Извештајот и работата на Советот на јавните обвинители го критикуваа и пратениците од Коалицијата Вреди.

Претседател на Комисијата Љупчо Пренџов ѝ порача на претседателката на Советот Душица Димитриевска дека огромното мнозинство граѓани очекуваат оставки од членовите на ова тело и дека е срамно е на ваков рејтинг во правосудството никој да не поднесе оставка.

– Немате авторитет и капацитет да воспоставите јавнообвинителски систем, рече Пренџов.

Тој најави дека пратеничката група на ВМРО-ДПМНЕ негативно ќе го оцени нивниот Годишен извештај.

Антонио Милошоски рече дека за кадрите во правосудството има и политичка одговорност, потсетувајќи на случајот со Изет Меџити, кој поднесе оставка од Советот на јавни обвинители, откако беше обвинет за подмитуање заедно со поранешниот врховен судија Наќе Георгиев и призна вина во спогодба со Обвинителството.

– За Мемети да стане член на Советот на јавни обвинители се гласаше во Собранието со 61 глас. Се чудевме зошто најмалку на десет дена доаѓаше да се консултира со поранешниот претседател на Собранието Талат Џафери. Мемети беше 16 години Народен правобранител, а беше и министер за правда и адвокат. Видовме со што се занимавал. Со продажба на правда за пари – рече Милошоски.

Пратеникот додаде дека е неоправдано молчењето на обвинителите доколку се сомневаат во некој нивен колега.

– Не е срамно да се поднесе оставка, која не мора да значи признавање вина, туку аларм или коректив нешто да се промени – им порача Милошоски на членовите на обвинителскиот совет.

Беким Ќоку од Коалицијата Вреди рече дека нема да дадат зелено светло за годишиот извештајот на Советот. Тој постави низа прашања поврзани со случаи во кои се вмешани членови на ДУИ, како струшкиот градоначалник Рамиз Мерко и други.

Претседателката на Советот на јавниот обвинител Димитриевска, која го презентрираше извештајот пред Комисијата посочи дека им недостигаат обвинители и оцени дека се постигнати значителни резултати во работењето. Таа рече дека во документот се наведени и случаите во кои тие постапувале.

– Советот на јавни обвинители нема овластување да врши директен и непосреден надзор во постапувањето на јавните обвинители во јавните обвинителства, тоа е исклучива надлежност на повисоките јавни обвинителства. Оценувањето на квалитетот и законитоста во работењето на обвинителите го врши Јавниот обвинител на соодветното обвинителство, а Советот одлучува по вложениот приговор на добиената оцена, што значи дека Советот, исто како и во дисциплинските постапки, и во овие случаи постапува како второстепен орган по вложените жалби – истакна Димитриевска.

Советот на јавни обвинители, како што истакна таа, смета дека е потребно да се извршат одредени измени и дополнувања во Законот за јавното обвинителство и во Законот за Советот на јавните обвинители, во насока да се даде поголема автономија на Советот за следење на работата на јавните обвинители, во смисла на законитоста и ажурноста на нивното постапување, без притоа да се наруши самостојноста и независноста на секој јавен обвинител во делот на донесувањето на јавно обвинителските одлуки.

The post НЕ ПОМИНУВААТ ФАЛБИТЕ НА ОБВИНИТЕЛИТЕ ПРЕД ПРАТЕНИЦИТЕ Се бараат оставки од целиот Совет на јавни обвинители appeared first on plusinfo.mk.

Ова во разговор за Плусинфо го вели пратеникот од редовите на ВМРО-ДПМНЕ, Антонио Милошоски, кој тврди дека приказната за пресудата од Стразбур е измислена приказна.

Не постои взаемна усогласеност за тоа што точно треба да содржи овој закон. Сите пратеници од опозицијата гласаа за да се симне предлог-законот од дневен ред, а кон нив се приклучија и еден пратеник од Алтернатива и еден пратеник од Турската демократска партија.

Антонио Милошоски Пратеник, ВМРО-ДПМНЕ

– Нема шанси да има вистина во приказната што синоќа ја раскажа вицепремиерот Артан Груби за тоа дека против Македонија има пресуда од Судот за човекови права во Стразбур. Дури да е така, сигурен сум дека вицепремиерот не дознал за пресудата непосредно пред да влезе во емисија во ТВ21. Тој морал да знае за пресудата неколку месеци наназад. Дефинитивно се работи за најобичен изговор, односно за обид како да се упати спин во јавноста, бидејќи и самиот Груби го знаеше исходот од денешната Комисија за политички систем – објаснува Милошоски.

Тој вели дека предлог-законот за матична евиденција не бил доволно усогласен, а тоа се гледало и по самото гласање на Комисијата за политички систем и односи меѓу заедниците, на којашто и пратениците од владејачката коалиција гласале за да се тргне од дневен ред.

– И во други земји-членки на Европската Унија има закони кои им дозволуваат на луѓето да го променат својот пол, ама тоа не е европска регулатива. Една норма си има Полска, друга норма си има Малта, трета норма има Шведска, четврта норма има Португалија. Нема усогласеност, а европска регулатива е ако секаде важат истите правила. Токму затоа предлог-законот за матична евиденција не може да биде со европско знаменце. И таму каде што има вакви закони, постојат многу сериозни процедури. Колку што сум јас запознаен со работите, пред да му се овозможи на човек да го смени полот, потребно е да посети ендокринолог, да прима хормонска терапија и задолжително да посетува психолог. Тоа е процедура за да се избегнат злоупотреби на законското решение. Оти вака, со изјава на нотар, денеска си маж, утре даваш изјава на нотар, а задутре играш за женската фудбалска репрезентација. Нема логика. Законот е многу површен и паушален. Всушност, недостатоците на законското решение излегоа на виделина и за време на Комисијата за политички систем, на којашто и пратениците од власта гласаа за да се симне предлог-законот од дневен ред. Едноставно, не постои взаемна усогласеност за тоа што точно треба да содржи овој закон. Сите пратеници од опозицијата гласаа за да се симне предлог-законот од дневен ред, а кон нив се приклучија и еден пратеник од Алтернатива и еден пратеник од Турската демократска партија. Сите други пратеници од власта беа воздржани – објаснува Милошоски.

Неговата сопартијка и колешка, Иванка Василевска, пак, бара од СДСМ да ја соопштат вистинската причина за повлекување на предлог-законот за матична евиденција.

– Со вчерашната најава дека овој предлог-закон ќе биде повлечен, владата уште еднаш демонстира неединство помеѓу коалициските партии во власта. Па затоа прашувам: На какви нозе стои тесното парламентарно мнозинство? Како и во многу наврати досега, владата го злоупотреби европското знаменце бидејќи и овој Закон беше испратен со европското знаменце до Собранието, иако не се повикуваше на никаква европска легислатива, со што дополнително го загрози угледот на македонската држава во меѓународните организации. Бараме од СДСМ да одговорат на прашањето која е вистинската причина за повлекувањето на овој скандалозен закон и дали истиот закон имаше владина поддршка од сите политички партии кои се дел од власта? До кога ќе бидеме заложници на социјални експерименти кои го уништуваат и духовно и ментално цивилизираниот општествен поредок? – прашува пратеничката Василевска.

Став за ова прашање побаравме и од портпаролот на СДСМ, Дарко Каевски, кој образложи зошто Владата го повлекла предлог-законот за матична евиденција.

– Владата го повлече предлог-законот затоа што тој треба да се доработи и да се усогласи со одредени регулативи. И Владата има свое образложение и во текот на денот ќе испрати соопштение до јавноста во кое ќе биде наведена точната причина за повлекување на предлог-законот. Во поглед на расположението кај коалициските партнери и нивниот став околу ваквото законско решение, засега можам да кажам дека сѐ уште не сме разговарале на оваа тема и дека ќе разговараме кога ќе дојде време. Односно, кога предлог-законот ќе биде доработен и ќе биде онака како што треба да биде, тогаш сериозно ќе разговараме и ќе дебатираме со дел од политичките партии од владејачката коалиција – ни изјави Каевски.

Инаку, дека не постои расположение за да се изгласа ваков закон се забележа и во текот на минатата недела кога пратениците од владината коалиција, но и од опозицијата, јасно дадоа до знаење дека се против предлог-законот на Владата.

Предлогот на Владата предвидуваше правно признавање на родот со постапка во која поединец може да ја промени ознаката за пол во матичната евиденција и така да се признае родовиот идентитет. Постапката предвидуваше само поднесување барање до Управата за водење матични книги без доставување докази за хируршката процедура за промена на полот. Барањето за правно признавање на родот се поднесува на образец, чија форма, содржина и начин на негово издавање ги пропишува министерот за правда. Притоа, кон барањето се доставува копија од лична карта на барателот за правно признавање на родот, пишува во предлог-законот.

The post ЗОШТО ВЛАДАТА ГО ПОВЛЕЧЕ ЗАКОНОТ ЗА ПРОМЕНА НА ПОЛОТ? Поради пресуда во Стразбур сигурно не! appeared first on plusinfo.mk.

Предлог-законот на седницата помина без расправа и беше даден на натамошно постапување.

Како што образложи повереникот од Министерството за внатрешни работи Весна Доревска, со измените и дополнувањата на Законот се врши усогласување со одредби од Законот за употреба на јазиците, како и усогласување со Уставниот закон за спроведување на амандманите од XXXIII до XXXVI на Уставот на Република Македонија.

Имено, со донесувањето на Законот за употреба на јазиците, меѓу другите обврски кои произлегуваат од него, се наметна и потребата од усогласување на обрасците за личните документи на граѓаните што ги издава Министерството за внатрешни работи. За патните исправи како личен документ на граѓаните,се врши усогласување во делот на начинот на печатење на обрасците за патните исправи и начинот на запишување на податоците во нив, со цел сеопфатно усогласување на постојното законско решение со законското решение предвидено во Законот за употреба на јазиците, како во делот на законската имплементација на јазиците на сите етнички заедници во државата, така и во терминолошкото дефинирање на различните категории на граѓани од етничките заедници, на начин кој е утврден во Законот за употреба на јазиците.

Покрај наведеното, предвидено е и усогласување на Законот со Амандманот XXXIII од Уставот на Република Северна Македонија, од аспект на рокот на замена на постојните патни исправи кои го содржат натписот ,,Република Македонија“ со патни исправи со новото уставно име на државата, запазувајќи го рокот предвиден во членот 3 од Уставниот закон за спроведување на Амандманите од XXXIII до XXXVI на Уставот, односно пет години од стапувањето во сила на уставните измени.

Обрасците на патните исправи и на визите, се посочува, се печатат на македонски јазик и неговото кирилско писмо, со превод на англиски и француски јазик и нивното писмо. Податоците кои се внесуваат во патната исправа се запишуваат на македонски јазик и неговото кирилско писмо и на основно латинично писмо, освен интернационалните ознаки (кодови), што се запишуваат согласно со утврдените меѓународни стандарди.

Обрасците на патните исправи на граѓаните кои зборуваат службен јазик различен од македонскиот јазик што го зборуваат најмалку 20 проценти од граѓаните на Република Северна Македонија, по службена должност се печатат и податоците во нив се запишуваат и на јазикот и писмото што го употребува граѓанинот. Обрасците на патните исправи на граѓаните кои зборуваат јазик различен од македонскиот што го зборуваат помалку од 20 проценти од граѓаните на Република Северна Македонија, на нивно барање, се печатат и на јазикот и писмото што го употребува граѓанинот. На нивно лично барање, податоците што се внесуваат во патната исправа се запишуваат и на јазикот и писмото што го употребува граѓанинот. Исто така, на нивно лично барање податоците за личното име што се внесуваат во патната исправа се запишуваат и на јазикот и писмото што го употребува граѓанинот, стои во Предлог законот.

Предлог законот содржи преодна одредба која предвидува дека патните исправи кои го содржат натписот „Република Македонија“ издадени до денот на отпочнување на примената на овој закон, ќе важат до рокот на важење кој е наведен во патната исправа, но не подолго од 12 февруари 2024 година. Предложената измена е во насока на усогласување на законот со рокот предвиден во член 3 од Уставниот закон за спроведување на Амандманите од XXXIII до XXXVI на Уставот на Република Македонија односно пет години од стапувањето во сила на уставните измени. Законот, според предлогот, треба да влезе во сила осмиот ден од денот на објавувањето во „Службен весник на Република Северна  Македонија“, а ќе почне да се применува од 1 јули 2021 година

The post Од први јули нови пасоши со „Северна“ appeared first on plusinfo.mk.