постои објективна можност да бидат извршени во времетраење на договорот со авторската агенција, склучил три договори со физички лица во вредност од по 686.236 денари за сметководствени услуги и изготвување годишна сметка во вкупна вредност од 2.058.708 денари, иако бил свесен дека едно од лицата немало никаква експертиза во вршење сметководствени услуги и не е регистрирано како овластен сметководител во Регистарот на овластени сметководители – стои во соопштението од Финансова полиција.

По престанокот на важноста на договорот за интелектуални услуги со правното лице ВЕДА ДООЕЛ Скопје, односно откако пријавениот бил одвратен од намерата да го доврши кривичното дело „Проневера во службата“ од член 354 ст.2 в.в ст.1 од КЗ на РСМ и да ги исплати средствата, поради навремено откривање на делото од страна на Управата за финансиска полиција, спровел нова постапка и склучил нов договор со правниот субјект ЕСИ СОЛУШН ДООЕЛ Скопје за интелектуални услуги, преку кој склучил договор со трето лице и ангажирал возило (камион) за собирање смет, потпишал патни налози и исплатил 604.461 денари спрема авторската агенција.

Според овие дејствија, Финансова полиција смета дека постои основано сомнение дека пријавениот постапил спротивно на член 40 и член 41 од Законот за јавни набавки (Службен весник на РМ бр.24/19 и бр.87/21) и спротивно на утврдените начела на јавните набавки и тоа: начело на економичност, ефикасност и ефективност на користењето јавни средства, начело на конкуренција помеѓу економските оператори, начело на транспарентност, начело на еднаков третман и недискриминација на економските оператори и начело на сразмерност, предвидени во членовите 4-8 во ЗЈН, односно склучил фиктивни договори и договори без да биде спроведена јавна набавка, на кој начин ги сторил кривичните дела „Злоупотреба на службената положба и овластување“,  „Фалсификување исправа“ и „Проневера во службата“– во обид, а со намера да овозможи корист на договорните физички лица во вкупен износ од 4.213.169 денари.

Рустеми од октомври минатата година се наоѓа во притвор, откако против него и уште едно лице беше отворен кривичен предмет, поради основано сомнение за сторено дело „Загрозување на животната средина и природата со отпад“ од член 230 став 1 од Кривичниот законик. Според обвинителството, осомничените постапиле спротивно на Законот за управување со отпад и на обврските од Оперативната програма за собирање и транспортирање комунален отпад, што резултирало со создавање мали депонии на јавни и сообраќајни површини во Скопје. 

The post ЕКСДИРЕКТОРОТ НА КОМУНАЛНА ДАЛ 68.500 ЕВРА ЗА ФИКТИВНИ ИНТЕЛЕКТУАЛНИ УСЛУГИ Склучувал договори со познаници кои немале никаква експертиза appeared first on plusinfo.mk.

Град Скопје нема да дозволи да се продолжат практиките од минатото со кои биле системски уништувани јавни претпријатија, вели градоначалникот Орце Ѓорѓиевски.

Тој откри дека во тек е акција во која се откриваат низа недоследности кај правни субјекти како загуба од 1,5 милиони евра во Комунална хигиена поради невпишани површини за наплата на ѓубретарина и големи загуби во Водовод и Канализација поради, како што вели, сериозни злоупотреби со вода и со водомери.

– Тоа претпоставувате од какви причини е направено. Нема да може така. Сега ќе има електронска база на точни податоци која ја вкрстуваме со Катастар. Секој обид да се направи таква работа во перспектива ќе биде строго санкциониран – изјави Ѓорѓиевски пред новинарите давајќи детали.

Зборувајќи за минати состојби во Комунална Хигиена градоначалникот изјави:

– Пример, над 130.000 квадратни метри сех впишани површини, површини кои, за мене и колегите од непознати причини, во минатото не биле опфатени во пресметките за наплата на ѓубретарина. Тоа се над 1,5 милиони евра загубен приход месечно на претпријaтието.

Ѓорѓеивски вели дека се работи за објекти од индустриска зона.

– И тоа како се спроведувало? Имало индустриска зона. Процена си направил некој во минатото дека на 5 објекти треба да им се пресмета целата површина за наплата, aма на некои требало помалку од што треба да им се пресмета.

Потоа градоначалнкот се осврна на злоупотреби на вода и ненаплата на сметки за водовод.

– Кога сме кај ЈП Водовод и канализација во тек е акција кај многу правни субјекти каде што има сериозна злоупотреба на вода, дупли водомери се поставувани во минатото, каде што не се регулирала состојбата како што треба и тоа се должи исто така на дел од генерираните загуби на претпријатието. Дел се должат на односите поврзани и со закоченоста на пречистителната станица каде што имаме сериозно придвижување напред, но и со на наплатата на сметки.

Ѓорѓиевски апелира дека Градот нема да дозволи состојба во којашто застаруваат долгови.

– Знаете и самите, тоа е состојба во која свесно го носите во колапс некое претпријатие или целиот град. Некој го дозволувал тоа во минатото.

The post СЕ ПРАВЕЛЕ МИЛИОНСКИ ДОЛГОВИ ВО ПРЕТПРИЈАТИЈА СО НЕВПИШАНИ КВАДРАТИ И ДУПЛИ ВОДОМЕРИ Град Скопје нема да дозволи да се повтори минатото appeared first on plusinfo.mk.

Град Скопје започнува со најголема инвестиција во јавната чистота во последната деценија, откако е распишана постапка за набавка на повеќе од 40 нови специјализирани возила за ЈП Комунална хигиена.

Градоначалникот Орце Ѓорѓиевски информира дека тендерската постапка ја спроведува Министерството за транспорт во соработка со Светска банка, а по завршување на сите правни процедури ќе започне и испораката на возилата.

– Ова е убава вест за Скопје. Како што ветив кога ја барав довербата од граѓаните, најдоброто за нашиот град допрва доаѓа. Официјално започна постапката за набавка на специјализирани возила кои ќе донесат ред и достоинство во јавната чистота – изјави Ѓорѓиевски.

Паралелно со оваа постапка, на денешната седница на Советот на Град Скопје ќе се усвои и програмата за Комунална хигиена, со која градот од сопствени средства ќе обезбеди уште повеќе од десет нови камиони.

Според градоначалникот, тоа значи дека во функција ќе бидат ставени над 40 современи возила кои секојдневно ќе се грижат за чистотата низ сите скопски населби.

– Ова е најголемата инвестиција во јавната чистота во последните десет години. Само за споредба – за помалку од три месеци од мојот мандат набавуваме повеќе од 40 возила, додека во претходните осум години биле набавени само четири – истакна Ѓорѓиевски.

Тој најави дека процесот на обновување на возниот парк на Комунална хигиена нема да застане тука и дека набавката на нови возила ќе продолжи континуирано.

– Проблемот со отпадот, кој со години ги мачеше скопјани, оди во историјата. Градот ќе располага со доволен број современи возила за навремено и организирано покривање на секоја улица, затоа што чист град значи здрав град, а здрав град, подобар живот за сите – порача градоначалникот.

Ѓорѓиевски упати благодарност и до премиерот Христијан Мицкоски и министерот за транспорт Александар Николоски за, како што рече, силната поддршка и грижата за граѓаните.

The post НАД 40 НОВИ КАМИОНИ ЗА ЧИСТ ГРАД Ѓорѓиевски најави крај на хаосот со отпадот appeared first on plusinfo.mk.

Во текот на декември 2025 година, ЈП Комунална хигиена-Скопје подигна и транспортираше вкупно 13.000 тони комунален отпад од кантите во индивидуалните домувања и од контејнерите поставени на јавни површини на територијата на градот Скопје.

Екипите на претпријатието отстранија и 2.200 кубни метри претежно кабаст и градежен отпад од диви депонии лоцирани во сите скопски општини.

Во текот на последниот месец од минатата година, Еко-патролата на ЈП Комунална хигиена-Скопје реализираше голем број едукативни разговори со претставници на стопанските субјекти, како и со лица коишто биле затекнати при неправилно одлагање на отпад, при што се изготвени 225 записници. Најголем број на записници, вкупно 85, се врачени во скопската општина Kарпош.

The post ВО ДЕКЕМВРИ СОБРАНИ 13.000 ТОНИ ЃУБРЕ Од диви депонии отстранети 2.200 тони градежен шут appeared first on plusinfo.mk.